Devi Bhagavata Purana 9.1.48–70
रासेश्वरी सुरसिका रासावासनिवासिनी । गोलोकवासिनी देवी गोपीवेषविधायिका ॥ ४८ ॥ परमाह्लादरूपा च सन्तोषहर्षरूपिणी । निर्गुणा च निराकारा निर्लिप्ताऽऽत्मस्वरूपिणी ॥ ४९ ॥ निरीहा निरहङ्कारा भक्तानुग्रहविग्रहा । वेदानुसारिध्यानेन विज्ञाता मा विचक्षणैः ॥ ५० ॥ दृष्टिदृष्टा न सा चेशैः सुरेन्द्रैर्मुनिपुङ्गवैः । वह्निशुद्धांशुकधरा नानालङ्कारभूषिता ॥ ५१ ॥ कोटिचन्द्रप्रभा पुष्टसर्वश्रीयुक्तविग्रहा । श्रीकृष्णभक्तिदास्यैककरा च सर्वसम्पदाम् ॥ ५२ ॥ अवतारे च वाराहे वृषभानुसुता च या । यत्पादपद्मसंस्पर्शात्पवित्रा च वसुन्धरा ॥ ५३ ॥ ब्रह्मादिभिरदृष्टा या सर्वैर्दृष्टा च भारते । स्त्रीरत्नसारसम्भूता कृष्णवक्षःस्थले स्थिता ॥ ५४ ॥ यथाम्बरे नवघने लोला सौदामनी मुने । षष्टिवर्षसहस्राणि प्रतप्तं ब्रह्मणा पुरा ॥ ५५ ॥ यत्पादपद्मनखरदृष्टये चात्मशुद्धये । न च दृष्टं च स्वप्नेऽपि प्रत्यक्षस्यापि का कथा ॥ ५६ ॥ तेनैव तपसा दृष्टा भुवि वृन्दावने वने । कथिता पञ्चमी देवी सा राधा च प्रकीर्तिता ॥ ५७ ॥ अंशरूपाः कलारूपाः कलांशांशांशसम्भवाः । प्रकृतेः प्रतिविश्वेषु देव्यश्च सर्वयोषितः ॥ ५८ ॥ परिपूर्णतमाः पञ्च विद्यादेव्यः प्रकीर्तिताः । या याः प्रधानांशरूपा वर्णयामि निशामय ॥ ५९ ॥ प्रधानांशस्वरूपा सा गङ्गा भुवनपावनी । विष्णुविग्रहसम्भूता द्रवरूपा सनातनी ॥ ६० ॥ पापिपापेध्मदाहाय ज्वलदग्निस्वरूपिणी । सुखस्पर्शा स्नानपानैर्निर्वाणपददायिनी ॥ ६१ ॥ गोलोकस्थानप्रस्थानसुखसोपानरूपिणी । पवित्ररूपा तीर्थानां सरितां च परावरा ॥ ६२ ॥ शम्भुमौलिजटामेरुमुक्तापंक्तिस्वरूपिणी । तपःसम्पादिनी सद्यो भारतेषु तपस्विनाम् ॥ ६३ ॥ चन्द्रपद्मक्षीरनिभा शुद्धसत्त्वस्वरूपिणी । निर्मला निरहङ्कारा साध्वी नारायणप्रिया ॥ ६४ ॥ प्रधानांशस्वरूपा च तुलसी विष्णुकामिनी । विष्णुभूषणरूपा च विष्णुपादस्थिता सती ॥ ६५ ॥ तपःसंकल्पपूजादिसङ्घसम्पादिनी मुने । सारभूता च पुष्पाणां पवित्रा पुण्यदा सदा ॥ ६६ ॥ दर्शनस्पर्शनाभ्यां च सद्यो निर्वाणदायिनी । कलौ कलुषशुष्केध्मदहनायाग्निरूपिणी ॥ ६७ ॥ यत्पादपद्मसंस्पर्शात्सद्यः पूता वसुन्धरा । यत्स्पर्शदर्शने चैवेच्छन्ति तीर्थानि शुद्धये ॥ ६८ ॥ यया विना च विश्वेषु सर्वकर्म च निष्फलम् । मोक्षदा या मुमुक्षूणां कामिनी सर्वकामदा ॥ ६९ ॥ कल्पवृक्षस्वरूपा या भारते वृक्षरूपिणी । भारतीनां प्रीणनाय जाता या परदेवता ॥ ७० ॥
rāseśvarī surasikā rāsāvāsanivāsinī | golokavāsinī devī gopīveṣavidhāyikā || 48 || paramāhlādarūpā ca santoṣaharṣarūpiṇī | nirguṇā ca nirākārā nirliptā''tmasvarūpiṇī || 49 || nirīhā nirahaṅkārā bhaktānugrahavigrahā | vedānusāridhyānena vijñātā mā vicakṣaṇaiḥ || 50 || dṛṣṭidṛṣṭā na sā ceśaiḥ surendrairmunipuṅgavaiḥ | vahniśuddhāṃśukadharā nānālaṅkārabhūṣitā || 51 || koṭicandraprabhā puṣṭasarvaśrīyuktavigrahā | śrīkṛṣṇabhaktidāsyaikakarā ca sarvasampadām || 52 || avatāre ca vārāhe vṛṣabhānusutā ca yā | yatpādapadmasaṃsparśātpavitrā ca vasundharā || 53 || brahmādibhiradṛṣṭā yā sarvairdṛṣṭā ca bhārate | strīratnasārasambhūtā kṛṣṇavakṣaḥsthale sthitā || 54 || yathāmbare navaghane lolā saudāmanī mune | ṣaṣṭivarṣasahasrāṇi