सर्गः १४
The March of the Gods' Army
॥
A canto of Kalidasa's Kumarasambhava.
51 verses·Sanskrit with transliteration
रणोत्सुकेनान्धकशत्रुसूनुना समं प्रयुक्तैस्त्रिदशैर्जिगीषुणा ।
महासुरं तारकसंज्ञकं द्विषं प्रसह्य हन्तुं समनह्यत द्रुतम् ॥ १ ॥
raṇotsukenāndhakaśatrusūnunā samaṃ prayuktaistridaśairjigīṣuṇā |
mahāsuraṃ tārakasaṃjñakaṃ dviṣaṃ prasahya hantuṃ samanahyata drutam || 1 ||
स दुर्निवारं मनसोऽतिवेगिनं जयश्रियः संनयनं सुदुःसहम् ।
विजित्वरं नाम तदा महारथं धनुर्धरः शक्तिधरोऽध्यरोहयत् ॥ २ ॥
sa durnivāraṃ manaso'tiveginaṃ jayaśriyaḥ saṃnayanaṃ suduḥsaham |
vijitvaraṃ nāma tadā mahārathaṃ dhanurdharaḥ śaktidharo'dhyarohayat || 2 ||
सुरालयश्रीविपदां निवारणं सुरारिसंपत्परितापकारणम् ।
केनापि दध्रेऽस्य विरोधिदारणं सुचारु चामीकरघर्मवारणम् ॥ ३ ॥
surālayaśrīvipadāṃ nivāraṇaṃ surārisaṃpatparitāpakāraṇam |
kenāpi dadhre'sya virodhidāraṇaṃ sucāru cāmīkaragharmavāraṇam || 3 ||
शरच्चरच्चन्द्रमरीचिपाण्डुरैः संवीज्यमानो वरचारुचामरैः ।
पुरःसरैः किंनरसिद्धचारणै रणेच्छुरस्तूयत वाग्भिरुल्बणैः ॥ ४ ॥
śaraccaraccandramarīcipāṇḍuraiḥ saṃvījyamāno varacārucāmaraiḥ |
puraḥsaraiḥ kiṃnarasiddhacāraṇai raṇecchurastūyata vāgbhirulbaṇaiḥ || 4 ||
प्रयाणकालोचितचारुवेषभृद्वज्रं वहन्पर्वतपक्षदारणम् ।
ऐरावतं स्फाटिकशैलसोदरं ततोऽधिरुह्य द्युपतिस्तमन्वगात् ॥ ५ ॥
prayāṇakālocitacāruveṣabhṛdvajraṃ vahanparvatapakṣadāraṇam |
airāvataṃ sphāṭikaśailasodaraṃ tato'dhiruhya dyupatistamanvagāt || 5 ||
तमन्वगच्छद् गिरिश्रृङ्गसोदरं मदोद्धतं मेषमधिष्ठितः शिखी ।
विरोधिविद्वेषरुषाधिकं ज्वलन्महो महीयस्तरमायुधं दधत् ॥ ६ ॥
tamanvagacchad giriśrṛṅgasodaraṃ madoddhataṃ meṣamadhiṣṭhitaḥ śikhī |
virodhividveṣaruṣādhikaṃ jvalanmaho mahīyastaramāyudhaṃ dadhat || 6 ||
अथेन्द्रनीलाचलचण्डविग्रहं विषाणविध्वस्तमहापयोधरम् ।
अधिष्ठितः कासरमुद्धरं मुदा वैरस्वतो दण्डधरस्तमन्वगात् ॥ ७ ॥
athendranīlācalacaṇḍavigrahaṃ viṣāṇavidhvastamahāpayodharam |
adhiṣṭhitaḥ kāsaramuddharaṃ mudā vairasvato daṇḍadharastamanvagāt || 7 ||
मदोद्धतं प्रेतमथाधिरुढवांस्तमन्धकद्वेषितनूजमन्वगात् ।
महासुरद्वेषविशेषभीषणः सुरोषणश्चण्डरणाय नैर्ऋतः ॥ ८ ॥
madoddhataṃ pretamathādhiruḍhavāṃstamandhakadveṣitanūjamanvagāt |
mahāsuradveṣaviśeṣabhīṣaṇaḥ suroṣaṇaścaṇḍaraṇāya nairṛtaḥ || 8 ||
नवोद्यदम्भोधरघोरदर्शने युद्धाय रुढो मकरे महत्तरे ।
दुर्वारपाशो वरुणो रणोल्बणस्तमन्वियाय त्रिपुरान्तकात्मजम् ॥ ९ ॥
