पटलः ७
Saptamaḥ paṭalaḥ
॥
A patala of the Niruttara Tantra.
37 verses·Sanskrit with transliteration
सप्तमः पटलः ।
श्रीदेव्युवाच - ।
भगवन् ! सर्व-जोवानां साक्षी त्वमति-हे प्रभो ! ।
अभिषेकं पुरा प्रोक्तं कीदृशं कथय प्रभो ॥ १ ॥
saptamaḥ paṭalaḥ |
śrīdevyuvāca - |
bhagavan ! sarva-jovānāṃ sākṣī tvamati-he prabho ! |
abhiṣekaṃ purā proktaṃ kīdṛśaṃ kathaya prabho || 1 ||
श्रीशिव उवाच - ।
अभिषेकं च द्विविधं राज्ञां च ज्ञानिनामपि ।
राजाभिषेकं देवेशि ! वैकादि-क्रियां चरेत् ॥ २ ॥
śrīśiva uvāca - |
abhiṣekaṃ ca dvividhaṃ rājñāṃ ca jñānināmapi |
rājābhiṣekaṃ deveśi ! vaikādi-kriyāṃ caret || 2 ||
ज्ञानिनामभिषेकं तु सर्व-तन्त्रेषु गोपितम् ।
कुल-चक्रं क्रमेणैव अभिषेकं चरेत् सुधीः ॥ ३ ॥
jñānināmabhiṣekaṃ tu sarva-tantreṣu gopitam |
kula-cakraṃ krameṇaiva abhiṣekaṃ caret sudhīḥ || 3 ||
कुल-नाथं गुरुं वीक्ष्य अभिषेकं गुरुश्चरेत् ।
सर्व-शान्ति-करं पुण्यं सर्व-रोग-निवारणं ॥ ४ ॥
kula-nāthaṃ guruṃ vīkṣya abhiṣekaṃ guruścaret |
sarva-śānti-karaṃ puṇyaṃ sarva-roga-nivāraṇaṃ || 4 ||
धनदं कामदं चैव आयुर्बुद्धि-करं नृणाम् ।
सर्व-सौभाग्य-जननं महा-पातक-नाशनम् ॥ ५ ॥
dhanadaṃ kāmadaṃ caiva āyurbuddhi-karaṃ nṛṇām |
sarva-saubhāgya-jananaṃ mahā-pātaka-nāśanam || 5 ||
सर्वाशा-पूरकं देवि ! मन्त्र-दोष-प्रणाशनम् ।
सर्वार्थ साधकं देवि ! धन-वृद्धि-करं परम् ॥ ६ ॥
sarvāśā-pūrakaṃ devi ! mantra-doṣa-praṇāśanam |
sarvārtha sādhakaṃ devi ! dhana-vṛddhi-karaṃ param || 6 ||
अभिचार-हरं सर्वं ग्रह-दोष-निवारणम् ।
भूतावेशादि-शमनं डाकिनीनां भयापहम् ॥ ७ ॥
abhicāra-haraṃ sarvaṃ graha-doṣa-nivāraṇam |
bhūtāveśādi-śamanaṃ ḍākinīnāṃ bhayāpaham || 7 ||
तेजो-वृद्धि-करं देवि ! सर्व-तीर्थ-फल-प्रदम् ।
स्त्री-गतेष्वपि दोषेषु शरीरे मानसे तथा ॥ ८ ॥
tejo-vṛddhi-karaṃ devi ! sarva-tīrtha-phala-pradam |
strī-gateṣvapi doṣeṣu śarīre mānase tathā || 8 ||
तक्षकेणापि दंष्टस्य विष-पीडा-विनाशनम् ।
तेजो-ह्रासे बले ह्रासे बुद्धि-ह्रासे धन-क्षये ॥ ९ ॥
takṣakeṇāpi daṃṣṭasya viṣa-pīḍā-vināśanam |
tejo-hrāse bale hrāse buddhi-hrāse dhana-kṣaye || 9 ||
विकारे देशिकः कुर्यादभिषेकं विचक्षणः ।
असौभाग्ये च नारीणामभिषेकः प्रवर्तते ॥ १० ॥
vikāre deśikaḥ kuryādabhiṣekaṃ vicakṣaṇaḥ |
asaubhāgye ca nārīṇāmabhiṣekaḥ pravartate || 10 ||
पूर्णाभिषेकी त्वनन्यानभिषेके प्रवर्तते ।
गुरुत्वं च लभेद् देवि ! कर्मणा चाभिषेकतः ॥ ११ ॥
pūrṇābhiṣekī tvananyānabhiṣeke pravartate |
gurutvaṃ ca labhed devi ! karmaṇā cābhiṣekataḥ || 11 ||
वैष्णवं गाणपत्यं च सौरः शैवः कुलेश्वरि ! ।
अभिषेकः प्रकुर्वीत शाक्तश्च कुल-भूषणः ॥ १२ ॥
vaiṣṇavaṃ gāṇapatyaṃ ca sauraḥ śaivaḥ kuleśvari ! |
abhiṣekaḥ prakurvīta śāktaśca kula-bhūṣaṇaḥ || 12 ||