prataptaṃ brahmaṇā purā || 55 || yatpādapadmanakharadṛṣṭaye cātmaśuddhaye | na ca dṛṣṭaṃ ca svapne'pi pratyakṣasyāpi kā kathā || 56 || tenaiva tapasā dṛṣṭā bhuvi vṛndāvane vane | kathitā pañcamī devī sā rādhā ca prakīrtitā || 57 || aṃśarūpāḥ kalārūpāḥ kalāṃśāṃśāṃśasambhavāḥ | prakṛteḥ prativiśveṣu devyaśca sarvayoṣitaḥ || 58 || paripūrṇatamāḥ pañca vidyādevyaḥ prakīrtitāḥ | yā yāḥ pradhānāṃśarūpā varṇayāmi niśāmaya || 59 || pradhānāṃśasvarūpā sā gaṅgā bhuvanapāvanī | viṣṇuvigrahasambhūtā dravarūpā sanātanī || 60 || pāpipāpedhmadāhāya jvaladagnisvarūpiṇī | sukhasparśā snānapānairnirvāṇapadadāyinī || 61 || golokasthānaprasthānasukhasopānarūpiṇī | pavitrarūpā tīrthānāṃ saritāṃ ca parāvarā || 62 || śambhumaulijaṭāmerumuktāpaṃktisvarūpiṇī | tapaḥsampādinī sadyo bhārateṣu tapasvinām || 63 || candrapadmakṣīranibhā śuddhasattvasvarūpiṇī | nirmalā nirahaṅkārā sādhvī nārāyaṇapriyā || 64 || pradhānāṃśasvarūpā ca tulasī viṣṇukāminī | viṣṇubhūṣaṇarūpā ca viṣṇupādasthitā satī || 65 || tapaḥsaṃkalpapūjādisaṅghasampādinī mune | sārabhūtā ca puṣpāṇāṃ pavitrā puṇyadā sadā || 66 || darśanasparśanābhyāṃ ca sadyo nirvāṇadāyinī | kalau kaluṣaśuṣkedhmadahanāyāgnirūpiṇī || 67 || yatpādapadmasaṃsparśātsadyaḥ pūtā vasundharā | yatsparśadarśane caivecchanti tīrthāni śuddhaye || 68 || yayā vinā ca viśveṣu sarvakarma ca niṣphalam | mokṣadā yā mumukṣūṇāṃ kāminī sarvakāmadā || 69 || kalpavṛkṣasvarūpā yā bhārate vṛkṣarūpiṇī | bhāratīnāṃ prīṇanāya jātā yā paradevatā || 70 ||
She is the Lady of the Rāsa Līlā, the Foremost of the Jovial, humourous (witty) persons and dwells always in Rāsa. Her abode is in Goloka and from Her have come out all the Gopīkās. Rāsa the circular dance of Kriṣṇa and the cow-herdesses of Vrindāvana. Her nature is the Highest Bliss, the Highest Contentment, and Excessive Joy; She transcends the three Sattva, Rajo and Tamo Guṇas and is Nirākāra (without any particular form); but She dwells everywhere but unconnected with any. She is the soul of all. She is without any effort to do anything and void of Ahamkāra. She assumes forms only to show Her favour to Her Bhaktas. The intelligent learned men (Pundits) read Her Mahimā (glories) in meditating on Her according to the Vedas. The chief of the Devas and the Munis could never see Her; Her clothings are fire-proof and She is decorated with many ornaments all over Her body. Her body looks as if the crores of moons have risen all at once; She is the Giver of Bhakti (devotion) towards Kriṣṇa, services towards Kriṣṇa; and She bestows all wealth and prosperity. In Varāha Kalpa, i.e., when the Varāha incarnation took place, She incarnated Herself as the daughter of one Gopa (cow-herd), named Vrisabhānu. And Earth was blessed by the touch of Her