सो सुत प्रिय पितु प्रान समाना। जद्यपि सो सब भाँति अयाना
so suta priya pitu prāna samānā| jadyapi so saba bhā~ti ayānā
उत्तरकाण्ड · उत्तरकाण्ड
Part 4 of 5: verses 874–1164 of 1,455Awadhi with transliteration
सो सुत प्रिय पितु प्रान समाना। जद्यपि सो सब भाँति अयाना
so suta priya pitu prāna samānā| jadyapi so saba bhā~ti ayānā
एहि बिधि जीव चराचर जेते। त्रिजग देव नर असुर समेते
ehi bidhi jīva carācara jete| trijaga deva nara asura samete
अखिल बिस्व यह मोर उपाया। सब पर मोहि बराबरि दाया
akhila bisva yaha mora upāyā| saba para mohi barābari dāyā
तिन्ह महँ जो परिहरि मद माया। भजै मोहि मन बच अरू काया
tinha maha~ jo parihari mada māyā| bhajai mohi mana baca arū kāyā
पुरूष नपुंसक नारि वा जीव चराचर कोइ । सर्ब भाव भज कपट तजि मोहि परम प्रिय सोइ ॥ ८७क ॥
purūṣa napuṃsaka nāri vā jīva carācara koi | sarba bhāva bhaja kapaṭa taji mohi parama priya soi || 87ka ||
सत्य कहउँ खग तोहि सुचि सेवक मम प्रानप्रिय । अस बिचारि भजु मोहि परिहरि आस भरोस सब ॥ ८७ख ॥
satya kahau~ khaga tohi suci sevaka mama prānapriya | asa bicāri bhaju mohi parihari āsa bharosa saba || 87kha ||
कबहूँ काल न ब्यापिहि तोही। सुमिरेसु भजेसु निरंतर मोही
kabahū~ kāla na byāpihi tohī| sumiresu bhajesu niraṃtara mohī
प्रभु बचनामृत सुनि न अघाऊँ। तनु पुलकित मन अति हरषाऊँ
prabhu bacanāmṛta suni na aghāū~| tanu pulakita mana ati haraṣāū~
सो सुख जानइ मन अरु काना। नहिं रसना पहिं जाइ बखाना
so sukha jānai mana aru kānā| nahiṃ rasanā pahiṃ jāi bakhānā
प्रभु सोभा सुख जानहिं नयना। कहि किमि सकहिं तिन्हहि नहिं बयना
prabhu sobhā sukha jānahiṃ nayanā| kahi kimi sakahiṃ tinhahi nahiṃ bayanā
बहु बिधि मोहि प्रबोधि सुख देई। लगे करन सिसु कौतुक तेई
bahu bidhi mohi prabodhi sukha deī| lage karana sisu kautuka teī
सजल नयन कछु मुख करि रूखा। चितइ मातु लागी अति भूखा
sajala nayana kachu mukha kari rūkhā| citai mātu lāgī ati bhūkhā
देखि मातु आतुर उठि धाई। कहि मृदु बचन लिए उर लाई
dekhi mātu ātura uṭhi dhāī| kahi mṛdu bacana lie ura lāī
गोद राखि कराव पय पाना। रघुपति चरित ललित कर गाना
goda rākhi karāva paya pānā| raghupati carita lalita kara gānā
जेहि सुख लागि पुरारि असुभ बेष कृत सिव सुखद । अवधपुरी नर नारि तेहि सुख महुँ संतत मगन ॥ ८८क ॥
jehi sukha lāgi purāri asubha beṣa kṛta siva sukhada | avadhapurī nara nāri tehi sukha mahu~ saṃtata magana || 88ka ||
सोइ सुख लवलेस जिन्ह बारक सपनेहुँ लहेउ । ते नहिं गनहिं खगेस ब्रह्मसुखहि सज्जन सुमति ॥ ८८ख ॥
soi sukha lavalesa jinha bāraka sapanehu~ laheu | te nahiṃ ganahiṃ khagesa brahmasukhahi sajjana sumati || 88kha ||
मैं पुनि अवध रहेउँ कछु काला। देखेउँ बालबिनोद रसाला
maiṃ puni avadha raheu~ kachu kālā| dekheu~ bālabinoda rasālā
राम प्रसाद भगति बर पायउँ। प्रभु पद बंदि निजाश्रम आयउँ
rāma prasāda bhagati bara pāyau~| prabhu pada baṃdi nijāśrama āyau~
तब ते मोहि न ब्यापी माया। जब ते रघुनायक अपनाया
taba te mohi na byāpī māyā| jaba te raghunāyaka apanāyā
यह सब गुप्त चरित मैं गावा। हरि मायाँ जिमि मोहि नचावा
yaha saba gupta carita maiṃ gāvā| hari māyā~ jimi mohi nacāvā
निज अनुभव अब कहउँ खगेसा। बिनु हरि भजन न जाहि कलेसा
nija anubhava aba kahau~ khagesā| binu hari bhajana na jāhi kalesā
राम कृपा बिनु सुनु खगराई। जानि न जाइ राम प्रभुताई
rāma kṛpā binu sunu khagarāī| jāni na jāi rāma prabhutāī
जानें बिनु न होइ परतीती। बिनु परतीति होइ नहिं प्रीती
jāneṃ binu na hoi paratītī| binu paratīti hoi nahiṃ prītī
प्रीति बिना नहिं भगति दिढ़ाई। जिमि खगपति जल कै चिकनाई
prīti binā nahiṃ bhagati dir̤hāī| jimi khagapati jala kai cikanāī
बिनु गुर होइ कि ग्यान ग्यान कि होइ बिराग बिनु । गावहिं बेद पुरान सुख कि लहिअ हरि भगति बिनु ॥ ८९क ॥
binu gura hoi ki gyāna gyāna ki hoi birāga binu | gāvahiṃ beda purāna sukha ki lahia hari bhagati binu || 89ka ||
कोउ बिश्राम कि पाव तात सहज संतोष बिनु । चलै कि जल बिनु नाव कोटि जतन पचि पचि मरिअ ॥ ८९ख ॥
kou biśrāma ki pāva tāta sahaja saṃtoṣa binu | calai ki jala binu nāva koṭi jatana paci paci maria || 89kha ||
बिनु संतोष न काम नसाहीं। काम अछत सुख सपनेहुँ नाहीं
binu saṃtoṣa na kāma nasāhīṃ| kāma achata sukha sapanehu~ nāhīṃ
राम भजन बिनु मिटहिं कि कामा। थल बिहीन तरु कबहुँ कि जामा
rāma bhajana binu miṭahiṃ ki kāmā| thala bihīna taru kabahu~ ki jāmā
बिनु बिग्यान कि समता आवइ। कोउ अवकास कि नभ बिनु पावइ
binu bigyāna ki samatā āvai| kou avakāsa ki nabha binu pāvai
श्रद्धा बिना धर्म नहिं होई। बिनु महि गंध कि पावइ कोई
śraddhā binā dharma nahiṃ hoī| binu mahi gaṃdha ki pāvai koī
बिनु तप तेज कि कर बिस्तारा। जल बिनु रस कि होइ संसारा
binu tapa teja ki kara bistārā| jala binu rasa ki hoi saṃsārā
सील कि मिल बिनु बुध सेवकाई। जिमि बिनु तेज न रूप गोसाई
sīla ki mila binu budha sevakāī| jimi binu teja na rūpa gosāī
निज सुख बिनु मन होइ कि थीरा। परस कि होइ बिहीन समीरा
nija sukha binu mana hoi ki thīrā| parasa ki hoi bihīna samīrā
कवनिउ सिद्धि कि बिनु बिस्वासा। बिनु हरि भजन न भव भय नासा
kavaniu siddhi ki binu bisvāsā| binu hari bhajana na bhava bhaya nāsā
बिनु बिस्वास भगति नहिं तेहि बिनु द्रवहिं न रामु । राम कृपा बिनु सपनेहुँ जीव न लह बिश्रामु ॥ ९०क ॥
binu bisvāsa bhagati nahiṃ tehi binu dravahiṃ na rāmu | rāma kṛpā binu sapanehu~ jīva na laha biśrāmu || 90ka ||
अस बिचारि मतिधीर तजि कुतर्क संसय सकल । भजहु राम रघुबीर करुनाकर सुंदर सुखद ॥ ९०ख ॥
asa bicāri matidhīra taji kutarka saṃsaya sakala | bhajahu rāma raghubīra karunākara suṃdara sukhada || 90kha ||
निज मति सरिस नाथ मैं गाई। प्रभु प्रताप महिमा खगराई
