Skip to content

सर्गः ८

Aṣṭamaḥ sargaḥ

A canto of the life of Madhvacharya.

54 versesSanskrit with transliteration

Madhvacharya as a young ascetic at Udupi, the image of Krishna beside him.

अष्टमः सर्गः । प्रतिभाप्रभाप्र {प्रतिभाप्रभाव} मुखसद्गुणैर्निजैरतिविस्मयं नियमिनां मनो नयन् । पुरुधीः कदाचिदथ वेदनायकं विजने शनैरुपससाद तं वने ॥ १ ॥

aṣṭamaḥ sargaḥ | pratibhāprabhāpra {pratibhāprabhāva} mukhasadguṇairnijairativismayaṃ niyamināṃ mano nayan | purudhīḥ kadācidatha vedanāyakaṃ vijane śanairupasasāda taṃ vane || 1 ||

Report an error

सुविशेषशेषवदशेषवर्णितप्रतिबोद्धुरस्य ननु शिष्यतोचिता । गुरुमानसस्य गुरुतापि सत्पतेरिति सोपसत्तिरमरैरमान्यत ॥ २ ॥

suviśeṣaśeṣavadaśeṣavarṇitapratiboddhurasya nanu śiṣyatocitā | gurumānasasya gurutāpi satpateriti sopasattiramarairamānyata || 2 ||

Report an error

पुर एव पूरितमपूरयत् पुनर्ननु कृष्ण एष परमार्थसङ्ख्यया । भगवन्मनः पुरमिवायतं पुरा निजधाम तां च जगृहे तदद्भुतम् ॥ ३ ॥

pura eva pūritamapūrayat punarnanu kṛṣṇa eṣa paramārthasaṅkhyayā | bhagavanmanaḥ puramivāyataṃ purā nijadhāma tāṃ ca jagṛhe tadadbhutam || 3 ||

Report an error

इतिहाससुन्दरपुराणसूत्रसत्प्रियपञ्चरात्रनिजभावसंयुतम् । अशृणोदनन्तहृदनन्ततोऽचिरात् परमार्थमप्यगणितागमावलेः ॥ ४ ॥

itihāsasundarapurāṇasūtrasatpriyapañcarātranijabhāvasaṃyutam | aśṛṇodanantahṛdanantato'cirāt paramārthamapyagaṇitāgamāvaleḥ || 4 ||

Report an error

ऋजुपुङ्गवस्य परिजानतः स्वयं सकलं तदप्यलमनन्तजन्मसु । स्वकृतोर्वनुग्रहबलादमुष्य तां विशिशेष शेषशयनः पुनर्धियम् ॥ ५ ॥

ṛjupuṅgavasya parijānataḥ svayaṃ sakalaṃ tadapyalamanantajanmasu | svakṛtorvanugrahabalādamuṣya tāṃ viśiśeṣa śeṣaśayanaḥ punardhiyam || 5 ||

Report an error

अथ बादरायणसहायसम्पदा प्रययौ प्रणेतु {प्रणन्तु} ममितान्तरो युतः । अपि नादिरायणपदोदितं हरेर्वपुरन्तरं लसितमाश्रमान्तरे ॥ ६ ॥

atha bādarāyaṇasahāyasampadā prayayau praṇetu {praṇantu} mamitāntaro yutaḥ | api nādirāyaṇapadoditaṃ harervapurantaraṃ lasitamāśramāntare || 6 ||

Report an error

तमपश्यदाश्रमवरे प्रभूतधीर्ज्वलनं ज्वलन्तमिव धूमवर्जितम् । वरवल्कलाकलितमौञ्जिमेखलं विलसज्जटावलयमादिपूरुषम् ॥ ७ ॥

tamapaśyadāśramavare prabhūtadhīrjvalanaṃ jvalantamiva dhūmavarjitam | varavalkalākalitamauñjimekhalaṃ vilasajjaṭāvalayamādipūruṣam || 7 ||

