प्रभु पद बंदि सीस रज राखी। बोले सत्य सहज बलु भाषी
prabhu pada baṃdi sīsa raja rākhī| bole satya sahaja balu bhāṣī
अयोध्याकाण्ड · अयोध्याकाण्ड
Part 8 of 10: verses 2066–2360 of 2,947Awadhi with transliteration
प्रभु पद बंदि सीस रज राखी। बोले सत्य सहज बलु भाषी
prabhu pada baṃdi sīsa raja rākhī| bole satya sahaja balu bhāṣī
अनुचित नाथ न मानब मोरा। भरत हमहि उपचार न थोरा
anucita nātha na mānaba morā| bharata hamahi upacāra na thorā
कहँ लगि सहिअ रहिअ मनु मारें। नाथ साथ धनु हाथ हमारें
kaha~ lagi sahia rahia manu māreṃ| nātha sātha dhanu hātha hamāreṃ
छत्रि जाति रघुकुल जनमु राम अनुग जगु जान । लातहुँ मारें चढ़ति सिर नीच को धूरि समान ॥ २२९ ॥
chatri jāti raghukula janamu rāma anuga jagu jāna | lātahu~ māreṃ car̤hati sira nīca ko dhūri samāna || 229 ||
उठि कर जोरि रजायसु मागा। मनहुँ बीर रस सोवत जागा
uṭhi kara jori rajāyasu māgā| manahu~ bīra rasa sovata jāgā
बाँधि जटा सिर कसि कटि भाथा। साजि सरासनु सायकु हाथा
bā~dhi jaṭā sira kasi kaṭi bhāthā| sāji sarāsanu sāyaku hāthā
आजु राम सेवक जसु लेऊँ। भरतहि समर सिखावन देऊँ
āju rāma sevaka jasu leū~| bharatahi samara sikhāvana deū~
राम निरादर कर फलु पाई। सोवहुँ समर सेज दोउ भाई
rāma nirādara kara phalu pāī| sovahu~ samara seja dou bhāī
आइ बना भल सकल समाजू। प्रगट करउँ रिस पाछिल आजू
āi banā bhala sakala samājū| pragaṭa karau~ risa pāchila ājū
जिमि करि निकर दलइ मृगराजू। लेइ लपेटि लवा जिमि बाजू
jimi kari nikara dalai mṛgarājū| lei lapeṭi lavā jimi bājū
तैसेहिं भरतहि सेन समेता। सानुज निदरि निपातउँ खेता
taisehiṃ bharatahi sena sametā| sānuja nidari nipātau~ khetā
जौं सहाय कर संकरु आई। तौ मारउँ रन राम दोहाई
jauṃ sahāya kara saṃkaru āī| tau mārau~ rana rāma dohāī
अति सरोष माखे लखनु लखि सुनि सपथ प्रवान । सभय लोक सब लोकपति चाहत भभरि भगान ॥ २३० ॥
ati saroṣa mākhe lakhanu lakhi suni sapatha pravāna | sabhaya loka saba lokapati cāhata bhabhari bhagāna || 230 ||
जगु भय मगन गगन भइ बानी। लखन बाहुबलु बिपुल बखानी
jagu bhaya magana gagana bhai bānī| lakhana bāhubalu bipula bakhānī
तात प्रताप प्रभाउ तुम्हारा। को कहि सकइ को जाननिहारा
tāta pratāpa prabhāu tumhārā| ko kahi sakai ko jānanihārā
अनुचित उचित काजु किछु होऊ। समुझि करिअ भल कह सबु कोऊ
anucita ucita kāju kichu hoū| samujhi karia bhala kaha sabu koū
सहसा करि पाछैं पछिताहीं। कहहिं बेद बुध ते बुध नाहीं
sahasā kari pāchaiṃ pachitāhīṃ| kahahiṃ beda budha te budha nāhīṃ
सुनि सुर बचन लखन सकुचाने। राम सीयँ सादर सनमाने
suni sura bacana lakhana sakucāne| rāma sīya~ sādara sanamāne
कही तात तुम्ह नीति सुहाई। सब तें कठिन राजमदु भाई
kahī tāta tumha nīti suhāī| saba teṃ kaṭhina rājamadu bhāī
जो अचवँत नृप मातहिं तेई। नाहिन साधुसभा जेहिं सेई
jo acava~ta nṛpa mātahiṃ teī| nāhina sādhusabhā jehiṃ seī
सुनहु लखन भल भरत सरीसा। बिधि प्रपंच महँ सुना न दीसा
sunahu lakhana bhala bharata sarīsā| bidhi prapaṃca maha~ sunā na dīsā
भरतहि होइ न राजमदु बिधि हरि हर पद पाइ । कबहुँ कि काँजी सीकरनि छीरसिंधु बिनसाइ ॥ २३१ ॥
bharatahi hoi na rājamadu bidhi hari hara pada pāi | kabahu~ ki kā~jī sīkarani chīrasiṃdhu binasāi || 231 ||
तिमिरु तरुन तरनिहि मकु गिलई। गगनु मगन मकु मेघहिं मिलई
timiru taruna taranihi maku gilaī| gaganu magana maku meghahiṃ milaī
गोपद जल बूड़हिं घटजोनी। सहज छमा बरु छाड़ै छोनी
gopada jala būr̤ahiṃ ghaṭajonī| sahaja chamā baru chār̤ai chonī
मसक फूँक मकु मेरु उड़ाई। होइ न नृपमदु भरतहि भाई
masaka phū~ka maku meru ur̤āī| hoi na nṛpamadu bharatahi bhāī
लखन तुम्हार सपथ पितु आना। सुचि सुबंधु नहिं भरत समाना
lakhana tumhāra sapatha pitu ānā| suci subaṃdhu nahiṃ bharata samānā
सगुन खीरु अवगुन जलु ताता। मिलइ रचइ परपंचु बिधाता
saguna khīru avaguna jalu tātā| milai racai parapaṃcu bidhātā