nija mati sarisa nātha maiṃ gāī| prabhu pratāpa mahimā khagarāī
कहेउँ न कछु करि जुगुति बिसेषी। यह सब मैं निज नयनन्हि देखी
kaheu~ na kachu kari juguti biseṣī| yaha saba maiṃ nija nayananhi dekhī
महिमा नाम रूप गुन गाथा। सकल अमित अनंत रघुनाथा
mahimā nāma rūpa guna gāthā| sakala amita anaṃta raghunāthā
निज निज मति मुनि हरि गुन गावहिं। निगम सेष सिव पार न पावहिं
nija nija mati muni hari guna gāvahiṃ| nigama seṣa siva pāra na pāvahiṃ
तुम्हहि आदि खग मसक प्रजंता। नभ उड़ाहिं नहिं पावहिं अंता
tumhahi ādi khaga masaka prajaṃtā| nabha ur̤āhiṃ nahiṃ pāvahiṃ aṃtā
तिमि रघुपति महिमा अवगाहा। तात कबहुँ कोउ पाव कि थाहा
timi raghupati mahimā avagāhā| tāta kabahu~ kou pāva ki thāhā
रामु काम सत कोटि सुभग तन। दुर्गा कोटि अमित अरि मर्दन
rāmu kāma sata koṭi subhaga tana| durgā koṭi amita ari mardana
सक्र कोटि सत सरिस बिलासा। नभ सत कोटि अमित अवकासा
sakra koṭi sata sarisa bilāsā| nabha sata koṭi amita avakāsā
मरुत कोटि सत बिपुल बल रबि सत कोटि प्रकास । ससि सत कोटि सुसीतल समन सकल भव त्रास ॥ ९१क ॥
maruta koṭi sata bipula bala rabi sata koṭi prakāsa | sasi sata koṭi susītala samana sakala bhava trāsa || 91ka ||
काल कोटि सत सरिस अति दुस्तर दुर्ग दुरंत । धूमकेतु सत कोटि सम दुराधरष भगवंत ॥ ९१ख ॥
kāla koṭi sata sarisa ati dustara durga duraṃta | dhūmaketu sata koṭi sama durādharaṣa bhagavaṃta || 91kha ||
प्रभु अगाध सत कोटि पताला। समन कोटि सत सरिस कराला
prabhu agādha sata koṭi patālā| samana koṭi sata sarisa karālā
तीरथ अमित कोटि सम पावन। नाम अखिल अघ पूग नसावन
tīratha amita koṭi sama pāvana| nāma akhila agha pūga nasāvana
हिमगिरि कोटि अचल रघुबीरा। सिंधु कोटि सत सम गंभीरा
himagiri koṭi acala raghubīrā| siṃdhu koṭi sata sama gaṃbhīrā
कामधेनु सत कोटि समाना। सकल काम दायक भगवाना
kāmadhenu sata koṭi samānā| sakala kāma dāyaka bhagavānā
सारद कोटि अमित चतुराई। बिधि सत कोटि सृष्टि निपुनाई
sārada koṭi amita caturāī| bidhi sata koṭi sṛṣṭi nipunāī
बिष्नु कोटि सम पालन कर्ता। रुद्र कोटि सत सम संहर्ता
biṣnu koṭi sama pālana kartā| rudra koṭi sata sama saṃhartā
धनद कोटि सत सम धनवाना। माया कोटि प्रपंच निधाना
dhanada koṭi sata sama dhanavānā| māyā koṭi prapaṃca nidhānā
भार धरन सत कोटि अहीसा। निरवधि निरुपम प्रभु जगदीसा
bhāra dharana sata koṭi ahīsā| niravadhi nirupama prabhu jagadīsā
निरुपम न उपमा आन राम समान रामु निगम कहै । जिमि कोटि सत खद्योत सम रबि कहत अति लघुता लहै । एहि भाँति निज निज मति बिलास मुनिस हरिहि बखानहीं । प्रभु भाव गाहक अति कृपाल सप्रेम सुनि सुख मानहीं
nirupama na upamā āna rāma samāna rāmu nigama kahai | jimi koṭi sata khadyota sama rabi kahata ati laghutā lahai | ehi bhā~ti nija nija mati bilāsa munisa harihi bakhānahīṃ | prabhu bhāva gāhaka ati kṛpāla saprema suni sukha mānahīṃ
रामु अमित गुन सागर थाह कि पावइ कोइ । संतन्ह सन जस किछु सुनेउँ तुम्हहि सुनायउँ सोइ ॥ ९२क ॥
rāmu amita guna sāgara thāha ki pāvai koi | saṃtanha sana jasa kichu suneu~ tumhahi sunāyau~ soi || 92ka ||
भाव बस्य भगवान सुख निधान करुना भवन । तजि ममता मद मान भजिअ सदा सीता रवन ॥ ९२ख ॥
bhāva basya bhagavāna sukha nidhāna karunā bhavana | taji mamatā mada māna bhajia sadā sītā ravana || 92kha ||
सुनि भुसुंडि के बचन सुहाए। हरषित खगपति पंख फुलाए
suni bhusuṃḍi ke bacana suhāe| haraṣita khagapati paṃkha phulāe
नयन नीर मन अति हरषाना। श्रीरघुपति प्रताप उर आना
nayana nīra mana ati haraṣānā| śrīraghupati pratāpa ura ānā
पाछिल मोह समुझि पछिताना। ब्रह्म अनादि मनुज करि माना
pāchila moha samujhi pachitānā| brahma anādi manuja kari mānā
पुनि पुनि काग चरन सिरु नावा। जानि राम सम प्रेम बढ़ावा
puni puni kāga carana siru nāvā| jāni rāma sama prema bar̤hāvā
गुर बिनु भव निधि तरइ न कोई। जौं बिरंचि संकर सम होई
gura binu bhava nidhi tarai na koī| jauṃ biraṃci saṃkara sama hoī
संसय सर्प ग्रसेउ मोहि ताता। दुखद लहरि कुतर्क बहु ब्राता
saṃsaya sarpa graseu mohi tātā| dukhada lahari kutarka bahu brātā
तव सरूप गारुड़ि रघुनायक। मोहि जिआयउ जन सुखदायक
tava sarūpa gārur̤i raghunāyaka| mohi jiāyau jana sukhadāyaka
तव प्रसाद मम मोह नसाना। राम रहस्य अनूपम जाना
tava prasāda mama moha nasānā| rāma rahasya anūpama jānā
ताहि प्रसंसि बिबिध बिधि सीस नाइ कर जोरि । बचन बिनीत सप्रेम मृदु बोलेउ गरुड़ बहोरि ॥ ९३क ॥
tāhi prasaṃsi bibidha bidhi sīsa nāi kara jori | bacana binīta saprema mṛdu boleu garur̤a bahori || 93ka ||
प्रभु अपने अबिबेक ते बूझउँ स्वामी तोहि । कृपासिंधु सादर कहहु जानि दास निज मोहि ॥ ९३ख ॥
prabhu apane abibeka te būjhau~ svāmī tohi | kṛpāsiṃdhu sādara kahahu jāni dāsa nija mohi || 93kha ||
तुम्ह सर्बग्य तन्य तम पारा। सुमति सुसील सरल आचारा
tumha sarbagya tanya tama pārā| sumati susīla sarala ācārā
ग्यान बिरति बिग्यान निवासा। रघुनायक के तुम्ह प्रिय दासा
gyāna birati bigyāna nivāsā| raghunāyaka ke tumha priya dāsā
कारन कवन देह यह पाई। तात सकल मोहि कहहु बुझाई
kārana kavana deha yaha pāī| tāta sakala mohi kahahu bujhāī
राम चरित सर सुंदर स्वामी। पायहु कहाँ कहहु नभगामी
rāma carita sara suṃdara svāmī| pāyahu kahā~ kahahu nabhagāmī
नाथ सुना मैं अस सिव पाहीं। महा प्रलयहुँ नास तव नाहीं
nātha sunā maiṃ asa siva pāhīṃ| mahā pralayahu~ nāsa tava nāhīṃ
मुधा बचन नहिं ईस्वर कहई। सोउ मोरें मन संसय अहई
mudhā bacana nahiṃ īsvara kahaī| sou moreṃ mana saṃsaya ahaī
अग जग जीव नाग नर देवा। नाथ सकल जगु काल कलेवा
aga jaga jīva nāga nara devā| nātha sakala jagu kāla kalevā
अंड कटाह अमित लय कारी। कालु सदा दुरतिक्रम भारी
aṃḍa kaṭāha amita laya kārī| kālu sadā duratikrama bhārī