Report an error

अतिदुर्जयेन्द्रियजयादिरूपिणा तपसा वसन्तमिव सन्ततं वने । निजरूपभूतनिरपेक्षनिर्मलप्रचुरात्मसौख्यरतमप्यनारतम् ॥ ८ ॥

atidurjayendriyajayādirūpiṇā tapasā vasantamiva santataṃ vane | nijarūpabhūtanirapekṣanirmalapracurātmasaukhyaratamapyanāratam || 8 ||

Report an error

नयनद्वयेन नलिनप्रभामुषा परिफुल्लताविलसितेन विस्मयात् । तमवेक्ष्य धर्मजमधर्मदुर्लभं मनसेति भूरितरमानसोऽस्मरत् ॥ ९ ॥

nayanadvayena nalinaprabhāmuṣā pariphullatāvilasitena vismayāt | tamavekṣya dharmajamadharmadurlabhaṃ manaseti bhūritaramānaso'smarat || 9 ||

Report an error

जगतां चतुर्दशतयं चतुर्मुखप्रमुखैर्युतं प्रलयमानिनाय यः । सममुल्लसन् कमलयैव केवलं परमः स एष हि पुराणपूरुषः ॥ १० ॥

jagatāṃ caturdaśatayaṃ caturmukhapramukhairyutaṃ pralayamānināya yaḥ | samamullasan kamalayaiva kevalaṃ paramaḥ sa eṣa hi purāṇapūruṣaḥ || 10 ||

Report an error

त्रिगुणाकृतिप्रकृतितो महत्ततस्त्रिविधामहङ्कृतिममर्त्यखान्यतः । अपि भूतपञ्चकमितोऽण्डमण्डलं भगवानसाविह जगन्ति चासृजत् ॥ ११ ॥

triguṇākṛtiprakṛtito mahattatastrividhāmahaṅkṛtimamartyakhānyataḥ | api bhūtapañcakamito'ṇḍamaṇḍalaṃ bhagavānasāviha jaganti cāsṛjat || 11 ||

Report an error

विधिवायुवीन्द्रशिवकौशिकेशकानमरामरानुगनरासुरादिकान् । सृजति प्रपालयति हन्ति सन्ततं स्वगतिं प्रयापयति चैष लीलया ॥ १२ ॥

vidhivāyuvīndraśivakauśikeśakānamarāmarānuganarāsurādikān | sṛjati prapālayati hanti santataṃ svagatiṃ prayāpayati caiṣa līlayā || 12 ||

Report an error

अगणेय {अगणय्य}सद्गुणगणो विदूषणः स्ववशाखिलोऽप्यनुपचारतः स्वयम् । स्मृतिकीर्तनप्रणतिभिर्विमुक्तये स्वजनस्य यात्ययमनेकरूपताम् ॥ १३ ॥

agaṇeya {agaṇayya}sadguṇagaṇo vidūṣaṇaḥ svavaśākhilo'pyanupacārataḥ svayam | smṛtikīrtanapraṇatibhirvimuktaye svajanasya yātyayamanekarūpatām || 13 ||

Report an error

चतुराननाय चतुरः पुराऽऽगमान् प्रददावसावनिमिषेश्वरः प्रभुः । विनिहत्य हि श्रुतिमुषं पुरातनं वपुषोद्धतं हयमुखेन सद्रिपुम् ॥ १४ ॥

caturānanāya caturaḥ purā''gamān pradadāvasāvanimiṣeśvaraḥ prabhuḥ | vinihatya hi śrutimuṣaṃ purātanaṃ vapuṣoddhataṃ hayamukhena sadripum || 14 ||

Report an error

अमरेन्द्रवैरिभुजदण्डमण्डलप्रतिकर्षपुष्करपतद्धरोद्धृतिः । विदधे वराहवपुषाऽमुनोर्मिमत्सृतिसिन्धुकच्छपतयाऽऽप्तरक्षिणा ॥ १५ ॥

amarendravairibhujadaṇḍamaṇḍalapratikarṣapuṣkarapataddharoddhṛtiḥ | vidadhe varāhavapuṣā'munormimatsṛtisindhukacchapatayā''ptarakṣiṇā || 15 ||