navodyadambhodharaghoradarśane yuddhāya ruḍho makare mahattare |
durvārapāśo varuṇo raṇolbaṇastamanviyāya tripurāntakātmajam || 9 ||
दिगम्बराधिक्रमणोल्बणं क्षणान्मृगं महीयांसमरुद्धविक्रमम् ।
अधिष्ठितः सङ्गरकेलिलालसो मरुन्महेशात्मजमन्वगाद् द्रुतम् ॥ १० ॥
digambarādhikramaṇolbaṇaṃ kṣaṇānmṛgaṃ mahīyāṃsamaruddhavikramam |
adhiṣṭhitaḥ saṅgarakelilālaso marunmaheśātmajamanvagād drutam || 10 ||
विरोधिनां शोणितपारणैषिणीं गदामनूनां नरवाहनो वहन् ।
महाहवाम्भोधि विगाहनोद्धतं यियासु मन्वागमदीशनन्दनम् ॥ ११ ॥
virodhināṃ śoṇitapāraṇaiṣiṇīṃ gadāmanūnāṃ naravāhano vahan |
mahāhavāmbhodhi vigāhanoddhataṃ yiyāsu manvāgamadīśanandanam || 11 ||
महाहिनिर्बद्धजटाकलापिनो ज्वलत्त्रिशूलप्रबलायुधा युधे ।
रुद्रास्तुषाराद्रिसखं महावृषं ततोऽधिरुढास्तमयुः िुनाकिनः ॥ १२ ॥
mahāhinirbaddhajaṭākalāpino jvalattriśūlaprabalāyudhā yudhe |
rudrāstuṣārādrisakhaṃ mahāvṛṣaṃ tato'dhiruḍhāstamayuḥ iunākinaḥ || 12 ||
अन्येऽपि संनह्य मदारणोत्सवश्रद्धालवः स्वर्गिगणास्तमन्वयुः ।
स्ववाहनानि प्रबलान्यधिष्ठिताः प्रमोदविस्मेरमुखाम्बुजश्रियः ॥ १३ ॥
anye'pi saṃnahya madāraṇotsavaśraddhālavaḥ svargigaṇāstamanvayuḥ |
svavāhanāni prabalānyadhiṣṭhitāḥ pramodavismeramukhāmbujaśriyaḥ || 13 ||
उद्दण्डहेमध्वजदण्डसंकुलाश्चञ्चद्विचित्रातपवारणोज्ज्वलाः ।
चलद्धनस्यन्दनघोषभीषणाः करीन्द्रघण्टारवचण्डचीत्कृताः ॥ १४ ॥
uddaṇḍahemadhvajadaṇḍasaṃkulāścañcadvicitrātapavāraṇojjvalāḥ |
caladdhanasyandanaghoṣabhīṣaṇāḥ karīndraghaṇṭāravacaṇḍacītkṛtāḥ || 14 ||
स्फुरद्विचित्रायुधकान्तिमण्डलैरुद्द्योतिताशावलयाम्बरान्तराः ।
दिवौकसां सोऽनुवहन्महाचमूः पिनाकपाणेस्तनयस्ततो ययौ ॥ १५ ॥
sphuradvicitrāyudhakāntimaṇḍalairuddyotitāśāvalayāmbarāntarāḥ |
divaukasāṃ so'nuvahanmahācamūḥ pinākapāṇestanayastato yayau || 15 ||
कोलाहलेनोच्चलतां दिवौकसां महाचमूनां गुरुभिर्ध्वजव्रजैः ।
घनैर्निरुच्छ्वासमभूदनन्तरं दिङ्मण्डलं व्योमतलं महीतलम् ॥ १६ ॥
kolāhalenoccalatāṃ divaukasāṃ mahācamūnāṃ gurubhirdhvajavrajaiḥ |
ghanairnirucchvāsamabhūdanantaraṃ diṅmaṇḍalaṃ vyomatalaṃ mahītalam || 16 ||
सुरारिलक्ष्मीपरिकम्पहेतवो दिक्चक्रवालप्रतिनादमेदुराः ।
नभोन्तकुक्षिंभरयो घनाः स्वना निहन्यमानैः पटहैर्वितेनिरे ॥ १७ ॥
surārilakṣmīparikampahetavo dikcakravālapratinādamedurāḥ |
nabhontakukṣiṃbharayo ghanāḥ svanā nihanyamānaiḥ paṭahairvitenire || 17 ||
प्रमथ्यमानाम्बुधिगर्जतर्जनैः सुरारिनारीगणगर्भपातनैः ।