तुम्हहि न ब्यापत काल अति कराल कारन कवन । मोहि सो कहहु कृपाल ग्यान प्रभाव कि जोग बल ॥ ९४क ॥
tumhahi na byāpata kāla ati karāla kārana kavana | mohi so kahahu kṛpāla gyāna prabhāva ki joga bala || 94ka ||
प्रभु तव आश्रम आएँ मोर मोह भ्रम भाग । कारन कवन सो नाथ सब कहहु सहित अनुराग ॥ ९४ख ॥
prabhu tava āśrama āe~ mora moha bhrama bhāga | kārana kavana so nātha saba kahahu sahita anurāga || 94kha ||
गरुड़ गिरा सुनि हरषेउ कागा। बोलेउ उमा परम अनुरागा
garur̤a girā suni haraṣeu kāgā| boleu umā parama anurāgā
धन्य धन्य तव मति उरगारी। प्रस्न तुम्हारि मोहि अति प्यारी
dhanya dhanya tava mati uragārī| prasna tumhāri mohi ati pyārī
सुनि तव प्रस्न सप्रेम सुहाई। बहुत जनम कै सुधि मोहि आई
suni tava prasna saprema suhāī| bahuta janama kai sudhi mohi āī
सब निज कथा कहउँ मैं गाई। तात सुनहु सादर मन लाई
saba nija kathā kahau~ maiṃ gāī| tāta sunahu sādara mana lāī
जप तप मख सम दम ब्रत दाना। बिरति बिबेक जोग बिग्याना
japa tapa makha sama dama brata dānā| birati bibeka joga bigyānā
सब कर फल रघुपति पद प्रेमा। तेहि बिनु कोउ न पावइ छेमा
saba kara phala raghupati pada premā| tehi binu kou na pāvai chemā
एहि तन राम भगति मैं पाई। ताते मोहि ममता अधिकाई
ehi tana rāma bhagati maiṃ pāī| tāte mohi mamatā adhikāī
जेहि तें कछु निज स्वारथ होई। तेहि पर ममता कर सब कोई
jehi teṃ kachu nija svāratha hoī| tehi para mamatā kara saba koī
पन्नगारि असि नीति श्रुति संमत सज्जन कहहिं । अति नीचहु सन प्रीति करिअ जानि निज परम हित ॥ ९५क ॥
pannagāri asi nīti śruti saṃmata sajjana kahahiṃ | ati nīcahu sana prīti karia jāni nija parama hita || 95ka ||
पाट कीट तें होइ तेहि तें पाटंबर रुचिर । कृमि पालइ सबु कोइ परम अपावन प्रान सम ॥ ९५ख ॥
pāṭa kīṭa teṃ hoi tehi teṃ pāṭaṃbara rucira | kṛmi pālai sabu koi parama apāvana prāna sama || 95kha ||
स्वारथ साँच जीव कहुँ एहा। मन क्रम बचन राम पद नेहा
svāratha sā~ca jīva kahu~ ehā| mana krama bacana rāma pada nehā
सोइ पावन सोइ सुभग सरीरा। जो तनु पाइ भजिअ रघुबीरा
soi pāvana soi subhaga sarīrā| jo tanu pāi bhajia raghubīrā
राम बिमुख लहि बिधि सम देही। कबि कोबिद न प्रसंसहिं तेही
rāma bimukha lahi bidhi sama dehī| kabi kobida na prasaṃsahiṃ tehī
राम भगति एहिं तन उर जामी। ताते मोहि परम प्रिय स्वामी
rāma bhagati ehiṃ tana ura jāmī| tāte mohi parama priya svāmī
तजउँ न तन निज इच्छा मरना। तन बिनु बेद भजन नहिं बरना
tajau~ na tana nija icchā maranā| tana binu beda bhajana nahiṃ baranā
प्रथम मोहँ मोहि बहुत बिगोवा। राम बिमुख सुख कबहुँ न सोवा
prathama moha~ mohi bahuta bigovā| rāma bimukha sukha kabahu~ na sovā
नाना जनम कर्म पुनि नाना। किए जोग जप तप मख दाना
nānā janama karma puni nānā| kie joga japa tapa makha dānā
कवन जोनि जनमेउँ जहँ नाहीं। मैं खगेस भ्रमि भ्रमि जग माहीं
kavana joni janameu~ jaha~ nāhīṃ| maiṃ khagesa bhrami bhrami jaga māhīṃ
देखेउँ करि सब करम गोसाई। सुखी न भयउँ अबहिं की नाई
dekheu~ kari saba karama gosāī| sukhī na bhayau~ abahiṃ kī nāī
सुधि मोहि नाथ जन्म बहु केरी। सिव प्रसाद मति मोहँ न घेरी
sudhi mohi nātha janma bahu kerī| siva prasāda mati moha~ na gherī
प्रथम जन्म के चरित अब कहउँ सुनहु बिहगेस । सुनि प्रभु पद रति उपजइ जातें मिटहिं कलेस ॥ ९६क ॥
prathama janma ke carita aba kahau~ sunahu bihagesa | suni prabhu pada rati upajai jāteṃ miṭahiṃ kalesa || 96ka ||
पूरुब कल्प एक प्रभु जुग कलिजुग मल मूल । नर अरु नारि अधर्म रत सकल निगम प्रतिकूल ॥ ९६ख ॥
pūruba kalpa eka prabhu juga kalijuga mala mūla | nara aru nāri adharma rata sakala nigama pratikūla || 96kha ||
तेहि कलिजुग कोसलपुर जाई। जन्मत भयउँ सूद्र तनु पाई
tehi kalijuga kosalapura jāī| janmata bhayau~ sūdra tanu pāī
सिव सेवक मन क्रम अरु बानी। आन देव निंदक अभिमानी
siva sevaka mana krama aru bānī| āna deva niṃdaka abhimānī
धन मद मत्त परम बाचाला। उग्रबुद्धि उर दंभ बिसाला
dhana mada matta parama bācālā| ugrabuddhi ura daṃbha bisālā
जदपि रहेउँ रघुपति रजधानी। तदपि न कछु महिमा तब जानी
jadapi raheu~ raghupati rajadhānī| tadapi na kachu mahimā taba jānī
अब जाना मैं अवध प्रभावा। निगमागम पुरान अस गावा
aba jānā maiṃ avadha prabhāvā| nigamāgama purāna asa gāvā
कवनेहुँ जन्म अवध बस जोई। राम परायन सो परि होई
kavanehu~ janma avadha basa joī| rāma parāyana so pari hoī
अवध प्रभाव जान तब प्रानी। जब उर बसहिं रामु धनुपानी
avadha prabhāva jāna taba prānī| jaba ura basahiṃ rāmu dhanupānī
सो कलिकाल कठिन उरगारी। पाप परायन सब नर नारी
so kalikāla kaṭhina uragārī| pāpa parāyana saba nara nārī
कलिमल ग्रसे धर्म सब लुप्त भए सदग्रंथ । दंभिन्ह निज मति कल्पि करि प्रगट किए बहु पंथ ॥ ९७क ॥
kalimala grase dharma saba lupta bhae sadagraṃtha | daṃbhinha nija mati kalpi kari pragaṭa kie bahu paṃtha || 97ka ||
भए लोग सब मोहबस लोभ ग्रसे सुभ कर्म । सुनु हरिजान ग्यान निधि कहउँ कछुक कलिधर्म ॥ ९७ख ॥
bhae loga saba mohabasa lobha grase subha karma | sunu harijāna gyāna nidhi kahau~ kachuka kalidharma || 97kha ||
बरन धर्म नहिं आश्रम चारी। श्रुति बिरोध रत सब नर नारी
barana dharma nahiṃ āśrama cārī| śruti birodha rata saba nara nārī
द्विज श्रुति बेचक भूप प्रजासन। कोउ नहिं मान निगम अनुसासन
dvija śruti becaka bhūpa prajāsana| kou nahiṃ māna nigama anusāsana
मारग सोइ जा कहुँ जोइ भावा। पंडित सोइ जो गाल बजावा
māraga soi jā kahu~ joi bhāvā| paṃḍita soi jo gāla bajāvā
मिथ्यारंभ दंभ रत जोई। ता कहुँ संत कहइ सब कोई
mithyāraṃbha daṃbha rata joī| tā kahu~ saṃta kahai saba koī
सोइ सयान जो परधन हारी। जो कर दंभ सो बड़ आचारी
soi sayāna jo paradhana hārī| jo kara daṃbha so bar̤a ācārī
