Skip to content

सर्गः ९

Agni Receives Shiva's Seed

A canto of Kalidasa's Kumarasambhava.

52 versesSanskrit with transliteration

Shiva's fire and Parvati's austerity.

तथाविधेऽनङ्गरसप्रसङ्गे मुखारविन्दे मधुपः प्रियायाः । संभोगवेश्म प्रविशन्तमन्तर्ददर्श पारावतमेकमीशः ॥ १ ॥

tathāvidhe'naṅgarasaprasaṅge mukhāravinde madhupaḥ priyāyāḥ | saṃbhogaveśma praviśantamantardadarśa pārāvatamekamīśaḥ || 1 ||

Report an error

सुकान्तकान्तामणितानुकारं कूजन्तमाधूर्णितरक्तनेत्रम् । प्रस्फारितोन्नम्रविनम्रकण्ठं मुहुर्मुहुर्न्यञ्चितचारुपुच्छम् ॥ २ ॥

sukāntakāntāmaṇitānukāraṃ kūjantamādhūrṇitaraktanetram | prasphāritonnamravinamrakaṇṭhaṃ muhurmuhurnyañcitacārupuccham || 2 ||

Report an error

विशृङ्खलं पक्षतियुग्ममीषद्दधानमानन्दगतिं मदेन । शुभ्रांशुवर्ण जटिलाग्रपादमितस्ततो मण्डलकैश्चरन्तम् ॥ ३ ॥

viśṛṅkhalaṃ pakṣatiyugmamīṣaddadhānamānandagatiṃ madena | śubhrāṃśuvarṇa jaṭilāgrapādamitastato maṇḍalakaiścarantam || 3 ||

Report an error

रतिद्वितीयेन मनोभवेन ह्रदयात्सुधाया प्रविगाह्यमानात् । तं वीक्ष्य फेनस्य चयं नवोत्थमिवाभ्यनन्दत्क्षणमिन्दुमौलिः ॥ ४ ॥

ratidvitīyena manobhavena hradayātsudhāyā pravigāhyamānāt | taṃ vīkṣya phenasya cayaṃ navotthamivābhyanandatkṣaṇamindumauliḥ || 4 ||

Report an error

तस्याकृतिं कामपि वीक्ष्य दिव्यामन्तर्भवश्छद्यविहंगमग्निम् । विचिन्तयन्संविविदे स देवो भ्रूभङ्गभीमश्च रुषा बभूव ॥ ५ ॥

tasyākṛtiṃ kāmapi vīkṣya divyāmantarbhavaśchadyavihaṃgamagnim | vicintayansaṃvivide sa devo bhrūbhaṅgabhīmaśca ruṣā babhūva || 5 ||

Report an error

स्वरुपमास्थाय ततो हुताशस्त्रसन्वलत्कम्प कृताञ्जलिः सन् । प्रवेपमानो नितरां स्मरारिमिदं वचो व्यक्तमथाध्युवाच ॥ ६ ॥

svarupamāsthāya tato hutāśastrasanvalatkampa kṛtāñjaliḥ san | pravepamāno nitarāṃ smarārimidaṃ vaco vyaktamathādhyuvāca || 6 ||

Report an error

असि त्वमेको जगतामधीशः स्वर्गौकसां त्वं विपदो निहंसि । ततः सुरेन्द्रप्रमुखाः प्रभो त्वामुपासते दैत्यवरैर्विधूताः ॥ ७ ॥

asi tvameko jagatāmadhīśaḥ svargaukasāṃ tvaṃ vipado nihaṃsi | tataḥ surendrapramukhāḥ prabho tvāmupāsate daityavarairvidhūtāḥ || 7 ||

Report an error

त्वया प्रियाप्रेमवशंवदेन शतं व्यतीये सुरतादृतूनाम् । रहः स्थितेन त्वदवीक्षणार्तो दैन्यं परं प्राप सुरैः सुरेन्द्रः ॥ ८ ॥

tvayā priyāpremavaśaṃvadena śataṃ vyatīye suratādṛtūnām | rahaḥ sthitena tvadavīkṣaṇārto dainyaṃ paraṃ prāpa suraiḥ surendraḥ || 8 ||