भरतु हंस रबिबंस तड़ागा। जनमि कीन्ह गुन दोष बिभागा
bharatu haṃsa rabibaṃsa tar̤āgā| janami kīnha guna doṣa bibhāgā
गहि गुन पय तजि अवगुन बारी। निज जस जगत कीन्हि उजिआरी
gahi guna paya taji avaguna bārī| nija jasa jagata kīnhi ujiārī
कहत भरत गुन सीलु सुभाऊ। पेम पयोधि मगन रघुराऊ
kahata bharata guna sīlu subhāū| pema payodhi magana raghurāū
सुनि रघुबर बानी बिबुध देखि भरत पर हेतु । सकल सराहत राम सो प्रभु को कृपानिकेतु ॥ २३२ ॥
suni raghubara bānī bibudha dekhi bharata para hetu | sakala sarāhata rāma so prabhu ko kṛpāniketu || 232 ||
जौं न होत जग जनम भरत को। सकल धरम धुर धरनि धरत को
jauṃ na hota jaga janama bharata ko| sakala dharama dhura dharani dharata ko
कबि कुल अगम भरत गुन गाथा। को जानइ तुम्ह बिनु रघुनाथा
kabi kula agama bharata guna gāthā| ko jānai tumha binu raghunāthā
लखन राम सियँ सुनि सुर बानी। अति सुखु लहेउ न जाइ बखानी
lakhana rāma siya~ suni sura bānī| ati sukhu laheu na jāi bakhānī
इहाँ भरतु सब सहित सहाए। मंदाकिनीं पुनीत नहाए
ihā~ bharatu saba sahita sahāe| maṃdākinīṃ punīta nahāe
सरित समीप राखि सब लोगा। मागि मातु गुर सचिव नियोगा
sarita samīpa rākhi saba logā| māgi mātu gura saciva niyogā
चले भरतु जहँ सिय रघुराई। साथ निषादनाथु लघु भाई
cale bharatu jaha~ siya raghurāī| sātha niṣādanāthu laghu bhāī
समुझि मातु करतब सकुचाहीं। करत कुतरक कोटि मन माहीं
samujhi mātu karataba sakucāhīṃ| karata kutaraka koṭi mana māhīṃ
रामु लखनु सिय सुनि मम नाऊँ। उठि जनि अनत जाहिं तजि ठाऊँ
rāmu lakhanu siya suni mama nāū~| uṭhi jani anata jāhiṃ taji ṭhāū~
मातु मते महुँ मानि मोहि जो कछु करहिं सो थोर । अघ अवगुन छमि आदरहिं समुझि आपनी ओर ॥ २३३ ॥
mātu mate mahu~ māni mohi jo kachu karahiṃ so thora | agha avaguna chami ādarahiṃ samujhi āpanī ora || 233 ||
जौं परिहरहिं मलिन मनु जानी। जौ सनमानहिं सेवकु मानी
jauṃ pariharahiṃ malina manu jānī| jau sanamānahiṃ sevaku mānī
मोरें सरन रामहि की पनही। राम सुस्वामि दोसु सब जनही
moreṃ sarana rāmahi kī panahī| rāma susvāmi dosu saba janahī
जग जस भाजन चातक मीना। नेम पेम निज निपुन नबीना
jaga jasa bhājana cātaka mīnā| nema pema nija nipuna nabīnā
अस मन गुनत चले मग जाता। सकुच सनेहँ सिथिल सब गाता
asa mana gunata cale maga jātā| sakuca saneha~ sithila saba gātā
फेरत मनहुँ मातु कृत खोरी। चलत भगति बल धीरज धोरी
pherata manahu~ mātu kṛta khorī| calata bhagati bala dhīraja dhorī
जब समुझत रघुनाथ सुभाऊ। तब पथ परत उताइल पाऊ
jaba samujhata raghunātha subhāū| taba patha parata utāila pāū
भरत दसा तेहि अवसर कैसी। जल प्रबाहँ जल अलि गति जैसी
bharata dasā tehi avasara kaisī| jala prabāha~ jala ali gati jaisī
देखि भरत कर सोचु सनेहू। भा निषाद तेहि समयँ बिदेहू
dekhi bharata kara socu sanehū| bhā niṣāda tehi samaya~ bidehū
लगे होन मंगल सगुन सुनि गुनि कहत निषादु । मिटिहि सोचु होइहि हरषु पुनि परिनाम बिषादु ॥ २३४ ॥
lage hona maṃgala saguna suni guni kahata niṣādu | miṭihi socu hoihi haraṣu puni parināma biṣādu || 234 ||
सेवक बचन सत्य सब जाने। आश्रम निकट जाइ निअराने
sevaka bacana satya saba jāne| āśrama nikaṭa jāi niarāne
भरत दीख बन सैल समाजू। मुदित छुधित जनु पाइ सुनाजू
bharata dīkha bana saila samājū| mudita chudhita janu pāi sunājū
ईति भीति जनु प्रजा दुखारी। त्रिबिध ताप पीड़ित ग्रह मारी
īti bhīti janu prajā dukhārī| tribidha tāpa pīr̤ita graha mārī
जाइ सुराज सुदेस सुखारी। होहिं भरत गति तेहि अनुहारी
jāi surāja sudesa sukhārī| hohiṃ bharata gati tehi anuhārī
राम बास बन संपति भ्राजा। सुखी प्रजा जनु पाइ सुराजा
rāma bāsa bana saṃpati bhrājā| sukhī prajā janu pāi surājā
सचिव बिरागु बिबेकु नरेसू। बिपिन सुहावन पावन देसू
saciva birāgu bibeku naresū| bipina suhāvana pāvana desū
भट जम नियम सैल रजधानी। सांति सुमति सुचि सुंदर रानी
bhaṭa jama niyama saila rajadhānī| sāṃti sumati suci suṃdara rānī