जौ कह झूँठ मसखरी जाना। कलिजुग सोइ गुनवंत बखाना
jau kaha jhū~ṭha masakharī jānā| kalijuga soi gunavaṃta bakhānā
निराचार जो श्रुति पथ त्यागी। कलिजुग सोइ ग्यानी सो बिरागी
nirācāra jo śruti patha tyāgī| kalijuga soi gyānī so birāgī
जाकें नख अरु जटा बिसाला। सोइ तापस प्रसिद्ध कलिकाला
jākeṃ nakha aru jaṭā bisālā| soi tāpasa prasiddha kalikālā
असुभ बेष भूषन धरें भच्छाभच्छ जे खाहिं । तेइ जोगी तेइ सिद्ध नर पूज्य ते कलिजुग माहिं ॥ ९८क ॥
asubha beṣa bhūṣana dhareṃ bhacchābhaccha je khāhiṃ | tei jogī tei siddha nara pūjya te kalijuga māhiṃ || 98ka ||
जे अपकारी चार तिन्ह कर गौरव मान्य तेइ । मन क्रम बचन लबार तेइ बकता कलिकाल महुँ ॥ ९८ख ॥
je apakārī cāra tinha kara gaurava mānya tei | mana krama bacana labāra tei bakatā kalikāla mahu~ || 98kha ||
नारि बिबस नर सकल गोसाई। नाचहिं नट मर्कट की नाई
nāri bibasa nara sakala gosāī| nācahiṃ naṭa markaṭa kī nāī
सूद्र द्विजन्ह उपदेसहिं ग्याना। मेलि जनेऊ लेहिं कुदाना
sūdra dvijanha upadesahiṃ gyānā| meli janeū lehiṃ kudānā
सब नर काम लोभ रत क्रोधी। देव बिप्र श्रुति संत बिरोधी
saba nara kāma lobha rata krodhī| deva bipra śruti saṃta birodhī
गुन मंदिर सुंदर पति त्यागी। भजहिं नारि पर पुरुष अभागी
guna maṃdira suṃdara pati tyāgī| bhajahiṃ nāri para puruṣa abhāgī
सौभागिनीं बिभूषन हीना। बिधवन्ह के सिंगार नबीना
saubhāginīṃ bibhūṣana hīnā| bidhavanha ke siṃgāra nabīnā
गुर सिष बधिर अंध का लेखा। एक न सुनइ एक नहिं देखा
gura siṣa badhira aṃdha kā lekhā| eka na sunai eka nahiṃ dekhā
हरइ सिष्य धन सोक न हरई। सो गुर घोर नरक महुँ परई
harai siṣya dhana soka na haraī| so gura ghora naraka mahu~ paraī
मातु पिता बालकन्हि बोलाबहिं। उदर भरै सोइ धर्म सिखावहिं
mātu pitā bālakanhi bolābahiṃ| udara bharai soi dharma sikhāvahiṃ
ब्रह्म ग्यान बिनु नारि नर कहहिं न दूसरि बात । कौड़ी लागि लोभ बस करहिं बिप्र गुर घात ॥ ९९क ॥
brahma gyāna binu nāri nara kahahiṃ na dūsari bāta | kaur̤ī lāgi lobha basa karahiṃ bipra gura ghāta || 99ka ||
बादहिं सूद्र द्विजन्ह सन हम तुम्ह ते कछु घाटि । जानइ ब्रह्म सो बिप्रबर आँखि देखावहिं डाटि ॥ ९९ख ॥
bādahiṃ sūdra dvijanha sana hama tumha te kachu ghāṭi | jānai brahma so biprabara ā~khi dekhāvahiṃ ḍāṭi || 99kha ||
पर त्रिय लंपट कपट सयाने। मोह द्रोह ममता लपटाने
para triya laṃpaṭa kapaṭa sayāne| moha droha mamatā lapaṭāne
तेइ अभेदबादी ग्यानी नर। देखा में चरित्र कलिजुग कर
tei abhedabādī gyānī nara| dekhā meṃ caritra kalijuga kara
आपु गए अरु तिन्हहू घालहिं। जे कहुँ सत मारग प्रतिपालहिं
āpu gae aru tinhahū ghālahiṃ| je kahu~ sata māraga pratipālahiṃ
कल्प कल्प भरि एक एक नरका। परहिं जे दूषहिं श्रुति करि तरका
kalpa kalpa bhari eka eka narakā| parahiṃ je dūṣahiṃ śruti kari tarakā
जे बरनाधम तेलि कुम्हारा। स्वपच किरात कोल कलवारा
je baranādhama teli kumhārā| svapaca kirāta kola kalavārā
नारि मुई गृह संपति नासी। मूड़ मुड़ाइ होहिं सन्यासी
nāri muī gṛha saṃpati nāsī| mūr̤a mur̤āi hohiṃ sanyāsī
ते बिप्रन्ह सन आपु पुजावहिं। उभय लोक निज हाथ नसावहिं
te bipranha sana āpu pujāvahiṃ| ubhaya loka nija hātha nasāvahiṃ
बिप्र निरच्छर लोलुप कामी। निराचार सठ बृषली स्वामी
bipra niracchara lolupa kāmī| nirācāra saṭha bṛṣalī svāmī
सूद्र करहिं जप तप ब्रत नाना। बैठि बरासन कहहिं पुराना
sūdra karahiṃ japa tapa brata nānā| baiṭhi barāsana kahahiṃ purānā
सब नर कल्पित करहिं अचारा। जाइ न बरनि अनीति अपारा
saba nara kalpita karahiṃ acārā| jāi na barani anīti apārā
भए बरन संकर कलि भिन्नसेतु सब लोग । करहिं पाप पावहिं दुख भय रुज सोक बियोग ॥ १००क ॥
bhae barana saṃkara kali bhinnasetu saba loga | karahiṃ pāpa pāvahiṃ dukha bhaya ruja soka biyoga || 100ka ||
श्रुति संमत हरि भक्ति पथ संजुत बिरति बिबेक । तेहि न चलहिं नर मोह बस कल्पहिं पंथ अनेक ॥ १००ख ॥
śruti saṃmata hari bhakti patha saṃjuta birati bibeka | tehi na calahiṃ nara moha basa kalpahiṃ paṃtha aneka || 100kha ||
बहु दाम सँवारहिं धाम जती। बिषया हरि लीन्हि न रहि बिरती । तपसी धनवंत दरिद्र गृही। कलि कौतुक तात न जात कही
bahu dāma sa~vārahiṃ dhāma jatī| biṣayā hari līnhi na rahi biratī | tapasī dhanavaṃta daridra gṛhī| kali kautuka tāta na jāta kahī
कुलवंति निकारहिं नारि सती। गृह आनिहिं चेरी निबेरि गती । सुत मानहिं मातु पिता तब लौं। अबलानन दीख नहीं जब लौं
kulavaṃti nikārahiṃ nāri satī| gṛha ānihiṃ cerī niberi gatī | suta mānahiṃ mātu pitā taba lauṃ| abalānana dīkha nahīṃ jaba lauṃ
ससुरारि पिआरि लगी जब तें। रिपरूप कुटुंब भए तब तें । नृप पाप परायन धर्म नहीं। करि दंड बिडंब प्रजा नितहीं
sasurāri piāri lagī jaba teṃ| riparūpa kuṭuṃba bhae taba teṃ | nṛpa pāpa parāyana dharma nahīṃ| kari daṃḍa biḍaṃba prajā nitahīṃ
धनवंत कुलीन मलीन अपी। द्विज चिन्ह जनेउ उघार तपी । नहिं मान पुरान न बेदहि जो। हरि सेवक संत सही कलि सो
dhanavaṃta kulīna malīna apī| dvija cinha janeu ughāra tapī | nahiṃ māna purāna na bedahi jo| hari sevaka saṃta sahī kali so
कबि बृंद उदार दुनी न सुनी। गुन दूषक ब्रात न कोपि गुनी । कलि बारहिं बार दुकाल परै। बिनु अन्न दुखी सब लोग मरै
kabi bṛṃda udāra dunī na sunī| guna dūṣaka brāta na kopi gunī | kali bārahiṃ bāra dukāla parai| binu anna dukhī saba loga marai
सुनु खगेस कलि कपट हठ दंभ द्वेष पाषंड । मान मोह मारादि मद ब्यापि रहे ब्रह्मंड ॥ १०१क ॥
sunu khagesa kali kapaṭa haṭha daṃbha dveṣa pāṣaṃḍa | māna moha mārādi mada byāpi rahe brahmaṃḍa || 101ka ||
तामस धर्म करहिं नर जप तप ब्रत मख दान । देव न बरषहिं धरनीं बए न जामहिं धान ॥ १०१ख ॥
tāmasa dharma karahiṃ nara japa tapa brata makha dāna | deva na baraṣahiṃ dharanīṃ bae na jāmahiṃ dhāna || 101kha ||
