मे॑धा⟦म्⟧ म॑ह्यम् अ॑ङ्गिरसो मे॑धां सप्त॑र्षयो ददुः । मे॑धाम् इ॑न्द्रश् चाग्नि॑श् च मे॑धान् धाता॑ दधातु मे ।
médhā⟦m⟧ máhyam áṅgiraso médhāṃ saptárṣayo daduḥ | médhām índraś cāgníś ca médhān dhātā́ dadhātu me |
अध्यायः ४ • खिलसूक्तम् ८
Sanskrit from the selected Khilani edition, with IAST and source accents.
9 passagesSanskrit with transliteration
मे॑धा⟦म्⟧ म॑ह्यम् अ॑ङ्गिरसो मे॑धां सप्त॑र्षयो ददुः । मे॑धाम् इ॑न्द्रश् चाग्नि॑श् च मे॑धान् धाता॑ दधातु मे ।
médhā⟦m⟧ máhyam áṅgiraso médhāṃ saptárṣayo daduḥ | médhām índraś cāgníś ca médhān dhātā́ dadhātu me |
मे॑धां मे व॑रुणो राजा॑ मे॑धान् देवी॑ स॑रस्वती । मे॑धाम् मे अश्वि॑नौ देवा॑व् आ॑ धत्तं पु॑ष्करस्रजा ।
médhāṃ me váruṇo rājā́ médhān devī́ sárasvatī | médhām me aśvínau devā́v ā́ dhattaṃ púṣkarasrajā |
या॑ मे॑धाप्सर॑स्सु गन्धर्वे॑षु च य॑न् म॑नः । दइ॑वी या॑ मा॑नुषी मे॑धा सा॑ माम् आ॑ विशताद् इह॑ ।
yā́ médhāpsarássu gandharvéṣu ca yán mánaḥ | daívī yā́ mā́nuṣī médhā sā́ mām ā́ viśatād ihá |
य॑न् मेनू॑क्तं त॑द् रमतां श॑केयं य्य॑द् अनुब्रुवे॑ । नि॑शामितं नि॑ शामये म॑यि श्रुत॑म् । सह॑ व्रतेन भूयासं ब्र॑ह्मणा स॑ङ् गमेमहि ।
yán menū́ktaṃ tád ramatāṃ śákeyaṃ yyád anubruvé | níśāmitaṃ ní śāmaye máyi śrutám | sahá vratena bhūyāsaṃ bráhmaṇā sáṅ gamemahi |
श॑रीरम् मे विचक्षण वा॑ङ् मे म॑धुमद् दुहे । अ॑वृधम् अह॑म् असउ॑ सू॑र्यो ब्र॑ह्मण आणी॑स् स्थ । श्रुत॑म् मे मा॑ प्र॑ हासीः ॥ १६ ॥
śárīram me vicakṣaṇa vā́ṅ me mádhumad duhe | ávṛdham ahám asaú sū́ryo bráhmaṇa āṇī́s stha | śrutám me mā́ prá hāsīḥ || 16 ||
मे॑धां देवीं॑ म॑नसा रे॑जमानां गन्धर्व॑जुष्टां प्र॑ति नो जुषस्व । म॑ह्यं मे॑धां वद म॑ह्यं श्रि॑यं व्वद मे॑धावी॑ भूयासम् अजि॑राचरिष्णुः॑ ।
médhāṃ devī́ṃ mánasā réjamānāṃ gandharvájuṣṭāṃ práti no juṣasva | máhyaṃ médhāṃ vada máhyaṃ śríyaṃ vvada médhāvī́ bhūyāsam ajírācariṣṇúḥ |
स॑दसस्प॑तिम् अ॑द्भुतं प्रिय॑म् इ॑न्द्रस्य का॑म्यम् । सनि॑म् मे॑धाम् अयासिषम् ।
sádasaspátim ádbhutaṃ priyám índrasya kā́myam | saním médhām ayāsiṣam |
मेधा॑व्य् अहं॑ सुम॑नास् सुप्र॑तीकश् श्रद्धा॑मनास् सत्य॑मतिस् सुशे॑वः । महायशा॑ धारयि॑ष्णुᳵ प्रवक्ता॑ भूया॑सम् अस्येश्वर॑या प्रयोगे॑ ।
medhā́vy aháṃ sumánās suprátīkaś śraddhā́manās satyámatis suśévaḥ | mahāyaśā́ dhārayíṣṇuh̬ pravaktā́ bhūyā́sam asyeśvaráyā prayogé |
यां॑ मे॑धान् देवगणाः॑ पित॑रश् चो॑पासते । तया मा॑म् अद्य॑ मेधया॑ग्ने मेधावि॑नं कुरु ॥ १७ ॥
yā́ṃ médhān devagaṇā́ḥ pitáraś cópāsate | tayā mā́m adyá medhayā́gne medhāvínaṃ kuru || 17 ||
Keys: ← → turn the page, J K step through the verses.
Illustration: Verse & Place (Project-owned).