Report an error

नरसिंह एष विददार दारुणं प्रतिघोदये नखरचक्रतेजसा । स्वरिपुं क्षणेन सरसः स्फुरत्तनुं पृथुसत्तवमिष्टजनभीतिभञ्जनः ॥ १६ ॥

narasiṃha eṣa vidadāra dāruṇaṃ pratighodaye nakharacakratejasā | svaripuṃ kṣaṇena sarasaḥ sphurattanuṃ pṛthusattavamiṣṭajanabhītibhañjanaḥ || 16 ||

Report an error

अपि वामनो ललितबाल्यवानयं प्रतिभाबलेन कृतदैत्यकौतुकः । उपधेरधः कृतबलीन्द्रशात्रवः स्वजनाय केवलमदात् परं पदम् ॥ १७ ॥

api vāmano lalitabālyavānayaṃ pratibhābalena kṛtadaityakautukaḥ | upadheradhaḥ kṛtabalīndraśātravaḥ svajanāya kevalamadāt paraṃ padam || 17 ||

Report an error

कथयन्त्यमुं परशुभासमानगोहतमर्त्यदेवतमसं मुहुर्मुहुः । जगतां हितं हरिमिवापरं हरिं गुरुशक्तितापसवरान्वयोद्भवम् ॥ १८ ॥

kathayantyamuṃ paraśubhāsamānagohatamartyadevatamasaṃ muhurmuhuḥ | jagatāṃ hitaṃ harimivāparaṃ hariṃ guruśaktitāpasavarānvayodbhavam || 18 ||

Report an error

करुणाकरः स वसुदेवमोददो भगवान् पुरा हिमकरान्वयेऽभवत् । जितवान् दिशो दशरथोग्र्यसम्पदो जनको बभूव भुवि यस्य वैरिहा ॥ १९ ॥

karuṇākaraḥ sa vasudevamodado bhagavān purā himakarānvaye'bhavat | jitavān diśo daśarathogryasampado janako babhūva bhuvi yasya vairihā || 19 ||

Report an error

भुजगेश्वरोऽपि भुवनेश्वरप्रियः समजन्यथारिदरजन्मभुव्यभूत् । तममुष्य कान्तिविजितेन्दुमग्रजं रमणीयमाहुरिह रामनामकम् ॥ २० ॥

bhujageśvaro'pi bhuvaneśvarapriyaḥ samajanyathāridarajanmabhuvyabhūt | tamamuṣya kāntivijitendumagrajaṃ ramaṇīyamāhuriha rāmanāmakam || 20 ||

Report an error

जनकेन सोऽथ विरहासहिष्णुना मुहुरीक्षितो वनमनीयत प्रभुः । चकितेन दुष्टजनतस्तपस्विना तत आसुरीं निशिचरीं जघान सः ॥ २१ ॥

janakena so'tha virahāsahiṣṇunā muhurīkṣito vanamanīyata prabhuḥ | cakitena duṣṭajanatastapasvinā tata āsurīṃ niśicarīṃ jaghāna saḥ || 21 ||

Report an error

मुनिसप्ततन्तुकृतवैरबन्धनं कटुकेश्यरिष्टपदमुख्यदुर्जनम् । क्षपयन्तमुद्यतसुबाहुमाहवे तमथाभ्यनन्ददमरादिसद्गणः ॥ २२ ॥

munisaptatantukṛtavairabandhanaṃ kaṭukeśyariṣṭapadamukhyadurjanam | kṣapayantamudyatasubāhumāhave tamathābhyanandadamarādisadgaṇaḥ || 22 ||

Report an error

सवने विकस्वरगुणस्वरद्विजे स्फुरिते चरन् सकलगोकुलप्रियः । इतकामतापसरसार्द्रधीगिरः प्रतिलालयन्नरमतैष सुन्दरीः ॥ २३ ॥

savane vikasvaraguṇasvaradvije sphurite caran sakalagokulapriyaḥ | itakāmatāpasarasārdradhīgiraḥ pratilālayannaramataiṣa sundarīḥ || 23 ||

