Skip to content

अयोध्याकाण्ड · अयोध्याकाण्ड

Ayodhya Kanda

Part 6 of 10: verses 1476–1770 of 2,947Awadhi with transliteration

देखत भरतु बिकल भए भारी। परे चरन तन दसा बिसारी

dekhata bharatu bikala bhae bhārī| pare carana tana dasā bisārī

Report an error

मातु तात कहँ देहि देखाई। कहँ सिय रामु लखनु दोउ भाई

mātu tāta kaha~ dehi dekhāī| kaha~ siya rāmu lakhanu dou bhāī

Report an error

कैकइ कत जनमी जग माझा। जौं जनमि त भइ काहे न बाँझा

kaikai kata janamī jaga mājhā| jauṃ janami ta bhai kāhe na bā~jhā

Report an error

कुल कलंकु जेहिं जनमेउ मोही। अपजस भाजन प्रियजन द्रोही

kula kalaṃku jehiṃ janameu mohī| apajasa bhājana priyajana drohī

Report an error

को तिभुवन मोहि सरिस अभागी। गति असि तोरि मातु जेहि लागी

ko tibhuvana mohi sarisa abhāgī| gati asi tori mātu jehi lāgī

Report an error

पितु सुरपुर बन रघुबर केतू। मैं केवल सब अनरथ हेतु

pitu surapura bana raghubara ketū| maiṃ kevala saba anaratha hetu

Report an error

धिग मोहि भयउँ बेनु बन आगी। दुसह दाह दुख दूषन भागी

dhiga mohi bhayau~ benu bana āgī| dusaha dāha dukha dūṣana bhāgī

Report an error

मातु भरत के बचन मृदु सुनि सुनि उठी सँभारि । लिए उठाइ लगाइ उर लोचन मोचति बारि ॥ १६४ ॥

mātu bharata ke bacana mṛdu suni suni uṭhī sa~bhāri | lie uṭhāi lagāi ura locana mocati bāri || 164 ||

Report an error

सरल सुभाय मायँ हियँ लाए। अति हित मनहुँ राम फिरि आए

sarala subhāya māya~ hiya~ lāe| ati hita manahu~ rāma phiri āe

Report an error

भेंटेउ बहुरि लखन लघु भाई। सोकु सनेहु न हृदयँ समाई

bheṃṭeu bahuri lakhana laghu bhāī| soku sanehu na hṛdaya~ samāī

Report an error

देखि सुभाउ कहत सबु कोई। राम मातु अस काहे न होई

dekhi subhāu kahata sabu koī| rāma mātu asa kāhe na hoī

Report an error

माताँ भरतु गोद बैठारे। आँसु पौंछि मृदु बचन उचारे

mātā~ bharatu goda baiṭhāre| ā~su pauṃchi mṛdu bacana ucāre

Report an error

अजहुँ बच्छ बलि धीरज धरहू। कुसमउ समुझि सोक परिहरहू

ajahu~ baccha bali dhīraja dharahū| kusamau samujhi soka pariharahū

Report an error

जनि मानहु हियँ हानि गलानी। काल करम गति अघटित जानि

jani mānahu hiya~ hāni galānī| kāla karama gati aghaṭita jāni

Report an error

काहुहि दोसु देहु जनि ताता। भा मोहि सब बिधि बाम बिधाता

kāhuhi dosu dehu jani tātā| bhā mohi saba bidhi bāma bidhātā

Report an error

जो एतेहुँ दुख मोहि जिआवा। अजहुँ को जानइ का तेहि भावा

jo etehu~ dukha mohi jiāvā| ajahu~ ko jānai kā tehi bhāvā

Report an error

पितु आयस भूषन बसन तात तजे रघुबीर । बिसमउ हरषु न हृदयँ कछु पहिरे बलकल चीर ॥ १६५ ॥

pitu āyasa bhūṣana basana tāta taje raghubīra | bisamau haraṣu na hṛdaya~ kachu pahire balakala cīra || 165 ||

Report an error

मुख प्रसन्न मन रंग न रोषू। सब कर सब बिधि करि परितोषू

mukha prasanna mana raṃga na roṣū| saba kara saba bidhi kari paritoṣū

Report an error

चले बिपिन सुनि सिय सँग लागी। रहइ न राम चरन अनुरागी

cale bipina suni siya sa~ga lāgī| rahai na rāma carana anurāgī

Report an error

सुनतहिं लखनु चले उठि साथा। रहहिं न जतन किए रघुनाथा

sunatahiṃ lakhanu cale uṭhi sāthā| rahahiṃ na jatana kie raghunāthā

Report an error

तब रघुपति सबही सिरु नाई। चले संग सिय अरु लघु भाई

taba raghupati sabahī siru nāī| cale saṃga siya aru laghu bhāī

Report an error

रामु लखनु सिय बनहि सिधाए। गइउँ न संग न प्रान पठाए

rāmu lakhanu siya banahi sidhāe| gaiu~ na saṃga na prāna paṭhāe

Report an error

यहु सबु भा इन्ह आँखिन्ह आगें। तउ न तजा तनु जीव अभागें

yahu sabu bhā inha ā~khinha āgeṃ| tau na tajā tanu jīva abhāgeṃ

Report an error

मोहि न लाज निज नेहु निहारी। राम सरिस सुत मैं महतारी

mohi na lāja nija nehu nihārī| rāma sarisa suta maiṃ mahatārī

Report an error

जिऐ मरै भल भूपति जाना। मोर हृदय सत कुलिस समाना

jiai marai bhala bhūpati jānā| mora hṛdaya sata kulisa samānā

Report an error

कौसल्या के बचन सुनि भरत सहित रनिवास । ब्याकुल बिलपत राजगृह मानहुँ सोक नेवासु ॥ १६६ ॥

kausalyā ke bacana suni bharata sahita ranivāsa | byākula bilapata rājagṛha mānahu~ soka nevāsu || 166 ||

Report an error

बिलपहिं बिकल भरत दोउ भाई। कौसल्याँ लिए हृदयँ लगाई

bilapahiṃ bikala bharata dou bhāī| kausalyā~ lie hṛdaya~ lagāī

Report an error

भाँति अनेक भरतु समुझाए। कहि बिबेकमय बचन सुनाए

bhā~ti aneka bharatu samujhāe| kahi bibekamaya bacana sunāe

Report an error

भरतहुँ मातु सकल समुझाईं। कहि पुरान श्रुति कथा सुहाईं

bharatahu~ mātu sakala samujhāīṃ| kahi purāna śruti kathā suhāīṃ

Report an error

छल बिहीन सुचि सरल सुबानी। बोले भरत जोरि जुग पानी

chala bihīna suci sarala subānī| bole bharata jori juga pānī

Report an error

जे अघ मातु पिता सुत मारें। गाइ गोठ महिसुर पुर जारें

je agha mātu pitā suta māreṃ| gāi goṭha mahisura pura jāreṃ

Report an error

जे अघ तिय बालक बध कीन्हें। मीत महीपति माहुर दीन्हें

je agha tiya bālaka badha kīnheṃ| mīta mahīpati māhura dīnheṃ

Report an error

जे पातक उपपातक अहहीं। करम बचन मन भव कबि कहहीं

je pātaka upapātaka ahahīṃ| karama bacana mana bhava kabi kahahīṃ

Report an error

ते पातक मोहि होहुँ बिधाता। जौं यहु होइ मोर मत माता

te pātaka mohi hohu~ bidhātā| jauṃ yahu hoi mora mata mātā

Report an error

जे परिहरि हरि हर चरन भजहिं भूतगन घोर । तेहि कइ गति मोहि देउ बिधि जौं जननी मत मोर ॥ १६७ ॥

je parihari hari hara carana bhajahiṃ bhūtagana ghora | tehi kai gati mohi deu bidhi jauṃ jananī mata mora || 167 ||