सकल अंग संपन्न सुराऊ। राम चरन आश्रित चित चाऊ
sakala aṃga saṃpanna surāū| rāma carana āśrita cita cāū
जीति मोह महिपालु दल सहित बिबेक भुआलु । करत अकंटक राजु पुरँ सुख संपदा सुकालु ॥ २३५ ॥
jīti moha mahipālu dala sahita bibeka bhuālu | karata akaṃṭaka rāju pura~ sukha saṃpadā sukālu || 235 ||
बन प्रदेस मुनि बास घनेरे। जनु पुर नगर गाउँ गन खेरे
bana pradesa muni bāsa ghanere| janu pura nagara gāu~ gana khere
बिपुल बिचित्र बिहग मृग नाना। प्रजा समाजु न जाइ बखाना
bipula bicitra bihaga mṛga nānā| prajā samāju na jāi bakhānā
खगहा करि हरि बाघ बराहा। देखि महिष बृष साजु सराहा
khagahā kari hari bāgha barāhā| dekhi mahiṣa bṛṣa sāju sarāhā
बयरु बिहाइ चरहिं एक संगा। जहँ तहँ मनहुँ सेन चतुरंगा
bayaru bihāi carahiṃ eka saṃgā| jaha~ taha~ manahu~ sena caturaṃgā
झरना झरहिं मत्त गज गाजहिं। मनहुँ निसान बिबिधि बिधि बाजहिं
jharanā jharahiṃ matta gaja gājahiṃ| manahu~ nisāna bibidhi bidhi bājahiṃ
चक चकोर चातक सुक पिक गन। कूजत मंजु मराल मुदित मन
caka cakora cātaka suka pika gana| kūjata maṃju marāla mudita mana
अलिगन गावत नाचत मोरा। जनु सुराज मंगल चहु ओरा
aligana gāvata nācata morā| janu surāja maṃgala cahu orā
बेलि बिटप तृन सफल सफूला। सब समाजु मुद मंगल मूला
beli biṭapa tṛna saphala saphūlā| saba samāju muda maṃgala mūlā
राम सैल सोभा निरखि भरत हृदयँ अति पेमु । तापस तप फलु पाइ जिमि सुखी सिरानें नेमु ॥ २३६ ॥
rāma saila sobhā nirakhi bharata hṛdaya~ ati pemu | tāpasa tapa phalu pāi jimi sukhī sirāneṃ nemu || 236 ||
तब केवट ऊँचें चढ़ि धाई। कहेउ भरत सन भुजा उठाई
taba kevaṭa ū~ceṃ car̤hi dhāī| kaheu bharata sana bhujā uṭhāī
नाथ देखिअहिं बिटप बिसाला। पाकरि जंबु रसाल तमाला
nātha dekhiahiṃ biṭapa bisālā| pākari jaṃbu rasāla tamālā
जिन्ह तरुबरन्ह मध्य बटु सोहा। मंजु बिसाल देखि मनु मोहा
jinha tarubaranha madhya baṭu sohā| maṃju bisāla dekhi manu mohā
नील सघन पल्ल्व फल लाला। अबिरल छाहँ सुखद सब काला
nīla saghana pallva phala lālā| abirala chāha~ sukhada saba kālā
मानहुँ तिमिर अरुनमय रासी। बिरची बिधि सँकेलि सुषमा सी
mānahu~ timira arunamaya rāsī| biracī bidhi sa~keli suṣamā sī
ए तरु सरित समीप गोसाँई। रघुबर परनकुटी जहँ छाई
e taru sarita samīpa gosā~ī| raghubara paranakuṭī jaha~ chāī
तुलसी तरुबर बिबिध सुहाए। कहुँ कहुँ सियँ कहुँ लखन लगाए
tulasī tarubara bibidha suhāe| kahu~ kahu~ siya~ kahu~ lakhana lagāe
बट छायाँ बेदिका बनाई। सियँ निज पानि सरोज सुहाई
baṭa chāyā~ bedikā banāī| siya~ nija pāni saroja suhāī
जहाँ बैठि मुनिगन सहित नित सिय रामु सुजान । सुनहिं कथा इतिहास सब आगम निगम पुरान ॥ २३७ ॥
jahā~ baiṭhi munigana sahita nita siya rāmu sujāna | sunahiṃ kathā itihāsa saba āgama nigama purāna || 237 ||
सखा बचन सुनि बिटप निहारी। उमगे भरत बिलोचन बारी
sakhā bacana suni biṭapa nihārī| umage bharata bilocana bārī
करत प्रनाम चले दोउ भाई। कहत प्रीति सारद सकुचाई
karata pranāma cale dou bhāī| kahata prīti sārada sakucāī
हरषहिं निरखि राम पद अंका। मानहुँ पारसु पायउ रंका
haraṣahiṃ nirakhi rāma pada aṃkā| mānahu~ pārasu pāyau raṃkā
रज सिर धरि हियँ नयनन्हि लावहिं। रघुबर मिलन सरिस सुख पावहिं
raja sira dhari hiya~ nayananhi lāvahiṃ| raghubara milana sarisa sukha pāvahiṃ
देखि भरत गति अकथ अतीवा। प्रेम मगन मृग खग जड़ जीवा
dekhi bharata gati akatha atīvā| prema magana mṛga khaga jar̤a jīvā
सखहि सनेह बिबस मग भूला। कहि सुपंथ सुर बरषहिं फूला
sakhahi saneha bibasa maga bhūlā| kahi supaṃtha sura baraṣahiṃ phūlā
निरखि सिद्ध साधक अनुरागे। सहज सनेहु सराहन लागे
nirakhi siddha sādhaka anurāge| sahaja sanehu sarāhana lāge
होत न भूतल भाउ भरत को। अचर सचर चर अचर करत को
hota na bhūtala bhāu bharata ko| acara sacara cara acara karata ko
पेम अमिअ मंदरु बिरहु भरतु पयोधि गँभीर । मथि प्रगटेउ सुर साधु हित कृपासिंधु रघुबीर ॥ २३८ ॥