Report an error

सहजान्वितः सकलमित्रसंयुतो मधुरां पुरीं जनकवल्लभां गतः । प्रविशन्निमां स जगदेकसुन्दरो नरनार्युदारनयनोत्सवोऽभवत् ॥ २४ ॥

sahajānvitaḥ sakalamitrasaṃyuto madhurāṃ purīṃ janakavallabhāṃ gataḥ | praviśannimāṃ sa jagadekasundaro naranāryudāranayanotsavo'bhavat || 24 ||

Report an error

अथ खण्डितेश्वरधनुः स लीलया क्षपितोग्रसेननृपपुत्रपौरुषः । समुपास्य विप्रगुरुमब्जभूगुरुः स्वजनानमोदयदमेयतेजसा ॥ २५ ॥

atha khaṇḍiteśvaradhanuḥ sa līlayā kṣapitograsenanṛpaputrapauruṣaḥ | samupāsya vipragurumabjabhūguruḥ svajanānamodayadameyatejasā || 25 ||

Report an error

कमलामयं कमलपत्रलोचनां भुवमागतां नृपसुतां गृहीतवान् । निजलीलया विजितराजशात्रवो मुदमापदाप्य पुरमब्धिदुर्गमम् ॥ २६ ॥

kamalāmayaṃ kamalapatralocanāṃ bhuvamāgatāṃ nṛpasutāṃ gṛhītavān | nijalīlayā vijitarājaśātravo mudamāpadāpya puramabdhidurgamam || 26 ||

Report an error

स जगाम मातृजनतुष्टये किल त्वरितोवनं {त्वरितोऽवनं} विदधदीप्सितं सताम् । सह भार्ययाऽपि शुभया महाजयध्वजलक्ष्मणाग्र्यसुहृदा विना मुदा ॥ २७ ॥

sa jagāma mātṛjanatuṣṭaye kila tvaritovanaṃ {tvarito'vanaṃ} vidadhadīpsitaṃ satām | saha bhāryayā'pi śubhayā mahājayadhvajalakṣmaṇāgryasuhṛdā vinā mudā || 27 ||

Report an error

समतीतपर्वतपुरोगदुर्गमः खरदूषणादिसुजनद्विषो बहून् । स निहत्य विश्वभयदं सुदुःसहं नरकं महातम उपानयत् क्रमात् ॥ २८ ॥

samatītaparvatapurogadurgamaḥ kharadūṣaṇādisujanadviṣo bahūn | sa nihatya viśvabhayadaṃ suduḥsahaṃ narakaṃ mahātama upānayat kramāt || 28 ||

Report an error

रुचिराश्रमाजिरचिताग्र्यतेजसा प्रियया प्रियो भुवनमान्यया समम् । भृशमाकुलीकृतमदप्रमादवत्सुरपारिजातहृदवाप धाम सः ॥ २९ ॥

rucirāśramājiracitāgryatejasā priyayā priyo bhuvanamānyayā samam | bhṛśamākulīkṛtamadapramādavatsurapārijātahṛdavāpa dhāma saḥ || 29 ||

Report an error

हरितामधीशनरदेवमण्डलं दशकं विजित्य परभीषणं मुहुः । स्फुरितामिह प्रियतमां निजश्रियं भगवानुपैक्षत हरन्तमप्रियम् ॥ ३० ॥

haritāmadhīśanaradevamaṇḍalaṃ daśakaṃ vijitya parabhīṣaṇaṃ muhuḥ | sphuritāmiha priyatamāṃ nijaśriyaṃ bhagavānupaikṣata harantamapriyam || 30 ||

Report an error

अभिवन्दितः पवननन्दनादिभिः स कदाचिदिन्द्रसुतवर्धको गवा । निजराज्यमात्मदयिताय दत्तवान् हरिसूनवे हतविपक्षमुत्तमम् ॥ ३१ ॥

abhivanditaḥ pavananandanādibhiḥ sa kadācidindrasutavardhako gavā | nijarājyamātmadayitāya dattavān harisūnave hatavipakṣamuttamam || 31 ||