Report an error

बेचहिं बेदु धरमु दुहि लेहीं। पिसुन पराय पाप कहि देहीं

becahiṃ bedu dharamu duhi lehīṃ| pisuna parāya pāpa kahi dehīṃ

Report an error

कपटी कुटिल कलहप्रिय क्रोधी। बेद बिदूषक बिस्व बिरोधी

kapaṭī kuṭila kalahapriya krodhī| beda bidūṣaka bisva birodhī

Report an error

लोभी लंपट लोलुपचारा। जे ताकहिं परधनु परदारा

lobhī laṃpaṭa lolupacārā| je tākahiṃ paradhanu paradārā

Report an error

पावौं मैं तिन्ह के गति घोरा। जौं जननी यहु संमत मोरा

pāvauṃ maiṃ tinha ke gati ghorā| jauṃ jananī yahu saṃmata morā

Report an error

जे नहिं साधुसंग अनुरागे। परमारथ पथ बिमुख अभागे

je nahiṃ sādhusaṃga anurāge| paramāratha patha bimukha abhāge

Report an error

जे न भजहिं हरि नरतनु पाई। जिन्हहि न हरि हर सुजसु सोहाई

je na bhajahiṃ hari naratanu pāī| jinhahi na hari hara sujasu sohāī

Report an error

तजि श्रुतिपंथु बाम पथ चलहीं। बंचक बिरचि बेष जगु छलहीं

taji śrutipaṃthu bāma patha calahīṃ| baṃcaka biraci beṣa jagu chalahīṃ

Report an error

तिन्ह कै गति मोहि संकर देऊ। जननी जौं यहु जानौं भेऊ

tinha kai gati mohi saṃkara deū| jananī jauṃ yahu jānauṃ bheū

Report an error

मातु भरत के बचन सुनि साँचे सरल सुभायँ । कहति राम प्रिय तात तुम्ह सदा बचन मन कायँ ॥ १६८ ॥

mātu bharata ke bacana suni sā~ce sarala subhāya~ | kahati rāma priya tāta tumha sadā bacana mana kāya~ || 168 ||

Report an error

राम प्रानहु तें प्रान तुम्हारे। तुम्ह रघुपतिहि प्रानहु तें प्यारे

rāma prānahu teṃ prāna tumhāre| tumha raghupatihi prānahu teṃ pyāre

Report an error

बिधु बिष चवै स्त्रवै हिमु आगी। होइ बारिचर बारि बिरागी

bidhu biṣa cavai stravai himu āgī| hoi bāricara bāri birāgī

Report an error

भएँ ग्यानु बरु मिटै न मोहू। तुम्ह रामहि प्रतिकूल न होहू

bhae~ gyānu baru miṭai na mohū| tumha rāmahi pratikūla na hohū

Report an error

मत तुम्हार यहु जो जग कहहीं। सो सपनेहुँ सुख सुगति न लहहीं

mata tumhāra yahu jo jaga kahahīṃ| so sapanehu~ sukha sugati na lahahīṃ

Report an error

अस कहि मातु भरतु हियँ लाए। थन पय स्त्रवहिं नयन जल छाए

asa kahi mātu bharatu hiya~ lāe| thana paya stravahiṃ nayana jala chāe

Report an error

करत बिलाप बहुत यहि भाँती। बैठेहिं बीति गइ सब राती

karata bilāpa bahuta yahi bhā~tī| baiṭhehiṃ bīti gai saba rātī

Report an error

बामदेउ बसिष्ठ तब आए। सचिव महाजन सकल बोलाए

bāmadeu basiṣṭha taba āe| saciva mahājana sakala bolāe

Report an error

मुनि बहु भाँति भरत उपदेसे। कहि परमारथ बचन सुदेसे

muni bahu bhā~ti bharata upadese| kahi paramāratha bacana sudese

Report an error

तात हृदयँ धीरजु धरहु करहु जो अवसर आजु । उठे भरत गुर बचन सुनि करन कहेउ सबु साजु ॥ १६९ ॥

tāta hṛdaya~ dhīraju dharahu karahu jo avasara āju | uṭhe bharata gura bacana suni karana kaheu sabu sāju || 169 ||

Report an error

नृपतनु बेद बिदित अन्हवावा। परम बिचित्र बिमानु बनावा

nṛpatanu beda bidita anhavāvā| parama bicitra bimānu banāvā

Report an error

गहि पद भरत मातु सब राखी। रहीं रानि दरसन अभिलाषी

gahi pada bharata mātu saba rākhī| rahīṃ rāni darasana abhilāṣī

Report an error

चंदन अगर भार बहु आए। अमित अनेक सुगंध सुहाए

caṃdana agara bhāra bahu āe| amita aneka sugaṃdha suhāe

Report an error

सरजु तीर रचि चिता बनाई। जनु सुरपुर सोपान सुहाई

saraju tīra raci citā banāī| janu surapura sopāna suhāī

Report an error

एहि बिधि दाह क्रिया सब कीन्ही। बिधिवत न्हाइ तिलांजुलि दीन्ही

ehi bidhi dāha kriyā saba kīnhī| bidhivata nhāi tilāṃjuli dīnhī

Report an error

सोधि सुमृति सब बेद पुराना। कीन्ह भरत दसगात बिधाना

sodhi sumṛti saba beda purānā| kīnha bharata dasagāta bidhānā

Report an error

जहँ जस मुनिबर आयसु दीन्हा। तहँ तस सहस भाँति सबु कीन्हा

jaha~ jasa munibara āyasu dīnhā| taha~ tasa sahasa bhā~ti sabu kīnhā

Report an error

भए बिसुद्ध दिए सब दाना। धेनु बाजि गज बाहन नाना

bhae bisuddha die saba dānā| dhenu bāji gaja bāhana nānā

Report an error

सिंघासन भूषन बसन अन्न धरनि धन धाम । दिए भरत लहि भूमिसुर भे परिपूरन काम ॥ १७० ॥

siṃghāsana bhūṣana basana anna dharani dhana dhāma | die bharata lahi bhūmisura bhe paripūrana kāma || 170 ||

Report an error

पितु हित भरत कीन्हि जसि करनी। सो मुख लाख जाइ नहिं बरनी

pitu hita bharata kīnhi jasi karanī| so mukha lākha jāi nahiṃ baranī

Report an error

सुदिनु सोधि मुनिबर तब आए। सचिव महाजन सकल बोलाए

sudinu sodhi munibara taba āe| saciva mahājana sakala bolāe

Report an error

बैठे राजसभाँ सब जाई। पठए बोलि भरत दोउ भाई

baiṭhe rājasabhā~ saba jāī| paṭhae boli bharata dou bhāī

Report an error

भरतु बसिष्ठ निकट बैठारे। नीति धरममय बचन उचारे

bharatu basiṣṭha nikaṭa baiṭhāre| nīti dharamamaya bacana ucāre

Report an error

प्रथम कथा सब मुनिबर बरनी। कैकइ कुटिल कीन्हि जसि करनी

prathama kathā saba munibara baranī| kaikai kuṭila kīnhi jasi karanī

Report an error

भूप धरमब्रतु सत्य सराहा। जेहिं तनु परिहरि प्रेमु निबाहा

bhūpa dharamabratu satya sarāhā| jehiṃ tanu parihari premu nibāhā

Report an error

कहत राम गुन सील सुभाऊ। सजल नयन पुलकेउ मुनिराऊ

kahata rāma guna sīla subhāū| sajala nayana pulakeu munirāū

Report an error

बहुरि लखन सिय प्रीति बखानी। सोक सनेह मगन मुनि ग्यानी

bahuri lakhana siya prīti bakhānī| soka saneha magana muni gyānī

Report an error

सुनहु भरत भावी प्रबल बिलखि कहेउ मुनिनाथ । हानि लाभु जीवन मरनु जसु अपजसु बिधि हाथ ॥ १७१ ॥

sunahu bharata bhāvī prabala bilakhi kaheu muninātha | hāni lābhu jīvana maranu jasu apajasu bidhi hātha || 171 ||