pema amia maṃdaru birahu bharatu payodhi ga~bhīra | mathi pragaṭeu sura sādhu hita kṛpāsiṃdhu raghubīra || 238 ||
सखा समेत मनोहर जोटा। लखेउ न लखन सघन बन ओटा
sakhā sameta manohara joṭā| lakheu na lakhana saghana bana oṭā
भरत दीख प्रभु आश्रमु पावन। सकल सुमंगल सदनु सुहावन
bharata dīkha prabhu āśramu pāvana| sakala sumaṃgala sadanu suhāvana
करत प्रबेस मिटे दुख दावा। जनु जोगीं परमारथु पावा
karata prabesa miṭe dukha dāvā| janu jogīṃ paramārathu pāvā
देखे भरत लखन प्रभु आगे। पूँछे बचन कहत अनुरागे
dekhe bharata lakhana prabhu āge| pū~che bacana kahata anurāge
सीस जटा कटि मुनि पट बाँधें। तून कसें कर सरु धनु काँधें
sīsa jaṭā kaṭi muni paṭa bā~dheṃ| tūna kaseṃ kara saru dhanu kā~dheṃ
बेदी पर मुनि साधु समाजू। सीय सहित राजत रघुराजू
bedī para muni sādhu samājū| sīya sahita rājata raghurājū
बलकल बसन जटिल तनु स्यामा। जनु मुनि बेष कीन्ह रति कामा
balakala basana jaṭila tanu syāmā| janu muni beṣa kīnha rati kāmā
कर कमलनि धनु सायकु फेरत। जिय की जरनि हरत हँसि हेरत
kara kamalani dhanu sāyaku pherata| jiya kī jarani harata ha~si herata
लसत मंजु मुनि मंडली मध्य सीय रघुचंदु । ग्यान सभाँ जनु तनु धरे भगति सच्चिदानंदु ॥ २३९ ॥
lasata maṃju muni maṃḍalī madhya sīya raghucaṃdu | gyāna sabhā~ janu tanu dhare bhagati saccidānaṃdu || 239 ||
सानुज सखा समेत मगन मन। बिसरे हरष सोक सुख दुख गन
sānuja sakhā sameta magana mana| bisare haraṣa soka sukha dukha gana
पाहि नाथ कहि पाहि गोसाई। भूतल परे लकुट की नाई
pāhi nātha kahi pāhi gosāī| bhūtala pare lakuṭa kī nāī
बचन सपेम लखन पहिचाने। करत प्रनामु भरत जियँ जाने
bacana sapema lakhana pahicāne| karata pranāmu bharata jiya~ jāne
बंधु सनेह सरस एहि ओरा। उत साहिब सेवा बस जोरा
baṃdhu saneha sarasa ehi orā| uta sāhiba sevā basa jorā
मिलि न जाइ नहिं गुदरत बनई। सुकबि लखन मन की गति भनई
mili na jāi nahiṃ gudarata banaī| sukabi lakhana mana kī gati bhanaī
रहे राखि सेवा पर भारू। चढ़ी चंग जनु खैंच खेलारू
rahe rākhi sevā para bhārū| car̤hī caṃga janu khaiṃca khelārū
कहत सप्रेम नाइ महि माथा। भरत प्रनाम करत रघुनाथा
kahata saprema nāi mahi māthā| bharata pranāma karata raghunāthā
उठे रामु सुनि पेम अधीरा। कहुँ पट कहुँ निषंग धनु तीरा
uṭhe rāmu suni pema adhīrā| kahu~ paṭa kahu~ niṣaṃga dhanu tīrā
बरबस लिए उठाइ उर लाए कृपानिधान । भरत राम की मिलनि लखि बिसरे सबहि अपान ॥ २४० ॥
barabasa lie uṭhāi ura lāe kṛpānidhāna | bharata rāma kī milani lakhi bisare sabahi apāna || 240 ||
मिलनि प्रीति किमि जाइ बखानी। कबिकुल अगम करम मन बानी
milani prīti kimi jāi bakhānī| kabikula agama karama mana bānī
परम पेम पूरन दोउ भाई। मन बुधि चित अहमिति बिसराई
parama pema pūrana dou bhāī| mana budhi cita ahamiti bisarāī
कहहु सुपेम प्रगट को करई। केहि छाया कबि मति अनुसरई
kahahu supema pragaṭa ko karaī| kehi chāyā kabi mati anusaraī
कबिहि अरथ आखर बलु साँचा। अनुहरि ताल गतिहि नटु नाचा
kabihi aratha ākhara balu sā~cā| anuhari tāla gatihi naṭu nācā
अगम सनेह भरत रघुबर को। जहँ न जाइ मनु बिधि हरि हर को
agama saneha bharata raghubara ko| jaha~ na jāi manu bidhi hari hara ko
सो मैं कुमति कहौं केहि भाँती। बाज सुराग कि गाँडर ताँती
so maiṃ kumati kahauṃ kehi bhā~tī| bāja surāga ki gā~ḍara tā~tī
मिलनि बिलोकि भरत रघुबर की। सुरगन सभय धकधकी धरकी
milani biloki bharata raghubara kī| suragana sabhaya dhakadhakī dharakī
समुझाए सुरगुरु जड़ जागे। बरषि प्रसून प्रसंसन लागे
samujhāe suraguru jar̤a jāge| baraṣi prasūna prasaṃsana lāge
मिलि सपेम रिपुसूदनहि केवटु भेंटेउ राम । भूरि भायँ भेंटे भरत लछिमन करत प्रनाम ॥ २४१ ॥
mili sapema ripusūdanahi kevaṭu bheṃṭeu rāma | bhūri bhāya~ bheṃṭe bharata lachimana karata pranāma || 241 ||
भेंटेउ लखन ललकि लघु भाई। बहुरि निषादु लीन्ह उर लाई