Report an error

मुदमाप्य तत्र दयितोरुवार्तया मधुहा मरुत्सुतमुखप्रवृत्तया । हरितिग्मचक्रलसितोऽब्धिमध्यगं प्रययौ स पुण्यजनसेवितं पुरम् ॥ ३२ ॥

mudamāpya tatra dayitoruvārtayā madhuhā marutsutamukhapravṛttayā | haritigmacakralasito'bdhimadhyagaṃ prayayau sa puṇyajanasevitaṃ puram || 32 ||

Report an error

पृथुकुम्भकर्णगजराजमुद्धतं ससहोदरं सविबुधेन्द्रशात्रवम् । धरणीभरं पृथुलचक्रमक्षिणोन्निशितेषुचक्रकृतविक्रमः प्रभुः ॥ ३३ ॥

pṛthukumbhakarṇagajarājamuddhataṃ sasahodaraṃ savibudhendraśātravam | dharaṇībharaṃ pṛthulacakramakṣiṇonniśiteṣucakrakṛtavikramaḥ prabhuḥ || 33 ||

Report an error

अथ भार्यया हुतवहं प्रविष्टया सहितः सहोदरपुरःसरैरपि । अयमाप्य धाम चिरमिष्टदः सतां निजमूलरूपपरमैक्यमेयिवान् ॥ ३४ ॥

atha bhāryayā hutavahaṃ praviṣṭayā sahitaḥ sahodarapuraḥsarairapi | ayamāpya dhāma ciramiṣṭadaḥ satāṃ nijamūlarūpaparamaikyameyivān || 34 ||

Report an error

महिदासपूज्यचरणो द्विजादभूद्विदितात् स विष्णुयशसोऽमलात्मनः । इह यो दधे जगति पापशान्तये बहुधामहेतिमतिदीप्तगोस्थितिम् ॥ ३५ ॥

mahidāsapūjyacaraṇo dvijādabhūdviditāt sa viṣṇuyaśaso'malātmanaḥ | iha yo dadhe jagati pāpaśāntaye bahudhāmahetimatidīptagosthitim || 35 ||

Report an error

सुतपोरुचेरयमपापकर्दमान्ननु मानवीतनयतामुपेयिवान् । समयेन भूरिनिजभक्तिपूरितान् समजीजनत् सुमनसः स देवराट् ॥ ३६ ॥

sutaporucerayamapāpakardamānnanu mānavītanayatāmupeyivān | samayena bhūrinijabhaktipūritān samajījanat sumanasaḥ sa devarāṭ || 36 ||

Report an error

सुबृहत्पयोधरमिथःप्रसंहतिप्रकटीभवत्परमयौवनाकृतिः । असुराहितां वरविलासिनीतनुः प्रददावमुष्य सुरराशये सुधाम् ॥ ३७ ॥

subṛhatpayodharamithaḥprasaṃhatiprakaṭībhavatparamayauvanākṛtiḥ | asurāhitāṃ varavilāsinītanuḥ pradadāvamuṣya surarāśaye sudhām || 37 ||

Report an error

सुजनाय दत्तपद आत्मशुद्धिदः सुकुमाररूप्यभवदेष शाश्वतः । अनसूयया शुचिमनीषया धृतः परमादरेण मुनिपुङ्गवोड्हया ॥ ३८ ॥

sujanāya dattapada ātmaśuddhidaḥ sukumārarūpyabhavadeṣa śāśvataḥ | anasūyayā śucimanīṣayā dhṛtaḥ paramādareṇa munipuṅgavoḍhayā || 38 ||