Report an error

त्वदीयसेवावसरप्रतीक्षैरभ्यर्थितः शक्रमुखैः सुरैस्त्वाम् । उपागतोऽन्वेष्टुमहं विहंगरुपेण विद्वन्समयोचितेन ॥ ९ ॥

tvadīyasevāvasarapratīkṣairabhyarthitaḥ śakramukhaiḥ suraistvām | upāgato'nveṣṭumahaṃ vihaṃgarupeṇa vidvansamayocitena || 9 ||

Report an error

इति प्रभो चेतसि संप्रधार्य तन्नोऽपराधं भगवन् क्षमस्व । पराभिभूता वद किं क्षमन्ते कालातिपातं शरणार्थिनोऽमी ॥ १० ॥

iti prabho cetasi saṃpradhārya tanno'parādhaṃ bhagavan kṣamasva | parābhibhūtā vada kiṃ kṣamante kālātipātaṃ śaraṇārthino'mī || 10 ||

Report an error

प्रभो प्रसीदाशु सृजात्मपुत्रं यं प्राप्य सेनान्यमसौ सुरेन्द्रः । स्वर्लोकलक्ष्मीप्रभुतामवाप्य जगत्त्रयं पाति तव प्रसादात् ॥ ११ ॥

prabho prasīdāśu sṛjātmaputraṃ yaṃ prāpya senānyamasau surendraḥ | svarlokalakṣmīprabhutāmavāpya jagattrayaṃ pāti tava prasādāt || 11 ||

Report an error

स शंकरस्तामिति जातवेदोविज्ञापनामर्थवतीं निशम्य । अभूत्प्रसन्नः परितोषयन्ति गीर्भिर्गिरिशा रुचिराभिरीशम् ॥ १२ ॥

sa śaṃkarastāmiti jātavedovijñāpanāmarthavatīṃ niśamya | abhūtprasannaḥ paritoṣayanti gīrbhirgiriśā rucirābhirīśam || 12 ||

Report an error

प्रसन्नचेता मदनान्तकारः स तारकारेर्जयिनो भवाय । शक्रस्य सेनाधिपतेर्जयाय व्यचिन्तयच्चेतसि भावि किंचित् ॥ १३ ॥

prasannacetā madanāntakāraḥ sa tārakārerjayino bhavāya | śakrasya senādhipaterjayāya vyacintayaccetasi bhāvi kiṃcit || 13 ||

Report an error

युगान्तकालाग्निमिवाविषह्यं परिच्युतं मन्मथरङ्गभङ्गात् । रतान्तरेतः स हिरण्यरेतस्यथोर्ध्वरेतास्तदमोघमाधात् ॥ १४ ॥

yugāntakālāgnimivāviṣahyaṃ paricyutaṃ manmatharaṅgabhaṅgāt | ratāntaretaḥ sa hiraṇyaretasyathordhvaretāstadamoghamādhāt || 14 ||

Report an error

अथोष्णबाष्पानिलदूषितान्तं विशुद्धमादर्शमिवात्मदेहम् । बभार भूम्ना सहसा पुरारिरेतः परिक्षेपकुवर्णमग्निः ॥ १५ ॥

athoṣṇabāṣpāniladūṣitāntaṃ viśuddhamādarśamivātmadeham | babhāra bhūmnā sahasā purāriretaḥ parikṣepakuvarṇamagniḥ || 15 ||

Report an error

त्वं सर्वभक्षो भव भीमकर्मा कुष्ठाभिभूतोऽनल धूमगर्भः । इत्थं शशापाद्रिसुता हुताशं रुष्टा रतानन्दसुखस्य भङ्गात् ॥ १६ ॥

tvaṃ sarvabhakṣo bhava bhīmakarmā kuṣṭhābhibhūto'nala dhūmagarbhaḥ | itthaṃ śaśāpādrisutā hutāśaṃ ruṣṭā ratānandasukhasya bhaṅgāt || 16 ||

Report an error

दक्षस्य शापेन शशी क्षयीव प्लुष्टो हिमेनेव सरोजकोशः । वहन्विरुपं वपुरुग्ररेतश्चयेन वह्निः किल निर्जगाम ॥ १७ ॥

dakṣasya śāpena śaśī kṣayīva pluṣṭo himeneva sarojakośaḥ | vahanvirupaṃ vapurugraretaścayena vahniḥ kila nirjagāma || 17 ||