Report an error

अस बिचारि केहि देइअ दोसू। ब्यरथ काहि पर कीजिअ रोसू

asa bicāri kehi deia dosū| byaratha kāhi para kījia rosū

Report an error

तात बिचारु केहि करहु मन माहीं। सोच जोगु दसरथु नृपु नाहीं

tāta bicāru kehi karahu mana māhīṃ| soca jogu dasarathu nṛpu nāhīṃ

Report an error

सोचिअ बिप्र जो बेद बिहीना। तजि निज धरमु बिषय लयलीना

socia bipra jo beda bihīnā| taji nija dharamu biṣaya layalīnā

Report an error

सोचिअ नृपति जो नीति न जाना। जेहि न प्रजा प्रिय प्रान समाना

socia nṛpati jo nīti na jānā| jehi na prajā priya prāna samānā

Report an error

सोचिअ बयसु कृपन धनवानू। जो न अतिथि सिव भगति सुजानू

socia bayasu kṛpana dhanavānū| jo na atithi siva bhagati sujānū

Report an error

सोचिअ सूद्रु बिप्र अवमानी। मुखर मानप्रिय ग्यान गुमानी

socia sūdru bipra avamānī| mukhara mānapriya gyāna gumānī

Report an error

सोचिअ पुनि पति बंचक नारी। कुटिल कलहप्रिय इच्छाचारी

socia puni pati baṃcaka nārī| kuṭila kalahapriya icchācārī

Report an error

सोचिअ बटु निज ब्रतु परिहरई। जो नहिं गुर आयसु अनुसरई

socia baṭu nija bratu pariharaī| jo nahiṃ gura āyasu anusaraī

Report an error

सोचिअ गृही जो मोह बस करइ करम पथ त्याग । सोचिअ जति प्रंपच रत बिगत बिबेक बिराग ॥ १७२ ॥

socia gṛhī jo moha basa karai karama patha tyāga | socia jati praṃpaca rata bigata bibeka birāga || 172 ||

Report an error

बैखानस सोइ सोचै जोगु। तपु बिहाइ जेहि भावइ भोगू

baikhānasa soi socai jogu| tapu bihāi jehi bhāvai bhogū

Report an error

सोचिअ पिसुन अकारन क्रोधी। जननि जनक गुर बंधु बिरोधी

socia pisuna akārana krodhī| janani janaka gura baṃdhu birodhī

Report an error

सब बिधि सोचिअ पर अपकारी। निज तनु पोषक निरदय भारी

saba bidhi socia para apakārī| nija tanu poṣaka niradaya bhārī

Report an error

सोचनीय सबहि बिधि सोई। जो न छाड़ि छलु हरि जन होई

socanīya sabahi bidhi soī| jo na chār̤i chalu hari jana hoī

Report an error

सोचनीय नहिं कोसलराऊ। भुवन चारिदस प्रगट प्रभाऊ

socanīya nahiṃ kosalarāū| bhuvana cāridasa pragaṭa prabhāū

Report an error

भयउ न अहइ न अब होनिहारा। भूप भरत जस पिता तुम्हारा

bhayau na ahai na aba honihārā| bhūpa bharata jasa pitā tumhārā

Report an error

बिधि हरि हरु सुरपति दिसिनाथा। बरनहिं सब दसरथ गुन गाथा

bidhi hari haru surapati disināthā| baranahiṃ saba dasaratha guna gāthā

Report an error

कहहु तात केहि भाँति कोउ करिहि बड़ाई तासु । राम लखन तुम्ह सत्रुहन सरिस सुअन सुचि जासु ॥ १७३ ॥

kahahu tāta kehi bhā~ti kou karihi bar̤āī tāsu | rāma lakhana tumha satruhana sarisa suana suci jāsu || 173 ||

Report an error

सब प्रकार भूपति बड़भागी। बादि बिषादु करिअ तेहि लागी

saba prakāra bhūpati bar̤abhāgī| bādi biṣādu karia tehi lāgī

Report an error

यहु सुनि समुझि सोचु परिहरहू। सिर धरि राज रजायसु करहू

yahu suni samujhi socu pariharahū| sira dhari rāja rajāyasu karahū

Report an error

राँय राजपदु तुम्ह कहुँ दीन्हा। पिता बचनु फुर चाहिअ कीन्हा

rā~ya rājapadu tumha kahu~ dīnhā| pitā bacanu phura cāhia kīnhā

Report an error

तजे रामु जेहिं बचनहि लागी। तनु परिहरेउ राम बिरहागी

taje rāmu jehiṃ bacanahi lāgī| tanu parihareu rāma birahāgī

Report an error

नृपहि बचन प्रिय नहिं प्रिय प्राना। करहु तात पितु बचन प्रवाना

nṛpahi bacana priya nahiṃ priya prānā| karahu tāta pitu bacana pravānā

Report an error

करहु सीस धरि भूप रजाई। हइ तुम्ह कहँ सब भाँति भलाई

karahu sīsa dhari bhūpa rajāī| hai tumha kaha~ saba bhā~ti bhalāī

Report an error

परसुराम पितु अग्या राखी। मारी मातु लोक सब साखी

parasurāma pitu agyā rākhī| mārī mātu loka saba sākhī

Report an error

तनय जजातिहि जौबनु दयऊ। पितु अग्याँ अघ अजसु न भयऊ

tanaya jajātihi jaubanu dayaū| pitu agyā~ agha ajasu na bhayaū

Report an error

अनुचित उचित बिचारु तजि जे पालहिं पितु बैन । ते भाजन सुख सुजस के बसहिं अमरपति ऐन ॥ १७४ ॥

anucita ucita bicāru taji je pālahiṃ pitu baina | te bhājana sukha sujasa ke basahiṃ amarapati aina || 174 ||

Report an error

अवसि नरेस बचन फुर करहू। पालहु प्रजा सोकु परिहरहू

avasi naresa bacana phura karahū| pālahu prajā soku pariharahū

Report an error

सुरपुर नृप पाइहि परितोषू। तुम्ह कहुँ सुकृत सुजसु नहिं दोषू

surapura nṛpa pāihi paritoṣū| tumha kahu~ sukṛta sujasu nahiṃ doṣū

Report an error

बेद बिदित संमत सबही का। जेहि पितु देइ सो पावइ टीका

beda bidita saṃmata sabahī kā| jehi pitu dei so pāvai ṭīkā

Report an error

करहु राजु परिहरहु गलानी। मानहु मोर बचन हित जानी

karahu rāju pariharahu galānī| mānahu mora bacana hita jānī

Report an error

सुनि सुखु लहब राम बैदेहीं। अनुचित कहब न पंडित केहीं

suni sukhu lahaba rāma baidehīṃ| anucita kahaba na paṃḍita kehīṃ

Report an error

कौसल्यादि सकल महतारीं। तेउ प्रजा सुख होहिं सुखारीं

kausalyādi sakala mahatārīṃ| teu prajā sukha hohiṃ sukhārīṃ

Report an error

परम तुम्हार राम कर जानिहि। सो सब बिधि तुम्ह सन भल मानिहि

parama tumhāra rāma kara jānihi| so saba bidhi tumha sana bhala mānihi

Report an error

सौंपेहु राजु राम कै आएँ। सेवा करेहु सनेह सुहाएँ

sauṃpehu rāju rāma kai āe~| sevā karehu saneha suhāe~

Report an error

कीजिअ गुर आयसु अवसि कहहिं सचिव कर जोरि । रघुपति आएँ उचित जस तस तब करब बहोरि ॥ १७५ ॥

kījia gura āyasu avasi kahahiṃ saciva kara jori | raghupati āe~ ucita jasa tasa taba karaba bahori || 175 ||