Report an error

दयितः सतामृषभ एष भूधरो वपुरुद्वहन् परमहंसलक्षणम् । व्यहरद्वलक्षतमपक्षशोभनं परतत्तवलिप्सुसनकादिवन्दितः ॥ ३९ ॥

dayitaḥ satāmṛṣabha eṣa bhūdharo vapurudvahan paramahaṃsalakṣaṇam | vyaharadvalakṣatamapakṣaśobhanaṃ paratattavalipsusanakādivanditaḥ || 39 ||

Report an error

उदपादि धर्मतनयो ह्ययं हरिर्नरदेवसोदर उदारविक्रमः । अपि कृष्ण इत्यभिहितो मुदे सतां स्वयमेव यस्य सहजो व्यजायत ॥ ४० ॥

udapādi dharmatanayo hyayaṃ harirnaradevasodara udāravikramaḥ | api kṛṣṇa ityabhihito mude satāṃ svayameva yasya sahajo vyajāyata || 40 ||

Report an error

परमात्मने सततमेकरूपिणे दशरूपिणे शतसहस्ररूपिणे । अविकारिणे स्फुटमनन्तरूपिणे सुखचित्समस्ततनवे नमो नमः ॥ ४१ ॥

paramātmane satatamekarūpiṇe daśarūpiṇe śatasahasrarūpiṇe | avikāriṇe sphuṭamanantarūpiṇe sukhacitsamastatanave namo namaḥ || 41 ||

Report an error

इति चिन्तयन्नविरलान्तरो हरिं प्रणनाम सप्रणयमादृतोऽमुना । अजितौ परस्परसभाजितौ स तौ निकषा निषीदति पुरोपवेशिनौ ॥ ४२ ॥

iti cintayannaviralāntaro hariṃ praṇanāma sapraṇayamādṛto'munā | ajitau parasparasabhājitau sa tau nikaṣā niṣīdati puropaveśinau || 42 ||

Report an error

विविधा विधाय किल तत्र सङ्कथा वदनं मुनीन्द्रतनयस्य सुन्दरम् । अवलोक्य लोकपतिरानतं महासुखतीर्थमाह रहसि स्म गामिमाम् ॥ ४३ ॥

vividhā vidhāya kila tatra saṅkathā vadanaṃ munīndratanayasya sundaram | avalokya lokapatirānataṃ mahāsukhatīrthamāha rahasi sma gāmimām || 43 ||

Report an error

शृणु देवकार्यमवधार्य धैर्यवान् मदुदीर्यमाणमिदमार्यसम्मतम् । भविताऽन्यदुष्करतरं विधाय यत्तरुणं तवावतरणं महाफलम् ॥ ४४ ॥

śṛṇu devakāryamavadhārya dhairyavān madudīryamāṇamidamāryasammatam | bhavitā'nyaduṣkarataraṃ vidhāya yattaruṇaṃ tavāvataraṇaṃ mahāphalam || 44 ||

Report an error

अपिधाय सूत्रहृदयं सतां प्रियं प्रविधाय भाष्यमधुना निजेच्छया । अपरैः श्रुतिस्मृतिनिजार्थदूषकैः सुतरां तिरोभवति संविदाहता ॥ ४५ ॥

apidhāya sūtrahṛdayaṃ satāṃ priyaṃ pravidhāya bhāṣyamadhunā nijecchayā | aparaiḥ śrutismṛtinijārthadūṣakaiḥ sutarāṃ tirobhavati saṃvidāhatā || 45 ||

Report an error

अपनेतुमेनमनयं कृतं खलैः प्रतिनेतुमात्मजनतां शुभां गतिम् । कुरु सूत्रभाष्यमविलम्बितं व्रजेः सुमतेन योजय कवे श्रुतिस्मृतीः ॥ ४६ ॥

apanetumenamanayaṃ kṛtaṃ khalaiḥ pratinetumātmajanatāṃ śubhāṃ gatim | kuru sūtrabhāṣyamavilambitaṃ vrajeḥ sumatena yojaya kave śrutismṛtīḥ || 46 ||

