स्फुरत्परानन्दरसात्मकेन त्वया समासादितभोगलीलाः । असीममानन्दभरं प्रपन्ना महान्तमापुर्मदमम्बुजाक्ष्यः ॥ १ ॥
sphuratparānandarasātmakena tvayā samāsāditabhogalīlāḥ | asīmamānandabharaṃ prapannā mahāntamāpurmadamambujākṣyaḥ || 1 ||
दशकम् ६७
Ten-verse prayers to Krishna of Guruvayur retelling the Bhagavata Purana.
10 versesSanskrit with transliteration
स्फुरत्परानन्दरसात्मकेन त्वया समासादितभोगलीलाः । असीममानन्दभरं प्रपन्ना महान्तमापुर्मदमम्बुजाक्ष्यः ॥ १ ॥
sphuratparānandarasātmakena tvayā samāsāditabhogalīlāḥ | asīmamānandabharaṃ prapannā mahāntamāpurmadamambujākṣyaḥ || 1 ||
निलीयतेऽसौ मयि मय्यमायं रमापतिर्विश्वमनोभिरामः । इतिस्म सर्वाः कलिताभिमाना निरीक्ष्य गोविन्द तिरोहितोऽभूः ॥ २ ॥
nilīyate'sau mayi mayyamāyaṃ ramāpatirviśvamanobhirāmaḥ | itisma sarvāḥ kalitābhimānā nirīkṣya govinda tirohito'bhūḥ || 2 ||
राधाभिधां तावदजातगर्वामतिप्रियां गोपवधूं मुरारे । भवानुपादाय गतो विदूरं तया सह स्वैरविहारकारी ॥ ३ ॥
rādhābhidhāṃ tāvadajātagarvāmatipriyāṃ gopavadhūṃ murāre | bhavānupādāya gato vidūraṃ tayā saha svairavihārakārī || 3 ||
तिरोहितेऽथ त्वयि जाततापाः समं समेताः कमलायताक्ष्यः । वने वने त्वां परिमार्गयन्त्यो विषादमापुर्भगवन्नपारम् ॥ ४ ॥
tirohite'tha tvayi jātatāpāḥ samaṃ sametāḥ kamalāyatākṣyaḥ | vane vane tvāṃ parimārgayantyo viṣādamāpurbhagavannapāram || 4 ||
हा चूत हा चम्पक कर्णिकार हा मल्लिके मालति बालवल्ल्यः । किं वीक्षितो नो हृदयैकचोर इत्यादि तास्त्वत्प्रवणा विलेपुः ॥ ५ ॥
hā cūta hā campaka karṇikāra hā mallike mālati bālavallyaḥ | kiṃ vīkṣito no hṛdayaikacora ityādi tāstvatpravaṇā vilepuḥ || 5 ||
निरीक्षितोऽयं सखि पङ्कजाक्षः पुरो ममेत्याकुलमालपन्ती । त्वां भावनाचक्षुषि वीक्ष्य काचित्तापं सखीनां द्विगुणीचकार ॥ ६ ॥
nirīkṣito'yaṃ sakhi paṅkajākṣaḥ puro mametyākulamālapantī | tvāṃ bhāvanācakṣuṣi vīkṣya kācittāpaṃ sakhīnāṃ dviguṇīcakāra || 6 ||
त्वदात्मिकास्ता यमुनातटान्ते तवानुचक्रुः किल चेष्टितानि । विचित्य भूयोऽपि तथैव मानात् त्वया वियुक्तां ददृशुश्च राधाम् ॥ ७ ॥
tvadātmikāstā yamunātaṭānte tavānucakruḥ kila ceṣṭitāni | vicitya bhūyo'pi tathaiva mānāt tvayā viyuktāṃ dadṛśuśca rādhām || 7 ||
ततः समं ता विपिने समन्तात्तमोवतारावधि मार्गयन्त्यः । पुनर्विमिश्रा यमुनातटान्ते भृशं विलेपुश्च जगुर्गुणांस्ते ॥ ८ ॥
tataḥ samaṃ tā vipine samantāttamovatārāvadhi mārgayantyaḥ | punarvimiśrā yamunātaṭānte bhṛśaṃ vilepuśca jagurguṇāṃste || 8 ||
तथाव्यथासंकुलमानसानां व्रजाङ्गनानां करुणैकसिन्धो । जगत्त्रयीमोहनमोहनात्मा त्वं प्रादुरासीरयि मन्दहासी ॥ ९ ॥
tathāvyathāsaṃkulamānasānāṃ vrajāṅganānāṃ karuṇaikasindho | jagattrayīmohanamohanātmā tvaṃ prādurāsīrayi mandahāsī || 9 ||
सन्दिग्धसन्दर्शनमात्मकान्तं त्वां वीक्ष्य तन्व्यस्सहसा तदानीम् । किं किं न चक्रुः प्रमदातिभारात् स त्वं गदात्पालय मारुतेश ॥ १० ॥
sandigdhasandarśanamātmakāntaṃ tvāṃ vīkṣya tanvyassahasā tadānīm | kiṃ kiṃ na cakruḥ pramadātibhārāt sa tvaṃ gadātpālaya māruteśa || 10 ||
Keys: ← → turn the page, J K step through the verses.
Illustration: Verse & Place (Project-owned).