Report an error

कौसल्या धरि धीरजु कहई। पूत पथ्य गुर आयसु अहई

kausalyā dhari dhīraju kahaī| pūta pathya gura āyasu ahaī

Report an error

सो आदरिअ करिअ हित मानी। तजिअ बिषादु काल गति जानी

so ādaria karia hita mānī| tajia biṣādu kāla gati jānī

Report an error

बन रघुपति सुरपति नरनाहू। तुम्ह एहि भाँति तात कदराहू

bana raghupati surapati naranāhū| tumha ehi bhā~ti tāta kadarāhū

Report an error

परिजन प्रजा सचिव सब अंबा। तुम्हही सुत सब कहँ अवलंबा

parijana prajā saciva saba aṃbā| tumhahī suta saba kaha~ avalaṃbā

Report an error

लखि बिधि बाम कालु कठिनाई। धीरजु धरहु मातु बलि जाई

lakhi bidhi bāma kālu kaṭhināī| dhīraju dharahu mātu bali jāī

Report an error

सिर धरि गुर आयसु अनुसरहू। प्रजा पालि परिजन दुखु हरहू

sira dhari gura āyasu anusarahū| prajā pāli parijana dukhu harahū

Report an error

गुर के बचन सचिव अभिनंदनु। सुने भरत हिय हित जनु चंदनु

gura ke bacana saciva abhinaṃdanu| sune bharata hiya hita janu caṃdanu

Report an error

सुनी बहोरि मातु मृदु बानी। सील सनेह सरल रस सानी

sunī bahori mātu mṛdu bānī| sīla saneha sarala rasa sānī

Report an error

सानी सरल रस मातु बानी सुनि भरत ब्याकुल भए । लोचन सरोरुह स्त्रवत सींचत बिरह उर अंकुर नए । सो दसा देखत समय तेहि बिसरी सबहि सुधि देह की । तुलसी सराहत सकल सादर सीवँ सहज सनेह की

sānī sarala rasa mātu bānī suni bharata byākula bhae | locana saroruha stravata sīṃcata biraha ura aṃkura nae | so dasā dekhata samaya tehi bisarī sabahi sudhi deha kī | tulasī sarāhata sakala sādara sīva~ sahaja saneha kī

Report an error

भरतु कमल कर जोरि धीर धुरंधर धीर धरि । बचन अमिअँ जनु बोरि देत उचित उत्तर सबहि ॥ १७६ ॥

bharatu kamala kara jori dhīra dhuraṃdhara dhīra dhari | bacana amia~ janu bori deta ucita uttara sabahi || 176 ||

Report an error

मोहि उपदेसु दीन्ह गुर नीका। प्रजा सचिव संमत सबही का

mohi upadesu dīnha gura nīkā| prajā saciva saṃmata sabahī kā

Report an error

मातु उचित धरि आयसु दीन्हा। अवसि सीस धरि चाहउँ कीन्हा

mātu ucita dhari āyasu dīnhā| avasi sīsa dhari cāhau~ kīnhā

Report an error

गुर पितु मातु स्वामि हित बानी। सुनि मन मुदित करिअ भलि जानी

gura pitu mātu svāmi hita bānī| suni mana mudita karia bhali jānī

Report an error

उचित कि अनुचित किएँ बिचारू। धरमु जाइ सिर पातक भारू

ucita ki anucita kie~ bicārū| dharamu jāi sira pātaka bhārū

Report an error

तुम्ह तौ देहु सरल सिख सोई। जो आचरत मोर भल होई

tumha tau dehu sarala sikha soī| jo ācarata mora bhala hoī

Report an error

जद्यपि यह समुझत हउँ नीकें। तदपि होत परितोषु न जी कें

jadyapi yaha samujhata hau~ nīkeṃ| tadapi hota paritoṣu na jī keṃ

Report an error

अब तुम्ह बिनय मोरि सुनि लेहू। मोहि अनुहरत सिखावनु देहू

aba tumha binaya mori suni lehū| mohi anuharata sikhāvanu dehū

Report an error

ऊतरु देउँ छमब अपराधू। दुखित दोष गुन गनहिं न साधू

ūtaru deu~ chamaba aparādhū| dukhita doṣa guna ganahiṃ na sādhū

Report an error

पितु सुरपुर सिय रामु बन करन कहहु मोहि राजु । एहि तें जानहु मोर हित कै आपन बड़ काजु ॥ १७७ ॥

pitu surapura siya rāmu bana karana kahahu mohi rāju | ehi teṃ jānahu mora hita kai āpana bar̤a kāju || 177 ||

Report an error

हित हमार सियपति सेवकाई। सो हरि लीन्ह मातु कुटिलाई

hita hamāra siyapati sevakāī| so hari līnha mātu kuṭilāī

Report an error

मैं अनुमानि दीख मन माहीं। आन उपायँ मोर हित नाहीं

maiṃ anumāni dīkha mana māhīṃ| āna upāya~ mora hita nāhīṃ

Report an error

सोक समाजु राजु केहि लेखें। लखन राम सिय बिनु पद देखें

soka samāju rāju kehi lekheṃ| lakhana rāma siya binu pada dekheṃ

Report an error

बादि बसन बिनु भूषन भारू। बादि बिरति बिनु ब्रह्म बिचारू

bādi basana binu bhūṣana bhārū| bādi birati binu brahma bicārū

Report an error

सरुज सरीर बादि बहु भोगा। बिनु हरिभगति जायँ जप जोगा

saruja sarīra bādi bahu bhogā| binu haribhagati jāya~ japa jogā

Report an error

जायँ जीव बिनु देह सुहाई। बादि मोर सबु बिनु रघुराई

jāya~ jīva binu deha suhāī| bādi mora sabu binu raghurāī

Report an error

जाउँ राम पहिं आयसु देहू। एकहिं आँक मोर हित एहू

jāu~ rāma pahiṃ āyasu dehū| ekahiṃ ā~ka mora hita ehū

Report an error

मोहि नृप करि भल आपन चहहू। सोउ सनेह जड़ता बस कहहू

mohi nṛpa kari bhala āpana cahahū| sou saneha jar̤atā basa kahahū

Report an error

कैकेई सुअ कुटिलमति राम बिमुख गतलाज । तुम्ह चाहत सुखु मोहबस मोहि से अधम कें राज ॥ १७८ ॥

kaikeī sua kuṭilamati rāma bimukha gatalāja | tumha cāhata sukhu mohabasa mohi se adhama keṃ rāja || 178 ||

Report an error

कहउँ साँचु सब सुनि पतिआहू। चाहिअ धरमसील नरनाहू

kahau~ sā~cu saba suni patiāhū| cāhia dharamasīla naranāhū

Report an error

मोहि राजु हठि देइहहु जबहीं। रसा रसातल जाइहि तबहीं

mohi rāju haṭhi deihahu jabahīṃ| rasā rasātala jāihi tabahīṃ

Report an error

मोहि समान को पाप निवासू। जेहि लगि सीय राम बनबासू

mohi samāna ko pāpa nivāsū| jehi lagi sīya rāma banabāsū

Report an error

रायँ राम कहुँ काननु दीन्हा। बिछुरत गमनु अमरपुर कीन्हा

rāya~ rāma kahu~ kānanu dīnhā| bichurata gamanu amarapura kīnhā

Report an error

मैं सठु सब अनरथ कर हेतू। बैठ बात सब सुनउँ सचेतू

maiṃ saṭhu saba anaratha kara hetū| baiṭha bāta saba sunau~ sacetū

Report an error

बिनु रघुबीर बिलोकि अबासू। रहे प्रान सहि जग उपहासू

binu raghubīra biloki abāsū| rahe prāna sahi jaga upahāsū

Report an error

राम पुनीत बिषय रस रूखे। लोलुप भूमि भोग के भूखे

rāma punīta biṣaya rasa rūkhe| lolupa bhūmi bhoga ke bhūkhe

Report an error

कहँ लगि कहौं हृदय कठिनाई। निदरि कुलिसु जेहिं लही बड़ाई

kaha~ lagi kahauṃ hṛdaya kaṭhināī| nidari kulisu jehiṃ lahī bar̤āī

Report an error

कारन तें कारजु कठिन होइ दोसु नहि मोर । कुलिस अस्थि तें उपल तें लोह कराल कठोर ॥ १७९ ॥

kārana teṃ kāraju kaṭhina hoi dosu nahi mora | kulisa asthi teṃ upala teṃ loha karāla kaṭhora || 179 ||