Report an error

अमितां मितामपि गिरं जगद्गुरोरिति तां निशम्य विरलेतरान्तरः । वदतां वरस्तमवदत् तदा तयोर्विरहाक्षमः खलु चराचरेशयोः ॥ ४७ ॥

amitāṃ mitāmapi giraṃ jagadguroriti tāṃ niśamya viraletarāntaraḥ | vadatāṃ varastamavadat tadā tayorvirahākṣamaḥ khalu carācareśayoḥ || 47 ||

Report an error

भवतोरितः सततसेवनामृते मम मङ्क्तुमस्तु भगवन्ननुग्रहः । न लभेय वल्लभतमेदृशं सुखं जगतां त्रयेऽपि जगदेकमङ्गलम् ॥ ४८ ॥

bhavatoritaḥ satatasevanāmṛte mama maṅktumastu bhagavannanugrahaḥ | na labheya vallabhatamedṛśaṃ sukhaṃ jagatāṃ traye'pi jagadekamaṅgalam || 48 ||

Report an error

कलिकालकालितगुणे धरातले सुजनो न नूनमधुनाऽस्ति योग्यधीः । परतत्तववर्णनमयोग्यतावते ननु हव्यदानमिव निन्द्यते शुने ॥ ४९ ॥

kalikālakālitaguṇe dharātale sujano na nūnamadhunā'sti yogyadhīḥ | paratattavavarṇanamayogyatāvate nanu havyadānamiva nindyate śune || 49 ||

Report an error

इति तं ब्रुवाणमयमब्रवीद्विभुर्भुवि सन्ति सौम्य पुरुषा गुणोचिताः । विमलान् मणीनिव गुणोज्जहितानिमान् दयया विशोधय विशुद्धगोगणैः ॥ ५० ॥

iti taṃ bruvāṇamayamabravīdvibhurbhuvi santi saumya puruṣā guṇocitāḥ | vimalān maṇīniva guṇojjahitānimān dayayā viśodhaya viśuddhagogaṇaiḥ || 50 ||

Report an error

तव कीर्तिरार्तिमतिमात्रमानयेदशुभान् प्रभाकरविभेव कौशिकान् । कमलाकरानिव शुभान् प्रबोधयेत् परमाज्ञया मम विशेषतोऽनिशम् ॥ ५१ ॥

tava kīrtirārtimatimātramānayedaśubhān prabhākaravibheva kauśikān | kamalākarāniva śubhān prabodhayet paramājñayā mama viśeṣato'niśam || 51 ||

Report an error

इति सा महीधरमुखाद्विनिःसृता जगतां सुखाय विशदा सरस्वती । द्विजराजगोविषयतातिपूरितं प्रविवेश मध्वपृथुबुद्धिवारिधिम् ॥ ५२ ॥

iti sā mahīdharamukhādviniḥsṛtā jagatāṃ sukhāya viśadā sarasvatī | dvijarājagoviṣayatātipūritaṃ praviveśa madhvapṛthubuddhivāridhim || 52 ||

Report an error

मतमित्यवेत्य महितं महतोरभिधाय बाड्हमिति धीरमतिः । अनयोर्नियोगमधिरोपितवान् स्वशिरस्यनन्यसुवहं {अन्यनिवहं} प्रणमन् ॥ ५३ ॥

matamityavetya mahitaṃ mahatorabhidhāya bāḍhamiti dhīramatiḥ | anayorniyogamadhiropitavān svaśirasyananyasuvahaṃ {anyanivahaṃ} praṇaman || 53 ||

Report an error

आम्नायास्त्रय इव तत्तवबोधकास्ते पापघ्नास्त्रय इव पावकाः प्रजानाम् । लोका वा सकलभृतस्त्रयोऽत्र रेजुः सानन्दा मुनिसुतधर्मसूनुमध्वाः ॥ ५४ ॥

āmnāyāstraya iva tattavabodhakāste pāpaghnāstraya iva pāvakāḥ prajānām | lokā vā sakalabhṛtastrayo'tra rejuḥ sānandā munisutadharmasūnumadhvāḥ || 54 ||

Report an error

Illustration: Verse & Place (Project-owned).