Report an error

स पावकालोकरुषा विलक्षां स्मरत्रपास्मेरविनम्रवक्त्राम् । विनोदयामास गिरीन्द्रपुत्रीं श्रृङ्गारगर्भैर्मधुरैर्वचोभिः ॥ १८ ॥

sa pāvakālokaruṣā vilakṣāṃ smaratrapāsmeravinamravaktrām | vinodayāmāsa girīndraputrīṃ śrṛṅgāragarbhairmadhurairvacobhiḥ || 18 ||

Report an error

हरो विकीर्णं घनघर्मतोयैर्नेत्राञ्जनाङ्कं हृदयप्रियायाः । द्वितीयकौपीनचलाञ्चलेनाहरन्मुखेन्दोरकलङ्किनोऽस्याः ॥ १९ ॥

haro vikīrṇaṃ ghanagharmatoyairnetrāñjanāṅkaṃ hṛdayapriyāyāḥ | dvitīyakaupīnacalāñcalenāharanmukhendorakalaṅkino'syāḥ || 19 ||

Report an error

मन्देन खिन्नाङ्गुलिना करेण कम्प्रेण तस्या वदनारविन्दात् । परामृशन्घर्मजलं जहार हरः सहेलं व्यजनानिलेन ॥ २० ॥

mandena khinnāṅgulinā kareṇa kampreṇa tasyā vadanāravindāt | parāmṛśangharmajalaṃ jahāra haraḥ sahelaṃ vyajanānilena || 20 ||

Report an error

रतिश्लथं तत्कबरीकलापमंसावसक्तं विगलत्प्रसूनम् । स पारिजातोद्भवपुष्पमय्या स्त्रजा बबन्धामृतमूर्तिमौलिः ॥ २१ ॥

ratiślathaṃ tatkabarīkalāpamaṃsāvasaktaṃ vigalatprasūnam | sa pārijātodbhavapuṣpamayyā strajā babandhāmṛtamūrtimauliḥ || 21 ||

Report an error

कपोलपाल्यां मृगनाभिचित्रपत्ररावलीमिन्दुमुखः सुमुख्याः । स्मरस्य सिद्धस्य जगद्विमोहमन्त्राक्षरश्रेणिमिवोल्लिलेख ॥ २२ ॥

kapolapālyāṃ mṛganābhicitrapatrarāvalīmindumukhaḥ sumukhyāḥ | smarasya siddhasya jagadvimohamantrākṣaraśreṇimivollilekha || 22 ||

Report an error

रथस्य कर्णावभि तन्मुखस्य ताटङ्कचक्रद्वितयं न्यधात्सः । जगज्जिगीषुर्विषमेषुरेष ध्रुवं यमारोहति पुष्पचापः ॥ २३ ॥

rathasya karṇāvabhi tanmukhasya tāṭaṅkacakradvitayaṃ nyadhātsaḥ | jagajjigīṣurviṣameṣureṣa dhruvaṃ yamārohati puṣpacāpaḥ || 23 ||

Report an error

तस्याः स कण्ठे पिहितस्तनाग्रां न्यधत्त मुक्ताफलहारवल्लीम् । या प्राप मेरुद्वितयस्य मूर्ध्नि स्थितस्य गाङ्गौघयुगस्य लक्ष्मीम् ॥ २४ ॥

tasyāḥ sa kaṇṭhe pihitastanāgrāṃ nyadhatta muktāphalahāravallīm | yā prāpa merudvitayasya mūrdhni sthitasya gāṅgaughayugasya lakṣmīm || 24 ||

Report an error

नखव्रणश्रेणिवरे बबन्ध नितम्बबिम्बे रशनाकलापम् । चलस्वचेतोमृगबन्धनाय मनोभुवः पाशमिव स्मरारिः ॥ २५ ॥

nakhavraṇaśreṇivare babandha nitambabimbe raśanākalāpam | calasvacetomṛgabandhanāya manobhuvaḥ pāśamiva smarāriḥ || 25 ||

Report an error

भालेक्षणाग्नौ स्वयमञ्जनं स भङ्क्त्वा दृशोः साधु निवेश्य तस्याः । नवोत्पलाक्ष्याः पुलकोपगूढे कण्ठे विनीलेऽङ्गुलिमुज्जघर्ष ॥ २६ ॥

bhālekṣaṇāgnau svayamañjanaṃ sa bhaṅktvā dṛśoḥ sādhu niveśya tasyāḥ | navotpalākṣyāḥ pulakopagūḍhe kaṇṭhe vinīle'ṅgulimujjagharṣa || 26 ||