Report an error

कैकेई भव तनु अनुरागे। पाँवर प्रान अघाइ अभागे

kaikeī bhava tanu anurāge| pā~vara prāna aghāi abhāge

Report an error

जौं प्रिय बिरहँ प्रान प्रिय लागे। देखब सुनब बहुत अब आगे

jauṃ priya biraha~ prāna priya lāge| dekhaba sunaba bahuta aba āge

Report an error

लखन राम सिय कहुँ बनु दीन्हा। पठइ अमरपुर पति हित कीन्हा

lakhana rāma siya kahu~ banu dīnhā| paṭhai amarapura pati hita kīnhā

Report an error

लीन्ह बिधवपन अपजसु आपू। दीन्हेउ प्रजहि सोकु संतापू

līnha bidhavapana apajasu āpū| dīnheu prajahi soku saṃtāpū

Report an error

मोहि दीन्ह सुखु सुजसु सुराजू। कीन्ह कैकेईं सब कर काजू

mohi dīnha sukhu sujasu surājū| kīnha kaikeīṃ saba kara kājū

Report an error

एहि तें मोर काह अब नीका। तेहि पर देन कहहु तुम्ह टीका

ehi teṃ mora kāha aba nīkā| tehi para dena kahahu tumha ṭīkā

Report an error

कैकई जठर जनमि जग माहीं। यह मोहि कहँ कछु अनुचित नाहीं

kaikaī jaṭhara janami jaga māhīṃ| yaha mohi kaha~ kachu anucita nāhīṃ

Report an error

मोरि बात सब बिधिहिं बनाई। प्रजा पाँच कत करहु सहाई

mori bāta saba bidhihiṃ banāī| prajā pā~ca kata karahu sahāī

Report an error

ग्रह ग्रहीत पुनि बात बस तेहि पुनि बीछी मार । तेहि पिआइअ बारुनी कहहु काह उपचार ॥ १८० ॥

graha grahīta puni bāta basa tehi puni bīchī māra | tehi piāia bārunī kahahu kāha upacāra || 180 ||

Report an error

कैकइ सुअन जोगु जग जोई। चतुर बिरंचि दीन्ह मोहि सोई

kaikai suana jogu jaga joī| catura biraṃci dīnha mohi soī

Report an error

दसरथ तनय राम लघु भाई। दीन्हि मोहि बिधि बादि बड़ाई

dasaratha tanaya rāma laghu bhāī| dīnhi mohi bidhi bādi bar̤āī

Report an error

तुम्ह सब कहहु कढ़ावन टीका। राय रजायसु सब कहँ नीका

tumha saba kahahu kar̤hāvana ṭīkā| rāya rajāyasu saba kaha~ nīkā

Report an error

उतरु देउँ केहि बिधि केहि केही। कहहु सुखेन जथा रुचि जेही

utaru deu~ kehi bidhi kehi kehī| kahahu sukhena jathā ruci jehī

Report an error

मोहि कुमातु समेत बिहाई। कहहु कहिहि के कीन्ह भलाई

mohi kumātu sameta bihāī| kahahu kahihi ke kīnha bhalāī

Report an error

मो बिनु को सचराचर माहीं। जेहि सिय रामु प्रानप्रिय नाहीं

mo binu ko sacarācara māhīṃ| jehi siya rāmu prānapriya nāhīṃ

Report an error

परम हानि सब कहँ बड़ लाहू। अदिनु मोर नहि दूषन काहू

parama hāni saba kaha~ bar̤a lāhū| adinu mora nahi dūṣana kāhū

Report an error

संसय सील प्रेम बस अहहू। सबुइ उचित सब जो कछु कहहू

saṃsaya sīla prema basa ahahū| sabui ucita saba jo kachu kahahū

Report an error

राम मातु सुठि सरलचित मो पर प्रेमु बिसेषि । कहइ सुभाय सनेह बस मोरि दीनता देखि ॥ १८१ ॥

rāma mātu suṭhi saralacita mo para premu biseṣi | kahai subhāya saneha basa mori dīnatā dekhi || 181 ||

Report an error

गुर बिबेक सागर जगु जाना। जिन्हहि बिस्व कर बदर समाना

gura bibeka sāgara jagu jānā| jinhahi bisva kara badara samānā

Report an error

मो कहँ तिलक साज सज सोऊ। भएँ बिधि बिमुख बिमुख सबु कोऊ

mo kaha~ tilaka sāja saja soū| bhae~ bidhi bimukha bimukha sabu koū

Report an error

परिहरि रामु सीय जग माहीं। कोउ न कहिहि मोर मत नाहीं

parihari rāmu sīya jaga māhīṃ| kou na kahihi mora mata nāhīṃ

Report an error

सो मैं सुनब सहब सुखु मानी। अंतहुँ कीच तहाँ जहँ पानी

so maiṃ sunaba sahaba sukhu mānī| aṃtahu~ kīca tahā~ jaha~ pānī

Report an error

डरु न मोहि जग कहिहि कि पोचू। परलोकहु कर नाहिन सोचू

ḍaru na mohi jaga kahihi ki pocū| paralokahu kara nāhina socū

Report an error

एकइ उर बस दुसह दवारी। मोहि लगि भे सिय रामु दुखारी

ekai ura basa dusaha davārī| mohi lagi bhe siya rāmu dukhārī

Report an error

जीवन लाहु लखन भल पावा। सबु तजि राम चरन मनु लावा

jīvana lāhu lakhana bhala pāvā| sabu taji rāma carana manu lāvā

Report an error

मोर जनम रघुबर बन लागी। झूठ काह पछिताउँ अभागी

mora janama raghubara bana lāgī| jhūṭha kāha pachitāu~ abhāgī

Report an error

आपनि दारुन दीनता कहउँ सबहि सिरु नाइ । देखें बिनु रघुनाथ पद जिय कै जरनि न जाइ ॥ १८२ ॥

āpani dāruna dīnatā kahau~ sabahi siru nāi | dekheṃ binu raghunātha pada jiya kai jarani na jāi || 182 ||

Report an error

आन उपाउ मोहि नहि सूझा। को जिय कै रघुबर बिनु बूझा

āna upāu mohi nahi sūjhā| ko jiya kai raghubara binu būjhā

Report an error

एकहिं आँक इहइ मन माहीं। प्रातकाल चलिहउँ प्रभु पाहीं

ekahiṃ ā~ka ihai mana māhīṃ| prātakāla calihau~ prabhu pāhīṃ

Report an error

जद्यपि मैं अनभल अपराधी। भै मोहि कारन सकल उपाधी

jadyapi maiṃ anabhala aparādhī| bhai mohi kārana sakala upādhī

Report an error

तदपि सरन सनमुख मोहि देखी। छमि सब करिहहिं कृपा बिसेषी

tadapi sarana sanamukha mohi dekhī| chami saba karihahiṃ kṛpā biseṣī

Report an error

सील सकुच सुठि सरल सुभाऊ। कृपा सनेह सदन रघुराऊ

sīla sakuca suṭhi sarala subhāū| kṛpā saneha sadana raghurāū

Report an error

अरिहुक अनभल कीन्ह न रामा। मैं सिसु सेवक जद्यपि बामा

arihuka anabhala kīnha na rāmā| maiṃ sisu sevaka jadyapi bāmā

Report an error

तुम्ह पै पाँच मोर भल मानी। आयसु आसिष देहु सुबानी

tumha pai pā~ca mora bhala mānī| āyasu āsiṣa dehu subānī

Report an error

जेहिं सुनि बिनय मोहि जनु जानी। आवहिं बहुरि रामु रजधानी

jehiṃ suni binaya mohi janu jānī| āvahiṃ bahuri rāmu rajadhānī

Report an error

जद्यपि जनमु कुमातु तें मैं सठु सदा सदोस । आपन जानि न त्यागिहहिं मोहि रघुबीर भरोस ॥ १८३ ॥

jadyapi janamu kumātu teṃ maiṃ saṭhu sadā sadosa | āpana jāni na tyāgihahiṃ mohi raghubīra bharosa || 183 ||