मन्त्र-तन्त्रं च सर्वेषामभिषेकाद्धि सिध्यति ।
अभिषेकेण सर्वेषामधिकारी भवेद् ध्रुवम् ॥ १३ ॥
mantra-tantraṃ ca sarveṣāmabhiṣekāddhi sidhyati |
abhiṣekeṇa sarveṣāmadhikārī bhaved dhruvam || 13 ||
अभिषेक-कृतो विप्रो ब्रह्मत्वं लभते ध्रुवम् ।
अभिषेक-कृतः क्षत्री विप्र-धर्मत्वमागतः ॥ १४ ॥
abhiṣeka-kṛto vipro brahmatvaṃ labhate dhruvam |
abhiṣeka-kṛtaḥ kṣatrī vipra-dharmatvamāgataḥ || 14 ||
वैश्यः क्षत्रियतां याति शूद्रो वैश्यत्वमागतः ।
अभिषेकेण सर्वेबां बद्धोऽपि बद्धतां त्यजेत् ॥ १५ ॥
vaiśyaḥ kṣatriyatāṃ yāti śūdro vaiśyatvamāgataḥ |
abhiṣekeṇa sarvebāṃ baddho'pi baddhatāṃ tyajet || 15 ||
ब्राह्मणस्य सुरा-पाने ब्राह्मण्यं त्यजते क्षणात् ।
अभिषेक-कृते विप्रे सुरा-पानं विधीयते ॥ १६ ॥
brāhmaṇasya surā-pāne brāhmaṇyaṃ tyajate kṣaṇāt |
abhiṣeka-kṛte vipre surā-pānaṃ vidhīyate || 16 ||
आगमः पञ्चमो वेदः कुलमाश्रयः पार्वति ! ।
शिवोऽपि पञ्चमो वर्णः सिद्ध-विद्यां जपेद् यतः ॥ १७ ॥
āgamaḥ pañcamo vedaḥ kulamāśrayaḥ pārvati ! |
śivo'pi pañcamo varṇaḥ siddha-vidyāṃ japed yataḥ || 17 ||
सुवर्णत्वं परित्यज्य शिवत्वं सम्प्रजायते ।
अभिषेकं विना नैव ब्राह्मणः तु पिबेत् सुराम् ॥ १८ ॥
suvarṇatvaṃ parityajya śivatvaṃ samprajāyate |
abhiṣekaṃ vinā naiva brāhmaṇaḥ tu pibet surām || 18 ||
प्रगृह्य सिद्ध-विद्यां च सङ्केतज्ञस्ततो भवेत् ।
सङ्केतज्ञः कुलागारे नाभिषेकं समाचरेत् ॥ १९ ॥
pragṛhya siddha-vidyāṃ ca saṅketajñastato bhavet |
saṅketajñaḥ kulāgāre nābhiṣekaṃ samācaret || 19 ||
अभिषेक-कृतो मन्त्री कुल-पूजां समाचरेत् ।
कुल-पूजा-कृतो मन्त्री पितृ-भूमि समाश्रयेत् ॥ २० ॥
abhiṣeka-kṛto mantrī kula-pūjāṃ samācaret |
kula-pūjā-kṛto mantrī pitṛ-bhūmi samāśrayet || 20 ||
पितृ-भूमि-कृतं स्थानं एकाकी विहरेत् सदा ।
एकाकी विहरेद् वीरः प्रान्तरे च त्रिप्रान्तरे ॥ २१ ॥
pitṛ-bhūmi-kṛtaṃ sthānaṃ ekākī viharet sadā |
ekākī vihared vīraḥ prāntare ca triprāntare || 21 ||
तत्र सिद्धिं लभेद् देवि ! देवानामपि दुर्लभाम् ।
कुलाचारं विना देवि ! तन्त्र-मन्त्रं न सिद्धयति ॥ २२ ॥
tatra siddhiṃ labhed devi ! devānāmapi durlabhām |
kulācāraṃ vinā devi ! tantra-mantraṃ na siddhayati || 22 ||
सिद्ध-विद्या कुलागारे द्रुतं सिद्धचति निश्चितम् ।
अभिषेक-कृतो विप्रः सुरां दद्याद्युगे युगे ॥ २३ ॥
siddha-vidyā kulāgāre drutaṃ siddhacati niścitam |
abhiṣeka-kṛto vipraḥ surāṃ dadyādyuge yuge || 23 ||
सुरां पीत्वा जपेद् विद्यां कुलागारे विशेषतः ।
विजया चानुकल्पं च सुराभावे निवेदयेत् ॥ २४ ॥
surāṃ pītvā japed vidyāṃ kulāgāre viśeṣataḥ |
vijayā cānukalpaṃ ca surābhāve nivedayet || 24 ||
आनन्देन विना भ्रंशो न च तृप्पन्ति देवताः ।
पञ्चमेनार्चयेत् कालीं कामाख्यायां विशेषतः ॥ २५ ॥
