अनुज समेत देहु रघुनाथा। निसिचर बध मैं होब सनाथा
anuja sameta dehu raghunāthā| nisicara badha maiṃ hoba sanāthā
बालकाण्ड · बालकाण्ड
Part 8 of 12: verses 2003–2288 of 3,432Awadhi with transliteration
अनुज समेत देहु रघुनाथा। निसिचर बध मैं होब सनाथा
anuja sameta dehu raghunāthā| nisicara badha maiṃ hoba sanāthā
देहु भूप मन हरषित तजहु मोह अग्यान । धर्म सुजस प्रभु तुम्ह कौं इन्ह कहँ अति कल्यान ॥ २०७ ॥
dehu bhūpa mana haraṣita tajahu moha agyāna | dharma sujasa prabhu tumha kauṃ inha kaha~ ati kalyāna || 207 ||
सुनि राजा अति अप्रिय बानी। हृदय कंप मुख दुति कुमुलानी
suni rājā ati apriya bānī| hṛdaya kaṃpa mukha duti kumulānī
चौथेंपन पायउँ सुत चारी। बिप्र बचन नहिं कहेहु बिचारी
cautheṃpana pāyau~ suta cārī| bipra bacana nahiṃ kahehu bicārī
मागहु भूमि धेनु धन कोसा। सर्बस देउँ आजु सहरोसा
māgahu bhūmi dhenu dhana kosā| sarbasa deu~ āju saharosā
देह प्रान तें प्रिय कछु नाही। सोउ मुनि देउँ निमिष एक माही
deha prāna teṃ priya kachu nāhī| sou muni deu~ nimiṣa eka māhī
सब सुत प्रिय मोहि प्रान कि नाईं। राम देत नहिं बनइ गोसाई
saba suta priya mohi prāna ki nāīṃ| rāma deta nahiṃ banai gosāī
कहँ निसिचर अति घोर कठोरा। कहँ सुंदर सुत परम किसोरा
kaha~ nisicara ati ghora kaṭhorā| kaha~ suṃdara suta parama kisorā
सुनि नृप गिरा प्रेम रस सानी। हृदयँ हरष माना मुनि ग्यानी
suni nṛpa girā prema rasa sānī| hṛdaya~ haraṣa mānā muni gyānī
तब बसिष्ट बहु निधि समुझावा। नृप संदेह नास कहँ पावा
taba basiṣṭa bahu nidhi samujhāvā| nṛpa saṃdeha nāsa kaha~ pāvā
अति आदर दोउ तनय बोलाए। हृदयँ लाइ बहु भाँति सिखाए
ati ādara dou tanaya bolāe| hṛdaya~ lāi bahu bhā~ti sikhāe
मेरे प्रान नाथ सुत दोऊ। तुम्ह मुनि पिता आन नहिं कोऊ
mere prāna nātha suta doū| tumha muni pitā āna nahiṃ koū
सौंपे भूप रिषिहि सुत बहु बिधि देइ असीस । जननी भवन गए प्रभु चले नाइ पद सीस ॥ २०८क ॥
sauṃpe bhūpa riṣihi suta bahu bidhi dei asīsa | jananī bhavana gae prabhu cale nāi pada sīsa || 208ka ||
पुरुषसिंह दोउ बीर हरषि चले मुनि भय हरन । कृपासिंधु मतिधीर अखिल बिस्व कारन करन ॥ २०८ख ॥
puruṣasiṃha dou bīra haraṣi cale muni bhaya harana | kṛpāsiṃdhu matidhīra akhila bisva kārana karana || 208kha ||
अरुन नयन उर बाहु बिसाला। नील जलज तनु स्याम तमाला
aruna nayana ura bāhu bisālā| nīla jalaja tanu syāma tamālā
कटि पट पीत कसें बर भाथा। रुचिर चाप सायक दुहुँ हाथा
kaṭi paṭa pīta kaseṃ bara bhāthā| rucira cāpa sāyaka duhu~ hāthā
स्याम गौर सुंदर दोउ भाई। बिस्बामित्र महानिधि पाई
syāma gaura suṃdara dou bhāī| bisbāmitra mahānidhi pāī
प्रभु ब्रह्मन्यदेव मै जाना। मोहि निति पिता तजेहु भगवाना
prabhu brahmanyadeva mai jānā| mohi niti pitā tajehu bhagavānā
चले जात मुनि दीन्हि दिखाई। सुनि ताड़का क्रोध करि धाई
cale jāta muni dīnhi dikhāī| suni tār̤akā krodha kari dhāī
एकहिं बान प्रान हरि लीन्हा। दीन जानि तेहि निज पद दीन्हा
ekahiṃ bāna prāna hari līnhā| dīna jāni tehi nija pada dīnhā
तब रिषि निज नाथहि जियँ चीन्ही। बिद्यानिधि कहुँ बिद्या दीन्ही
taba riṣi nija nāthahi jiya~ cīnhī| bidyānidhi kahu~ bidyā dīnhī
जाते लाग न छुधा पिपासा। अतुलित बल तनु तेज प्रकासा
jāte lāga na chudhā pipāsā| atulita bala tanu teja prakāsā
आयुष सब समर्पि कै प्रभु निज आश्रम आनि । कंद मूल फल भोजन दीन्ह भगति हित जानि ॥ २०९ ॥
āyuṣa saba samarpi kai prabhu nija āśrama āni | kaṃda mūla phala bhojana dīnha bhagati hita jāni || 209 ||
प्रात कहा मुनि सन रघुराई। निर्भय जग्य करहु तुम्ह जाई
prāta kahā muni sana raghurāī| nirbhaya jagya karahu tumha jāī
होम करन लागे मुनि झारी। आपु रहे मख कीं रखवारी
homa karana lāge muni jhārī| āpu rahe makha kīṃ rakhavārī
सुनि मारीच निसाचर क्रोही। लै सहाय धावा मुनिद्रोही
suni mārīca nisācara krohī| lai sahāya dhāvā munidrohī
बिनु फर बान राम तेहि मारा। सत जोजन गा सागर पारा
binu phara bāna rāma tehi mārā| sata jojana gā sāgara pārā
पावक सर सुबाहु पुनि मारा। अनुज निसाचर कटकु सँघारा
pāvaka sara subāhu puni mārā| anuja nisācara kaṭaku sa~ghārā
मारि असुर द्विज निर्मयकारी। अस्तुति करहिं देव मुनि झारी
māri asura dvija nirmayakārī| astuti karahiṃ deva muni jhārī
तहँ पुनि कछुक दिवस रघुराया। रहे कीन्हि बिप्रन्ह पर दाया
taha~ puni kachuka divasa raghurāyā| rahe kīnhi bipranha para dāyā
भगति हेतु बहु कथा पुराना। कहे बिप्र जद्यपि प्रभु जाना
bhagati hetu bahu kathā purānā| kahe bipra jadyapi prabhu jānā
तब मुनि सादर कहा बुझाई। चरित एक प्रभु देखिअ जाई
taba muni sādara kahā bujhāī| carita eka prabhu dekhia jāī
धनुषजग्य मुनि रघुकुल नाथा। हरषि चले मुनिबर के साथा
dhanuṣajagya muni raghukula nāthā| haraṣi cale munibara ke sāthā
आश्रम एक दीख मग माहीं। खग मृग जीव जंतु तहँ नाहीं
āśrama eka dīkha maga māhīṃ| khaga mṛga jīva jaṃtu taha~ nāhīṃ
पूछा मुनिहि सिला प्रभु देखी। सकल कथा मुनि कहा बिसेषी
pūchā munihi silā prabhu dekhī| sakala kathā muni kahā biseṣī
गौतम नारि श्राप बस उपल देह धरि धीर । चरन कमल रज चाहति कृपा करहु रघुबीर ॥ २१० ॥