bheṃṭeu lakhana lalaki laghu bhāī| bahuri niṣādu līnha ura lāī
पुनि मुनिगन दुहुँ भाइन्ह बंदे। अभिमत आसिष पाइ अनंदे
puni munigana duhu~ bhāinha baṃde| abhimata āsiṣa pāi anaṃde
सानुज भरत उमगि अनुरागा। धरि सिर सिय पद पदुम परागा
sānuja bharata umagi anurāgā| dhari sira siya pada paduma parāgā
पुनि पुनि करत प्रनाम उठाए। सिर कर कमल परसि बैठाए
puni puni karata pranāma uṭhāe| sira kara kamala parasi baiṭhāe
सीयँ असीस दीन्हि मन माहीं। मगन सनेहँ देह सुधि नाहीं
sīya~ asīsa dīnhi mana māhīṃ| magana saneha~ deha sudhi nāhīṃ
सब बिधि सानुकूल लखि सीता। भे निसोच उर अपडर बीता
saba bidhi sānukūla lakhi sītā| bhe nisoca ura apaḍara bītā
कोउ किछु कहइ न कोउ किछु पूँछा। प्रेम भरा मन निज गति छूँछा
kou kichu kahai na kou kichu pū~chā| prema bharā mana nija gati chū~chā
तेहि अवसर केवटु धीरजु धरि। जोरि पानि बिनवत प्रनामु करि
tehi avasara kevaṭu dhīraju dhari| jori pāni binavata pranāmu kari
नाथ साथ मुनिनाथ के मातु सकल पुर लोग । सेवक सेनप सचिव सब आए बिकल बियोग ॥ २४२ ॥
nātha sātha muninātha ke mātu sakala pura loga | sevaka senapa saciva saba āe bikala biyoga || 242 ||
सीलसिंधु सुनि गुर आगवनू। सिय समीप राखे रिपुदवनू
sīlasiṃdhu suni gura āgavanū| siya samīpa rākhe ripudavanū
चले सबेग रामु तेहि काला। धीर धरम धुर दीनदयाला
cale sabega rāmu tehi kālā| dhīra dharama dhura dīnadayālā
गुरहि देखि सानुज अनुरागे। दंड प्रनाम करन प्रभु लागे
gurahi dekhi sānuja anurāge| daṃḍa pranāma karana prabhu lāge
मुनिबर धाइ लिए उर लाई। प्रेम उमगि भेंटे दोउ भाई
munibara dhāi lie ura lāī| prema umagi bheṃṭe dou bhāī
प्रेम पुलकि केवट कहि नामू। कीन्ह दूरि तें दंड प्रनामू
prema pulaki kevaṭa kahi nāmū| kīnha dūri teṃ daṃḍa pranāmū
रामसखा रिषि बरबस भेंटा। जनु महि लुठत सनेह समेटा
rāmasakhā riṣi barabasa bheṃṭā| janu mahi luṭhata saneha sameṭā
रघुपति भगति सुमंगल मूला। नभ सराहि सुर बरिसहिं फूला
raghupati bhagati sumaṃgala mūlā| nabha sarāhi sura barisahiṃ phūlā
एहि सम निपट नीच कोउ नाहीं। बड़ बसिष्ठ सम को जग माहीं
ehi sama nipaṭa nīca kou nāhīṃ| bar̤a basiṣṭha sama ko jaga māhīṃ
जेहि लखि लखनहु तें अधिक मिले मुदित मुनिराउ । सो सीतापति भजन को प्रगट प्रताप प्रभाउ ॥ २४३ ॥
jehi lakhi lakhanahu teṃ adhika mile mudita munirāu | so sītāpati bhajana ko pragaṭa pratāpa prabhāu || 243 ||
आरत लोग राम सबु जाना। करुनाकर सुजान भगवाना
ārata loga rāma sabu jānā| karunākara sujāna bhagavānā
जो जेहि भायँ रहा अभिलाषी। तेहि तेहि कै तसि तसि रुख राखी
jo jehi bhāya~ rahā abhilāṣī| tehi tehi kai tasi tasi rukha rākhī
सानुज मिलि पल महु सब काहू। कीन्ह दूरि दुखु दारुन दाहू
sānuja mili pala mahu saba kāhū| kīnha dūri dukhu dāruna dāhū
यह बड़ि बातँ राम कै नाहीं। जिमि घट कोटि एक रबि छाहीं
yaha bar̤i bāta~ rāma kai nāhīṃ| jimi ghaṭa koṭi eka rabi chāhīṃ
मिलि केवटिहि उमगि अनुरागा। पुरजन सकल सराहहिं भागा
mili kevaṭihi umagi anurāgā| purajana sakala sarāhahiṃ bhāgā
देखीं राम दुखित महतारीं। जनु सुबेलि अवलीं हिम मारीं
dekhīṃ rāma dukhita mahatārīṃ| janu subeli avalīṃ hima mārīṃ
प्रथम राम भेंटी कैकेई। सरल सुभायँ भगति मति भेई
prathama rāma bheṃṭī kaikeī| sarala subhāya~ bhagati mati bheī
पग परि कीन्ह प्रबोधु बहोरी। काल करम बिधि सिर धरि खोरी
paga pari kīnha prabodhu bahorī| kāla karama bidhi sira dhari khorī
भेटीं रघुबर मातु सब करि प्रबोधु परितोषु । अंब ईस आधीन जगु काहु न देइअ दोषु ॥ २४४ ॥
bheṭīṃ raghubara mātu saba kari prabodhu paritoṣu | aṃba īsa ādhīna jagu kāhu na deia doṣu || 244 ||
गुरतिय पद बंदे दुहु भाई। सहित बिप्रतिय जे सँग आई
guratiya pada baṃde duhu bhāī| sahita bipratiya je sa~ga āī
गंग गौरि सम सब सनमानीं।।देहिं असीस मुदित मृदु बानी
gaṃga gauri sama saba sanamānīṃ||dehiṃ asīsa mudita mṛdu bānī
गहि पद लगे सुमित्रा अंका। जनु भेटीं संपति अति रंका
