Skip to content

दशकम् २८

Garal̤aṃ taral̤ānalaṃ purastājjaladherudvijagāl̤a kāl̤akūṭam

Ten-verse prayers to Krishna of Guruvayur retelling the Bhagavata Purana.

10 versesSanskrit with transliteration

Guruvayurappan, Krishna of Guruvayur.

गरळं तरळानलं पुरस्ताज्जलधेरुद्विजगाळ काळकूटम् । अमरस्तुतिवादमोदनिघ्नो गिरिशस्तन्निपपौ भवत्प्रियार्थम् ॥ १ ॥

garal̤aṃ taral̤ānalaṃ purastājjaladherudvijagāl̤a kāl̤akūṭam | amarastutivādamodanighno giriśastannipapau bhavatpriyārtham || 1 ||

Report an error

विमथत्सु सुरासुरेषु जाता सुरभिस्तामृषिषु न्यधास्त्रिधामन् । हयरत्नमभूदथेभरत्नं द्यूतरुश्चाप्सरसः सुरेषु तानि ॥ २ ॥

vimathatsu surāsureṣu jātā surabhistāmṛṣiṣu nyadhāstridhāman | hayaratnamabhūdathebharatnaṃ dyūtaruścāpsarasaḥ sureṣu tāni || 2 ||

Report an error

जगदीश भवत्परा तदानीं कमनीया कमला बभूव देवी । अमलामवलोक्य यां विलोकः सकलोऽपि स्पृहयाम्बभूव लोकः ॥ ३ ॥

jagadīśa bhavatparā tadānīṃ kamanīyā kamalā babhūva devī | amalāmavalokya yāṃ vilokaḥ sakalo'pi spṛhayāmbabhūva lokaḥ || 3 ||

Report an error

त्वयि दत्तहृद्दे तदैव देव्यै त्रिदशेन्द्रो मणिपीठिकां व्यतारीत् । सकलोपहृताभिषेचनीयैरृषयस्तां श्रुतिगीर्भिरभ्यषिञ्चन् ॥ ४ ॥

tvayi dattahṛdde tadaiva devyai tridaśendro maṇipīṭhikāṃ vyatārīt | sakalopahṛtābhiṣecanīyairṛṣayastāṃ śrutigīrbhirabhyaṣiñcan || 4 ||

Report an error

अभिषेकजलानुपातिमुग्धत्वदपाङ्गैरवभूषिताङ्गवल्लीम् । मणिकुण्डलपीतचेलहारप्रमुखैस्ताममरादयोऽन्दभूषन् ॥ ५ ॥

abhiṣekajalānupātimugdhatvadapāṅgairavabhūṣitāṅgavallīm | maṇikuṇḍalapītacelahārapramukhaistāmamarādayo'ndabhūṣan || 5 ||

Report an error

वरणस्रजमात्तभृङ्गनादां दधती सा कुचकुम्भमन्दयाना । पदशिञ्जितमञ्जुनूपुरा त्वां कलितव्रीळविलासमाससाद ॥ ६ ॥

varaṇasrajamāttabhṛṅganādāṃ dadhatī sā kucakumbhamandayānā | padaśiñjitamañjunūpurā tvāṃ kalitavrīl̤avilāsamāsasāda || 6 ||

Report an error

गिरिश द्रुहिणादिसर्वदेवान् गुणभाजोऽप्यविमुक्तदोषलेशान् । अवमृश्य सदैव सर्वरम्ये निहिता त्वय्यनयापि दिव्यमाला ॥ ७ ॥

giriśa druhiṇādisarvadevān guṇabhājo'pyavimuktadoṣaleśān | avamṛśya sadaiva sarvaramye nihitā tvayyanayāpi divyamālā || 7 ||

Report an error

उरसा तरसा ममानिथैनां भुवनानां जननीमनन्यभावाम् । त्वदुरोविलसत्तदीक्षणश्री परिवृष्ट्या परिपुष्टमास विश्वम् ॥ ८ ॥

urasā tarasā mamānithaināṃ bhuvanānāṃ jananīmananyabhāvām | tvadurovilasattadīkṣaṇaśrī parivṛṣṭyā paripuṣṭamāsa viśvam || 8 ||

Report an error

अतिमोहनविभ्रमा तदानीं मदयन्ती खलु वारुणी निरागात् । तमसः पदवीमदास्त्वमेनामतिसम्माननया महासुरेभ्यः ॥ ९ ॥

atimohanavibhramā tadānīṃ madayantī khalu vāruṇī nirāgāt | tamasaḥ padavīmadāstvamenāmatisammānanayā mahāsurebhyaḥ || 9 ||

Report an error

तरुणाम्बुदसुन्दरस्तदा त्वं ननु धन्वन्तरिरुत्थितोऽम्बुराशेः । अमृतं कलशे वहन्कराभ्यामखिलार्तिं हर मारुतालयेश ॥ १० ॥

taruṇāmbudasundarastadā tvaṃ nanu dhanvantarirutthito'mburāśeḥ | amṛtaṃ kalaśe vahankarābhyāmakhilārtiṃ hara mārutālayeśa || 10 ||

Report an error

Illustration: Verse & Place (Project-owned).