नभश्चमूधूलिकुलैरिवाकुलं ररास गाढं पटहप्रतिस्वनैः ॥ १८ ॥
pramathyamānāmbudhigarjatarjanaiḥ surārinārīgaṇagarbhapātanaiḥ |
nabhaścamūdhūlikulairivākulaṃ rarāsa gāḍhaṃ paṭahapratisvanaiḥ || 18 ||
क्षुण्णं रथैर्वाजिभिराहतं खुरैः करीन्द्रकर्णैः परितः प्रसारितम् ।
धूतं ध्वजैः काञ्चनशैलजं रजो वातैर्हतं व्याम समारुहत्क्रमात् ॥ १९ ॥
kṣuṇṇaṃ rathairvājibhirāhataṃ khuraiḥ karīndrakarṇaiḥ paritaḥ prasāritam |
dhūtaṃ dhvajaiḥ kāñcanaśailajaṃ rajo vātairhataṃ vyāma samāruhatkramāt || 19 ||
खातं खुरै रथ्यतुरङ्गपुंगवै रुपत्यकाहाटकमेदिनीरजः ।
गतं दिगन्तान्मुखरैः समीरणैः सुविभ्रमं भूरि बभार भूयसा ॥ २० ॥
khātaṃ khurai rathyaturaṅgapuṃgavai rupatyakāhāṭakamedinīrajaḥ |
gataṃ digantānmukharaiḥ samīraṇaiḥ suvibhramaṃ bhūri babhāra bhūyasā || 20 ||
अधस्तथोर्ध्वं पुरतोऽथ पृष्ठतोऽभितोऽपि चामीकररेणुरुच्चकैः ।
चमूषु सर्पन्मरुदाहतोऽहरन्नवीनसूर्यस्य च कान्तिवैभवम् ॥ २१ ॥
adhastathordhvaṃ purato'tha pṛṣṭhato'bhito'pi cāmīkarareṇuruccakaiḥ |
camūṣu sarpanmarudāhato'harannavīnasūryasya ca kāntivaibhavam || 21 ||
बलोद्धृतं काञ्चनभूमिजं रजो बभौ दिगन्तेषु नभःस्थले स्थितम् ।
अकालसन्ध्याघनरागपिङ्गलं घनं घनानामिव वृन्दमुद्यतम् ॥ २२ ॥
baloddhṛtaṃ kāñcanabhūmijaṃ rajo babhau diganteṣu nabhaḥsthale sthitam |
akālasandhyāghanarāgapiṅgalaṃ ghanaṃ ghanānāmiva vṛndamudyatam || 22 ||
हेमावनीषु प्रतिबिम्बमात्मनो मुहुर्विलोक्याभिमुखं महागजाः ।
रसातलोत्तीर्णगजभ्रमात्क्रुधा दन्तप्रकाण्डप्रहृतानि तेनिरे ॥ २३ ॥
hemāvanīṣu pratibimbamātmano muhurvilokyābhimukhaṃ mahāgajāḥ |
rasātalottīrṇagajabhramātkrudhā dantaprakāṇḍaprahṛtāni tenire || 23 ||
सुजातसिन्दूरपरागपिञ्जरैः कलं चलद्भिः सुरसैन्यसिन्धुरैः ।
शुद्धासु चामीकरशैलभूमिषु नादृश्यत स्वं प्रतिबिम्बमग्रतः ॥ २४ ॥
sujātasindūraparāgapiñjaraiḥ kalaṃ caladbhiḥ surasainyasindhuraiḥ |
śuddhāsu cāmīkaraśailabhūmiṣu nādṛśyata svaṃ pratibimbamagrataḥ || 24 ||
इति क्रमेणामरराजवाहिनी महाहवाम्भोधिविलासलालसा ।
अवातरत्काञ्चनशैलतो द्रुतं कोलाहलाक्रान्तविधूतकन्दरा ॥ २५ ॥
iti krameṇāmararājavāhinī mahāhavāmbhodhivilāsalālasā |
avātaratkāñcanaśailato drutaṃ kolāhalākrāntavidhūtakandarā || 25 ||
महाचमूस्यन्दनचण्डचीत्कृतैर्विलोलघण्टेभपतेश्च बृंहितैः ।
सुरेन्द्रशैलेन्द्रमहागुहाशयाः सिंहा महत्स्वप्नसुखं न तत्यजुः ॥ २६ ॥
mahācamūsyandanacaṇḍacītkṛtairvilolaghaṇṭebhapateśca bṛṃhitaiḥ |