Report an error

अलक्तकं पादसरोरुहाग्रे सरोरुहाक्ष्याः किल संनिवेश्य । स्वमौलिगङ्गासलिलेन हस्तारुणत्वमक्षालयदिन्दुचूडः ॥ २७ ॥

alaktakaṃ pādasaroruhāgre saroruhākṣyāḥ kila saṃniveśya | svamauligaṅgāsalilena hastāruṇatvamakṣālayadinducūḍaḥ || 27 ||

Report an error

भस्मानुलिप्ते वपुषि स्वकीये सहेलमादर्शतलं विमृज्य । नेपथ्यलक्ष्म्याः परिभावनार्थमदर्शयज्जीवितवल्लभां सः ॥ २८ ॥

bhasmānulipte vapuṣi svakīye sahelamādarśatalaṃ vimṛjya | nepathyalakṣmyāḥ paribhāvanārthamadarśayajjīvitavallabhāṃ saḥ || 28 ||

Report an error

प्रियेण दत्ते मणिदर्पणे सा संभोगचिह्नं स्ववपुर्विभाव्य । त्रपावती तत्र घनानुरागं रोमाञ्चदम्भेन बहिर्बभार ॥ २९ ॥

priyeṇa datte maṇidarpaṇe sā saṃbhogacihnaṃ svavapurvibhāvya | trapāvatī tatra ghanānurāgaṃ romāñcadambhena bahirbabhāra || 29 ||

Report an error

नेपथ्यलक्ष्मीं दयितोपक्लृप्तां सस्मेरमादर्शतले विलोक्य । अमंस्त सौभाग्यवतीषु धुर्यमात्मानमुद्धूतविलक्षभावा ॥ ३० ॥

nepathyalakṣmīṃ dayitopaklṛptāṃ sasmeramādarśatale vilokya | amaṃsta saubhāgyavatīṣu dhuryamātmānamuddhūtavilakṣabhāvā || 30 ||

Report an error

अन्तः प्रविश्यावसरेऽथ तत्र स्निग्धे वयस्ये विजया जया च । सुसंपदोपाचरतां कलानामङ्के स्थितां तां शशिखण्डमौलेः ॥ ३१ ॥

antaḥ praviśyāvasare'tha tatra snigdhe vayasye vijayā jayā ca | susaṃpadopācaratāṃ kalānāmaṅke sthitāṃ tāṃ śaśikhaṇḍamauleḥ || 31 ||

Report an error

व्यधुर्बहिर्मङ्गलगानमुच्चैर्वैतालिकाश्चित्रचरित्रचारु । जगुश्च गन्धर्वगणाः सशङ्खस्वनं प्रमोदाय पिनाकपाणेः ॥ ३२ ॥

vyadhurbahirmaṅgalagānamuccairvaitālikāścitracaritracāru | jaguśca gandharvagaṇāḥ saśaṅkhasvanaṃ pramodāya pinākapāṇeḥ || 32 ||

Report an error

ततः स्वसेवावसरे सुराणां गणांस्तदालोकनतत्पराणाम् । द्वारि प्रविश्य प्रणतोऽथ नन्दी निवेदयामास कृताञ्जलिः सन् ॥ ३३ ॥

tataḥ svasevāvasare surāṇāṃ gaṇāṃstadālokanatatparāṇām | dvāri praviśya praṇato'tha nandī nivedayāmāsa kṛtāñjaliḥ san || 33 ||

Report an error

महेश्वरो मानसराजहंसीं करे दधानस्तनयां हिमाद्रेः । संभोगलीलालयतः सहेलं हरो बहिस्तानभि निर्जगाम ॥ ३४ ॥

maheśvaro mānasarājahaṃsīṃ kare dadhānastanayāṃ himādreḥ | saṃbhogalīlālayataḥ sahelaṃ haro bahistānabhi nirjagāma || 34 ||

Report an error

क्रमान्महेन्द्रप्रमुखाः प्रणेमुः शिरोनिबद्धाञ्जलयो महेशम् । प्रालेयशैलाधिपतेस्तनूजां देवीं च लोकत्रयमातरं ते ॥ ३५ ॥

kramānmahendrapramukhāḥ praṇemuḥ śironibaddhāñjalayo maheśam | prāleyaśailādhipatestanūjāṃ devīṃ ca lokatrayamātaraṃ te || 35 ||

