Skip to content

दशकम् ४८

Mudā suraudhaistvamudārasammadairudīrya dāmodara ityabhiṣṭutaḥ

Ten-verse prayers to Krishna of Guruvayur retelling the Bhagavata Purana.

10 versesSanskrit with transliteration

Guruvayurappan, Krishna of Guruvayur.

मुदा सुरौधैस्त्वमुदारसम्मदैरुदीर्य दामोदर इत्यभिष्टुतः । मृदूदरः स्वैरमुलूखले लगन्नदूरतो द्वौ ककुभावुदैक्षथाः ॥ १ ॥

mudā suraudhaistvamudārasammadairudīrya dāmodara ityabhiṣṭutaḥ | mṛdūdaraḥ svairamulūkhale lagannadūrato dvau kakubhāvudaikṣathāḥ || 1 ||

Report an error

कुबेरसूनुर्नळकूबराभिधः परो मणिग्रीव इति प्रथां गतः । महेशसेवाधिगतश्रियोन्मदौ चिरं किल त्वद्विमुखावखेलताम् ॥ २ ॥

kuberasūnurnal̤akūbarābhidhaḥ paro maṇigrīva iti prathāṃ gataḥ | maheśasevādhigataśriyonmadau ciraṃ kila tvadvimukhāvakhelatām || 2 ||

Report an error

सुरापगायां किल तौ मदोत्कटौ सुरापगायद्बहुयौवतावृतौ । विवाससौ केळिपरौ स नारदो भवत्पदैकप्रवणो निरैक्षत ॥ ३ ॥

surāpagāyāṃ kila tau madotkaṭau surāpagāyadbahuyauvatāvṛtau | vivāsasau kel̤iparau sa nārado bhavatpadaikapravaṇo niraikṣata || 3 ||

Report an error

भिया प्रियालोकमुपात्तवाससं पुरो निरीक्ष्यापि मदान्धचेतसौ । इमौ भवद्भक्त्युपशान्तिसिद्धये मुनिर्जगौ शान्तिमृते कुतस्सुखम् ॥ ४ ॥

bhiyā priyālokamupāttavāsasaṃ puro nirīkṣyāpi madāndhacetasau | imau bhavadbhaktyupaśāntisiddhaye munirjagau śāntimṛte kutassukham || 4 ||

Report an error

युवामवाप्तौ ककुभात्मतां चिरं हरिं निरीक्ष्याथ पदं स्वमाप्नुतम् । इतीरितौ तौ भवदीक्षणस्पृहां गतौ व्रजान्ते ककुभौ बभूवतुः ॥ ५ ॥

yuvāmavāptau kakubhātmatāṃ ciraṃ hariṃ nirīkṣyātha padaṃ svamāpnutam | itīritau tau bhavadīkṣaṇaspṛhāṃ gatau vrajānte kakubhau babhūvatuḥ || 5 ||

Report an error

अतन्द्रमिन्द्रदृयुगं तथाविधं समेयुषा मन्थरगामिना त्वया । तिरायितोलूखलरोधनिर्धुतौ चिराय जीर्णौ परिपातितौ तरू ॥ ६ ॥

atandramindradṛyugaṃ tathāvidhaṃ sameyuṣā mantharagāminā tvayā | tirāyitolūkhalarodhanirdhutau cirāya jīrṇau paripātitau tarū || 6 ||

Report an error

अभाजि शाखिद्वितयं यदा त्वया तदैव तद्गर्भतलान्निरेयुषा । महात्विषा यक्षयुगेन तत्क्षणादभाजि गोविन्द भवानपि स्तवैः ॥ ७ ॥

abhāji śākhidvitayaṃ yadā tvayā tadaiva tadgarbhatalānnireyuṣā | mahātviṣā yakṣayugena tatkṣaṇādabhāji govinda bhavānapi stavaiḥ || 7 ||

Report an error

इहान्यभक्तोऽपि समेष्यति क्रमाद्भवन्तमेतौ खलु रुद्रसेवकौ । मुनिप्रसादाद्भवदङ्घ्रिमागतौ गतौ वृणानौ खलु भक्तिमुत्तमाम् ॥ ८ ॥

ihānyabhakto'pi sameṣyati kramādbhavantametau khalu rudrasevakau | muniprasādādbhavadaṅghrimāgatau gatau vṛṇānau khalu bhaktimuttamām || 8 ||

Report an error

ततस्तरूद्दारणदारुणारवप्रकम्पिसम्पातिनि गोपमण्डले । विलज्जितत्वज्जननीमुखेक्षिणा व्यमोक्षि नन्दने भवान्विमोक्षदः ॥ ९ ॥

tatastarūddāraṇadāruṇāravaprakampisampātini gopamaṇḍale | vilajjitatvajjananīmukhekṣiṇā vyamokṣi nandane bhavānvimokṣadaḥ || 9 ||

Report an error

महीरुहोर्मध्यगतो बतार्भको हरेः प्रभावादपरिक्षतोऽधुना । इति ब्रवाणैर्गमितो गृहं भवान्मरुत्पुराधीश्वर पाहि मां गदात् ॥ १० ॥

mahīruhormadhyagato batārbhako hareḥ prabhāvādaparikṣato'dhunā | iti bravāṇairgamito gṛhaṃ bhavānmarutpurādhīśvara pāhi māṃ gadāt || 10 ||

Report an error

Illustration: Verse & Place (Project-owned).