surendraśailendramahāguhāśayāḥ siṃhā mahatsvapnasukhaṃ na tatyajuḥ || 26 ||
गम्भीरभेरीध्वनितैर्भयंकरैर्महागुहान्तप्रतिनादमेदुरैः ।
महारथानां गुरुनेमिनिस्वनैरनाकुलैस्तैर्मृगराजताजनि ॥ २७ ॥
gambhīrabherīdhvanitairbhayaṃkarairmahāguhāntapratinādameduraiḥ |
mahārathānāṃ guruneminisvanairanākulaistairmṛgarājatājani || 27 ||
समुत्थितेन त्रिदिवौकसां महाचमूरवेणाद्रितटान्तदारिणा ।
प्रपेदिरे केसरिणोऽधिकं मदं स्ववीर्यलक्ष्मीमृगराजतावशात् ॥ २८ ॥
samutthitena tridivaukasāṃ mahācamūraveṇādritaṭāntadāriṇā |
prapedire kesariṇo'dhikaṃ madaṃ svavīryalakṣmīmṛgarājatāvaśāt || 28 ||
भिया सुरानीकविमर्दजन्मना विदुद्रुवुर्दूरतरं द्रुतं मृगाः ।
गुहागृहान्ताद्बहिरेत्य हेलया तस्थुर्विशङ्कं नितरां मृगाधिपाः ॥ २९ ॥
bhiyā surānīkavimardajanmanā vidudruvurdūrataraṃ drutaṃ mṛgāḥ |
guhāgṛhāntādbahiretya helayā tasthurviśaṅkaṃ nitarāṃ mṛgādhipāḥ || 29 ||
विलोकिताः कौतुकिनाऽमरावतीजनेन जुष्टप्रमदेन दूरतः ।
सुराचलप्रान्तभुवः प्रपेदिरे सुविस्तृतायाः प्रसरं सुसैनिकाः ॥ ३० ॥
vilokitāḥ kautukinā'marāvatījanena juṣṭapramadena dūrataḥ |
surācalaprāntabhuvaḥ prapedire suvistṛtāyāḥ prasaraṃ susainikāḥ || 30 ||
पीतासितारक्तसितैः सुराचल प्रान्तस्थितैर्धातुरजोभिरम्बरम् ।
अयत्नगन्धर्वपुरोदयभ्रमं बभार भूम्नोत्पतितैरितस्ततः ॥ ३१ ॥
pītāsitāraktasitaiḥ surācala prāntasthitairdhāturajobhirambaram |
ayatnagandharvapurodayabhramaṃ babhāra bhūmnotpatitairitastataḥ || 31 ||
महास्वनः सैन्यविमर्दसम्भवः कर्णान्तकूलंकषतामुपेयिवान् ।
पयोनिधेः क्षुब्धतरस्य वर्धनो बभूव भूम्ना भुवनोदरम्भरिः ॥ ३२ ॥
mahāsvanaḥ sainyavimardasambhavaḥ karṇāntakūlaṃkaṣatāmupeyivān |
payonidheḥ kṣubdhatarasya vardhano babhūva bhūmnā bhuvanodarambhariḥ || 32 ||
महागजानां गुरुबृंहितैस्ततैः सुहेषितैर्घोरतरैश्च वाजिनाम् ।
घनै रथानां गुरुचण्डचीत्कृतैस्तिरोहितोऽभूत्पटहस्य निःस्वनः ॥ ३३ ॥
mahāgajānāṃ gurubṛṃhitaistataiḥ suheṣitairghorataraiśca vājinām |
ghanai rathānāṃ gurucaṇḍacītkṛtaistirohito'bhūtpaṭahasya niḥsvanaḥ || 33 ||
महासुराणामवरोधयोषितां कचाक्षिपक्ष्मस्तनमण्डलेषु च ।
ध्वजेषु नागेषु रथेषु वाजिषु क्षणेन तस्थौ सुरसैन्यजं रजः ॥ ३४ ॥
mahāsurāṇāmavarodhayoṣitāṃ kacākṣipakṣmastanamaṇḍaleṣu ca |
dhvajeṣu nāgeṣu ratheṣu vājiṣu kṣaṇena tasthau surasainyajaṃ rajaḥ || 34 ||
घनैर्विलोक्य स्थगितार्कमण्डलैश्चमूरजोभिर्निचितं नभःस्थलम् ।
अयायि हंसैरभि मानसं घनभ्रमेण सानन्दमनर्ति केकिभिः ॥ ३५ ॥