Report an error

यथागतं तान्विबुधान्विसृज्य प्रसाद्य मानक्रियया प्रतस्थे । स नन्दिना दत्तभुजोऽधिरुह्य वृषं वृषाङ्कः सह शैलपुत्र्या ॥ ३६ ॥

yathāgataṃ tānvibudhānvisṛjya prasādya mānakriyayā pratasthe | sa nandinā dattabhujo'dhiruhya vṛṣaṃ vṛṣāṅkaḥ saha śailaputryā || 36 ||

Report an error

मनोतिवेगेन ककुद्मता स प्रतिष्ठमानो गगनाध्वनोऽन्तः । वैमानिकैः साञ्जलिभिर्ववन्दे विहारहेलागतिभिर्गिरीशः ॥ ३७ ॥

manotivegena kakudmatā sa pratiṣṭhamāno gaganādhvano'ntaḥ | vaimānikaiḥ sāñjalibhirvavande vihārahelāgatibhirgirīśaḥ || 37 ||

Report an error

स्वर्वाहिनीवारिविहारचारी रतान्तनारीश्रमशान्तिकारी । तौ पारिजातप्रसवप्रसङ्गो मरुत्सिषेवे गिरीजागिरीशौ ॥ ३८ ॥

svarvāhinīvārivihāracārī ratāntanārīśramaśāntikārī | tau pārijātaprasavaprasaṅgo marutsiṣeve girījāgirīśau || 38 ||

Report an error

पिनाकिनापि स्फटिकाचलेन्द्रः कैलासनामा कलिताम्बरांशः । धृतार्धसोमोऽद्भुतभोगिभोगो विभूतिधारी स्व इव प्रपेदे ॥ ३९ ॥

pinākināpi sphaṭikācalendraḥ kailāsanāmā kalitāmbarāṃśaḥ | dhṛtārdhasomo'dbhutabhogibhogo vibhūtidhārī sva iva prapede || 39 ||

Report an error

विलोक्य यत्र स्फटिकरय भित्तौ सिद्धाङ्गनाः स्वं प्रतिबिम्बमारात् । भ्रान्त्या परस्या विमुखीभवन्ति प्रियेषु मानग्रहिला नमत्सु ॥ ४० ॥

vilokya yatra sphaṭikaraya bhittau siddhāṅganāḥ svaṃ pratibimbamārāt | bhrāntyā parasyā vimukhībhavanti priyeṣu mānagrahilā namatsu || 40 ||

Report an error

सुबिम्बितस्य स्फटिकांशुगुप्तेश्चन्द्रस्य चिह्नप्रकरः करोति । गौर्यार्पितस्येव रसेन यत्र कस्तूरिकायाः शकलस्य लीलाम् ॥ ४१ ॥

subimbitasya sphaṭikāṃśugupteścandrasya cihnaprakaraḥ karoti | gauryārpitasyeva rasena yatra kastūrikāyāḥ śakalasya līlām || 41 ||

Report an error

यदीयभित्तौ प्रतिबिम्बिताङ्गमात्मानमालोक्य रुषा करीन्द्राः । मत्तान्यकुम्भिभ्रमतोऽतिभीमदन्ताभिघातव्यसनं वहन्ति ॥ ४२ ॥

yadīyabhittau pratibimbitāṅgamātmānamālokya ruṣā karīndrāḥ | mattānyakumbhibhramato'tibhīmadantābhighātavyasanaṃ vahanti || 42 ||

Report an error

निशासु यत्र प्रतिबिम्बितानि ताराकुलानि स्फटिकालयेषु । दृष्ट्वा रतान्तच्युततारहारयुक्ताभ्रमं बिभ्रति सिद्धवध्वः ॥ ४३ ॥

niśāsu yatra pratibimbitāni tārākulāni sphaṭikālayeṣu | dṛṣṭvā ratāntacyutatārahārayuktābhramaṃ bibhrati siddhavadhvaḥ || 43 ||

Report an error

नभश्चरीमण्डनर्दपणश्रीः सुधानिधिर्मूर्धनि यस्य तिष्ठन् । अनर्ध्यचूडामणितामुपैति शैलाधिनाथस्य शिवालयस्य ॥ ४४ ॥

nabhaścarīmaṇḍanardapaṇaśrīḥ sudhānidhirmūrdhani yasya tiṣṭhan | anardhyacūḍāmaṇitāmupaiti śailādhināthasya śivālayasya || 44 ||

