Skip to content

दशकम् ७०

Iti tvayi rasākulaṃ ramitavallabhe …

Ten-verse prayers to Krishna of Guruvayur retelling the Bhagavata Purana.

10 versesSanskrit with transliteration

Guruvayurappan, Krishna of Guruvayur.

इति त्वयि रसाकुलं रमितवल्लभे वल्लवाः । कदापि पुनरम्बिकाकमितुरम्बिकाकानने । समेत्य भवता समं निशि निषेव्य दिव्योत्सवं । सुखं सुषुवुरग्रसीद्व्रजपमुग्रनागस्तदा ॥ १ ॥

iti tvayi rasākulaṃ ramitavallabhe vallavāḥ | kadāpi punarambikākamiturambikākānane | sametya bhavatā samaṃ niśi niṣevya divyotsavaṃ | sukhaṃ suṣuvuragrasīdvrajapamugranāgastadā || 1 ||

Report an error

समुन्मुखमथोन्मुकैरभिहतेऽपि तस्मिन्बला । दमुञ्चति भवत्पदे न्यपति पाहि पाहीति तैः । तदा खलु पदा भवान्समुपगम्य पस्पर्श तं । बभौ स च निजां तनुं समुपसाद्य वैद्याधरीम् ॥ २ ॥

samunmukhamathonmukairabhihate'pi tasminbalā | damuñcati bhavatpade nyapati pāhi pāhīti taiḥ | tadā khalu padā bhavānsamupagamya pasparśa taṃ | babhau sa ca nijāṃ tanuṃ samupasādya vaidyādharīm || 2 ||

Report an error

सुदर्शनधर प्रभो ननु सुदर्शनाख्योऽस्म्यहं । मुनीन्क्वचिदपाहसं त इह मां व्यधुर्वाहसम् । भवत्पदसमर्पणादमलतां गतोऽस्मीत्यसौ । स्तुवन्निजपदं ययौ व्रजपदं च गोपा मुदा ॥ ३ ॥

sudarśanadhara prabho nanu sudarśanākhyo'smyahaṃ | munīnkvacidapāhasaṃ ta iha māṃ vyadhurvāhasam | bhavatpadasamarpaṇādamalatāṃ gato'smītyasau | stuvannijapadaṃ yayau vrajapadaṃ ca gopā mudā || 3 ||

Report an error

कदापि खलु सीरिणा विहरति त्वयि स्त्रीजनै । र्जहार्धनदानुगः स किल शङ्खचूडोऽबलाः । अतिद्रुतमनुद्रुतस्तमथ मुक्तनारीजनं । रुरोजिथ शिरोमणिं हलभृते च तस्याददाः ॥ ४ ॥

kadāpi khalu sīriṇā viharati tvayi strījanai | rjahārdhanadānugaḥ sa kila śaṅkhacūḍo'balāḥ | atidrutamanudrutastamatha muktanārījanaṃ | rurojitha śiromaṇiṃ halabhṛte ca tasyādadāḥ || 4 ||

Report an error

दिनेषु च सुहृज्जनैः सह वनेषु लीलापरं । मनोभवमनोहरं रसितवेणुनादामृतम् । भवन्तममरीदृशाममृतपारणादायिनं । विचिन्त्य किमु नालपन् विरहतापिता गोपिकाः ॥ ५ ॥

dineṣu ca suhṛjjanaiḥ saha vaneṣu līlāparaṃ | manobhavamanoharaṃ rasitaveṇunādāmṛtam | bhavantamamarīdṛśāmamṛtapāraṇādāyinaṃ | vicintya kimu nālapan virahatāpitā gopikāḥ || 5 ||

Report an error

भोजराजभृतकस्त्वथ कश्चित्कष्टदुष्टपथदृष्टिररिष्टः । निष्ठुराकृतिरपष्ठुनिनादस्तिष्ठते स्म भवते वृषरूपी ॥ ६ ॥

bhojarājabhṛtakastvatha kaścitkaṣṭaduṣṭapathadṛṣṭirariṣṭaḥ | niṣṭhurākṛtirapaṣṭhuninādastiṣṭhate sma bhavate vṛṣarūpī || 6 ||

Report an error

शाक्वरोऽथ जगतीधृतिहारी मूर्तिमेष बृहतीं प्रदधानः । पङ्क्तिमाशु परिघूर्ण्य पशूनां छन्दसां निधिमवाप भवन्तम् ॥ ७ ॥

śākvaro'tha jagatīdhṛtihārī mūrtimeṣa bṛhatīṃ pradadhānaḥ | paṅktimāśu parighūrṇya paśūnāṃ chandasāṃ nidhimavāpa bhavantam || 7 ||

Report an error

तुङ्गशृङ्गमुखमाश्वभियन्तं ससंगृहय्य रभसादभियं तम् । भद्ररूपमपि दैत्यमभद्रं मर्दयन्नमदयः सुरलोकम् ॥ ८ ॥

tuṅgaśṛṅgamukhamāśvabhiyantaṃ sasaṃgṛhayya rabhasādabhiyaṃ tam | bhadrarūpamapi daityamabhadraṃ mardayannamadayaḥ suralokam || 8 ||

Report an error

चित्रमद्य भगवन् वृषघातात्सुस्थिराजनि वृषस्थितिरुर्व्याम् । वर्धते च वृषचेतसि भूयान्मोद इत्यभिनुतोऽसि सुरस्त्वम् ॥ ९ ॥

citramadya bhagavan vṛṣaghātātsusthirājani vṛṣasthitirurvyām | vardhate ca vṛṣacetasi bhūyānmoda ityabhinuto'si surastvam || 9 ||

Report an error

औक्षकाणि परिधावत दूरं वीक्ष्यतामयमिहोक्षविभेदी । इत्थमात्तहसितैः सह गोपैर्गेहगस्त्वमव वातपुरेश ॥ १० ॥

aukṣakāṇi paridhāvata dūraṃ vīkṣyatāmayamihokṣavibhedī | itthamāttahasitaiḥ saha gopairgehagastvamava vātapureśa || 10 ||

Report an error

Illustration: Verse & Place (Project-owned).