feet. She is such as Brahmā and the other Devas could never perceive Her by any of their senses, yet everyone at Vrindāvan saw Her very easily. She is the Gem amongst women. And when She is seen on the breast of Kriṣṇa, it seems that lightnings flash in the blue mass of clouds in the sky. In days gone by, Brahmā practised several austerities for sixty thousand years to purify Himself by seeing the nails of Her toe; but far from seeing that, He could not have that even in his dreams. At last He succeeded in seeing Her at Vrindāvana and became blessed. O Child Nārada! This is the fifth Prakṛiti and She is denominated as Rādhā. Every female in every Universe is sprung from a part of Śrī Rādhā or part of a part. O Nārada! Thus I have described to you the five Highest Prakritis, Durgā and others. Now I am going to describe those that are parts of these Prakṛitis. Hear. The Ganges, Gangā has sprung from the lotus feet of Viṣṇu; Her form is fluid-like; She is eternal. And She is the veritable burning fire to burn away the sins of the sinners. She is sweet to touch in taking baths and in drinking; She gives final liberation to the Jīvas, and leads easily to the Goloka abode. She is the holiest amongst the places of pilgrimage and is the first of the running rivers. She is the rows of pearls in the clotted hairs of Mahādeva’s head and She is the Tapasyā (asceticism) incarnate of the Tapasvīs (ascetics) of the Bhārata Varṣa. This Ganges purifies the three worlds and is the part of Mūlā Prakṛiti; She shines like the Full Moon, is white like white lotus and like milk; She is pure Śuddha Sattva, clear, free from any Ahamkāra, chaste and beloved of Nārāyana. The Tulasī Devī is the consort of Viṣṇu. She is the ornament of Nārāyaṇa, and dwells always at the lotus feet of Nārāyana. By Her are performed all the acts of worship, all austerities, and all Sankalpas (resolves). She is the chief of all the flowers, holy and able to give merits (Puṇyam) to others. At Her sight and touch, Nirvāṇa can be obtained; and, were it not for Her, there could be no other fire in this Kali Yuga to burn the sins. She Herself is of the nature of Fire and at the touch of Whose lotus-feet, the earth is purified; all the Tīrthas desire to have Her sight and touch for purification and without Her all acts in this world become fruitless. She bestows Mokṣa (liberation) to those who want final liberation, grants all sorts of desires to several people, Who Herself is like a Kalpa Vrikṣa, Who is the Presiding Deity of all the trees in Bhārata and Who has come here to grant satisfaction to the ladies of Bhārata Varṣa and She is considered very superior throughout all parts of India. This Tulasī Devī is the chief factor of Mūlā Prakṛiti.