gahi pada lage sumitrā aṃkā| janu bheṭīṃ saṃpati ati raṃkā
पुनि जननि चरननि दोउ भ्राता। परे पेम ब्याकुल सब गाता
puni janani caranani dou bhrātā| pare pema byākula saba gātā
अति अनुराग अंब उर लाए। नयन सनेह सलिल अन्हवाए
ati anurāga aṃba ura lāe| nayana saneha salila anhavāe
तेहि अवसर कर हरष बिषादू। किमि कबि कहै मूक जिमि स्वादू
tehi avasara kara haraṣa biṣādū| kimi kabi kahai mūka jimi svādū
मिलि जननहि सानुज रघुराऊ। गुर सन कहेउ कि धारिअ पाऊ
mili jananahi sānuja raghurāū| gura sana kaheu ki dhāria pāū
पुरजन पाइ मुनीस नियोगू। जल थल तकि तकि उतरेउ लोगू
purajana pāi munīsa niyogū| jala thala taki taki utareu logū
महिसुर मंत्री मातु गुर गने लोग लिए साथ । पावन आश्रम गवनु किय भरत लखन रघुनाथ ॥ २४५ ॥
mahisura maṃtrī mātu gura gane loga lie sātha | pāvana āśrama gavanu kiya bharata lakhana raghunātha || 245 ||
सीय आइ मुनिबर पग लागी। उचित असीस लही मन मागी
sīya āi munibara paga lāgī| ucita asīsa lahī mana māgī
गुरपतिनिहि मुनितियन्ह समेता। मिली पेमु कहि जाइ न जेता
gurapatinihi munitiyanha sametā| milī pemu kahi jāi na jetā
बंदि बंदि पग सिय सबही के। आसिरबचन लहे प्रिय जी के
baṃdi baṃdi paga siya sabahī ke| āsirabacana lahe priya jī ke
सासु सकल जब सीयँ निहारीं। मूदे नयन सहमि सुकुमारीं
sāsu sakala jaba sīya~ nihārīṃ| mūde nayana sahami sukumārīṃ
परीं बधिक बस मनहुँ मरालीं। काह कीन्ह करतार कुचालीं
parīṃ badhika basa manahu~ marālīṃ| kāha kīnha karatāra kucālīṃ
तिन्ह सिय निरखि निपट दुखु पावा। सो सबु सहिअ जो दैउ सहावा
tinha siya nirakhi nipaṭa dukhu pāvā| so sabu sahia jo daiu sahāvā
जनकसुता तब उर धरि धीरा। नील नलिन लोयन भरि नीरा
janakasutā taba ura dhari dhīrā| nīla nalina loyana bhari nīrā
मिली सकल सासुन्ह सिय जाई। तेहि अवसर करुना महि छाई
milī sakala sāsunha siya jāī| tehi avasara karunā mahi chāī
लागि लागि पग सबनि सिय भेंटति अति अनुराग । हृदयँ असीसहिं पेम बस रहिअहु भरी सोहाग ॥ २४६ ॥
lāgi lāgi paga sabani siya bheṃṭati ati anurāga | hṛdaya~ asīsahiṃ pema basa rahiahu bharī sohāga || 246 ||
बिकल सनेहँ सीय सब रानीं। बैठन सबहि कहेउ गुर ग्यानीं
bikala saneha~ sīya saba rānīṃ| baiṭhana sabahi kaheu gura gyānīṃ
कहि जग गति मायिक मुनिनाथा। कहे कछुक परमारथ गाथा
kahi jaga gati māyika munināthā| kahe kachuka paramāratha gāthā
नृप कर सुरपुर गवनु सुनावा। सुनि रघुनाथ दुसह दुखु पावा
nṛpa kara surapura gavanu sunāvā| suni raghunātha dusaha dukhu pāvā
मरन हेतु निज नेहु बिचारी। भे अति बिकल धीर धुर धारी
marana hetu nija nehu bicārī| bhe ati bikala dhīra dhura dhārī
कुलिस कठोर सुनत कटु बानी। बिलपत लखन सीय सब रानी
kulisa kaṭhora sunata kaṭu bānī| bilapata lakhana sīya saba rānī
सोक बिकल अति सकल समाजू। मानहुँ राजु अकाजेउ आजू
soka bikala ati sakala samājū| mānahu~ rāju akājeu ājū
मुनिबर बहुरि राम समुझाए। सहित समाज सुसरित नहाए
munibara bahuri rāma samujhāe| sahita samāja susarita nahāe
ब्रतु निरंबु तेहि दिन प्रभु कीन्हा। मुनिहु कहें जलु काहुँ न लीन्हा
bratu niraṃbu tehi dina prabhu kīnhā| munihu kaheṃ jalu kāhu~ na līnhā
भोरु भएँ रघुनंदनहि जो मुनि आयसु दीन्ह । श्रद्धा भगति समेत प्रभु सो सबु सादरु कीन्ह ॥ २४७ ॥
bhoru bhae~ raghunaṃdanahi jo muni āyasu dīnha | śraddhā bhagati sameta prabhu so sabu sādaru kīnha || 247 ||
करि पितु क्रिया बेद जसि बरनी। भे पुनीत पातक तम तरनी
kari pitu kriyā beda jasi baranī| bhe punīta pātaka tama taranī
जासु नाम पावक अघ तूला। सुमिरत सकल सुमंगल मूला
jāsu nāma pāvaka agha tūlā| sumirata sakala sumaṃgala mūlā
सुद्ध सो भयउ साधु संमत अस। तीरथ आवाहन सुरसरि जस
suddha so bhayau sādhu saṃmata asa| tīratha āvāhana surasari jasa
सुद्ध भएँ दुइ बासर बीते। बोले गुर सन राम पिरीते
suddha bhae~ dui bāsara bīte| bole gura sana rāma pirīte