ānandena vinā bhraṃśo na ca tṛppanti devatāḥ |
pañcamenārcayet kālīṃ kāmākhyāyāṃ viśeṣataḥ || 25 ||
कामाख्यायां विशेषेण कालिका सिद्धिदा भवेत् ।
कुलाचारं विना देवि! काली-मन्त्रः न सिद्धयति ॥ २६ ॥
kāmākhyāyāṃ viśeṣeṇa kālikā siddhidā bhavet |
kulācāraṃ vinā devi! kālī-mantraḥ na siddhayati || 26 ||
अभिषेकं विना देवि ! कुल-कर्म करोति यः ।
तस्य पूजादिकं कर्म चाभिचाराय कल्प्यते ॥ २७ ॥
abhiṣekaṃ vinā devi ! kula-karma karoti yaḥ |
tasya pūjādikaṃ karma cābhicārāya kalpyate || 27 ||
अभिषेकं विना देवि ! सिद्ध-विद्यां ददाति यः ।
तावत् कालं वसेद् घोरे यावच्चन्द्र-दिवाकरौ ॥ २८ ॥
abhiṣekaṃ vinā devi ! siddha-vidyāṃ dadāti yaḥ |
tāvat kālaṃ vased ghore yāvaccandra-divākarau || 28 ||
ब्रह्मत्वं च हरित्वं च शिवत्वं च कुलेश्वरि ! ।
दिव्यो वीरश्च देवेशि ! कुल-भक्ति-परायणः ।
अभिषेकं चरेद् धीमान् मोक्षार्थी कुल-कर्मसु ॥ २९ ॥
brahmatvaṃ ca haritvaṃ ca śivatvaṃ ca kuleśvari ! |
divyo vīraśca deveśi ! kula-bhakti-parāyaṇaḥ |
abhiṣekaṃ cared dhīmān mokṣārthī kula-karmasu || 29 ||
विमुखः कुल-धर्मेषु कुल-द्रव्य-परायणः ।
स याति नरकं घोरं काकं वा पर-जन्मनि ॥ ३० ॥
vimukhaḥ kula-dharmeṣu kula-dravya-parāyaṇaḥ |
sa yāti narakaṃ ghoraṃ kākaṃ vā para-janmani || 30 ||
तस्मात् सर्व-प्रयत्नेन अभिषेकं समाचरेत् ।
अभिषेकं चरेद् देवि ! अधिवास-पुरःसरम् ॥ ३१ ॥
tasmāt sarva-prayatnena abhiṣekaṃ samācaret |
abhiṣekaṃ cared devi ! adhivāsa-puraḥsaram || 31 ||
वृद्धि-श्राद्धं ततः कुर्याच्छिव-शक्तिं प्रपूजयेत् ।
गुरुं सम्पूज्य विधिवत् स्वर्णालङ्कार-भूषणैः ॥ ३२ ॥
vṛddhi-śrāddhaṃ tataḥ kuryācchiva-śaktiṃ prapūjayet |
guruṃ sampūjya vidhivat svarṇālaṅkāra-bhūṣaṇaiḥ || 32 ||
ततः सङ्कल्प-विधिना गुरूणां वरणं चरेत् ।
ततः पूजां चरेद् देव्यां पञ्चमैश्च पृथक् पृथक् ॥ ३३ ॥
tataḥ saṅkalpa-vidhinā gurūṇāṃ varaṇaṃ caret |
tataḥ pūjāṃ cared devyāṃ pañcamaiśca pṛthak pṛthak || 33 ||
प्रणम्य सद्गुरुं देव-देवीं च साधकेश्वरः ।
गुरु-पूजां विधायाथ देव्या ध्यानपरायणः ॥ ३४ ॥
praṇamya sadguruṃ deva-devīṃ ca sādhakeśvaraḥ |
guru-pūjāṃ vidhāyātha devyā dhyānaparāyaṇaḥ || 34 ||
अभिषेकं विधायाथ शुचौ देशे च देशिकः ।
शून्यागारे नदी-तीरे बिल्व-मूले त्रिपान्तरे ॥ ३५ ॥
abhiṣekaṃ vidhāyātha śucau deśe ca deśikaḥ |
śūnyāgāre nadī-tīre bilva-mūle tripāntare || 35 ||
महा-त्रिपान्तरे वापि निर्जने पितृकानने ।
ग्रामे पातालके वापि पर्वते तटिनी-तटे ॥ ३६ ॥
mahā-tripāntare vāpi nirjane pitṛkānane |
grāme pātālake vāpi parvate taṭinī-taṭe || 36 ||
देवतायतने वापी स्थानं परिचिन्तयेत् ॥ ३७ ॥
devatāyatane vāpī sthānaṃ paricintayet || 37 ||
Keys: ← → turn the page, J K step through the verses.
Illustration: Verse & Place (Project-owned).