Skip to content

दशकम् ५८

Tvayi viharaṇalole bālajālaiḥ pralamba

Ten-verse prayers to Krishna of Guruvayur retelling the Bhagavata Purana.

10 versesSanskrit with transliteration

Guruvayurappan, Krishna of Guruvayur.

त्वयि विहरणलोले बालजालैः प्रलम्ब । प्रमथनसविळम्बे धेनवः स्वैरचाराः । तृणकुतुकनिविष्टा दूरदूरं चरन्त्यः । किमपि विपिनमैषीकाख्यमीषांबभूवुः ॥ १ ॥

tvayi viharaṇalole bālajālaiḥ pralamba | pramathanasavil̤ambe dhenavaḥ svairacārāḥ | tṛṇakutukaniviṣṭā dūradūraṃ carantyaḥ | kimapi vipinamaiṣīkākhyamīṣāṃbabhūvuḥ || 1 ||

Report an error

अनधिगतनिदाघक्रौर्यबृन्दावनान्तात् । बहिरिदमुपयाताः काननं धेनवस्ताः । तव विरहविषण्णा ऊष्मलग्रीष्मताप । प्रसरविसरदम्भस्याकुलाः स्तम्भमापुः ॥ २ ॥

anadhigatanidāghakrauryabṛndāvanāntāt | bahiridamupayātāḥ kānanaṃ dhenavastāḥ | tava virahaviṣaṇṇā ūṣmalagrīṣmatāpa | prasaravisaradambhasyākulāḥ stambhamāpuḥ || 2 ||

Report an error

तदनु सह सहायैर्दूरमन्विष्य शौरे । गळितसरणिमुञ्जारण्यसञ्जातखेदम् । पशुकुलमभिवीक्ष्य क्षिप्रमानेतुमारात् । त्वयि गतवति ही ही सर्वतोऽग्निर्जजृम्भे ॥ ३ ॥

tadanu saha sahāyairdūramanviṣya śaure | gal̤itasaraṇimuñjāraṇyasañjātakhedam | paśukulamabhivīkṣya kṣipramānetumārāt | tvayi gatavati hī hī sarvato'gnirjajṛmbhe || 3 ||

Report an error

सकलहरिति दीप्ते घोरभाङ्कारभीमे । शिखिनि विहतमार्गा अर्धदग्धा इवार्ताः । अहह भुवनबन्धो पाहि पाहीति सर्वे । शरणमुपगतास्त्वां तापहर्तारमेकम् ॥ ४ ॥

sakalahariti dīpte ghorabhāṅkārabhīme | śikhini vihatamārgā ardhadagdhā ivārtāḥ | ahaha bhuvanabandho pāhi pāhīti sarve | śaraṇamupagatāstvāṃ tāpahartāramekam || 4 ||

Report an error

अलमलमतिभीत्य सर्वतो मीलयध्वं । भृशमिति तव वाचा मीलिताक्षेषु तेषु । क्वनु दवदहनोऽसौ कुत्र मुञ्जाटवी सा । सपदि ववृतिरे ते हन्त भण्डीरदेशे ॥ ५ ॥

alamalamatibhītya sarvato mīlayadhvaṃ | bhṛśamiti tava vācā mīlitākṣeṣu teṣu | kvanu davadahano'sau kutra muñjāṭavī sā | sapadi vavṛtire te hanta bhaṇḍīradeśe || 5 ||

Report an error

जय जय तव माया केयमीशेति तेषां । नुतिभिरुदितहासो बद्वनानाविलासः । पुनरपि विपिनान्ते प्राचरः पाटलादि । प्रसवनिकरमात्रग्राह्यघर्मानुभावे ॥ ६ ॥

jaya jaya tava māyā keyamīśeti teṣāṃ | nutibhiruditahāso badvanānāvilāsaḥ | punarapi vipinānte prācaraḥ pāṭalādi | prasavanikaramātragrāhyagharmānubhāve || 6 ||

Report an error

त्वयि विमुखविमोच्चैस्तापभारं वहन्तं । तव भजनवदन्तः पङ्कमुच्छोषयन्तम् । तव भुजवदुदञ्चत् भूरितेजःप्रवाहं । तपसमयमनैषीर्यामुनेषु स्थलेषु ॥ ७ ॥

tvayi vimukhavimoccaistāpabhāraṃ vahantaṃ | tava bhajanavadantaḥ paṅkamucchoṣayantam | tava bhujavadudañcat bhūritejaḥpravāhaṃ | tapasamayamanaiṣīryāmuneṣu sthaleṣu || 7 ||

Report an error

तदनु जलदजालैस्त्वद्वपुस्तुल्यभाभि । र्विकसदमलविद्यूत्पीतवासोविलासैः । सकलभुवनभाजां हर्षदां वर्षवेलां । क्षितिधरकुहरेषु स्वैरवासी व्यनैषीः ॥ ८ ॥

tadanu jaladajālaistvadvapustulyabhābhi | rvikasadamalavidyūtpītavāsovilāsaiḥ | sakalabhuvanabhājāṃ harṣadāṃ varṣavelāṃ | kṣitidharakuhareṣu svairavāsī vyanaiṣīḥ || 8 ||

Report an error

कुहरतलनिविष्टं त्वां गरिष्ठं गिरीन्द्रः । शिखिकुलनवकेकाकाकुभिः स्तोत्रकारी । स्फुटकुटजकदम्बस्तोमपुष्पाञ्जलिं च । प्रविदधदनुभेजे देव गोवर्धनोऽसौ ॥ ९ ॥

kuharatalaniviṣṭaṃ tvāṃ gariṣṭhaṃ girīndraḥ | śikhikulanavakekākākubhiḥ stotrakārī | sphuṭakuṭajakadambastomapuṣpāñjaliṃ ca | pravidadhadanubheje deva govardhano'sau || 9 ||

Report an error

अथ शरदमुपेतां तां भवद्भक्तचेतो । विमलसलिलपूरां मानयन्काननेषु । तृणाममलवनान्ते चारु सञ्चारयन् गाः । पवनपुरपते त्वं देहि मे देहसौख्यम् ॥ १० ॥

atha śaradamupetāṃ tāṃ bhavadbhaktaceto | vimalasalilapūrāṃ mānayankānaneṣu | tṛṇāmamalavanānte cāru sañcārayan gāḥ | pavanapurapate tvaṃ dehi me dehasaukhyam || 10 ||

Report an error

Illustration: Verse & Place (Project-owned).