gautama nāri śrāpa basa upala deha dhari dhīra | carana kamala raja cāhati kṛpā karahu raghubīra || 210 ||
परसत पद पावन सोक नसावन प्रगट भई तपपुंज सही । देखत रघुनायक जन सुख दायक सनमुख होइ कर जोरि रही । अति प्रेम अधीरा पुलक सरीरा मुख नहिं आवइ बचन कही । अतिसय बड़भागी चरनन्हि लागी जुगल नयन जलधार बही
parasata pada pāvana soka nasāvana pragaṭa bhaī tapapuṃja sahī | dekhata raghunāyaka jana sukha dāyaka sanamukha hoi kara jori rahī | ati prema adhīrā pulaka sarīrā mukha nahiṃ āvai bacana kahī | atisaya bar̤abhāgī carananhi lāgī jugala nayana jaladhāra bahī
धीरजु मन कीन्हा प्रभु कहुँ चीन्हा रघुपति कृपाँ भगति पाई । अति निर्मल बानीं अस्तुति ठानी ग्यानगम्य जय रघुराई । मै नारि अपावन प्रभु जग पावन रावन रिपु जन सुखदाई । राजीव बिलोचन भव भय मोचन पाहि पाहि सरनहिं आई
dhīraju mana kīnhā prabhu kahu~ cīnhā raghupati kṛpā~ bhagati pāī | ati nirmala bānīṃ astuti ṭhānī gyānagamya jaya raghurāī | mai nāri apāvana prabhu jaga pāvana rāvana ripu jana sukhadāī | rājīva bilocana bhava bhaya mocana pāhi pāhi saranahiṃ āī
मुनि श्राप जो दीन्हा अति भल कीन्हा परम अनुग्रह मैं माना । देखेउँ भरि लोचन हरि भवमोचन इहइ लाभ संकर जाना । बिनती प्रभु मोरी मैं मति भोरी नाथ न मागउँ बर आना । पद कमल परागा रस अनुरागा मम मन मधुप करै पाना
muni śrāpa jo dīnhā ati bhala kīnhā parama anugraha maiṃ mānā | dekheu~ bhari locana hari bhavamocana ihai lābha saṃkara jānā | binatī prabhu morī maiṃ mati bhorī nātha na māgau~ bara ānā | pada kamala parāgā rasa anurāgā mama mana madhupa karai pānā
जेहिं पद सुरसरिता परम पुनीता प्रगट भई सिव सीस धरी । सोइ पद पंकज जेहि पूजत अज मम सिर धरेउ कृपाल हरी । एहि भाँति सिधारी गौतम नारी बार बार हरि चरन परी । जो अति मन भावा सो बरु पावा गै पतिलोक अनंद भरी
jehiṃ pada surasaritā parama punītā pragaṭa bhaī siva sīsa dharī | soi pada paṃkaja jehi pūjata aja mama sira dhareu kṛpāla harī | ehi bhā~ti sidhārī gautama nārī bāra bāra hari carana parī | jo ati mana bhāvā so baru pāvā gai patiloka anaṃda bharī
अस प्रभु दीनबंधु हरि कारन रहित दयाल । तुलसिदास सठ तेहि भजु छाड़ि कपट जंजाल ॥ २११ ॥
asa prabhu dīnabaṃdhu hari kārana rahita dayāla | tulasidāsa saṭha tehi bhaju chār̤i kapaṭa jaṃjāla || 211 ||
चले राम लछिमन मुनि संगा। गए जहाँ जग पावनि गंगा
cale rāma lachimana muni saṃgā| gae jahā~ jaga pāvani gaṃgā
गाधिसूनु सब कथा सुनाई। जेहि प्रकार सुरसरि महि आई
gādhisūnu saba kathā sunāī| jehi prakāra surasari mahi āī
तब प्रभु रिषिन्ह समेत नहाए। बिबिध दान महिदेवन्हि पाए
taba prabhu riṣinha sameta nahāe| bibidha dāna mahidevanhi pāe
हरषि चले मुनि बृंद सहाया। बेगि बिदेह नगर निअराया
haraṣi cale muni bṛṃda sahāyā| begi bideha nagara niarāyā
पुर रम्यता राम जब देखी। हरषे अनुज समेत बिसेषी
pura ramyatā rāma jaba dekhī| haraṣe anuja sameta biseṣī
बापीं कूप सरित सर नाना। सलिल सुधासम मनि सोपाना
bāpīṃ kūpa sarita sara nānā| salila sudhāsama mani sopānā
गुंजत मंजु मत्त रस भृंगा। कूजत कल बहुबरन बिहंगा
guṃjata maṃju matta rasa bhṛṃgā| kūjata kala bahubarana bihaṃgā
बरन बरन बिकसे बन जाता। त्रिबिध समीर सदा सुखदाता
barana barana bikase bana jātā| tribidha samīra sadā sukhadātā
सुमन बाटिका बाग बन बिपुल बिहंग निवास । फूलत फलत सुपल्लवत सोहत पुर चहुँ पास ॥ २१२ ॥
sumana bāṭikā bāga bana bipula bihaṃga nivāsa | phūlata phalata supallavata sohata pura cahu~ pāsa || 212 ||
बनइ न बरनत नगर निकाई। जहाँ जाइ मन तहँइँ लोभाई
banai na baranata nagara nikāī| jahā~ jāi mana taha~i~ lobhāī
चारु बजारु बिचित्र अँबारी। मनिमय बिधि जनु स्वकर सँवारी
cāru bajāru bicitra a~bārī| manimaya bidhi janu svakara sa~vārī
धनिक बनिक बर धनद समाना। बैठ सकल बस्तु लै नाना
dhanika banika bara dhanada samānā| baiṭha sakala bastu lai nānā
चौहट सुंदर गलीं सुहाई। संतत रहहिं सुगंध सिंचाई
cauhaṭa suṃdara galīṃ suhāī| saṃtata rahahiṃ sugaṃdha siṃcāī
मंगलमय मंदिर सब केरें। चित्रित जनु रतिनाथ चितेरें
maṃgalamaya maṃdira saba kereṃ| citrita janu ratinātha citereṃ
पुर नर नारि सुभग सुचि संता। धरमसील ग्यानी गुनवंता
pura nara nāri subhaga suci saṃtā| dharamasīla gyānī gunavaṃtā
अति अनूप जहँ जनक निवासू। बिथकहिं बिबुध बिलोकि बिलासू
ati anūpa jaha~ janaka nivāsū| bithakahiṃ bibudha biloki bilāsū
होत चकित चित कोट बिलोकी। सकल भुवन सोभा जनु रोकी
hota cakita cita koṭa bilokī| sakala bhuvana sobhā janu rokī
धवल धाम मनि पुरट पट सुघटित नाना भाँति । सिय निवास सुंदर सदन सोभा किमि कहि जाति ॥ २१३ ॥
dhavala dhāma mani puraṭa paṭa sughaṭita nānā bhā~ti | siya nivāsa suṃdara sadana sobhā kimi kahi jāti || 213 ||
सुभग द्वार सब कुलिस कपाटा। भूप भीर नट मागध भाटा
subhaga dvāra saba kulisa kapāṭā| bhūpa bhīra naṭa māgadha bhāṭā
बनी बिसाल बाजि गज साला। हय गय रथ संकुल सब काला
banī bisāla bāji gaja sālā| haya gaya ratha saṃkula saba kālā
सूर सचिव सेनप बहुतेरे। नृपगृह सरिस सदन सब केरे
sūra saciva senapa bahutere| nṛpagṛha sarisa sadana saba kere
पुर बाहेर सर सारित समीपा। उतरे जहँ तहँ बिपुल महीपा
