திருச்சிற்றம்பலம்
tirucciṟṟampalam
Editor's note: Traditional opening material, separate from the numbered poems.
திருமுறை 4 — திருப்புகலூர் · திருப்புகலூர்
tiruppukalūr
tiruppukalūr, from book 4 of the Tirumurai.
10 passagesTamil with transliteration
Invocation
திருச்சிற்றம்பலம்
tirucciṟṟampalam
Editor's note: Traditional opening material, separate from the numbered poems.
செய்யர் வெண்ணூலர் கருமான் மறிதுள்ளுங் கையர் கனைகழல் கட்டிய காலினர் மெய்யர் மெய்ந்நின் றவர்க்கல்லா தவர்க்கென்றும் பொய்யர் புகலூர்ப் புரிசடை யாரே.
ceyyar veṇṇūlar karumāṉ maṟituḷḷuṅ kaiyar kaṉaikaḻal kaṭṭiya kāliṉar meyyar meynniṉ ṟavarkkallā tavarkkeṉṟum poyyar pukalūrp puricaṭai yārē.
மேகநல் ஊர்தியர் மின்போல் மிளிர்சடைப் பாக மதிநுத லாளையோர் பாகத்தர் நாக வளையினர் நாக வுடையினர் போகர் புகலூர்ப் புரிசடை யாரே.
mēkanal ūrtiyar miṉpōl miḷircaṭaip pāka matinuta lāḷaiyōr pākattar nāka vaḷaiyiṉar nāka vuṭaiyiṉar pōkar pukalūrp puricaṭai yārē.
பெருந்தாழ் சடைமுடி மேற்பிறை சூடிக் கருந்தாழ் குழலியுந் தாமுங் கலந்து திருந்தா மனமுடை யார்திறத் தென்றும் பொருந்தார் புகலூர்ப் புரிசடை யாரே.
peruntāḻ caṭaimuṭi mēṟpiṟai cūṭik karuntāḻ kuḻaliyun tāmuṅ kalantu tiruntā maṉamuṭai yārtiṟat teṉṟum poruntār pukalūrp puricaṭai yārē.
அக்கார் அணிவடம் ஆகத்தர் நாகத்தர் நக்கார் இளமதிக் கண்ணியர் நாடொறும் உக்கார் தலைபிடித் துன்பலிக் கூர்தொறும் புக்கார் புகலூர்ப் புரிசடை யாரே.
akkār aṇivaṭam ākattar nākattar nakkār iḷamatik kaṇṇiyar nāṭoṟum ukkār talaipiṭit tuṉpalik kūrtoṟum pukkār pukalūrp puricaṭai yārē.
ஆர்த்தார் உயிரடும் அந்தகன் றன்னுடல் பேர்த்தார் பிறைநுதற் பெண்ணின்நல் லாள்உட்கக் கூர்த்தார் மருப்பிற் கொலைக்களிற் றீருரி போர்த்தார் புகலூர்ப் புரிசடை யாரே.
ārttār uyiraṭum antakaṉ ṟaṉṉuṭal pērttār piṟainutaṟ peṇṇiṉnal lāḷuṭkak kūrttār maruppiṟ kolaikkaḷiṟ ṟīruri pōrttār pukalūrp puricaṭai yārē.
தூமன் சுறவந் துதைந்த கொடியுடைக் காமன் கணைவலங் காய்ந்தமுக் கண்ணினர் சேம நெறியினர் சீரை யுடையவர் பூமன் புகலூர்ப் புரிசடை யாரே.
tūmaṉ cuṟavan tutainta koṭiyuṭaik kāmaṉ kaṇaivalaṅ kāyntamuk kaṇṇiṉar cēma neṟiyiṉar cīrai yuṭaiyavar pūmaṉ pukalūrp puricaṭai yārē.
உதைத்தார் மறலி உருளவோர் காலாற் சிதைத்தார் திகழ்தக்கன் செய்தநல் வேள்வி பதைத்தார் சிரங்கரங் கொண்டுவெய் யோன்கண் புதைத்தார் புகலூர்ப் புரிசடை யாரே.
utaittār maṟali uruḷavōr kālāṟ citaittār tikaḻtakkaṉ ceytanal vēḷvi pataittār ciraṅkaraṅ koṇṭuvey yōṉkaṇ putaittār pukalūrp puricaṭai yārē.
கரிந்தார் தலையர் கடிமதில் மூன்றுந் தெரிந்தார் கணைகள் செழுந்தழ லுண்ண விரிந்தார் சடைமேல் விரிபுனற் கங்கை புரிந்தார் புகலூர்ப் புரிசடை யாரே.
karintār talaiyar kaṭimatil mūṉṟun terintār kaṇaikaḷ ceḻuntaḻa luṇṇa virintār caṭaimēl viripuṉaṟ kaṅkai purintār pukalūrp puricaṭai yārē.
ஈண்டார் அழலி னிருவருங் கைதொழ நீண்டார் நெடுந்தடு மாற்ற நிலையஞ்ச மாண்டார்தம் என்பு மலர்க்கொன்றை மாலையும் பூண்டார் புகலூர்ப் புரிசடை யாரே.
īṇṭār aḻali ṉiruvaruṅ kaitoḻa nīṇṭār neṭuntaṭu māṟṟa nilaiyañca māṇṭārtam eṉpu malarkkoṉṟai mālaiyum pūṇṭār pukalūrp puricaṭai yārē.
கறுத்தார் மணிகண்டங் கால்விர லூன்றி இறுத்தார் இலங்கையர் கோன்முடி பத்தும் அறுத்தார் புலனைந்தும் ஆயிழை பாகம் பொறுத்தார் புகலூர்ப் புரிசடை யாரே.
kaṟuttār maṇikaṇṭaṅ kālvira lūṉṟi iṟuttār ilaṅkaiyar kōṉmuṭi pattum aṟuttār pulaṉaintum āyiḻai pākam poṟuttār pukalūrp puricaṭai yārē.
Keys: ← → turn the page, J K step through the verses.
Illustration: Verse & Place (Project-owned).