Report an error

भरत बचन सब कहँ प्रिय लागे। राम सनेह सुधाँ जनु पागे

bharata bacana saba kaha~ priya lāge| rāma saneha sudhā~ janu pāge

Report an error

लोग बियोग बिषम बिष दागे। मंत्र सबीज सुनत जनु जागे

loga biyoga biṣama biṣa dāge| maṃtra sabīja sunata janu jāge

Report an error

मातु सचिव गुर पुर नर नारी। सकल सनेहँ बिकल भए भारी

mātu saciva gura pura nara nārī| sakala saneha~ bikala bhae bhārī

Report an error

भरतहि कहहि सराहि सराही। राम प्रेम मूरति तनु आही

bharatahi kahahi sarāhi sarāhī| rāma prema mūrati tanu āhī

Report an error

तात भरत अस काहे न कहहू। प्रान समान राम प्रिय अहहू

tāta bharata asa kāhe na kahahū| prāna samāna rāma priya ahahū

Report an error

जो पावँरु अपनी जड़ताई। तुम्हहि सुगाइ मातु कुटिलाई

jo pāva~ru apanī jar̤atāī| tumhahi sugāi mātu kuṭilāī

Report an error

सो सठु कोटिक पुरुष समेता। बसिहि कलप सत नरक निकेता

so saṭhu koṭika puruṣa sametā| basihi kalapa sata naraka niketā

Report an error

अहि अघ अवगुन नहि मनि गहई। हरइ गरल दुख दारिद दहई

ahi agha avaguna nahi mani gahaī| harai garala dukha dārida dahaī

Report an error

अवसि चलिअ बन रामु जहँ भरत मंत्रु भल कीन्ह । सोक सिंधु बूड़त सबहि तुम्ह अवलंबनु दीन्ह ॥ १८४ ॥

avasi calia bana rāmu jaha~ bharata maṃtru bhala kīnha | soka siṃdhu būr̤ata sabahi tumha avalaṃbanu dīnha || 184 ||

Report an error

भा सब कें मन मोदु न थोरा। जनु घन धुनि सुनि चातक मोरा

bhā saba keṃ mana modu na thorā| janu ghana dhuni suni cātaka morā

Report an error

चलत प्रात लखि निरनउ नीके। भरतु प्रानप्रिय भे सबही के

calata prāta lakhi niranau nīke| bharatu prānapriya bhe sabahī ke

Report an error

मुनिहि बंदि भरतहि सिरु नाई। चले सकल घर बिदा कराई

munihi baṃdi bharatahi siru nāī| cale sakala ghara bidā karāī

Report an error

धन्य भरत जीवनु जग माहीं। सीलु सनेहु सराहत जाहीं

dhanya bharata jīvanu jaga māhīṃ| sīlu sanehu sarāhata jāhīṃ

Report an error

कहहि परसपर भा बड़ काजू। सकल चलै कर साजहिं साजू

kahahi parasapara bhā bar̤a kājū| sakala calai kara sājahiṃ sājū

Report an error

जेहि राखहिं रहु घर रखवारी। सो जानइ जनु गरदनि मारी

jehi rākhahiṃ rahu ghara rakhavārī| so jānai janu garadani mārī

Report an error

कोउ कह रहन कहिअ नहिं काहू। को न चहइ जग जीवन लाहू

kou kaha rahana kahia nahiṃ kāhū| ko na cahai jaga jīvana lāhū

Report an error

जरउ सो संपति सदन सुखु सुहद मातु पितु भाइ । सनमुख होत जो राम पद करै न सहस सहाइ ॥ १८५ ॥

jarau so saṃpati sadana sukhu suhada mātu pitu bhāi | sanamukha hota jo rāma pada karai na sahasa sahāi || 185 ||

Report an error

घर घर साजहिं बाहन नाना। हरषु हृदयँ परभात पयाना

ghara ghara sājahiṃ bāhana nānā| haraṣu hṛdaya~ parabhāta payānā

Report an error

भरत जाइ घर कीन्ह बिचारू। नगरु बाजि गज भवन भँडारू

bharata jāi ghara kīnha bicārū| nagaru bāji gaja bhavana bha~ḍārū

Report an error

संपति सब रघुपति कै आही। जौ बिनु जतन चलौं तजि ताही

saṃpati saba raghupati kai āhī| jau binu jatana calauṃ taji tāhī

Report an error

तौ परिनाम न मोरि भलाई। पाप सिरोमनि साइँ दोहाई

tau parināma na mori bhalāī| pāpa siromani sāi~ dohāī

Report an error

करइ स्वामि हित सेवकु सोई। दूषन कोटि देइ किन कोई

karai svāmi hita sevaku soī| dūṣana koṭi dei kina koī

Report an error

अस बिचारि सुचि सेवक बोले। जे सपनेहुँ निज धरम न डोले

asa bicāri suci sevaka bole| je sapanehu~ nija dharama na ḍole

Report an error

कहि सबु मरमु धरमु भल भाषा। जो जेहि लायक सो तेहिं राखा

kahi sabu maramu dharamu bhala bhāṣā| jo jehi lāyaka so tehiṃ rākhā

Report an error

करि सबु जतनु राखि रखवारे। राम मातु पहिं भरतु सिधारे

kari sabu jatanu rākhi rakhavāre| rāma mātu pahiṃ bharatu sidhāre

Report an error

आरत जननी जानि सब भरत सनेह सुजान । कहेउ बनावन पालकीं सजन सुखासन जान ॥ १८६ ॥

ārata jananī jāni saba bharata saneha sujāna | kaheu banāvana pālakīṃ sajana sukhāsana jāna || 186 ||

Report an error

चक्क चक्कि जिमि पुर नर नारी। चहत प्रात उर आरत भारी

cakka cakki jimi pura nara nārī| cahata prāta ura ārata bhārī

Report an error

जागत सब निसि भयउ बिहाना। भरत बोलाए सचिव सुजाना

jāgata saba nisi bhayau bihānā| bharata bolāe saciva sujānā

Report an error

कहेउ लेहु सबु तिलक समाजू। बनहिं देब मुनि रामहिं राजू

kaheu lehu sabu tilaka samājū| banahiṃ deba muni rāmahiṃ rājū

Report an error

बेगि चलहु सुनि सचिव जोहारे। तुरत तुरग रथ नाग सँवारे

begi calahu suni saciva johāre| turata turaga ratha nāga sa~vāre

Report an error

अरुंधती अरु अगिनि समाऊ। रथ चढ़ि चले प्रथम मुनिराऊ

aruṃdhatī aru agini samāū| ratha car̤hi cale prathama munirāū

Report an error

बिप्र बृंद चढ़ि बाहन नाना। चले सकल तप तेज निधाना

bipra bṛṃda car̤hi bāhana nānā| cale sakala tapa teja nidhānā

Report an error

नगर लोग सब सजि सजि जाना। चित्रकूट कहँ कीन्ह पयाना

nagara loga saba saji saji jānā| citrakūṭa kaha~ kīnha payānā

Report an error

सिबिका सुभग न जाहिं बखानी। चढ़ि चढ़ि चलत भई सब रानी

sibikā subhaga na jāhiṃ bakhānī| car̤hi car̤hi calata bhaī saba rānī

Report an error

सौंपि नगर सुचि सेवकनि सादर सकल चलाइ । सुमिरि राम सिय चरन तब चले भरत दोउ भाइ ॥ १८७ ॥

sauṃpi nagara suci sevakani sādara sakala calāi | sumiri rāma siya carana taba cale bharata dou bhāi || 187 ||

Report an error

राम दरस बस सब नर नारी। जनु करि करिनि चले तकि बारी

rāma darasa basa saba nara nārī| janu kari karini cale taki bārī

Report an error

बन सिय रामु समुझि मन माहीं। सानुज भरत पयादेहिं जाहीं

bana siya rāmu samujhi mana māhīṃ| sānuja bharata payādehiṃ jāhīṃ

Report an error

देखि सनेहु लोग अनुरागे। उतरि चले हय गय रथ त्यागे

dekhi sanehu loga anurāge| utari cale haya gaya ratha tyāge

Report an error

जाइ समीप राखि निज डोली। राम मातु मृदु बानी बोली

jāi samīpa rākhi nija ḍolī| rāma mātu mṛdu bānī bolī

Report an error

तात चढ़हु रथ बलि महतारी। होइहि प्रिय परिवारु दुखारी

tāta car̤hahu ratha bali mahatārī| hoihi priya parivāru dukhārī

Report an error

तुम्हरें चलत चलिहि सबु लोगू। सकल सोक कृस नहिं मग जोगू

tumhareṃ calata calihi sabu logū| sakala soka kṛsa nahiṃ maga jogū

Report an error

सिर धरि बचन चरन सिरु नाई। रथ चढ़ि चलत भए दोउ भाई

sira dhari bacana carana siru nāī| ratha car̤hi calata bhae dou bhāī

Report an error

तमसा प्रथम दिवस करि बासू। दूसर गोमति तीर निवासू

tamasā prathama divasa kari bāsū| dūsara gomati tīra nivāsū

Report an error

पय अहार फल असन एक निसि भोजन एक लोग । करत राम हित नेम ब्रत परिहरि भूषन भोग ॥ १८८ ॥

paya ahāra phala asana eka nisi bhojana eka loga | karata rāma hita nema brata parihari bhūṣana bhoga || 188 ||