अबला कच भूषन भूरि छुधा। धनहीन दुखी ममता बहुधा । सुख चाहहिं मूढ़ न धर्म रता। मति थोरि कठोरि न कोमलता ॥ १ ॥
abalā kaca bhūṣana bhūri chudhā| dhanahīna dukhī mamatā bahudhā | sukha cāhahiṃ mūr̤ha na dharma ratā| mati thori kaṭhori na komalatā || 1 ||
नर पीड़ित रोग न भोग कहीं। अभिमान बिरोध अकारनहीं । लघु जीवन संबतु पंच दसा। कलपांत न नास गुमानु असा ॥ २ ॥
nara pīr̤ita roga na bhoga kahīṃ| abhimāna birodha akāranahīṃ | laghu jīvana saṃbatu paṃca dasā| kalapāṃta na nāsa gumānu asā || 2 ||
कलिकाल बिहाल किए मनुजा। नहिं मानत क्वौ अनुजा तनुजा । नहिं तोष बिचार न सीतलता। सब जाति कुजाति भए मगता ॥ ३ ॥
kalikāla bihāla kie manujā| nahiṃ mānata kvau anujā tanujā | nahiṃ toṣa bicāra na sītalatā| saba jāti kujāti bhae magatā || 3 ||
इरिषा परुषाच्छर लोलुपता। भरि पूरि रही समता बिगता । सब लोग बियोग बिसोक हुए। बरनाश्रम धर्म अचार गए ॥ ४ ॥
iriṣā paruṣācchara lolupatā| bhari pūri rahī samatā bigatā | saba loga biyoga bisoka hue| baranāśrama dharma acāra gae || 4 ||
दम दान दया नहिं जानपनी। जड़ता परबंचनताति घनी । तनु पोषक नारि नरा सगरे। परनिंदक जे जग मो बगरे ॥ ५ ॥
dama dāna dayā nahiṃ jānapanī| jar̤atā parabaṃcanatāti ghanī | tanu poṣaka nāri narā sagare| paraniṃdaka je jaga mo bagare || 5 ||
सुनु ब्यालारि काल कलि मल अवगुन आगार । गुनउँ बहुत कलिजुग कर बिनु प्रयास निस्तार ॥ १०२क ॥
sunu byālāri kāla kali mala avaguna āgāra | gunau~ bahuta kalijuga kara binu prayāsa nistāra || 102ka ||
कृतजुग त्रेता द्वापर पूजा मख अरु जोग । जो गति होइ सो कलि हरि नाम ते पावहिं लोग ॥ १०२ख ॥
kṛtajuga tretā dvāpara pūjā makha aru joga | jo gati hoi so kali hari nāma te pāvahiṃ loga || 102kha ||
कृतजुग सब जोगी बिग्यानी। करि हरि ध्यान तरहिं भव प्रानी
kṛtajuga saba jogī bigyānī| kari hari dhyāna tarahiṃ bhava prānī
त्रेताँ बिबिध जग्य नर करहीं। प्रभुहि समर्पि कर्म भव तरहीं
tretā~ bibidha jagya nara karahīṃ| prabhuhi samarpi karma bhava tarahīṃ
द्वापर करि रघुपति पद पूजा। नर भव तरहिं उपाय न दूजा
dvāpara kari raghupati pada pūjā| nara bhava tarahiṃ upāya na dūjā
कलिजुग केवल हरि गुन गाहा। गावत नर पावहिं भव थाहा
kalijuga kevala hari guna gāhā| gāvata nara pāvahiṃ bhava thāhā
कलिजुग जोग न जग्य न ग्याना। एक अधार राम गुन गाना
kalijuga joga na jagya na gyānā| eka adhāra rāma guna gānā
सब भरोस तजि जो भज रामहि। प्रेम समेत गाव गुन ग्रामहि
saba bharosa taji jo bhaja rāmahi| prema sameta gāva guna grāmahi
सोइ भव तर कछु संसय नाहीं। नाम प्रताप प्रगट कलि माहीं
soi bhava tara kachu saṃsaya nāhīṃ| nāma pratāpa pragaṭa kali māhīṃ
कलि कर एक पुनीत प्रतापा। मानस पुन्य होहिं नहिं पापा
kali kara eka punīta pratāpā| mānasa punya hohiṃ nahiṃ pāpā
कलिजुग सम जुग आन नहिं जौं नर कर बिस्वास । गाइ राम गुन गन बिमलँ भव तर बिनहिं प्रयास ॥ १०३क ॥
kalijuga sama juga āna nahiṃ jauṃ nara kara bisvāsa | gāi rāma guna gana bimala~ bhava tara binahiṃ prayāsa || 103ka ||
प्रगट चारि पद धर्म के कलिल महुँ एक प्रधान । जेन केन बिधि दीन्हें दान करइ कल्यान ॥ १०३ख ॥
pragaṭa cāri pada dharma ke kalila mahu~ eka pradhāna | jena kena bidhi dīnheṃ dāna karai kalyāna || 103kha ||
नित जुग धर्म होहिं सब केरे। हृदयँ राम माया के प्रेरे
nita juga dharma hohiṃ saba kere| hṛdaya~ rāma māyā ke prere
सुद्ध सत्व समता बिग्याना। कृत प्रभाव प्रसन्न मन जाना
suddha satva samatā bigyānā| kṛta prabhāva prasanna mana jānā
सत्व बहुत रज कछु रति कर्मा। सब बिधि सुख त्रेता कर धर्मा
satva bahuta raja kachu rati karmā| saba bidhi sukha tretā kara dharmā
बहु रज स्वल्प सत्व कछु तामस। द्वापर धर्म हरष भय मानस
bahu raja svalpa satva kachu tāmasa| dvāpara dharma haraṣa bhaya mānasa
तामस बहुत रजोगुन थोरा। कलि प्रभाव बिरोध चहुँ ओरा
tāmasa bahuta rajoguna thorā| kali prabhāva birodha cahu~ orā
बुध जुग धर्म जानि मन माहीं। तजि अधर्म रति धर्म कराहीं
budha juga dharma jāni mana māhīṃ| taji adharma rati dharma karāhīṃ
काल धर्म नहिं ब्यापहिं ताही। रघुपति चरन प्रीति अति जाही
kāla dharma nahiṃ byāpahiṃ tāhī| raghupati carana prīti ati jāhī
नट कृत बिकट कपट खगराया। नट सेवकहि न ब्यापइ माया
naṭa kṛta bikaṭa kapaṭa khagarāyā| naṭa sevakahi na byāpai māyā
हरि माया कृत दोष गुन बिनु हरि भजन न जाहिं । भजिअ राम तजि काम सब अस बिचारि मन माहिं ॥ १०४क ॥
hari māyā kṛta doṣa guna binu hari bhajana na jāhiṃ | bhajia rāma taji kāma saba asa bicāri mana māhiṃ || 104ka ||
तेहि कलिकाल बरष बहु बसेउँ अवध बिहगेस । परेउ दुकाल बिपति बस तब मैं गयउँ बिदेस ॥ १०४ख ॥
tehi kalikāla baraṣa bahu baseu~ avadha bihagesa | pareu dukāla bipati basa taba maiṃ gayau~ bidesa || 104kha ||
गयउँ उजेनी सुनु उरगारी। दीन मलीन दरिद्र दुखारी
gayau~ ujenī sunu uragārī| dīna malīna daridra dukhārī
गएँ काल कछु संपति पाई। तहँ पुनि करउँ संभु सेवकाई
gae~ kāla kachu saṃpati pāī| taha~ puni karau~ saṃbhu sevakāī
बिप्र एक बैदिक सिव पूजा। करइ सदा तेहि काजु न दूजा
bipra eka baidika siva pūjā| karai sadā tehi kāju na dūjā
परम साधु परमारथ बिंदक। संभु उपासक नहिं हरि निंदक
parama sādhu paramāratha biṃdaka| saṃbhu upāsaka nahiṃ hari niṃdaka
तेहि सेवउँ मैं कपट समेता। द्विज दयाल अति नीति निकेता
tehi sevau~ maiṃ kapaṭa sametā| dvija dayāla ati nīti niketā
बाहिज नम्र देखि मोहि साईं। बिप्र पढ़ाव पुत्र की नाईं
bāhija namra dekhi mohi sāīṃ| bipra par̤hāva putra kī nāīṃ
संभु मंत्र मोहि द्विजबर दीन्हा। सुभ उपदेस बिबिध बिधि कीन्हा
saṃbhu maṃtra mohi dvijabara dīnhā| subha upadesa bibidha bidhi kīnhā