pura bāhera sara sārita samīpā| utare jaha~ taha~ bipula mahīpā
देखि अनूप एक अँवराई। सब सुपास सब भाँति सुहाई
dekhi anūpa eka a~varāī| saba supāsa saba bhā~ti suhāī
कौसिक कहेउ मोर मनु माना। इहाँ रहिअ रघुबीर सुजाना
kausika kaheu mora manu mānā| ihā~ rahia raghubīra sujānā
भलेहिं नाथ कहि कृपानिकेता। उतरे तहँ मुनिबृंद समेता
bhalehiṃ nātha kahi kṛpāniketā| utare taha~ munibṛṃda sametā
बिस्वामित्र महामुनि आए। समाचार मिथिलापति पाए
bisvāmitra mahāmuni āe| samācāra mithilāpati pāe
संग सचिव सुचि भूरि भट भूसुर बर गुर ग्याति । चले मिलन मुनिनायकहि मुदित राउ एहि भाँति ॥ २१४ ॥
saṃga saciva suci bhūri bhaṭa bhūsura bara gura gyāti | cale milana munināyakahi mudita rāu ehi bhā~ti || 214 ||
कीन्ह प्रनामु चरन धरि माथा। दीन्हि असीस मुदित मुनिनाथा
kīnha pranāmu carana dhari māthā| dīnhi asīsa mudita munināthā
बिप्रबृंद सब सादर बंदे। जानि भाग्य बड़ राउ अनंदे
biprabṛṃda saba sādara baṃde| jāni bhāgya bar̤a rāu anaṃde
कुसल प्रस्न कहि बारहिं बारा। बिस्वामित्र नृपहि बैठारा
kusala prasna kahi bārahiṃ bārā| bisvāmitra nṛpahi baiṭhārā
तेहि अवसर आए दोउ भाई। गए रहे देखन फुलवाई
tehi avasara āe dou bhāī| gae rahe dekhana phulavāī
स्याम गौर मृदु बयस किसोरा। लोचन सुखद बिस्व चित चोरा
syāma gaura mṛdu bayasa kisorā| locana sukhada bisva cita corā
उठे सकल जब रघुपति आए। बिस्वामित्र निकट बैठाए
uṭhe sakala jaba raghupati āe| bisvāmitra nikaṭa baiṭhāe
भए सब सुखी देखि दोउ भ्राता। बारि बिलोचन पुलकित गाता
bhae saba sukhī dekhi dou bhrātā| bāri bilocana pulakita gātā
मूरति मधुर मनोहर देखी। भयउ बिदेहु बिदेहु बिसेषी
mūrati madhura manohara dekhī| bhayau bidehu bidehu biseṣī
प्रेम मगन मनु जानि नृपु करि बिबेकु धरि धीर । बोलेउ मुनि पद नाइ सिरु गदगद गिरा गभीर ॥ २१५ ॥
prema magana manu jāni nṛpu kari bibeku dhari dhīra | boleu muni pada nāi siru gadagada girā gabhīra || 215 ||
कहहु नाथ सुंदर दोउ बालक। मुनिकुल तिलक कि नृपकुल पालक
kahahu nātha suṃdara dou bālaka| munikula tilaka ki nṛpakula pālaka
ब्रह्म जो निगम नेति कहि गावा। उभय बेष धरि की सोइ आवा
brahma jo nigama neti kahi gāvā| ubhaya beṣa dhari kī soi āvā
सहज बिरागरुप मनु मोरा। थकित होत जिमि चंद चकोरा
sahaja birāgarupa manu morā| thakita hota jimi caṃda cakorā
ताते प्रभु पूछउँ सतिभाऊ। कहहु नाथ जनि करहु दुराऊ
tāte prabhu pūchau~ satibhāū| kahahu nātha jani karahu durāū
इन्हहि बिलोकत अति अनुरागा। बरबस ब्रह्मसुखहि मन त्यागा
inhahi bilokata ati anurāgā| barabasa brahmasukhahi mana tyāgā
कह मुनि बिहसि कहेहु नृप नीका। बचन तुम्हार न होइ अलीका
kaha muni bihasi kahehu nṛpa nīkā| bacana tumhāra na hoi alīkā
ए प्रिय सबहि जहाँ लगि प्रानी। मन मुसुकाहिं रामु सुनि बानी
e priya sabahi jahā~ lagi prānī| mana musukāhiṃ rāmu suni bānī
रघुकुल मनि दसरथ के जाए। मम हित लागि नरेस पठाए
raghukula mani dasaratha ke jāe| mama hita lāgi naresa paṭhāe
रामु लखनु दोउ बंधुबर रूप सील बल धाम । मख राखेउ सबु साखि जगु जिते असुर संग्राम ॥ २१६ ॥
rāmu lakhanu dou baṃdhubara rūpa sīla bala dhāma | makha rākheu sabu sākhi jagu jite asura saṃgrāma || 216 ||
मुनि तव चरन देखि कह राऊ। कहि न सकउँ निज पुन्य प्राभाऊ
muni tava carana dekhi kaha rāū| kahi na sakau~ nija punya prābhāū
सुंदर स्याम गौर दोउ भ्राता। आनँदहू के आनँद दाता
suṃdara syāma gaura dou bhrātā| āna~dahū ke āna~da dātā
इन्ह कै प्रीति परसपर पावनि। कहि न जाइ मन भाव सुहावनि
inha kai prīti parasapara pāvani| kahi na jāi mana bhāva suhāvani
सुनहु नाथ कह मुदित बिदेहू। ब्रह्म जीव इव सहज सनेहू
sunahu nātha kaha mudita bidehū| brahma jīva iva sahaja sanehū
पुनि पुनि प्रभुहि चितव नरनाहू। पुलक गात उर अधिक उछाहू
puni puni prabhuhi citava naranāhū| pulaka gāta ura adhika uchāhū
म्रुनिहि प्रसंसि नाइ पद सीसू। चलेउ लवाइ नगर अवनीसू
mrunihi prasaṃsi nāi pada sīsū| caleu lavāi nagara avanīsū
सुंदर सदनु सुखद सब काला। तहाँ बासु लै दीन्ह भुआला
suṃdara sadanu sukhada saba kālā| tahā~ bāsu lai dīnha bhuālā
करि पूजा सब बिधि सेवकाई। गयउ राउ गृह बिदा कराई
kari pūjā saba bidhi sevakāī| gayau rāu gṛha bidā karāī
रिषय संग रघुबंस मनि करि भोजनु बिश्रामु । बैठे प्रभु भ्राता सहित दिवसु रहा भरि जामु ॥ २१७ ॥
riṣaya saṃga raghubaṃsa mani kari bhojanu biśrāmu | baiṭhe prabhu bhrātā sahita divasu rahā bhari jāmu || 217 ||
लखन हृदयँ लालसा बिसेषी। जाइ जनकपुर आइअ देखी
lakhana hṛdaya~ lālasā biseṣī| jāi janakapura āia dekhī
प्रभु भय बहुरि मुनिहि सकुचाहीं। प्रगट न कहहिं मनहिं मुसुकाहीं
prabhu bhaya bahuri munihi sakucāhīṃ| pragaṭa na kahahiṃ manahiṃ musukāhīṃ
राम अनुज मन की गति जानी। भगत बछलता हिंयँ हुलसानी
rāma anuja mana kī gati jānī| bhagata bachalatā hiṃya~ hulasānī
परम बिनीत सकुचि मुसुकाई। बोले गुर अनुसासन पाई
parama binīta sakuci musukāī| bole gura anusāsana pāī
नाथ लखनु पुरु देखन चहहीं। प्रभु सकोच डर प्रगट न कहहीं
nātha lakhanu puru dekhana cahahīṃ| prabhu sakoca ḍara pragaṭa na kahahīṃ