नाथ लोग सब निपट दुखारी। कंद मूल फल अंबु अहारी
nātha loga saba nipaṭa dukhārī| kaṃda mūla phala aṃbu ahārī
सानुज भरतु सचिव सब माता। देखि मोहि पल जिमि जुग जाता
sānuja bharatu saciva saba mātā| dekhi mohi pala jimi juga jātā
सब समेत पुर धारिअ पाऊ। आपु इहाँ अमरावति राऊ
saba sameta pura dhāria pāū| āpu ihā~ amarāvati rāū
बहुत कहेउँ सब कियउँ ढिठाई। उचित होइ तस करिअ गोसाँई
bahuta kaheu~ saba kiyau~ ḍhiṭhāī| ucita hoi tasa karia gosā~ī
धर्म सेतु करुनायतन कस न कहहु अस राम । लोग दुखित दिन दुइ दरस देखि लहहुँ बिश्राम ॥ २४८ ॥
dharma setu karunāyatana kasa na kahahu asa rāma | loga dukhita dina dui darasa dekhi lahahu~ biśrāma || 248 ||
राम बचन सुनि सभय समाजू। जनु जलनिधि महुँ बिकल जहाजू
rāma bacana suni sabhaya samājū| janu jalanidhi mahu~ bikala jahājū
सुनि गुर गिरा सुमंगल मूला। भयउ मनहुँ मारुत अनुकुला
suni gura girā sumaṃgala mūlā| bhayau manahu~ māruta anukulā
पावन पयँ तिहुँ काल नहाहीं। जो बिलोकि अंघ ओघ नसाहीं
pāvana paya~ tihu~ kāla nahāhīṃ| jo biloki aṃgha ogha nasāhīṃ
मंगलमूरति लोचन भरि भरि। निरखहिं हरषि दंडवत करि करि
maṃgalamūrati locana bhari bhari| nirakhahiṃ haraṣi daṃḍavata kari kari
राम सैल बन देखन जाहीं। जहँ सुख सकल सकल दुख नाहीं
rāma saila bana dekhana jāhīṃ| jaha~ sukha sakala sakala dukha nāhīṃ
झरना झरिहिं सुधासम बारी। त्रिबिध तापहर त्रिबिध बयारी
jharanā jharihiṃ sudhāsama bārī| tribidha tāpahara tribidha bayārī
बिटप बेलि तृन अगनित जाती। फल प्रसून पल्लव बहु भाँती
biṭapa beli tṛna aganita jātī| phala prasūna pallava bahu bhā~tī
सुंदर सिला सुखद तरु छाहीं। जाइ बरनि बन छबि केहि पाहीं
suṃdara silā sukhada taru chāhīṃ| jāi barani bana chabi kehi pāhīṃ
सरनि सरोरुह जल बिहग कूजत गुंजत भृंग । बैर बिगत बिहरत बिपिन मृग बिहंग बहुरंग ॥ २४९ ॥
sarani saroruha jala bihaga kūjata guṃjata bhṛṃga | baira bigata biharata bipina mṛga bihaṃga bahuraṃga || 249 ||
कोल किरात भिल्ल बनबासी। मधु सुचि सुंदर स्वादु सुधा सी
kola kirāta bhilla banabāsī| madhu suci suṃdara svādu sudhā sī
भरि भरि परन पुटीं रचि रुरी। कंद मूल फल अंकुर जूरी
bhari bhari parana puṭīṃ raci rurī| kaṃda mūla phala aṃkura jūrī
सबहि देहिं करि बिनय प्रनामा। कहि कहि स्वाद भेद गुन नामा
sabahi dehiṃ kari binaya pranāmā| kahi kahi svāda bheda guna nāmā
देहिं लोग बहु मोल न लेहीं। फेरत राम दोहाई देहीं
dehiṃ loga bahu mola na lehīṃ| pherata rāma dohāī dehīṃ
कहहिं सनेह मगन मृदु बानी। मानत साधु पेम पहिचानी
kahahiṃ saneha magana mṛdu bānī| mānata sādhu pema pahicānī
तुम्ह सुकृती हम नीच निषादा। पावा दरसनु राम प्रसादा
tumha sukṛtī hama nīca niṣādā| pāvā darasanu rāma prasādā
हमहि अगम अति दरसु तुम्हारा। जस मरु धरनि देवधुनि धारा
hamahi agama ati darasu tumhārā| jasa maru dharani devadhuni dhārā
राम कृपाल निषाद नेवाजा। परिजन प्रजउ चहिअ जस राजा
rāma kṛpāla niṣāda nevājā| parijana prajau cahia jasa rājā
यह जिंयँ जानि सँकोचु तजि करिअ छोहु लखि नेहु । हमहि कृतारथ करन लगि फल तृन अंकुर लेहु ॥ २५० ॥
yaha jiṃya~ jāni sa~kocu taji karia chohu lakhi nehu | hamahi kṛtāratha karana lagi phala tṛna aṃkura lehu || 250 ||
तुम्ह प्रिय पाहुने बन पगु धारे। सेवा जोगु न भाग हमारे
tumha priya pāhune bana pagu dhāre| sevā jogu na bhāga hamāre
देब काह हम तुम्हहि गोसाँई। ईधनु पात किरात मिताई
deba kāha hama tumhahi gosā~ī| īdhanu pāta kirāta mitāī
यह हमारि अति बड़ि सेवकाई। लेहि न बासन बसन चोराई
yaha hamāri ati bar̤i sevakāī| lehi na bāsana basana corāī
हम जड़ जीव जीव गन घाती। कुटिल कुचाली कुमति कुजाती
hama jar̤a jīva jīva gana ghātī| kuṭila kucālī kumati kujātī
पाप करत निसि बासर जाहीं। नहिं पट कटि नहि पेट अघाहीं
pāpa karata nisi bāsara jāhīṃ| nahiṃ paṭa kaṭi nahi peṭa aghāhīṃ
सपोनेहुँ धरम बुद्धि कस काऊ। यह रघुनंदन दरस प्रभाऊ