जपउँ मंत्र सिव मंदिर जाई। हृदयँ दंभ अहमिति अधिकाई
japau~ maṃtra siva maṃdira jāī| hṛdaya~ daṃbha ahamiti adhikāī
मैं खल मल संकुल मति नीच जाति बस मोह । हरि जन द्विज देखें जरउँ करउँ बिष्नु कर द्रोह ॥ १०५क ॥
maiṃ khala mala saṃkula mati nīca jāti basa moha | hari jana dvija dekheṃ jarau~ karau~ biṣnu kara droha || 105ka ||
गुर नित मोहि प्रबोध दुखित देखि आचरन मम । मोहि उपजइ अति क्रोध दंभिहि नीति कि भावई ॥ १०५ख ॥
gura nita mohi prabodha dukhita dekhi ācarana mama | mohi upajai ati krodha daṃbhihi nīti ki bhāvaī || 105kha ||
एक बार गुर लीन्ह बोलाई। मोहि नीति बहु भाँति सिखाई
eka bāra gura līnha bolāī| mohi nīti bahu bhā~ti sikhāī
सिव सेवा कर फल सुत सोई। अबिरल भगति राम पद होई
siva sevā kara phala suta soī| abirala bhagati rāma pada hoī
रामहि भजहिं तात सिव धाता। नर पावँर कै केतिक बाता
rāmahi bhajahiṃ tāta siva dhātā| nara pāva~ra kai ketika bātā
जासु चरन अज सिव अनुरागी। तातु द्रोहँ सुख चहसि अभागी
jāsu carana aja siva anurāgī| tātu droha~ sukha cahasi abhāgī
हर कहुँ हरि सेवक गुर कहेऊ। सुनि खगनाथ हृदय मम दहेऊ
hara kahu~ hari sevaka gura kaheū| suni khaganātha hṛdaya mama daheū
अधम जाति मैं बिद्या पाएँ। भयउँ जथा अहि दूध पिआएँ
adhama jāti maiṃ bidyā pāe~| bhayau~ jathā ahi dūdha piāe~
मानी कुटिल कुभाग्य कुजाती। गुर कर द्रोह करउँ दिनु राती
mānī kuṭila kubhāgya kujātī| gura kara droha karau~ dinu rātī
अति दयाल गुर स्वल्प न क्रोधा। पुनि पुनि मोहि सिखाव सुबोधा
ati dayāla gura svalpa na krodhā| puni puni mohi sikhāva subodhā
जेहि ते नीच बड़ाई पावा। सो प्रथमहिं हति ताहि नसावा
jehi te nīca bar̤āī pāvā| so prathamahiṃ hati tāhi nasāvā
धूम अनल संभव सुनु भाई। तेहि बुझाव घन पदवी पाई
dhūma anala saṃbhava sunu bhāī| tehi bujhāva ghana padavī pāī
रज मग परी निरादर रहई। सब कर पद प्रहार नित सहई
raja maga parī nirādara rahaī| saba kara pada prahāra nita sahaī
मरुत उड़ाव प्रथम तेहि भरई। पुनि नृप नयन किरीटन्हि परई
maruta ur̤āva prathama tehi bharaī| puni nṛpa nayana kirīṭanhi paraī
सुनु खगपति अस समुझि प्रसंगा। बुध नहिं करहिं अधम कर संगा
sunu khagapati asa samujhi prasaṃgā| budha nahiṃ karahiṃ adhama kara saṃgā
कबि कोबिद गावहिं असि नीती। खल सन कलह न भल नहिं प्रीती
kabi kobida gāvahiṃ asi nītī| khala sana kalaha na bhala nahiṃ prītī
उदासीन नित रहिअ गोसाईं। खल परिहरिअ स्वान की नाईं
udāsīna nita rahia gosāīṃ| khala pariharia svāna kī nāīṃ
मैं खल हृदयँ कपट कुटिलाई। गुर हित कहइ न मोहि सोहाई
maiṃ khala hṛdaya~ kapaṭa kuṭilāī| gura hita kahai na mohi sohāī
एक बार हर मंदिर जपत रहेउँ सिव नाम । गुर आयउ अभिमान तें उठि नहिं कीन्ह प्रनाम ॥ १०६क ॥
eka bāra hara maṃdira japata raheu~ siva nāma | gura āyau abhimāna teṃ uṭhi nahiṃ kīnha pranāma || 106ka ||
सो दयाल नहिं कहेउ कछु उर न रोष लवलेस । अति अघ गुर अपमानता सहि नहिं सके महेस ॥ १०६ख ॥
so dayāla nahiṃ kaheu kachu ura na roṣa lavalesa | ati agha gura apamānatā sahi nahiṃ sake mahesa || 106kha ||
मंदिर माझ भई नभ बानी। रे हतभाग्य अग्य अभिमानी
maṃdira mājha bhaī nabha bānī| re hatabhāgya agya abhimānī
जद्यपि तव गुर कें नहिं क्रोधा। अति कृपाल चित सम्यक बोधा
jadyapi tava gura keṃ nahiṃ krodhā| ati kṛpāla cita samyaka bodhā
तदपि साप सठ दैहउँ तोही। नीति बिरोध सोहाइ न मोही
tadapi sāpa saṭha daihau~ tohī| nīti birodha sohāi na mohī
जौं नहिं दंड करौं खल तोरा। भ्रष्ट होइ श्रुतिमारग मोरा
jauṃ nahiṃ daṃḍa karauṃ khala torā| bhraṣṭa hoi śrutimāraga morā
जे सठ गुर सन इरिषा करहीं। रौरव नरक कोटि जुग परहीं
je saṭha gura sana iriṣā karahīṃ| raurava naraka koṭi juga parahīṃ
त्रिजग जोनि पुनि धरहिं सरीरा। अयुत जन्म भरि पावहिं पीरा
trijaga joni puni dharahiṃ sarīrā| ayuta janma bhari pāvahiṃ pīrā
बैठ रहेसि अजगर इव पापी। सर्प होहि खल मल मति ब्यापी
baiṭha rahesi ajagara iva pāpī| sarpa hohi khala mala mati byāpī
महा बिटप कोटर महुँ जाई।।रहु अधमाधम अधगति पाई
mahā biṭapa koṭara mahu~ jāī||rahu adhamādhama adhagati pāī
हाहाकार कीन्ह गुर दारुन सुनि सिव साप । कंपित मोहि बिलोकि अति उर उपजा परिताप ॥ १०७क ॥
hāhākāra kīnha gura dāruna suni siva sāpa | kaṃpita mohi biloki ati ura upajā paritāpa || 107ka ||
करि दंडवत सप्रेम द्विज सिव सन्मुख कर जोरि । बिनय करत गदगद स्वर समुझि घोर गति मोरि ॥ १०७ख ॥
kari daṃḍavata saprema dvija siva sanmukha kara jori | binaya karata gadagada svara samujhi ghora gati mori || 107kha ||
नमामीशमीशान निर्वाणरूपं। विभुं ब्यापकं ब्रह्म वेदस्वरूपं । निजं निर्गुणं निर्विकल्पं निरीहं। चिदाकाशमाकाशवासं भजेऽहं
namāmīśamīśāna nirvāṇarūpaṃ| vibhuṃ byāpakaṃ brahma vedasvarūpaṃ | nijaṃ nirguṇaṃ nirvikalpaṃ nirīhaṃ| cidākāśamākāśavāsaṃ bhaje'haṃ
निराकारमोंकारमूलं तुरीयं। गिरा ग्यान गोतीतमीशं गिरीशं । करालं महाकाल कालं कृपालं। गुणागार संसारपारं नतोऽहं
nirākāramoṃkāramūlaṃ turīyaṃ| girā gyāna gotītamīśaṃ girīśaṃ | karālaṃ mahākāla kālaṃ kṛpālaṃ| guṇāgāra saṃsārapāraṃ nato'haṃ
तुषाराद्रि संकाश गौरं गभीरं। मनोभूत कोटि प्रभा श्री शरीरं । स्फुरन्मौलि कल्लोलिनी चारु गंगा। लसद्भालबालेन्दु कंठे भुजंगा
tuṣārādri saṃkāśa gauraṃ gabhīraṃ| manobhūta koṭi prabhā śrī śarīraṃ | sphuranmauli kallolinī cāru gaṃgā| lasadbhālabālendu kaṃṭhe bhujaṃgā
चलत्कुंडलं भ्रू सुनेत्रं विशालं। प्रसन्नाननं नीलकंठं दयालं । मृगाधीशचर्माम्बरं मुण्डमालं। प्रियं शंकरं सर्वनाथं भजामि
calatkuṃḍalaṃ bhrū sunetraṃ viśālaṃ| prasannānanaṃ nīlakaṃṭhaṃ dayālaṃ | mṛgādhīśacarmāmbaraṃ muṇḍamālaṃ| priyaṃ śaṃkaraṃ sarvanāthaṃ bhajāmi
प्रचंडं प्रकृष्टं प्रगल्भं परेशं। अखंडं अजं भानुकोटिप्रकाशं । त्रयःशूल निर्मूलनं शूलपाणिं। भजेऽहं भवानीपतिं भावगम्यं