जौं राउर आयसु मैं पावौं। नगर देखाइ तुरत लै आवौ
jauṃ rāura āyasu maiṃ pāvauṃ| nagara dekhāi turata lai āvau
सुनि मुनीसु कह बचन सप्रीती। कस न राम तुम्ह राखहु नीती
suni munīsu kaha bacana saprītī| kasa na rāma tumha rākhahu nītī
धरम सेतु पालक तुम्ह ताता। प्रेम बिबस सेवक सुखदाता
dharama setu pālaka tumha tātā| prema bibasa sevaka sukhadātā
जाइ देखी आवहु नगरु सुख निधान दोउ भाइ । करहु सुफल सब के नयन सुंदर बदन देखाइ ॥ २१८ ॥
jāi dekhī āvahu nagaru sukha nidhāna dou bhāi | karahu suphala saba ke nayana suṃdara badana dekhāi || 218 ||
मुनि पद कमल बंदि दोउ भ्राता। चले लोक लोचन सुख दाता
muni pada kamala baṃdi dou bhrātā| cale loka locana sukha dātā
बालक बृंदि देखि अति सोभा। लगे संग लोचन मनु लोभा
bālaka bṛṃdi dekhi ati sobhā| lage saṃga locana manu lobhā
पीत बसन परिकर कटि भाथा। चारु चाप सर सोहत हाथा
pīta basana parikara kaṭi bhāthā| cāru cāpa sara sohata hāthā
तन अनुहरत सुचंदन खोरी। स्यामल गौर मनोहर जोरी
tana anuharata sucaṃdana khorī| syāmala gaura manohara jorī
केहरि कंधर बाहु बिसाला। उर अति रुचिर नागमनि माला
kehari kaṃdhara bāhu bisālā| ura ati rucira nāgamani mālā
सुभग सोन सरसीरुह लोचन। बदन मयंक तापत्रय मोचन
subhaga sona sarasīruha locana| badana mayaṃka tāpatraya mocana
कानन्हि कनक फूल छबि देहीं। चितवत चितहि चोरि जनु लेहीं
kānanhi kanaka phūla chabi dehīṃ| citavata citahi cori janu lehīṃ
चितवनि चारु भृकुटि बर बाँकी। तिलक रेखा सोभा जनु चाँकी
citavani cāru bhṛkuṭi bara bā~kī| tilaka rekhā sobhā janu cā~kī
रुचिर चौतनीं सुभग सिर मेचक कुंचित केस । नख सिख सुंदर बंधु दोउ सोभा सकल सुदेस ॥ २१९ ॥
rucira cautanīṃ subhaga sira mecaka kuṃcita kesa | nakha sikha suṃdara baṃdhu dou sobhā sakala sudesa || 219 ||
देखन नगरु भूपसुत आए। समाचार पुरबासिन्ह पाए
dekhana nagaru bhūpasuta āe| samācāra purabāsinha pāe
धाए धाम काम सब त्यागी। मनहु रंक निधि लूटन लागी
dhāe dhāma kāma saba tyāgī| manahu raṃka nidhi lūṭana lāgī
निरखि सहज सुंदर दोउ भाई। होहिं सुखी लोचन फल पाई
nirakhi sahaja suṃdara dou bhāī| hohiṃ sukhī locana phala pāī
जुबतीं भवन झरोखन्हि लागीं। निरखहिं राम रूप अनुरागीं
jubatīṃ bhavana jharokhanhi lāgīṃ| nirakhahiṃ rāma rūpa anurāgīṃ
कहहिं परसपर बचन सप्रीती। सखि इन्ह कोटि काम छबि जीती
kahahiṃ parasapara bacana saprītī| sakhi inha koṭi kāma chabi jītī
सुर नर असुर नाग मुनि माहीं। सोभा असि कहुँ सुनिअति नाहीं
sura nara asura nāga muni māhīṃ| sobhā asi kahu~ suniati nāhīṃ
बिष्नु चारि भुज बिघि मुख चारी। बिकट बेष मुख पंच पुरारी
biṣnu cāri bhuja bighi mukha cārī| bikaṭa beṣa mukha paṃca purārī
अपर देउ अस कोउ न आही। यह छबि सखि पटतरिअ जाही
apara deu asa kou na āhī| yaha chabi sakhi paṭataria jāhī
बय किसोर सुषमा सदन स्याम गौर सुख घाम । अंग अंग पर वारिअहिं कोटि कोटि सत काम ॥ २२० ॥
baya kisora suṣamā sadana syāma gaura sukha ghāma | aṃga aṃga para vāriahiṃ koṭi koṭi sata kāma || 220 ||
कहहु सखी अस को तनुधारी। जो न मोह यह रूप निहारी
kahahu sakhī asa ko tanudhārī| jo na moha yaha rūpa nihārī
कोउ सप्रेम बोली मृदु बानी। जो मैं सुना सो सुनहु सयानी
kou saprema bolī mṛdu bānī| jo maiṃ sunā so sunahu sayānī
ए दोऊ दसरथ के ढोटा। बाल मरालन्हि के कल जोटा
e doū dasaratha ke ḍhoṭā| bāla marālanhi ke kala joṭā
मुनि कौसिक मख के रखवारे। जिन्ह रन अजिर निसाचर मारे
muni kausika makha ke rakhavāre| jinha rana ajira nisācara māre
स्याम गात कल कंज बिलोचन। जो मारीच सुभुज मदु मोचन
syāma gāta kala kaṃja bilocana| jo mārīca subhuja madu mocana
कौसल्या सुत सो सुख खानी। नामु रामु धनु सायक पानी
kausalyā suta so sukha khānī| nāmu rāmu dhanu sāyaka pānī
गौर किसोर बेषु बर काछें। कर सर चाप राम के पाछें
gaura kisora beṣu bara kācheṃ| kara sara cāpa rāma ke pācheṃ
लछिमनु नामु राम लघु भ्राता। सुनु सखि तासु सुमित्रा माता
lachimanu nāmu rāma laghu bhrātā| sunu sakhi tāsu sumitrā mātā
बिप्रकाजु करि बंधु दोउ मग मुनिबधू उधारि । आए देखन चापमख सुनि हरषीं सब नारि ॥ २२१ ॥
biprakāju kari baṃdhu dou maga munibadhū udhāri | āe dekhana cāpamakha suni haraṣīṃ saba nāri || 221 ||
देखि राम छबि कोउ एक कहई। जोगु जानकिहि यह बरु अहई
dekhi rāma chabi kou eka kahaī| jogu jānakihi yaha baru ahaī
जौ सखि इन्हहि देख नरनाहू। पन परिहरि हठि करइ बिबाहू
jau sakhi inhahi dekha naranāhū| pana parihari haṭhi karai bibāhū
कोउ कह ए भूपति पहिचाने। मुनि समेत सादर सनमाने
kou kaha e bhūpati pahicāne| muni sameta sādara sanamāne
सखि परंतु पनु राउ न तजई। बिधि बस हठि अबिबेकहि भजई
sakhi paraṃtu panu rāu na tajaī| bidhi basa haṭhi abibekahi bhajaī
कोउ कह जौं भल अहइ बिधाता। सब कहँ सुनिअ उचित फलदाता
kou kaha jauṃ bhala ahai bidhātā| saba kaha~ sunia ucita phaladātā
तौ जानकिहि मिलिहि बरु एहू। नाहिन आलि इहाँ संदेहू
tau jānakihi milihi baru ehū| nāhina āli ihā~ saṃdehū
जौ बिधि बस अस बनै सँजोगू। तौ कृतकृत्य होइ सब लोगू
jau bidhi basa asa banai sa~jogū| tau kṛtakṛtya hoi saba logū
सखि हमरें आरति अति तातें। कबहुँक ए आवहिं एहि नातें