ghanairvilokya sthagitārkamaṇḍalaiścamūrajobhirnicitaṃ nabhaḥsthalam |
ayāyi haṃsairabhi mānasaṃ ghanabhrameṇa sānandamanarti kekibhiḥ || 35 ||
सान्द्रैः सुरानीकरजोभिरम्बरे नवाम्बुदानीकनिभैरभिश्रितै ।
चकाशिरे स्वर्णमया महाध्वजाः परिस्फुरन्तस्तडितां गणा इव ॥ ३६ ॥
sāndraiḥ surānīkarajobhirambare navāmbudānīkanibhairabhiśritai |
cakāśire svarṇamayā mahādhvajāḥ parisphurantastaḍitāṃ gaṇā iva || 36 ||
विलोक्य धूलीपटलैर्भृशं भृतं द्यावापृथिव्योरलमन्तरं महत् ।
किमूर्ध्वतोऽधः किमधस्त ऊर्ध्वतो रजोऽभ्युपैतीति जनैरतर्क्यत ॥ ३७ ॥
vilokya dhūlīpaṭalairbhṛśaṃ bhṛtaṃ dyāvāpṛthivyoralamantaraṃ mahat |
kimūrdhvato'dhaḥ kimadhasta ūrdhvato rajo'bhyupaitīti janairatarkyata || 37 ||
नोर्ध्वं न चाधो न पुरो न पृष्ठतो न पार्श्वतोऽभूत्खलु चक्षुषोर्गतिः ।
सूच्यग्रभेद्यैः पृतनारजश्चयैराच्छादिता प्राणिगणस्य सर्वतः ॥ ३८ ॥
nordhvaṃ na cādho na puro na pṛṣṭhato na pārśvato'bhūtkhalu cakṣuṣorgatiḥ |
sūcyagrabhedyaiḥ pṛtanārajaścayairācchāditā prāṇigaṇasya sarvataḥ || 38 ||
दिगन्तदन्त्यावलिदानहारिभिर्विमानरन्ध्रप्रतिनादमेदुरैः ।
अनेकवाद्यध्वनितैरनारतैर्जगर्ज गाढं गुरुभिर्नभस्तलम् ॥ ३९ ॥
digantadantyāvalidānahāribhirvimānarandhrapratinādameduraiḥ |
anekavādyadhvanitairanāratairjagarja gāḍhaṃ gurubhirnabhastalam || 39 ||
भुवं विगाह्य प्रययौ महाचमूः क्वचिन्न मान्ती महतीं दिवं खलु ।
सुसंकुलायामपि तत्र निर्भरात्किं कांदिशीकत्वमवाप नाकुला ॥ ४० ॥
bhuvaṃ vigāhya prayayau mahācamūḥ kvacinna māntī mahatīṃ divaṃ khalu |
susaṃkulāyāmapi tatra nirbharātkiṃ kāṃdiśīkatvamavāpa nākulā || 40 ||
उद्दामदानद्विपवृन्दबृंहितैर्नितान्तमुत्तुङ्गतुरङ्गहेषितैः ।
चलद्घनस्यन्दननेमिनिःस्वनैरभून्निरुच्छ्वासमिवाकुलं जगत् ॥ ४१ ॥
uddāmadānadvipavṛndabṛṃhitairnitāntamuttuṅgaturaṅgaheṣitaiḥ |
caladghanasyandananeminiḥsvanairabhūnnirucchvāsamivākulaṃ jagat || 41 ||
महागजानां गुरुभिस्तु गर्जितैर्विलोलघण्टारणितै रणोल्वणैः ।
वीरप्रणादैः प्रमदप्रमेदुरैर्वाचालतामादधिरेतरां दिशः ॥ ४२ ॥
mahāgajānāṃ gurubhistu garjitairvilolaghaṇṭāraṇitai raṇolvaṇaiḥ |
vīrapraṇādaiḥ pramadapramedurairvācālatāmādadhiretarāṃ diśaḥ || 42 ||
दन्तीन्द्रदानद्रववारिवीचिभिः सद्योऽपि नद्यो बहुधा पुपूरिरे ।
धारा रजोभिस्तुरगैः क्षतैर्भृता याः पङ्कतामेत्य रथैः स्थलीकृताः ॥ ४३ ॥
dantīndradānadravavārivīcibhiḥ sadyo'pi nadyo bahudhā pupūrire |
dhārā rajobhisturagaiḥ kṣatairbhṛtā yāḥ paṅkatāmetya rathaiḥ sthalīkṛtāḥ || 43 ||
