Skip to content

दशकम् ९२

Vaidaissarvāṇi karmāṇyaphalaparatayā varṇitānīti budhvā

Ten-verse prayers to Krishna of Guruvayur retelling the Bhagavata Purana.

10 versesSanskrit with transliteration

Guruvayurappan, Krishna of Guruvayur.

वैदैस्सर्वाणि कर्माण्यफलपरतया वर्णितानीति बुध्वा । तानि त्वय्यर्पितान्येव हि समनुचरन् यानि नैष्कर्म्यमीश । मा भूद्वेदैर्निषिद्धे कुहचिदपि मनःकर्मवाचाः प्रवृत्ति । र्दुर्वर्ज्जञ्चेदवाप्तं तदपि खलु भवत्यर्पये चित्प्रकाशे ॥ १ ॥

vaidaissarvāṇi karmāṇyaphalaparatayā varṇitānīti budhvā | tāni tvayyarpitānyeva hi samanucaran yāni naiṣkarmyamīśa | mā bhūdvedairniṣiddhe kuhacidapi manaḥkarmavācāḥ pravṛtti | rdurvarjjañcedavāptaṃ tadapi khalu bhavatyarpaye citprakāśe || 1 ||

Report an error

यस्त्वन्यः कर्मयोगस्तव भजनमयस्तत्र चाभीष्टमूर्तिं । हृद्यां सत्त्वैकरूपां दृषदि हृदि मृदि क्वापि वा भावयित्वा । पुष्पैर्गन्धैर्निवेद्यैरपि च विरचितैः शक्तितो भक्तिपूतै । र्नित्यं वर्यां सपर्यां विदधदयि विभो त्वत्प्रसादं भजेयम् ॥ २ ॥

yastvanyaḥ karmayogastava bhajanamayastatra cābhīṣṭamūrtiṃ | hṛdyāṃ sattvaikarūpāṃ dṛṣadi hṛdi mṛdi kvāpi vā bhāvayitvā | puṣpairgandhairnivedyairapi ca viracitaiḥ śaktito bhaktipūtai | rnityaṃ varyāṃ saparyāṃ vidadhadayi vibho tvatprasādaṃ bhajeyam || 2 ||

Report an error

स्त्रीशूद्रास्त्वत्कथादिश्रवणविरहिता आसतां ते दयार्हा । स्त्वत्पादासन्नयातान्द्विजकुलजनुषो हन्त शोचाम्यशान्तान् । वृत्त्यर्थं ते यजन्तो बहुकथितमपि त्वामनाकर्णयन्तो । दृप्ता विद्याभिजात्यैः किमु न विदधते तादृशः मा कृथा माम् ॥ ३ ॥

strīśūdrāstvatkathādiśravaṇavirahitā āsatāṃ te dayārhā | stvatpādāsannayātāndvijakulajanuṣo hanta śocāmyaśāntān | vṛttyarthaṃ te yajanto bahukathitamapi tvāmanākarṇayanto | dṛptā vidyābhijātyaiḥ kimu na vidadhate tādṛśaḥ mā kṛthā mām || 3 ||

Report an error

पपोऽयं कृष्ण रामेत्यभिलपति निजं गूहितुं दुश्चारित्रं । निर्लज्जस्यास्य वाचा बहुतरकथनीयानि मे विघ्नितानि । भ्राता मे वन्ध्यशीलो भजति किल सदा विष्णुमित्थं बुधांस्ते । निन्दन्त्युच्चैर्हसन्ति त्वयि निहितरतींस्तादृशं मा कृथा माम् ॥ ४ ॥

papo'yaṃ kṛṣṇa rāmetyabhilapati nijaṃ gūhituṃ duścāritraṃ | nirlajjasyāsya vācā bahutarakathanīyāni me vighnitāni | bhrātā me vandhyaśīlo bhajati kila sadā viṣṇumitthaṃ budhāṃste | nindantyuccairhasanti tvayi nihitaratīṃstādṛśaṃ mā kṛthā mām || 4 ||

Report an error

श्वेतच्छायं कृते त्वां मुनिवरवपुषं प्रीणयन्ते तपोभि । स्त्रेतायां स्रुक्स्रुवाद्यङ्कितमरुणतनुं यज्ञरूपं यजन्ते । सेवन्ते तन्त्रमार्गैर्विलसदरिगदं द्वापरे श्यामलाङ्गं । नीलं सङ्कीर्तनाद्यैरिह कलिसमये मानुषास्त्वां भजन्ते ॥ ५ ॥

śvetacchāyaṃ kṛte tvāṃ munivaravapuṣaṃ prīṇayante tapobhi | stretāyāṃ sruksruvādyaṅkitamaruṇatanuṃ yajñarūpaṃ yajante | sevante tantramārgairvilasadarigadaṃ dvāpare śyāmalāṅgaṃ | nīlaṃ saṅkīrtanādyairiha kalisamaye mānuṣāstvāṃ bhajante || 5 ||