sakhi hamareṃ ārati ati tāteṃ| kabahu~ka e āvahiṃ ehi nāteṃ
नाहिं त हम कहुँ सुनहु सखि इन्ह कर दरसनु दूरि । यह संघटु तब होइ जब पुन्य पुराकृत भूरि ॥ २२२ ॥
nāhiṃ ta hama kahu~ sunahu sakhi inha kara darasanu dūri | yaha saṃghaṭu taba hoi jaba punya purākṛta bhūri || 222 ||
बोली अपर कहेहु सखि नीका। एहिं बिआह अति हित सबहीं का
bolī apara kahehu sakhi nīkā| ehiṃ biāha ati hita sabahīṃ kā
कोउ कह संकर चाप कठोरा। ए स्यामल मृदुगात किसोरा
kou kaha saṃkara cāpa kaṭhorā| e syāmala mṛdugāta kisorā
सबु असमंजस अहइ सयानी। यह सुनि अपर कहइ मृदु बानी
sabu asamaṃjasa ahai sayānī| yaha suni apara kahai mṛdu bānī
सखि इन्ह कहँ कोउ कोउ अस कहहीं। बड़ प्रभाउ देखत लघु अहहीं
sakhi inha kaha~ kou kou asa kahahīṃ| bar̤a prabhāu dekhata laghu ahahīṃ
परसि जासु पद पंकज धूरी। तरी अहल्या कृत अघ भूरी
parasi jāsu pada paṃkaja dhūrī| tarī ahalyā kṛta agha bhūrī
सो कि रहिहि बिनु सिवधनु तोरें। यह प्रतीति परिहरिअ न भोरें
so ki rahihi binu sivadhanu toreṃ| yaha pratīti pariharia na bhoreṃ
जेहिं बिरंचि रचि सीय सँवारी। तेहिं स्यामल बरु रचेउ बिचारी
jehiṃ biraṃci raci sīya sa~vārī| tehiṃ syāmala baru raceu bicārī
तासु बचन सुनि सब हरषानीं। ऐसेइ होउ कहहिं मुदु बानी
tāsu bacana suni saba haraṣānīṃ| aisei hou kahahiṃ mudu bānī
हियँ हरषहिं बरषहिं सुमन सुमुखि सुलोचनि बृंद । जाहिं जहाँ जहँ बंधु दोउ तहँ तहँ परमानंद ॥ २२३ ॥
hiya~ haraṣahiṃ baraṣahiṃ sumana sumukhi sulocani bṛṃda | jāhiṃ jahā~ jaha~ baṃdhu dou taha~ taha~ paramānaṃda || 223 ||
पुर पूरब दिसि गे दोउ भाई। जहँ धनुमख हित भूमि बनाई
pura pūraba disi ge dou bhāī| jaha~ dhanumakha hita bhūmi banāī
अति बिस्तार चारु गच ढारी। बिमल बेदिका रुचिर सँवारी
ati bistāra cāru gaca ḍhārī| bimala bedikā rucira sa~vārī
चहुँ दिसि कंचन मंच बिसाला। रचे जहाँ बेठहिं महिपाला
cahu~ disi kaṃcana maṃca bisālā| race jahā~ beṭhahiṃ mahipālā
तेहि पाछें समीप चहुँ पासा। अपर मंच मंडली बिलासा
tehi pācheṃ samīpa cahu~ pāsā| apara maṃca maṃḍalī bilāsā
कछुक ऊँचि सब भाँति सुहाई। बैठहिं नगर लोग जहँ जाई
kachuka ū~ci saba bhā~ti suhāī| baiṭhahiṃ nagara loga jaha~ jāī
तिन्ह के निकट बिसाल सुहाए। धवल धाम बहुबरन बनाए
tinha ke nikaṭa bisāla suhāe| dhavala dhāma bahubarana banāe
जहँ बैंठैं देखहिं सब नारी। जथा जोगु निज कुल अनुहारी
jaha~ baiṃṭhaiṃ dekhahiṃ saba nārī| jathā jogu nija kula anuhārī
पुर बालक कहि कहि मृदु बचना। सादर प्रभुहि देखावहिं रचना
pura bālaka kahi kahi mṛdu bacanā| sādara prabhuhi dekhāvahiṃ racanā
सब सिसु एहि मिस प्रेमबस परसि मनोहर गात । तन पुलकहिं अति हरषु हियँ देखि देखि दोउ भ्रात ॥ २२४ ॥
saba sisu ehi misa premabasa parasi manohara gāta | tana pulakahiṃ ati haraṣu hiya~ dekhi dekhi dou bhrāta || 224 ||
सिसु सब राम प्रेमबस जाने। प्रीति समेत निकेत बखाने
sisu saba rāma premabasa jāne| prīti sameta niketa bakhāne
निज निज रुचि सब लेंहिं बोलाई। सहित सनेह जाहिं दोउ भाई
nija nija ruci saba leṃhiṃ bolāī| sahita saneha jāhiṃ dou bhāī
राम देखावहिं अनुजहि रचना। कहि मृदु मधुर मनोहर बचना
rāma dekhāvahiṃ anujahi racanā| kahi mṛdu madhura manohara bacanā
लव निमेष महँ भुवन निकाया। रचइ जासु अनुसासन माया
lava nimeṣa maha~ bhuvana nikāyā| racai jāsu anusāsana māyā
भगति हेतु सोइ दीनदयाला। चितवत चकित धनुष मखसाला
bhagati hetu soi dīnadayālā| citavata cakita dhanuṣa makhasālā
कौतुक देखि चले गुरु पाहीं। जानि बिलंबु त्रास मन माहीं
kautuka dekhi cale guru pāhīṃ| jāni bilaṃbu trāsa mana māhīṃ
जासु त्रास डर कहुँ डर होई। भजन प्रभाउ देखावत सोई
jāsu trāsa ḍara kahu~ ḍara hoī| bhajana prabhāu dekhāvata soī
कहि बातें मृदु मधुर सुहाईं। किए बिदा बालक बरिआई
kahi bāteṃ mṛdu madhura suhāīṃ| kie bidā bālaka bariāī
सभय सप्रेम बिनीत अति सकुच सहित दोउ भाइ । गुर पद पंकज नाइ सिर बैठे आयसु पाइ ॥ २२५ ॥
sabhaya saprema binīta ati sakuca sahita dou bhāi | gura pada paṃkaja nāi sira baiṭhe āyasu pāi || 225 ||
निसि प्रबेस मुनि आयसु दीन्हा। सबहीं संध्याबंदनु कीन्हा
nisi prabesa muni āyasu dīnhā| sabahīṃ saṃdhyābaṃdanu kīnhā
कहत कथा इतिहास पुरानी। रुचिर रजनि जुग जाम सिरानी
kahata kathā itihāsa purānī| rucira rajani juga jāma sirānī
मुनिबर सयन कीन्हि तब जाई। लगे चरन चापन दोउ भाई
munibara sayana kīnhi taba jāī| lage carana cāpana dou bhāī
जिन्ह के चरन सरोरुह लागी। करत बिबिध जप जोग बिरागी
jinha ke carana saroruha lāgī| karata bibidha japa joga birāgī
तेइ दोउ बंधु प्रेम जनु जीते। गुर पद कमल पलोटत प्रीते
tei dou baṃdhu prema janu jīte| gura pada kamala paloṭata prīte
बारबार मुनि अग्या दीन्ही। रघुबर जाइ सयन तब कीन्ही
bārabāra muni agyā dīnhī| raghubara jāi sayana taba kīnhī
चापत चरन लखनु उर लाएँ। सभय सप्रेम परम सचु पाएँ
cāpata carana lakhanu ura lāe~| sabhaya saprema parama sacu pāe~
पुनि पुनि प्रभु कह सोवहु ताता। पौढ़े धरि उर पद जलजाता
puni puni prabhu kaha sovahu tātā| paur̤he dhari ura pada jalajātā
उठे लखन निसि बिगत सुनि अरुनसिखा धुनि कान । गुर तें पहिलेहिं जगतपति जागे रामु सुजान ॥ २२६ ॥