pracaṃḍaṃ prakṛṣṭaṃ pragalbhaṃ pareśaṃ| akhaṃḍaṃ ajaṃ bhānukoṭiprakāśaṃ | trayaḥśūla nirmūlanaṃ śūlapāṇiṃ| bhaje'haṃ bhavānīpatiṃ bhāvagamyaṃ
कलातीत कल्याण कल्पान्तकारी। सदा सज्जनानन्ददाता पुरारी । चिदानंदसंदोह मोहापहारी। प्रसीद प्रसीद प्रभो मन्मथारी
kalātīta kalyāṇa kalpāntakārī| sadā sajjanānandadātā purārī | cidānaṃdasaṃdoha mohāpahārī| prasīda prasīda prabho manmathārī
न यावद् उमानाथ पादारविन्दं। भजंतीह लोके परे वा नराणां । न तावत्सुखं शान्ति सन्तापनाशं। प्रसीद प्रभो सर्वभूताधिवासं
na yāvad umānātha pādāravindaṃ| bhajaṃtīha loke pare vā narāṇāṃ | na tāvatsukhaṃ śānti santāpanāśaṃ| prasīda prabho sarvabhūtādhivāsaṃ
न जानामि योगं जपं नैव पूजां। नतोऽहं सदा सर्वदा शंभु तुभ्यं । जरा जन्म दुःखौघ तातप्यमानं। प्रभो पाहि आपन्नमामीश शंभो
na jānāmi yogaṃ japaṃ naiva pūjāṃ| nato'haṃ sadā sarvadā śaṃbhu tubhyaṃ | jarā janma duḥkhaugha tātapyamānaṃ| prabho pāhi āpannamāmīśa śaṃbho
रुद्राष्टकमिदं प्रोक्तं विप्रेण हरतोषये । ये पठन्ति नरा भक्त्या तेषां शम्भुः प्रसीदति ॥ ९ ॥
rudrāṣṭakamidaṃ proktaṃ vipreṇa haratoṣaye | ye paṭhanti narā bhaktyā teṣāṃ śambhuḥ prasīdati || 9 ||
सुनि बिनती सर्बग्य सिव देखि ब्रिप्र अनुरागु । पुनि मंदिर नभबानी भइ द्विजबर बर मागु ॥ १०८क ॥
suni binatī sarbagya siva dekhi bripra anurāgu | puni maṃdira nabhabānī bhai dvijabara bara māgu || 108ka ||
जौं प्रसन्न प्रभु मो पर नाथ दीन पर नेहु । निज पद भगति देइ प्रभु पुनि दूसर बर देहु ॥ १०८ख ॥
jauṃ prasanna prabhu mo para nātha dīna para nehu | nija pada bhagati dei prabhu puni dūsara bara dehu || 108kha ||
तव माया बस जीव जड़ संतत फिरइ भुलान । तेहि पर क्रोध न करिअ प्रभु कृपा सिंधु भगवान ॥ १०८ग ॥
tava māyā basa jīva jar̤a saṃtata phirai bhulāna | tehi para krodha na karia prabhu kṛpā siṃdhu bhagavāna || 108ga ||
संकर दीनदयाल अब एहि पर होहु कृपाल । साप अनुग्रह होइ जेहिं नाथ थोरेहीं काल ॥ १०८घ ॥
saṃkara dīnadayāla aba ehi para hohu kṛpāla | sāpa anugraha hoi jehiṃ nātha thorehīṃ kāla || 108gha ||
एहि कर होइ परम कल्याना। सोइ करहु अब कृपानिधाना
ehi kara hoi parama kalyānā| soi karahu aba kṛpānidhānā
बिप्रगिरा सुनि परहित सानी। एवमस्तु इति भइ नभबानी
bipragirā suni parahita sānī| evamastu iti bhai nabhabānī
जदपि कीन्ह एहिं दारुन पापा। मैं पुनि दीन्ह कोप करि सापा
jadapi kīnha ehiṃ dāruna pāpā| maiṃ puni dīnha kopa kari sāpā
तदपि तुम्हार साधुता देखी। करिहउँ एहि पर कृपा बिसेषी
tadapi tumhāra sādhutā dekhī| karihau~ ehi para kṛpā biseṣī
छमासील जे पर उपकारी। ते द्विज मोहि प्रिय जथा खरारी
chamāsīla je para upakārī| te dvija mohi priya jathā kharārī
मोर श्राप द्विज ब्यर्थ न जाइहि। जन्म सहस अवस्य यह पाइहि
mora śrāpa dvija byartha na jāihi| janma sahasa avasya yaha pāihi
जनमत मरत दुसह दुख होई। अहि स्वल्पउ नहिं ब्यापिहि सोई
janamata marata dusaha dukha hoī| ahi svalpau nahiṃ byāpihi soī
कवनेउँ जन्म मिटिहि नहिं ग्याना। सुनहि सूद्र मम बचन प्रवाना
kavaneu~ janma miṭihi nahiṃ gyānā| sunahi sūdra mama bacana pravānā
रघुपति पुरीं जन्म तब भयऊ। पुनि तैं मम सेवाँ मन दयऊ
raghupati purīṃ janma taba bhayaū| puni taiṃ mama sevā~ mana dayaū
पुरी प्रभाव अनुग्रह मोरें। राम भगति उपजिहि उर तोरें
purī prabhāva anugraha moreṃ| rāma bhagati upajihi ura toreṃ
सुनु मम बचन सत्य अब भाई। हरितोषन ब्रत द्विज सेवकाई
sunu mama bacana satya aba bhāī| haritoṣana brata dvija sevakāī
अब जनि करहि बिप्र अपमाना। जानेहु संत अनंत समाना
aba jani karahi bipra apamānā| jānehu saṃta anaṃta samānā
इंद्र कुलिस मम सूल बिसाला। कालदंड हरि चक्र कराला
iṃdra kulisa mama sūla bisālā| kāladaṃḍa hari cakra karālā
जो इन्ह कर मारा नहिं मरई। बिप्रद्रोह पावक सो जरई
jo inha kara mārā nahiṃ maraī| bipradroha pāvaka so jaraī
अस बिबेक राखेहु मन माहीं। तुम्ह कहँ जग दुर्लभ कछु नाहीं
asa bibeka rākhehu mana māhīṃ| tumha kaha~ jaga durlabha kachu nāhīṃ
औरउ एक आसिषा मोरी। अप्रतिहत गति होइहि तोरी
aurau eka āsiṣā morī| apratihata gati hoihi torī
सुनि सिव बचन हरषि गुर एवमस्तु इति भाषि । मोहि प्रबोधि गयउ गृह संभु चरन उर राखि ॥ १०९क ॥
suni siva bacana haraṣi gura evamastu iti bhāṣi | mohi prabodhi gayau gṛha saṃbhu carana ura rākhi || 109ka ||
प्रेरित काल बिधि गिरि जाइ भयउँ मैं ब्याल । पुनि प्रयास बिनु सो तनु जजेउँ गएँ कछु काल ॥ १०९ख ॥
prerita kāla bidhi giri jāi bhayau~ maiṃ byāla | puni prayāsa binu so tanu jajeu~ gae~ kachu kāla || 109kha ||
जोइ तनु धरउँ तजउँ पुनि अनायास हरिजान । जिमि नूतन पट पहिरइ नर परिहरइ पुरान ॥ १०९ग ॥
joi tanu dharau~ tajau~ puni anāyāsa harijāna | jimi nūtana paṭa pahirai nara pariharai purāna || 109ga ||
सिवँ राखी श्रुति नीति अरु मैं नहिं पावा क्लेस । एहि बिधि धरेउँ बिबिध तनु ग्यान न गयउ खगेस ॥ १०९घ ॥
siva~ rākhī śruti nīti aru maiṃ nahiṃ pāvā klesa | ehi bidhi dhareu~ bibidha tanu gyāna na gayau khagesa || 109gha ||
त्रिजग देव नर जोइ तनु धरउँ। तहँ तहँ राम भजन अनुसरऊँ
trijaga deva nara joi tanu dharau~| taha~ taha~ rāma bhajana anusaraū~
एक सूल मोहि बिसर न काऊ। गुर कर कोमल सील सुभाऊ
eka sūla mohi bisara na kāū| gura kara komala sīla subhāū
चरम देह द्विज कै मैं पाई। सुर दुर्लभ पुरान श्रुति गाई
carama deha dvija kai maiṃ pāī| sura durlabha purāna śruti gāī
खेलउँ तहूँ बालकन्ह मीला। करउँ सकल रघुनायक लीला
khelau~ tahū~ bālakanha mīlā| karau~ sakala raghunāyaka līlā
प्रौढ़ भएँ मोहि पिता पढ़ावा। समझउँ सुनउँ गुनउँ नहिं भावा
praur̤ha bhae~ mohi pitā par̤hāvā| samajhau~ sunau~ gunau~ nahiṃ bhāvā
मन ते सकल बासना भागी। केवल राम चरन लय लागी