Report an error

सोऽयं कालेयकालो जयति मुररिपो यत्र सङ्कीर्तनाद्यै । र्निर्यत्नैरेव मार्गैरखिलद नचिरात्त्वत्प्रसादं भजन्ते । जातास्त्रेताकृतादावपि हि किल कलौ सम्भवं कामयन्ते । दैवात्तत्रैव जातान्विषयविषरसैर्मा विभो वञ्चयास्मान् ॥ ६ ॥

so'yaṃ kāleyakālo jayati muraripo yatra saṅkīrtanādyai | rniryatnaireva mārgairakhilada nacirāttvatprasādaṃ bhajante | jātāstretākṛtādāvapi hi kila kalau sambhavaṃ kāmayante | daivāttatraiva jātānviṣayaviṣarasairmā vibho vañcayāsmān || 6 ||

Report an error

भक्तास्तावत्कलौ स्युर्द्रमिळभुवि ततो भूरिशस्तत्र चोच्चैः । कावेरीं ताम्रपर्णीमनुकिल धृतमालाञ्च पुण्यां प्रतीचीम् । हा मामप्येतदन्तर्भवमपि च विभो किञ्चिदञ्चिद्रसं त्व । य्याशापाशैर्निबध्य भ्रमय न भगवन् पूरय त्वन्निषेवाम् ॥ ७ ॥

bhaktāstāvatkalau syurdramil̤abhuvi tato bhūriśastatra coccaiḥ | kāverīṃ tāmraparṇīmanukila dhṛtamālāñca puṇyāṃ pratīcīm | hā māmapyetadantarbhavamapi ca vibho kiñcidañcidrasaṃ tva | yyāśāpāśairnibadhya bhramaya na bhagavan pūraya tvanniṣevām || 7 ||

Report an error

दृष्ट्वा धर्मद्रुहं तं कलिमपकरुणं प्राङ्महीक्षित्परीक्षि । द्धन्तुं व्याकृष्टखड्गोऽपि न विनिहतवान् सारवेदी गुणांशात् । त्वत्सेवाद्याशु सिध्येदसदिह न तथा त्वत्परे चैष भीरु । र्यत्तु प्रागेव रोगादिभिरपहरते तत्र हा शिक्षयैनम् ॥ ८ ॥

dṛṣṭvā dharmadruhaṃ taṃ kalimapakaruṇaṃ prāṅmahīkṣitparīkṣi | ddhantuṃ vyākṛṣṭakhaḍgo'pi na vinihatavān sāravedī guṇāṃśāt | tvatsevādyāśu sidhyedasadiha na tathā tvatpare caiṣa bhīru | ryattu prāgeva rogādibhirapaharate tatra hā śikṣayainam || 8 ||

Report an error

गङ्गा गीता च गायत्र्यपि च तुळसिका गोपिकाचन्दनं तत् । साळग्रामाभिपूजा परपुरुष तथैकादशी नामवर्णाः । एतान्यष्टाप्ययत्नान्ययि कलिसमये त्वत्प्रसादप्रवृद्ध्या । क्षिप्रं मुक्तिप्रदानीत्यभिदधुरृषयस्तेषु मां सज्जयेथाः ॥ ९ ॥

gaṅgā gītā ca gāyatryapi ca tul̤asikā gopikācandanaṃ tat | sāl̤agrāmābhipūjā parapuruṣa tathaikādaśī nāmavarṇāḥ | etānyaṣṭāpyayatnānyayi kalisamaye tvatprasādapravṛddhyā | kṣipraṃ muktipradānītyabhidadhurṛṣayasteṣu māṃ sajjayethāḥ || 9 ||

Report an error

देवर्षीणां पितॄणामपि न पुनरृणी किङ्गरो वा स भूमन् । योऽसौ सर्वात्मना त्वां शरणमुपगतः सर्वकृत्यानि हित्वा । तस्योत्पन्नं विकर्माप्यखिलमपनुदस्येव चित्तस्थितस्त्वं । तन्मे पापोत्थतापान्पवनपुरपते रुन्दि भक्तिं प्रणीयाः ॥ १० ॥

devarṣīṇāṃ pitṝṇāmapi na punarṛṇī kiṅgaro vā sa bhūman | yo'sau sarvātmanā tvāṃ śaraṇamupagataḥ sarvakṛtyāni hitvā | tasyotpannaṃ vikarmāpyakhilamapanudasyeva cittasthitastvaṃ | tanme pāpotthatāpānpavanapurapate rundi bhaktiṃ praṇīyāḥ || 10 ||

Report an error

Illustration: Verse & Place (Project-owned).