uṭhe lakhana nisi bigata suni arunasikhā dhuni kāna | gura teṃ pahilehiṃ jagatapati jāge rāmu sujāna || 226 ||
सकल सौच करि जाइ नहाए। नित्य निबाहि मुनिहि सिर नाए
sakala sauca kari jāi nahāe| nitya nibāhi munihi sira nāe
समय जानि गुर आयसु पाई। लेन प्रसून चले दोउ भाई
samaya jāni gura āyasu pāī| lena prasūna cale dou bhāī
भूप बागु बर देखेउ जाई। जहँ बसंत रितु रही लोभाई
bhūpa bāgu bara dekheu jāī| jaha~ basaṃta ritu rahī lobhāī
लागे बिटप मनोहर नाना। बरन बरन बर बेलि बिताना
lāge biṭapa manohara nānā| barana barana bara beli bitānā
नव पल्लव फल सुमान सुहाए। निज संपति सुर रूख लजाए
nava pallava phala sumāna suhāe| nija saṃpati sura rūkha lajāe
चातक कोकिल कीर चकोरा। कूजत बिहग नटत कल मोरा
cātaka kokila kīra cakorā| kūjata bihaga naṭata kala morā
मध्य बाग सरु सोह सुहावा। मनि सोपान बिचित्र बनावा
madhya bāga saru soha suhāvā| mani sopāna bicitra banāvā
बिमल सलिलु सरसिज बहुरंगा। जलखग कूजत गुंजत भृंगा
bimala salilu sarasija bahuraṃgā| jalakhaga kūjata guṃjata bhṛṃgā
बागु तड़ागु बिलोकि प्रभु हरषे बंधु समेत । परम रम्य आरामु यहु जो रामहि सुख देत ॥ २२७ ॥
bāgu tar̤āgu biloki prabhu haraṣe baṃdhu sameta | parama ramya ārāmu yahu jo rāmahi sukha deta || 227 ||
चहुँ दिसि चितइ पूँछि मालिगन। लगे लेन दल फूल मुदित मन
cahu~ disi citai pū~chi māligana| lage lena dala phūla mudita mana
तेहि अवसर सीता तहँ आई। गिरिजा पूजन जननि पठाई
tehi avasara sītā taha~ āī| girijā pūjana janani paṭhāī
संग सखीं सब सुभग सयानी। गावहिं गीत मनोहर बानी
saṃga sakhīṃ saba subhaga sayānī| gāvahiṃ gīta manohara bānī
सर समीप गिरिजा गृह सोहा। बरनि न जाइ देखि मनु मोहा
sara samīpa girijā gṛha sohā| barani na jāi dekhi manu mohā
मज्जनु करि सर सखिन्ह समेता। गई मुदित मन गौरि निकेता
majjanu kari sara sakhinha sametā| gaī mudita mana gauri niketā
पूजा कीन्हि अधिक अनुरागा। निज अनुरूप सुभग बरु मागा
pūjā kīnhi adhika anurāgā| nija anurūpa subhaga baru māgā
एक सखी सिय संगु बिहाई। गई रही देखन फुलवाई
eka sakhī siya saṃgu bihāī| gaī rahī dekhana phulavāī
तेहि दोउ बंधु बिलोके जाई। प्रेम बिबस सीता पहिं आई
tehi dou baṃdhu biloke jāī| prema bibasa sītā pahiṃ āī
तासु दसा देखि सखिन्ह पुलक गात जलु नैन । कहु कारनु निज हरष कर पूछहि सब मृदु बैन ॥ २२८ ॥
tāsu dasā dekhi sakhinha pulaka gāta jalu naina | kahu kāranu nija haraṣa kara pūchahi saba mṛdu baina || 228 ||
देखन बागु कुअँर दुइ आए। बय किसोर सब भाँति सुहाए
dekhana bāgu kua~ra dui āe| baya kisora saba bhā~ti suhāe
स्याम गौर किमि कहौं बखानी। गिरा अनयन नयन बिनु बानी
syāma gaura kimi kahauṃ bakhānī| girā anayana nayana binu bānī
सुनि हरषीं सब सखीं सयानी। सिय हियँ अति उतकंठा जानी
suni haraṣīṃ saba sakhīṃ sayānī| siya hiya~ ati utakaṃṭhā jānī
एक कहइ नृपसुत तेइ आली। सुने जे मुनि सँग आए काली
eka kahai nṛpasuta tei ālī| sune je muni sa~ga āe kālī
जिन्ह निज रूप मोहनी डारी। कीन्ह स्वबस नगर नर नारी
jinha nija rūpa mohanī ḍārī| kīnha svabasa nagara nara nārī
बरनत छबि जहँ तहँ सब लोगू। अवसि देखिअहिं देखन जोगू
baranata chabi jaha~ taha~ saba logū| avasi dekhiahiṃ dekhana jogū
तासु वचन अति सियहि सुहाने। दरस लागि लोचन अकुलाने
tāsu vacana ati siyahi suhāne| darasa lāgi locana akulāne
चली अग्र करि प्रिय सखि सोई। प्रीति पुरातन लखइ न कोई
calī agra kari priya sakhi soī| prīti purātana lakhai na koī
सुमिरि सीय नारद बचन उपजी प्रीति पुनीत । चकित बिलोकति सकल दिसि जनु सिसु मृगी सभीत ॥ २२९ ॥
sumiri sīya nārada bacana upajī prīti punīta | cakita bilokati sakala disi janu sisu mṛgī sabhīta || 229 ||
कंकन किंकिनि नूपुर धुनि सुनि। कहत लखन सन रामु हृदयँ गुनि
kaṃkana kiṃkini nūpura dhuni suni| kahata lakhana sana rāmu hṛdaya~ guni
मानहुँ मदन दुंदुभी दीन्ही।।मनसा बिस्व बिजय कहँ कीन्ही
mānahu~ madana duṃdubhī dīnhī||manasā bisva bijaya kaha~ kīnhī
अस कहि फिरि चितए तेहि ओरा। सिय मुख ससि भए नयन चकोरा
asa kahi phiri citae tehi orā| siya mukha sasi bhae nayana cakorā
भए बिलोचन चारु अचंचल। मनहुँ सकुचि निमि तजे दिगंचल
bhae bilocana cāru acaṃcala| manahu~ sakuci nimi taje digaṃcala
देखि सीय सोभा सुखु पावा। हृदयँ सराहत बचनु न आवा
dekhi sīya sobhā sukhu pāvā| hṛdaya~ sarāhata bacanu na āvā
जनु बिरंचि सब निज निपुनाई। बिरचि बिस्व कहँ प्रगटि देखाई
janu biraṃci saba nija nipunāī| biraci bisva kaha~ pragaṭi dekhāī
सुंदरता कहुँ सुंदर करई। छबिगृहँ दीपसिखा जनु बरई
suṃdaratā kahu~ suṃdara karaī| chabigṛha~ dīpasikhā janu baraī
सब उपमा कबि रहे जुठारी। केहिं पटतरौं बिदेहकुमारी
saba upamā kabi rahe juṭhārī| kehiṃ paṭatarauṃ bidehakumārī
सिय सोभा हियँ बरनि प्रभु आपनि दसा बिचारि । बोले सुचि मन अनुज सन बचन समय अनुहारि ॥ २३० ॥
siya sobhā hiya~ barani prabhu āpani dasā bicāri | bole suci mana anuja sana bacana samaya anuhāri || 230 ||
तात जनकतनया यह सोई। धनुषजग्य जेहि कारन होई
tāta janakatanayā yaha soī| dhanuṣajagya jehi kārana hoī
पूजन गौरि सखीं लै आई। करत प्रकासु फिरइ फुलवाई
pūjana gauri sakhīṃ lai āī| karata prakāsu phirai phulavāī