निम्नाः प्रदेशाः स्थलतामुपागमन्निम्नत्वमुच्चैरपि सर्वतश्च ते ।
तुरङ्गमाणां व्रजतां खुरैः क्षता रथैर्गजेन्द्रैः परितः समीकृताः ॥ ४४ ॥
nimnāḥ pradeśāḥ sthalatāmupāgamannimnatvamuccairapi sarvataśca te |
turaṅgamāṇāṃ vrajatāṃ khuraiḥ kṣatā rathairgajendraiḥ paritaḥ samīkṛtāḥ || 44 ||
नभोदिगन्तप्रतिघोषभीषणैर्महामहीभृत्तटदारणोल्वणैः ।
पयोधिनिर्धूननकेलिभिर्जगद् बभूव भेरीध्वनितैः समाकुलम् ॥ ४५ ॥
nabhodigantapratighoṣabhīṣaṇairmahāmahībhṛttaṭadāraṇolvaṇaiḥ |
payodhinirdhūnanakelibhirjagad babhūva bherīdhvanitaiḥ samākulam || 45 ||
इतस्ततो वातविधूत चञ्चलैर्नोरन्ध्रिताशागमनैर्ध्वजांशुकैः ।
लक्षैः क्वणत्काञ्चनकिङ्किणीकुलैरमज्जि धूलीजलधौ नभोगते ॥ ४६ ॥
itastato vātavidhūta cañcalairnorandhritāśāgamanairdhvajāṃśukaiḥ |
lakṣaiḥ kvaṇatkāñcanakiṅkiṇīkulairamajji dhūlījaladhau nabhogate || 46 ||
घण्टारवै रौद्रतरैर्निरन्तरं विसृत्वरैर्गर्जरवैः सुभैरवैः ।
मत्तद्विपानां प्रथयाम्बभूविरे न वाहिनीनां पटहस्य निःस्वनाः ॥ ४७ ॥
ghaṇṭāravai raudratarairnirantaraṃ visṛtvarairgarjaravaiḥ subhairavaiḥ |
mattadvipānāṃ prathayāmbabhūvire na vāhinīnāṃ paṭahasya niḥsvanāḥ || 47 ||
करालवाचालमुखाश्चमूस्वनैर्ध्वस्ताम्बरा वीक्ष्य दिशो रजस्वलाः ।
तिरोबभूवे गहनैर्दिनेश्वरो रजोन्धकारैः परितः कुतोऽप्यसौ ॥ ४८ ॥
karālavācālamukhāścamūsvanairdhvastāmbarā vīkṣya diśo rajasvalāḥ |
tirobabhūve gahanairdineśvaro rajondhakāraiḥ paritaḥ kuto'pyasau || 48 ||
आक्रान्तपूर्वा रभसेन सैनिकैर्दिगङ्गना व्योम रजोभिदूषिता ।
भेरीरवाणां प्रतिशब्दितैर्घनैर्जगर्ज गाढं घनमत्सरादिव ॥ ४९ ॥
ākrāntapūrvā rabhasena sainikairdigaṅganā vyoma rajobhidūṣitā |
bherīravāṇāṃ pratiśabditairghanairjagarja gāḍhaṃ ghanamatsarādiva || 49 ||
गुरुसमीरसमीरितभूधरा इव गजा गगनं विजगाहिरे ।
गुरुतरा इव वारिधरा रथा भुवमितीह विवर्त इवाभवत् ॥ ५० ॥
gurusamīrasamīritabhūdharā iva gajā gaganaṃ vijagāhire |
gurutarā iva vāridharā rathā bhuvamitīha vivarta ivābhavat || 50 ||
बलवदसुरलोकानल्पकल्पान्तकाले ।
निरवधय इवाम्भोराशयो घोरघोषाः ।
गुरुतरपरिमज्जद्भूभृतो देवसेना ।
ववृधुरपि सुपूर्णा व्योमभूम्यन्तराले ॥ ५१ ॥
balavadasuralokānalpakalpāntakāle |
niravadhaya ivāmbhorāśayo ghoraghoṣāḥ |
gurutaraparimajjadbhūbhṛto devasenā |
vavṛdhurapi supūrṇā vyomabhūmyantarāle || 51 ||
Keys: ← → turn the page, J K step through the verses.
Illustration: Verse & Place (Project-owned).