Report an error

समीयिवांसो रहसि स्मरार्ता रिरंसवो यत्र सुराः प्रियाभिः । एकाकिनोऽपि प्रतिबिम्बभाजो विभान्ति भूयोभिरिवान्विताः स्वैः ॥ ४५ ॥

samīyivāṃso rahasi smarārtā riraṃsavo yatra surāḥ priyābhiḥ | ekākino'pi pratibimbabhājo vibhānti bhūyobhirivānvitāḥ svaiḥ || 45 ||

Report an error

देवोऽपि गौर्या सह चन्द्रमौलिर्यदृच्छया स्फाटिकशैलश्रृङ्गे । श्रृङ्गारचेष्टाभिरनारताभिर्मनोहराभिर्व्यहरच्चिराय ॥ ४६ ॥

devo'pi gauryā saha candramauliryadṛcchayā sphāṭikaśailaśrṛṅge | śrṛṅgāraceṣṭābhiranāratābhirmanoharābhirvyaharaccirāya || 46 ||

Report an error

देवस्य तस्य स्मरसूदनस्य हस्तं समालिङ्ग्य सुविभ्रमश्रीः । सा नन्दिना वेत्रभृतोपदिष्टमार्गा पुरोगेण कलं चचाल ॥ ४७ ॥

devasya tasya smarasūdanasya hastaṃ samāliṅgya suvibhramaśrīḥ | sā nandinā vetrabhṛtopadiṣṭamārgā purogeṇa kalaṃ cacāla || 47 ||

Report an error

चलच्छिखाग्रो विकटाङ्गभङ्गः सुदन्तुरः शुक्लसुतीक्ष्णतुण्डः । भ्रुवोपदिष्टः स तु शङ्करेण तस्या विनोदाय ननर्त भृङ्गी ॥ ४८ ॥

calacchikhāgro vikaṭāṅgabhaṅgaḥ sudanturaḥ śuklasutīkṣṇatuṇḍaḥ | bhruvopadiṣṭaḥ sa tu śaṅkareṇa tasyā vinodāya nanarta bhṛṅgī || 48 ||

Report an error

कण्ठस्थलीलोलकपालमाला दंष्ट्राकरालाननमभ्यनृत्यत् । प्रीतेन तेन प्रभुणा नियुक्ता काली कलत्रस्य मुदे प्रियस्य ॥ ४९ ॥

kaṇṭhasthalīlolakapālamālā daṃṣṭrākarālānanamabhyanṛtyat | prītena tena prabhuṇā niyuktā kālī kalatrasya mude priyasya || 49 ||

Report an error

भयंकरौ तौ विकटं नदन्तौ विलोक्य बाला भयविह्वलाङ्गी । सरागमुत्सङ्गमनङ्गशत्रोर्गाढं प्रसह्य स्वयमालिलिङ्ग ॥ ५० ॥

bhayaṃkarau tau vikaṭaṃ nadantau vilokya bālā bhayavihvalāṅgī | sarāgamutsaṅgamanaṅgaśatrorgāḍhaṃ prasahya svayamāliliṅga || 50 ||

Report an error

उत्तुङ्गपीनस्तनपिण्डपीडं ससंभ्रमं तत्परिरम्भमीशः । प्रपद्य सद्य पुलकोपगूढः स्मरेण रुढप्रमदो ममाद ॥ ५१ ॥

uttuṅgapīnastanapiṇḍapīḍaṃ sasaṃbhramaṃ tatparirambhamīśaḥ | prapadya sadya pulakopagūḍhaḥ smareṇa ruḍhapramado mamāda || 51 ||

Report an error

इति गिरितनुजाविलासलीलाविविधविभङ्गिभिरेष तोषितः सन् । अमृतकरशिरोमणिर्गिरीन्द्रे कृतवसतिर्वशिभिर्गणैर्ननन्द ॥ ५२ ॥

iti giritanujāvilāsalīlāvividhavibhaṅgibhireṣa toṣitaḥ san | amṛtakaraśiromaṇirgirīndre kṛtavasatirvaśibhirgaṇairnananda || 52 ||

Report an error

Illustration: Verse & Place (Project-owned).