जासु बिलोकि अलोकिक सोभा। सहज पुनीत मोर मनु छोभा
jāsu biloki alokika sobhā| sahaja punīta mora manu chobhā
सो सबु कारन जान बिधाता। फरकहिं सुभद अंग सुनु भ्राता
so sabu kārana jāna bidhātā| pharakahiṃ subhada aṃga sunu bhrātā
रघुबंसिन्ह कर सहज सुभाऊ। मनु कुपंथ पगु धरइ न काऊ
raghubaṃsinha kara sahaja subhāū| manu kupaṃtha pagu dharai na kāū
मोहि अतिसय प्रतीति मन केरी। जेहिं सपनेहुँ परनारि न हेरी
mohi atisaya pratīti mana kerī| jehiṃ sapanehu~ paranāri na herī
जिन्ह कै लहहिं न रिपु रन पीठी। नहिं पावहिं परतिय मनु डीठी
jinha kai lahahiṃ na ripu rana pīṭhī| nahiṃ pāvahiṃ paratiya manu ḍīṭhī
मंगन लहहि न जिन्ह कै नाहीं। ते नरबर थोरे जग माहीं
maṃgana lahahi na jinha kai nāhīṃ| te narabara thore jaga māhīṃ
करत बतकहि अनुज सन मन सिय रूप लोभान । मुख सरोज मकरंद छबि करइ मधुप इव पान ॥ २३१ ॥
karata batakahi anuja sana mana siya rūpa lobhāna | mukha saroja makaraṃda chabi karai madhupa iva pāna || 231 ||
चितवहि चकित चहूँ दिसि सीता। कहँ गए नृपकिसोर मनु चिंता
citavahi cakita cahū~ disi sītā| kaha~ gae nṛpakisora manu ciṃtā
जहँ बिलोक मृग सावक नैनी। जनु तहँ बरिस कमल सित श्रेनी
jaha~ biloka mṛga sāvaka nainī| janu taha~ barisa kamala sita śrenī
लता ओट तब सखिन्ह लखाए। स्यामल गौर किसोर सुहाए
latā oṭa taba sakhinha lakhāe| syāmala gaura kisora suhāe
देखि रूप लोचन ललचाने। हरषे जनु निज निधि पहिचाने
dekhi rūpa locana lalacāne| haraṣe janu nija nidhi pahicāne
थके नयन रघुपति छबि देखें। पलकन्हिहूँ परिहरीं निमेषें
thake nayana raghupati chabi dekheṃ| palakanhihū~ pariharīṃ nimeṣeṃ
अधिक सनेहँ देह भै भोरी। सरद ससिहि जनु चितव चकोरी
adhika saneha~ deha bhai bhorī| sarada sasihi janu citava cakorī
लोचन मग रामहि उर आनी। दीन्हे पलक कपाट सयानी
locana maga rāmahi ura ānī| dīnhe palaka kapāṭa sayānī
जब सिय सखिन्ह प्रेमबस जानी। कहि न सकहिं कछु मन सकुचानी
jaba siya sakhinha premabasa jānī| kahi na sakahiṃ kachu mana sakucānī
लताभवन तें प्रगट भे तेहि अवसर दोउ भाइ । निकसे जनु जुग बिमल बिधु जलद पटल बिलगाइ ॥ २३२ ॥
latābhavana teṃ pragaṭa bhe tehi avasara dou bhāi | nikase janu juga bimala bidhu jalada paṭala bilagāi || 232 ||
सोभा सीवँ सुभग दोउ बीरा। नील पीत जलजाभ सरीरा
sobhā sīva~ subhaga dou bīrā| nīla pīta jalajābha sarīrā
मोरपंख सिर सोहत नीके। गुच्छ बीच बिच कुसुम कली के
morapaṃkha sira sohata nīke| guccha bīca bica kusuma kalī ke
भाल तिलक श्रमबिंदु सुहाए। श्रवन सुभग भूषन छबि छाए
bhāla tilaka śramabiṃdu suhāe| śravana subhaga bhūṣana chabi chāe
बिकट भृकुटि कच घूघरवारे। नव सरोज लोचन रतनारे
bikaṭa bhṛkuṭi kaca ghūgharavāre| nava saroja locana ratanāre
चारु चिबुक नासिका कपोला। हास बिलास लेत मनु मोला
cāru cibuka nāsikā kapolā| hāsa bilāsa leta manu molā
मुखछबि कहि न जाइ मोहि पाहीं। जो बिलोकि बहु काम लजाहीं
mukhachabi kahi na jāi mohi pāhīṃ| jo biloki bahu kāma lajāhīṃ
उर मनि माल कंबु कल गीवा। काम कलभ कर भुज बलसींवा
ura mani māla kaṃbu kala gīvā| kāma kalabha kara bhuja balasīṃvā
सुमन समेत बाम कर दोना। सावँर कुअँर सखी सुठि लोना
sumana sameta bāma kara donā| sāva~ra kua~ra sakhī suṭhi lonā
केहरि कटि पट पीत धर सुषमा सील निधान । देखि भानुकुलभूषनहि बिसरा सखिन्ह अपान ॥ २३३ ॥
kehari kaṭi paṭa pīta dhara suṣamā sīla nidhāna | dekhi bhānukulabhūṣanahi bisarā sakhinha apāna || 233 ||
धरि धीरजु एक आलि सयानी। सीता सन बोली गहि पानी
dhari dhīraju eka āli sayānī| sītā sana bolī gahi pānī
बहुरि गौरि कर ध्यान करेहू। भूपकिसोर देखि किन लेहू
bahuri gauri kara dhyāna karehū| bhūpakisora dekhi kina lehū
सकुचि सीयँ तब नयन उघारे। सनमुख दोउ रघुसिंघ निहारे
sakuci sīya~ taba nayana ughāre| sanamukha dou raghusiṃgha nihāre
नख सिख देखि राम कै सोभा। सुमिरि पिता पनु मनु अति छोभा
nakha sikha dekhi rāma kai sobhā| sumiri pitā panu manu ati chobhā
परबस सखिन्ह लखी जब सीता। भयउ गहरु सब कहहि सभीता
parabasa sakhinha lakhī jaba sītā| bhayau gaharu saba kahahi sabhītā
पुनि आउब एहि बेरिआँ काली। अस कहि मन बिहसी एक आली
puni āuba ehi beriā~ kālī| asa kahi mana bihasī eka ālī
गूढ़ गिरा सुनि सिय सकुचानी। भयउ बिलंबु मातु भय मानी
gūr̤ha girā suni siya sakucānī| bhayau bilaṃbu mātu bhaya mānī
धरि बड़ि धीर रामु उर आने। फिरि अपनपउ पितुबस जाने
dhari bar̤i dhīra rāmu ura āne| phiri apanapau pitubasa jāne
देखन मिस मृग बिहग तरु फिरइ बहोरि बहोरि । निरखि निरखि रघुबीर छबि बाढ़इ प्रीति न थोरि ॥ २३४ ॥
dekhana misa mṛga bihaga taru phirai bahori bahori | nirakhi nirakhi raghubīra chabi bār̤hai prīti na thori || 234 ||
जानि कठिन सिवचाप बिसूरति। चली राखि उर स्यामल मूरति
jāni kaṭhina sivacāpa bisūrati| calī rākhi ura syāmala mūrati
प्रभु जब जात जानकी जानी। सुख सनेह सोभा गुन खानी
prabhu jaba jāta jānakī jānī| sukha saneha sobhā guna khānī
परम प्रेममय मृदु मसि कीन्ही। चारु चित भीतीं लिख लीन्ही
parama premamaya mṛdu masi kīnhī| cāru cita bhītīṃ likha līnhī
गई भवानी भवन बहोरी। बंदि चरन बोली कर जोरी