Report an error

सई तीर बसि चले बिहाने। सृंगबेरपुर सब निअराने

saī tīra basi cale bihāne| sṛṃgaberapura saba niarāne

Report an error

समाचार सब सुने निषादा। हृदयँ बिचार करइ सबिषादा

samācāra saba sune niṣādā| hṛdaya~ bicāra karai sabiṣādā

Report an error

कारन कवन भरतु बन जाहीं। है कछु कपट भाउ मन माहीं

kārana kavana bharatu bana jāhīṃ| hai kachu kapaṭa bhāu mana māhīṃ

Report an error

जौं पै जियँ न होति कुटिलाई। तौ कत लीन्ह संग कटकाई

jauṃ pai jiya~ na hoti kuṭilāī| tau kata līnha saṃga kaṭakāī

Report an error

जानहिं सानुज रामहि मारी। करउँ अकंटक राजु सुखारी

jānahiṃ sānuja rāmahi mārī| karau~ akaṃṭaka rāju sukhārī

Report an error

भरत न राजनीति उर आनी। तब कलंकु अब जीवन हानी

bharata na rājanīti ura ānī| taba kalaṃku aba jīvana hānī

Report an error

सकल सुरासुर जुरहिं जुझारा। रामहि समर न जीतनिहारा

sakala surāsura jurahiṃ jujhārā| rāmahi samara na jītanihārā

Report an error

का आचरजु भरतु अस करहीं। नहिं बिष बेलि अमिअ फल फरहीं

kā ācaraju bharatu asa karahīṃ| nahiṃ biṣa beli amia phala pharahīṃ

Report an error

अस बिचारि गुहँ ग्याति सन कहेउ सजग सब होहु । हथवाँसहु बोरहु तरनि कीजिअ घाटारोहु ॥ १८९ ॥

asa bicāri guha~ gyāti sana kaheu sajaga saba hohu | hathavā~sahu borahu tarani kījia ghāṭārohu || 189 ||

Report an error

होहु सँजोइल रोकहु घाटा। ठाटहु सकल मरै के ठाटा

hohu sa~joila rokahu ghāṭā| ṭhāṭahu sakala marai ke ṭhāṭā

Report an error

सनमुख लोह भरत सन लेऊँ। जिअत न सुरसरि उतरन देऊँ

sanamukha loha bharata sana leū~| jiata na surasari utarana deū~

Report an error

समर मरनु पुनि सुरसरि तीरा। राम काजु छनभंगु सरीरा

samara maranu puni surasari tīrā| rāma kāju chanabhaṃgu sarīrā

Report an error

भरत भाइ नृपु मै जन नीचू। बड़ें भाग असि पाइअ मीचू

bharata bhāi nṛpu mai jana nīcū| bar̤eṃ bhāga asi pāia mīcū

Report an error

स्वामि काज करिहउँ रन रारी। जस धवलिहउँ भुवन दस चारी

svāmi kāja karihau~ rana rārī| jasa dhavalihau~ bhuvana dasa cārī

Report an error

तजउँ प्रान रघुनाथ निहोरें। दुहूँ हाथ मुद मोदक मोरें

tajau~ prāna raghunātha nihoreṃ| duhū~ hātha muda modaka moreṃ

Report an error

साधु समाज न जाकर लेखा। राम भगत महुँ जासु न रेखा

sādhu samāja na jākara lekhā| rāma bhagata mahu~ jāsu na rekhā

Report an error

जायँ जिअत जग सो महि भारू। जननी जौबन बिटप कुठारू

jāya~ jiata jaga so mahi bhārū| jananī jaubana biṭapa kuṭhārū

Report an error

बिगत बिषाद निषादपति सबहि बढ़ाइ उछाहु । सुमिरि राम मागेउ तुरत तरकस धनुष सनाहु ॥ १९० ॥

bigata biṣāda niṣādapati sabahi bar̤hāi uchāhu | sumiri rāma māgeu turata tarakasa dhanuṣa sanāhu || 190 ||

Report an error

बेगहु भाइहु सजहु सँजोऊ। सुनि रजाइ कदराइ न कोऊ

begahu bhāihu sajahu sa~joū| suni rajāi kadarāi na koū

Report an error

भलेहिं नाथ सब कहहिं सहरषा। एकहिं एक बढ़ावइ करषा

bhalehiṃ nātha saba kahahiṃ saharaṣā| ekahiṃ eka bar̤hāvai karaṣā

Report an error

चले निषाद जोहारि जोहारी। सूर सकल रन रूचइ रारी

cale niṣāda johāri johārī| sūra sakala rana rūcai rārī

Report an error

सुमिरि राम पद पंकज पनहीं। भाथीं बाँधि चढ़ाइन्हि धनहीं

sumiri rāma pada paṃkaja panahīṃ| bhāthīṃ bā~dhi car̤hāinhi dhanahīṃ

Report an error

अँगरी पहिरि कूँड़ि सिर धरहीं। फरसा बाँस सेल सम करहीं

a~garī pahiri kū~r̤i sira dharahīṃ| pharasā bā~sa sela sama karahīṃ

Report an error

एक कुसल अति ओड़न खाँड़े। कूदहि गगन मनहुँ छिति छाँड़े

eka kusala ati or̤ana khā~r̤e| kūdahi gagana manahu~ chiti chā~r̤e

Report an error

निज निज साजु समाजु बनाई। गुह राउतहि जोहारे जाई

nija nija sāju samāju banāī| guha rāutahi johāre jāī

Report an error

देखि सुभट सब लायक जाने। लै लै नाम सकल सनमाने

dekhi subhaṭa saba lāyaka jāne| lai lai nāma sakala sanamāne

Report an error

भाइहु लावहु धोख जनि आजु काज बड़ मोहि । सुनि सरोष बोले सुभट बीर अधीर न होहि ॥ १९१ ॥

bhāihu lāvahu dhokha jani āju kāja bar̤a mohi | suni saroṣa bole subhaṭa bīra adhīra na hohi || 191 ||

Report an error

राम प्रताप नाथ बल तोरे। करहिं कटकु बिनु भट बिनु घोरे

rāma pratāpa nātha bala tore| karahiṃ kaṭaku binu bhaṭa binu ghore

Report an error

जीवत पाउ न पाछें धरहीं। रुंड मुंडमय मेदिनि करहीं

jīvata pāu na pācheṃ dharahīṃ| ruṃḍa muṃḍamaya medini karahīṃ

Report an error

दीख निषादनाथ भल टोलू। कहेउ बजाउ जुझाऊ ढोलू

dīkha niṣādanātha bhala ṭolū| kaheu bajāu jujhāū ḍholū

Report an error

एतना कहत छींक भइ बाँए। कहेउ सगुनिअन्ह खेत सुहाए

etanā kahata chīṃka bhai bā~e| kaheu sagunianha kheta suhāe

Report an error

बूढ़ु एकु कह सगुन बिचारी। भरतहि मिलिअ न होइहि रारी

būr̤hu eku kaha saguna bicārī| bharatahi milia na hoihi rārī

Report an error

रामहि भरतु मनावन जाहीं। सगुन कहइ अस बिग्रहु नाहीं

rāmahi bharatu manāvana jāhīṃ| saguna kahai asa bigrahu nāhīṃ

Report an error

सुनि गुह कहइ नीक कह बूढ़ा। सहसा करि पछिताहिं बिमूढ़ा

suni guha kahai nīka kaha būr̤hā| sahasā kari pachitāhiṃ bimūr̤hā

Report an error

भरत सुभाउ सीलु बिनु बूझें। बड़ि हित हानि जानि बिनु जूझें

bharata subhāu sīlu binu būjheṃ| bar̤i hita hāni jāni binu jūjheṃ

Report an error

गहहु घाट भट समिटि सब लेउँ मरम मिलि जाइ । बूझि मित्र अरि मध्य गति तस तब करिहउँ आइ ॥ १९२ ॥

gahahu ghāṭa bhaṭa samiṭi saba leu~ marama mili jāi | būjhi mitra ari madhya gati tasa taba karihau~ āi || 192 ||