mana te sakala bāsanā bhāgī| kevala rāma carana laya lāgī
कहु खगेस अस कवन अभागी। खरी सेव सुरधेनुहि त्यागी
kahu khagesa asa kavana abhāgī| kharī seva suradhenuhi tyāgī
प्रेम मगन मोहि कछु न सोहाई। हारेउ पिता पढ़ाइ पढ़ाई
prema magana mohi kachu na sohāī| hāreu pitā par̤hāi par̤hāī
भए कालबस जब पितु माता। मैं बन गयउँ भजन जनत्राता
bhae kālabasa jaba pitu mātā| maiṃ bana gayau~ bhajana janatrātā
जहँ जहँ बिपिन मुनीस्वर पावउँ। आश्रम जाइ जाइ सिरु नावउँ
jaha~ jaha~ bipina munīsvara pāvau~| āśrama jāi jāi siru nāvau~
बूझत तिन्हहि राम गुन गाहा। कहहिं सुनउँ हरषित खगनाहा
būjhata tinhahi rāma guna gāhā| kahahiṃ sunau~ haraṣita khaganāhā
सुनत फिरउँ हरि गुन अनुबादा। अब्याहत गति संभु प्रसादा
sunata phirau~ hari guna anubādā| abyāhata gati saṃbhu prasādā
छूटी त्रिबिध ईषना गाढ़ी। एक लालसा उर अति बाढ़ी
chūṭī tribidha īṣanā gār̤hī| eka lālasā ura ati bār̤hī
राम चरन बारिज जब देखौं। तब निज जन्म सफल करि लेखौं
rāma carana bārija jaba dekhauṃ| taba nija janma saphala kari lekhauṃ
जेहि पूँछउँ सोइ मुनि अस कहई। ईस्वर सर्ब भूतमय अहई
jehi pū~chau~ soi muni asa kahaī| īsvara sarba bhūtamaya ahaī
निर्गुन मत नहिं मोहि सोहाई। सगुन ब्रह्म रति उर अधिकाई
nirguna mata nahiṃ mohi sohāī| saguna brahma rati ura adhikāī
गुर के बचन सुरति करि राम चरन मनु लाग । रघुपति जस गावत फिरउँ छन छन नव अनुराग ॥ ११०क ॥
gura ke bacana surati kari rāma carana manu lāga | raghupati jasa gāvata phirau~ chana chana nava anurāga || 110ka ||
मेरु सिखर बट छायाँ मुनि लोमस आसीन । देखि चरन सिरु नायउँ बचन कहेउँ अति दीन ॥ ११०ख ॥
meru sikhara baṭa chāyā~ muni lomasa āsīna | dekhi carana siru nāyau~ bacana kaheu~ ati dīna || 110kha ||
सुनि मम बचन बिनीत मृदु मुनि कृपाल खगराज । मोहि सादर पूँछत भए द्विज आयहु केहि काज ॥ ११०ग ॥
suni mama bacana binīta mṛdu muni kṛpāla khagarāja | mohi sādara pū~chata bhae dvija āyahu kehi kāja || 110ga ||
तब मैं कहा कृपानिधि तुम्ह सर्बग्य सुजान । सगुन ब्रह्म अवराधन मोहि कहहु भगवान ॥ ११०घ ॥
taba maiṃ kahā kṛpānidhi tumha sarbagya sujāna | saguna brahma avarādhana mohi kahahu bhagavāna || 110gha ||
तब मुनिष रघुपति गुन गाथा। कहे कछुक सादर खगनाथा
taba muniṣa raghupati guna gāthā| kahe kachuka sādara khaganāthā
ब्रह्मग्यान रत मुनि बिग्यानि। मोहि परम अधिकारी जानी
brahmagyāna rata muni bigyāni| mohi parama adhikārī jānī
लागे करन ब्रह्म उपदेसा। अज अद्वेत अगुन हृदयेसा
lāge karana brahma upadesā| aja adveta aguna hṛdayesā
अकल अनीह अनाम अरुपा। अनुभव गम्य अखंड अनूपा
akala anīha anāma arupā| anubhava gamya akhaṃḍa anūpā
मन गोतीत अमल अबिनासी। निर्बिकार निरवधि सुख रासी
mana gotīta amala abināsī| nirbikāra niravadhi sukha rāsī
सो तैं ताहि तोहि नहिं भेदा। बारि बीचि इव गावहि बेदा
so taiṃ tāhi tohi nahiṃ bhedā| bāri bīci iva gāvahi bedā
बिबिध भाँति मोहि मुनि समुझावा। निर्गुन मत मम हृदयँ न आवा
bibidha bhā~ti mohi muni samujhāvā| nirguna mata mama hṛdaya~ na āvā
पुनि मैं कहेउँ नाइ पद सीसा। सगुन उपासन कहहु मुनीसा
puni maiṃ kaheu~ nāi pada sīsā| saguna upāsana kahahu munīsā
राम भगति जल मम मन मीना। किमि बिलगाइ मुनीस प्रबीना
rāma bhagati jala mama mana mīnā| kimi bilagāi munīsa prabīnā
सोइ उपदेस कहहु करि दाया। निज नयनन्हि देखौं रघुराया
soi upadesa kahahu kari dāyā| nija nayananhi dekhauṃ raghurāyā
भरि लोचन बिलोकि अवधेसा। तब सुनिहउँ निर्गुन उपदेसा
bhari locana biloki avadhesā| taba sunihau~ nirguna upadesā
मुनि पुनि कहि हरिकथा अनूपा। खंडि सगुन मत अगुन निरूपा
muni puni kahi harikathā anūpā| khaṃḍi saguna mata aguna nirūpā
तब मैं निर्गुन मत कर दूरी। सगुन निरूपउँ करि हठ भूरी
taba maiṃ nirguna mata kara dūrī| saguna nirūpau~ kari haṭha bhūrī
उत्तर प्रतिउत्तर मैं कीन्हा। मुनि तन भए क्रोध के चीन्हा
uttara pratiuttara maiṃ kīnhā| muni tana bhae krodha ke cīnhā
सुनु प्रभु बहुत अवग्या किएँ। उपज क्रोध ग्यानिन्ह के हिएँ
sunu prabhu bahuta avagyā kie~| upaja krodha gyāninha ke hie~
अति संघरषन जौं कर कोई। अनल प्रगट चंदन ते होई
ati saṃgharaṣana jauṃ kara koī| anala pragaṭa caṃdana te hoī
-बारंबार सकोप मुनि करइ निरुपन ग्यान । मैं अपनें मन बैठ तब करउँ बिबिध अनुमान ॥ १११क ॥
-bāraṃbāra sakopa muni karai nirupana gyāna | maiṃ apaneṃ mana baiṭha taba karau~ bibidha anumāna || 111ka ||
क्रोध कि द्वेतबुद्धि बिनु द्वैत कि बिनु अग्यान । मायाबस परिछिन्न जड़ जीव कि ईस समान ॥ १११ख ॥
krodha ki dvetabuddhi binu dvaita ki binu agyāna | māyābasa parichinna jar̤a jīva ki īsa samāna || 111kha ||
कबहुँ कि दुख सब कर हित ताकें। तेहि कि दरिद्र परस मनि जाकें
kabahu~ ki dukha saba kara hita tākeṃ| tehi ki daridra parasa mani jākeṃ
परद्रोही की होहिं निसंका। कामी पुनि कि रहहिं अकलंका
paradrohī kī hohiṃ nisaṃkā| kāmī puni ki rahahiṃ akalaṃkā
बंस कि रह द्विज अनहित कीन्हें। कर्म कि होहिं स्वरूपहि चीन्हें
baṃsa ki raha dvija anahita kīnheṃ| karma ki hohiṃ svarūpahi cīnheṃ
काहू सुमति कि खल सँग जामी। सुभ गति पाव कि परत्रिय गामी
kāhū sumati ki khala sa~ga jāmī| subha gati pāva ki paratriya gāmī
भव कि परहिं परमात्मा बिंदक। सुखी कि होहिं कबहुँ हरिनिंदक
bhava ki parahiṃ paramātmā biṃdaka| sukhī ki hohiṃ kabahu~ hariniṃdaka
राजु कि रहइ नीति बिनु जानें। अघ कि रहहिं हरिचरित बखानें
rāju ki rahai nīti binu jāneṃ| agha ki rahahiṃ haricarita bakhāneṃ
पावन जस कि पुन्य बिनु होई। बिनु अघ अजस कि पावइ कोई
pāvana jasa ki punya binu hoī| binu agha ajasa ki pāvai koī
Keys: ← → turn the page, J K step through the verses.
Illustration: Verse & Place (Project-owned).