gaī bhavānī bhavana bahorī| baṃdi carana bolī kara jorī
जय जय गिरिबरराज किसोरी। जय महेस मुख चंद चकोरी
jaya jaya giribararāja kisorī| jaya mahesa mukha caṃda cakorī
जय गज बदन षड़ानन माता। जगत जननि दामिनि दुति गाता
jaya gaja badana ṣar̤ānana mātā| jagata janani dāmini duti gātā
नहिं तव आदि मध्य अवसाना। अमित प्रभाउ बेदु नहिं जाना
nahiṃ tava ādi madhya avasānā| amita prabhāu bedu nahiṃ jānā
भव भव बिभव पराभव कारिनि। बिस्व बिमोहनि स्वबस बिहारिनि
bhava bhava bibhava parābhava kārini| bisva bimohani svabasa bihārini
पतिदेवता सुतीय महुँ मातु प्रथम तव रेख । महिमा अमित न सकहिं कहि सहस सारदा सेष ॥ २३५ ॥
patidevatā sutīya mahu~ mātu prathama tava rekha | mahimā amita na sakahiṃ kahi sahasa sāradā seṣa || 235 ||
सेवत तोहि सुलभ फल चारी। बरदायनी पुरारि पिआरी
sevata tohi sulabha phala cārī| baradāyanī purāri piārī
देबि पूजि पद कमल तुम्हारे। सुर नर मुनि सब होहिं सुखारे
debi pūji pada kamala tumhāre| sura nara muni saba hohiṃ sukhāre
मोर मनोरथु जानहु नीकें। बसहु सदा उर पुर सबही कें
mora manorathu jānahu nīkeṃ| basahu sadā ura pura sabahī keṃ
कीन्हेउँ प्रगट न कारन तेहीं। अस कहि चरन गहे बैदेहीं
kīnheu~ pragaṭa na kārana tehīṃ| asa kahi carana gahe baidehīṃ
बिनय प्रेम बस भई भवानी। खसी माल मूरति मुसुकानी
binaya prema basa bhaī bhavānī| khasī māla mūrati musukānī
सादर सियँ प्रसादु सिर धरेऊ। बोली गौरि हरषु हियँ भरेऊ
sādara siya~ prasādu sira dhareū| bolī gauri haraṣu hiya~ bhareū
सुनु सिय सत्य असीस हमारी। पूजिहि मन कामना तुम्हारी
sunu siya satya asīsa hamārī| pūjihi mana kāmanā tumhārī
नारद बचन सदा सुचि साचा। सो बरु मिलिहि जाहिं मनु राचा
nārada bacana sadā suci sācā| so baru milihi jāhiṃ manu rācā
मनु जाहिं राचेउ मिलिहि सो बरु सहज सुंदर साँवरो । करुना निधान सुजान सीलु सनेहु जानत रावरो । एहि भाँति गौरि असीस सुनि सिय सहित हियँ हरषीं अली । तुलसी भवानिहि पूजि पुनि पुनि मुदित मन मंदिर चली
manu jāhiṃ rāceu milihi so baru sahaja suṃdara sā~varo | karunā nidhāna sujāna sīlu sanehu jānata rāvaro | ehi bhā~ti gauri asīsa suni siya sahita hiya~ haraṣīṃ alī | tulasī bhavānihi pūji puni puni mudita mana maṃdira calī
जानि गौरि अनुकूल सिय हिय हरषु न जाइ कहि । मंजुल मंगल मूल बाम अंग फरकन लगे ॥ २३६ ॥
jāni gauri anukūla siya hiya haraṣu na jāi kahi | maṃjula maṃgala mūla bāma aṃga pharakana lage || 236 ||
हृदयँ सराहत सीय लोनाई। गुर समीप गवने दोउ भाई
hṛdaya~ sarāhata sīya lonāī| gura samīpa gavane dou bhāī
राम कहा सबु कौसिक पाहीं। सरल सुभाउ छुअत छल नाहीं
rāma kahā sabu kausika pāhīṃ| sarala subhāu chuata chala nāhīṃ
सुमन पाइ मुनि पूजा कीन्ही। पुनि असीस दुहु भाइन्ह दीन्ही
sumana pāi muni pūjā kīnhī| puni asīsa duhu bhāinha dīnhī
सुफल मनोरथ होहुँ तुम्हारे। रामु लखनु सुनि भए सुखारे
suphala manoratha hohu~ tumhāre| rāmu lakhanu suni bhae sukhāre
करि भोजनु मुनिबर बिग्यानी। लगे कहन कछु कथा पुरानी
kari bhojanu munibara bigyānī| lage kahana kachu kathā purānī
बिगत दिवसु गुरु आयसु पाई। संध्या करन चले दोउ भाई
bigata divasu guru āyasu pāī| saṃdhyā karana cale dou bhāī
प्राची दिसि ससि उयउ सुहावा। सिय मुख सरिस देखि सुखु पावा
prācī disi sasi uyau suhāvā| siya mukha sarisa dekhi sukhu pāvā
बहुरि बिचारु कीन्ह मन माहीं। सीय बदन सम हिमकर नाहीं
bahuri bicāru kīnha mana māhīṃ| sīya badana sama himakara nāhīṃ
जनमु सिंधु पुनि बंधु बिषु दिन मलीन सकलंक । सिय मुख समता पाव किमि चंदु बापुरो रंक ॥ २३७ ॥
janamu siṃdhu puni baṃdhu biṣu dina malīna sakalaṃka | siya mukha samatā pāva kimi caṃdu bāpuro raṃka || 237 ||
घटइ बढ़इ बिरहनि दुखदाई। ग्रसइ राहु निज संधिहिं पाई
ghaṭai bar̤hai birahani dukhadāī| grasai rāhu nija saṃdhihiṃ pāī
कोक सिकप्रद पंकज द्रोही। अवगुन बहुत चंद्रमा तोही
koka sikaprada paṃkaja drohī| avaguna bahuta caṃdramā tohī
बैदेही मुख पटतर दीन्हे। होइ दोष बड़ अनुचित कीन्हे
baidehī mukha paṭatara dīnhe| hoi doṣa bar̤a anucita kīnhe
सिय मुख छबि बिधु ब्याज बखानी। गुरु पहिं चले निसा बड़ि जानी
siya mukha chabi bidhu byāja bakhānī| guru pahiṃ cale nisā bar̤i jānī
करि मुनि चरन सरोज प्रनामा। आयसु पाइ कीन्ह बिश्रामा
kari muni carana saroja pranāmā| āyasu pāi kīnha biśrāmā
बिगत निसा रघुनायक जागे। बंधु बिलोकि कहन अस लागे
bigata nisā raghunāyaka jāge| baṃdhu biloki kahana asa lāge
उदउ अरुन अवलोकहु ताता। पंकज कोक लोक सुखदाता
udau aruna avalokahu tātā| paṃkaja koka loka sukhadātā
बोले लखनु जोरि जुग पानी। प्रभु प्रभाउ सूचक मृदु बानी
bole lakhanu jori juga pānī| prabhu prabhāu sūcaka mṛdu bānī
अरुनोदयँ सकुचे कुमुद उडगन जोति मलीन । जिमि तुम्हार आगमन सुनि भए नृपति बलहीन ॥ २३८ ॥
arunodaya~ sakuce kumuda uḍagana joti malīna | jimi tumhāra āgamana suni bhae nṛpati balahīna || 238 ||
नृप सब नखत करहिं उजिआरी। टारि न सकहिं चाप तम भारी
nṛpa saba nakhata karahiṃ ujiārī| ṭāri na sakahiṃ cāpa tama bhārī
Keys: ← → turn the page, J K step through the verses.
Illustration: Verse & Place (Project-owned).