Skip to content

दशकम् ६१

Tataśca vṛndāvanato'tidūrato vanaṃ gatastvaṃ …

Ten-verse prayers to Krishna of Guruvayur retelling the Bhagavata Purana.

10 versesSanskrit with transliteration

Guruvayurappan, Krishna of Guruvayur.

ततश्च वृन्दावनतोऽतिदूरतो वनं गतस्त्वं खलु गोपगोकुलैः । हृदन्तरे भक्ततरद्विजाङ्गनाकदम्बकानुग्रहणाग्रहं वहन् ॥ १ ॥

tataśca vṛndāvanato'tidūrato vanaṃ gatastvaṃ khalu gopagokulaiḥ | hṛdantare bhaktataradvijāṅganākadambakānugrahaṇāgrahaṃ vahan || 1 ||

Report an error

ततो निरीक्ष्याशरणे वनान्तरे किशोरलोकं क्षुधितं तृषाकुलम् । अदूरतो यज्ञपरान् द्विजान्प्रति व्यसर्जयो दीदिवियाचनाय तान् ॥ २ ॥

tato nirīkṣyāśaraṇe vanāntare kiśoralokaṃ kṣudhitaṃ tṛṣākulam | adūrato yajñaparān dvijānprati vyasarjayo dīdiviyācanāya tān || 2 ||

Report an error

गतेष्वथो तेष्वभिधाय तेऽभिधां कुमारकेष्वोदनयाचिषु प्रभो । श्रुतिस्थिरा अप्यभिनिन्द्युरश्रुतिं न किञ्चिदूचुश्च महीसुरोत्तमाः ॥ ३ ॥

gateṣvatho teṣvabhidhāya te'bhidhāṃ kumārakeṣvodanayāciṣu prabho | śrutisthirā apyabhinindyuraśrutiṃ na kiñcidūcuśca mahīsurottamāḥ || 3 ||

Report an error

अनादरात् खिन्नधियो हि बालकाः समाययुर्युक्तमिदं हि यज्वसु । चिरादभक्ताः खलु ते महीसुराः कथं हि भक्तं त्वयि तैः समर्प्यते ॥ ४ ॥

anādarāt khinnadhiyo hi bālakāḥ samāyayuryuktamidaṃ hi yajvasu | cirādabhaktāḥ khalu te mahīsurāḥ kathaṃ hi bhaktaṃ tvayi taiḥ samarpyate || 4 ||

Report an error

निवेदयध्वं गृहिणीजनाय मां दिशेयुरन्नं करुणाकुला इमाः । इति स्मितार्द्रं भवतेरिता गतास्ते दारका दारजनं ययाचिरे ॥ ५ ॥

nivedayadhvaṃ gṛhiṇījanāya māṃ diśeyurannaṃ karuṇākulā imāḥ | iti smitārdraṃ bhavateritā gatāste dārakā dārajanaṃ yayācire || 5 ||

Report an error

गृहीतनाम्नि त्वयि सम्भ्रमाकुलाश्चतुर्विधं भोज्यरसं प्रगृह्य ताः । चिरं धृतत्वत्प्रविलोकनाग्रहाः स्वकैर्निरुद्धा अपि तूर्णमाययुः ॥ ६ ॥

gṛhītanāmni tvayi sambhramākulāścaturvidhaṃ bhojyarasaṃ pragṛhya tāḥ | ciraṃ dhṛtatvatpravilokanāgrahāḥ svakairniruddhā api tūrṇamāyayuḥ || 6 ||

Report an error

विलोलपिञ्छं चिकुरे कपोलयोः समुल्लसत्कुण्डलमार्द्रमीक्षिते । निधाय बाहुं सुहृदंससीमनि स्थितं भवन्तं समलोकयन्त ताः ॥ ७ ॥

vilolapiñchaṃ cikure kapolayoḥ samullasatkuṇḍalamārdramīkṣite | nidhāya bāhuṃ suhṛdaṃsasīmani sthitaṃ bhavantaṃ samalokayanta tāḥ || 7 ||

Report an error

तदा च काचित्त्वदुपागमोद्यता गृहीतहस्ता दयितेन यज्वना । तदैव सञ्चिन्त्य भवन्तमञ्जसा विवेश कैवल्यमहो कृतिन्यसौ ॥ ८ ॥

tadā ca kācittvadupāgamodyatā gṛhītahastā dayitena yajvanā | tadaiva sañcintya bhavantamañjasā viveśa kaivalyamaho kṛtinyasau || 8 ||

Report an error

आदाय भोज्यान्यनुगृह्य ताः पुनस्त्वदङ्गसङ्गस्पृहयोज्झतीर्गृहम् । विलोक्य यज्ञाय विसर्जयन्निमाश्चकर्थ भर्तॄनपि तास्वगर्हणान् ॥ ९ ॥

ādāya bhojyānyanugṛhya tāḥ punastvadaṅgasaṅgaspṛhayojjhatīrgṛham | vilokya yajñāya visarjayannimāścakartha bhartṝnapi tāsvagarhaṇān || 9 ||

Report an error

निरूप्य दोषं निजमङ्गनाजने विलोक्य भक्तिं च पुनर्विचारिभिः । प्रबुद्धतत्त्वैस्त्वमभिष्टुतो द्विजैर्मरुत्पुराधीश निरुन्धि मे गदान् ॥ १० ॥

nirūpya doṣaṃ nijamaṅganājane vilokya bhaktiṃ ca punarvicāribhiḥ | prabuddhatattvaistvamabhiṣṭuto dvijairmarutpurādhīśa nirundhi me gadān || 10 ||

Report an error

Illustration: Verse & Place (Project-owned).