Report an error

लखन सनेहु सुभायँ सुहाएँ। बैरु प्रीति नहिं दुरइँ दुराएँ

lakhana sanehu subhāya~ suhāe~| bairu prīti nahiṃ durai~ durāe~

Report an error

अस कहि भेंट सँजोवन लागे। कंद मूल फल खग मृग मागे

asa kahi bheṃṭa sa~jovana lāge| kaṃda mūla phala khaga mṛga māge

Report an error

मीन पीन पाठीन पुराने। भरि भरि भार कहारन्ह आने

mīna pīna pāṭhīna purāne| bhari bhari bhāra kahāranha āne

Report an error

मिलन साजु सजि मिलन सिधाए। मंगल मूल सगुन सुभ पाए

milana sāju saji milana sidhāe| maṃgala mūla saguna subha pāe

Report an error

देखि दूरि तें कहि निज नामू। कीन्ह मुनीसहि दंड प्रनामू

dekhi dūri teṃ kahi nija nāmū| kīnha munīsahi daṃḍa pranāmū

Report an error

जानि रामप्रिय दीन्हि असीसा। भरतहि कहेउ बुझाइ मुनीसा

jāni rāmapriya dīnhi asīsā| bharatahi kaheu bujhāi munīsā

Report an error

राम सखा सुनि संदनु त्यागा। चले उतरि उमगत अनुरागा

rāma sakhā suni saṃdanu tyāgā| cale utari umagata anurāgā

Report an error

गाउँ जाति गुहँ नाउँ सुनाई। कीन्ह जोहारु माथ महि लाई

gāu~ jāti guha~ nāu~ sunāī| kīnha johāru mātha mahi lāī

Report an error

करत दंडवत देखि तेहि भरत लीन्ह उर लाइ । मनहुँ लखन सन भेंट भइ प्रेम न हृदयँ समाइ ॥ १९३ ॥

karata daṃḍavata dekhi tehi bharata līnha ura lāi | manahu~ lakhana sana bheṃṭa bhai prema na hṛdaya~ samāi || 193 ||

Report an error

भेंटत भरतु ताहि अति प्रीती। लोग सिहाहिं प्रेम कै रीती

bheṃṭata bharatu tāhi ati prītī| loga sihāhiṃ prema kai rītī

Report an error

धन्य धन्य धुनि मंगल मूला। सुर सराहि तेहि बरिसहिं फूला

dhanya dhanya dhuni maṃgala mūlā| sura sarāhi tehi barisahiṃ phūlā

Report an error

लोक बेद सब भाँतिहिं नीचा। जासु छाँह छुइ लेइअ सींचा

loka beda saba bhā~tihiṃ nīcā| jāsu chā~ha chui leia sīṃcā

Report an error

तेहि भरि अंक राम लघु भ्राता। मिलत पुलक परिपूरित गाता

tehi bhari aṃka rāma laghu bhrātā| milata pulaka paripūrita gātā

Report an error

राम राम कहि जे जमुहाहीं। तिन्हहि न पाप पुंज समुहाहीं

rāma rāma kahi je jamuhāhīṃ| tinhahi na pāpa puṃja samuhāhīṃ

Report an error

यह तौ राम लाइ उर लीन्हा। कुल समेत जगु पावन कीन्हा

yaha tau rāma lāi ura līnhā| kula sameta jagu pāvana kīnhā

Report an error

करमनास जलु सुरसरि परई। तेहि को कहहु सीस नहिं धरई

karamanāsa jalu surasari paraī| tehi ko kahahu sīsa nahiṃ dharaī

Report an error

उलटा नामु जपत जगु जाना। बालमीकि भए ब्रह्म समाना

ulaṭā nāmu japata jagu jānā| bālamīki bhae brahma samānā

Report an error

स्वपच सबर खस जमन जड़ पावँर कोल किरात । रामु कहत पावन परम होत भुवन बिख्यात ॥ १९४ ॥

svapaca sabara khasa jamana jar̤a pāva~ra kola kirāta | rāmu kahata pāvana parama hota bhuvana bikhyāta || 194 ||

Report an error

नहिं अचिरजु जुग जुग चलि आई। केहि न दीन्हि रघुबीर बड़ाई

nahiṃ aciraju juga juga cali āī| kehi na dīnhi raghubīra bar̤āī

Report an error

राम नाम महिमा सुर कहहीं। सुनि सुनि अवधलोग सुखु लहहीं

rāma nāma mahimā sura kahahīṃ| suni suni avadhaloga sukhu lahahīṃ

Report an error

रामसखहि मिलि भरत सप्रेमा। पूँछी कुसल सुमंगल खेमा

rāmasakhahi mili bharata sapremā| pū~chī kusala sumaṃgala khemā

Report an error

देखि भरत कर सील सनेहू। भा निषाद तेहि समय बिदेहू

dekhi bharata kara sīla sanehū| bhā niṣāda tehi samaya bidehū

Report an error

सकुच सनेहु मोदु मन बाढ़ा। भरतहि चितवत एकटक ठाढ़ा

sakuca sanehu modu mana bār̤hā| bharatahi citavata ekaṭaka ṭhār̤hā

Report an error

धरि धीरजु पद बंदि बहोरी। बिनय सप्रेम करत कर जोरी

dhari dhīraju pada baṃdi bahorī| binaya saprema karata kara jorī

Report an error

कुसल मूल पद पंकज पेखी। मैं तिहुँ काल कुसल निज लेखी

kusala mūla pada paṃkaja pekhī| maiṃ tihu~ kāla kusala nija lekhī

Report an error

अब प्रभु परम अनुग्रह तोरें। सहित कोटि कुल मंगल मोरें

aba prabhu parama anugraha toreṃ| sahita koṭi kula maṃgala moreṃ

Report an error

समुझि मोरि करतूति कुलु प्रभु महिमा जियँ जोइ । जो न भजइ रघुबीर पद जग बिधि बंचित सोइ ॥ १९५ ॥

samujhi mori karatūti kulu prabhu mahimā jiya~ joi | jo na bhajai raghubīra pada jaga bidhi baṃcita soi || 195 ||

Report an error

कपटी कायर कुमति कुजाती। लोक बेद बाहेर सब भाँती

kapaṭī kāyara kumati kujātī| loka beda bāhera saba bhā~tī

Report an error

राम कीन्ह आपन जबही तें। भयउँ भुवन भूषन तबही तें

rāma kīnha āpana jabahī teṃ| bhayau~ bhuvana bhūṣana tabahī teṃ

Report an error

देखि प्रीति सुनि बिनय सुहाई। मिलेउ बहोरि भरत लघु भाई

dekhi prīti suni binaya suhāī| mileu bahori bharata laghu bhāī

Report an error

कहि निषाद निज नाम सुबानीं। सादर सकल जोहारीं रानीं

kahi niṣāda nija nāma subānīṃ| sādara sakala johārīṃ rānīṃ

Report an error

जानि लखन सम देहिं असीसा। जिअहु सुखी सय लाख बरीसा

jāni lakhana sama dehiṃ asīsā| jiahu sukhī saya lākha barīsā

Report an error

निरखि निषादु नगर नर नारी। भए सुखी जनु लखनु निहारी

nirakhi niṣādu nagara nara nārī| bhae sukhī janu lakhanu nihārī

Report an error

कहहिं लहेउ एहिं जीवन लाहू। भेंटेउ रामभद्र भरि बाहू

kahahiṃ laheu ehiṃ jīvana lāhū| bheṃṭeu rāmabhadra bhari bāhū

Report an error

सुनि निषादु निज भाग बड़ाई। प्रमुदित मन लइ चलेउ लेवाई

suni niṣādu nija bhāga bar̤āī| pramudita mana lai caleu levāī

Report an error

सनकारे सेवक सकल चले स्वामि रुख पाइ । घर तरु तर सर बाग बन बास बनाएन्हि जाइ ॥ १९६ ॥

sanakāre sevaka sakala cale svāmi rukha pāi | ghara taru tara sara bāga bana bāsa banāenhi jāi || 196 ||

Report an error

Illustration: Verse & Place (Project-owned).