saponehu~ dharama buddhi kasa kāū| yaha raghunaṃdana darasa prabhāū
जब तें प्रभु पद पदुम निहारे। मिटे दुसह दुख दोष हमारे
jaba teṃ prabhu pada paduma nihāre| miṭe dusaha dukha doṣa hamāre
बचन सुनत पुरजन अनुरागे। तिन्ह के भाग सराहन लागे
bacana sunata purajana anurāge| tinha ke bhāga sarāhana lāge
लागे सराहन भाग सब अनुराग बचन सुनावहीं । बोलनि मिलनि सिय राम चरन सनेहु लखि सुखु पावहीं । नर नारि निदरहिं नेहु निज सुनि कोल भिल्लनि की गिरा । तुलसी कृपा रघुबंसमनि की लोह लै लौका तिरा
lāge sarāhana bhāga saba anurāga bacana sunāvahīṃ | bolani milani siya rāma carana sanehu lakhi sukhu pāvahīṃ | nara nāri nidarahiṃ nehu nija suni kola bhillani kī girā | tulasī kṛpā raghubaṃsamani kī loha lai laukā tirā
बिहरहिं बन चहु ओर प्रतिदिन प्रमुदित लोग सब । जल ज्यों दादुर मोर भए पीन पावस प्रथम ॥ २५१ ॥
biharahiṃ bana cahu ora pratidina pramudita loga saba | jala jyoṃ dādura mora bhae pīna pāvasa prathama || 251 ||
पुर जन नारि मगन अति प्रीती। बासर जाहिं पलक सम बीती
pura jana nāri magana ati prītī| bāsara jāhiṃ palaka sama bītī
सीय सासु प्रति बेष बनाई। सादर करइ सरिस सेवकाई
sīya sāsu prati beṣa banāī| sādara karai sarisa sevakāī
लखा न मरमु राम बिनु काहूँ। माया सब सिय माया माहूँ
lakhā na maramu rāma binu kāhū~| māyā saba siya māyā māhū~
सीयँ सासु सेवा बस कीन्हीं। तिन्ह लहि सुख सिख आसिष दीन्हीं
sīya~ sāsu sevā basa kīnhīṃ| tinha lahi sukha sikha āsiṣa dīnhīṃ
लखि सिय सहित सरल दोउ भाई। कुटिल रानि पछितानि अघाई
lakhi siya sahita sarala dou bhāī| kuṭila rāni pachitāni aghāī
अवनि जमहि जाचति कैकेई। महि न बीचु बिधि मीचु न देई
avani jamahi jācati kaikeī| mahi na bīcu bidhi mīcu na deī
लोकहुँ बेद बिदित कबि कहहीं। राम बिमुख थलु नरक न लहहीं
lokahu~ beda bidita kabi kahahīṃ| rāma bimukha thalu naraka na lahahīṃ
यहु संसउ सब के मन माहीं। राम गवनु बिधि अवध कि नाहीं
yahu saṃsau saba ke mana māhīṃ| rāma gavanu bidhi avadha ki nāhīṃ
निसि न नीद नहिं भूख दिन भरतु बिकल सुचि सोच । नीच कीच बिच मगन जस मीनहि सलिल सँकोच ॥ २५२ ॥
nisi na nīda nahiṃ bhūkha dina bharatu bikala suci soca | nīca kīca bica magana jasa mīnahi salila sa~koca || 252 ||
कीन्ही मातु मिस काल कुचाली। ईति भीति जस पाकत साली
kīnhī mātu misa kāla kucālī| īti bhīti jasa pākata sālī
केहि बिधि होइ राम अभिषेकू। मोहि अवकलत उपाउ न एकू
kehi bidhi hoi rāma abhiṣekū| mohi avakalata upāu na ekū
अवसि फिरहिं गुर आयसु मानी। मुनि पुनि कहब राम रुचि जानी
avasi phirahiṃ gura āyasu mānī| muni puni kahaba rāma ruci jānī
मातु कहेहुँ बहुरहिं रघुराऊ। राम जननि हठ करबि कि काऊ
mātu kahehu~ bahurahiṃ raghurāū| rāma janani haṭha karabi ki kāū
मोहि अनुचर कर केतिक बाता। तेहि महँ कुसमउ बाम बिधाता
mohi anucara kara ketika bātā| tehi maha~ kusamau bāma bidhātā
जौं हठ करउँ त निपट कुकरमू। हरगिरि तें गुरु सेवक धरमू
jauṃ haṭha karau~ ta nipaṭa kukaramū| haragiri teṃ guru sevaka dharamū
एकउ जुगुति न मन ठहरानी। सोचत भरतहि रैनि बिहानी
ekau juguti na mana ṭhaharānī| socata bharatahi raini bihānī
प्रात नहाइ प्रभुहि सिर नाई। बैठत पठए रिषयँ बोलाई
prāta nahāi prabhuhi sira nāī| baiṭhata paṭhae riṣaya~ bolāī
गुर पद कमल प्रनामु करि बैठे आयसु पाइ । बिप्र महाजन सचिव सब जुरे सभासद आइ ॥ २५३ ॥
gura pada kamala pranāmu kari baiṭhe āyasu pāi | bipra mahājana saciva saba jure sabhāsada āi || 253 ||
बोले मुनिबरु समय समाना। सुनहु सभासद भरत सुजाना
bole munibaru samaya samānā| sunahu sabhāsada bharata sujānā
धरम धुरीन भानुकुल भानू। राजा रामु स्वबस भगवानू
dharama dhurīna bhānukula bhānū| rājā rāmu svabasa bhagavānū
सत्यसंध पालक श्रुति सेतू। राम जनमु जग मंगल हेतू
satyasaṃdha pālaka śruti setū| rāma janamu jaga maṃgala hetū
गुर पितु मातु बचन अनुसारी। खल दलु दलन देव हितकारी
gura pitu mātu bacana anusārī| khala dalu dalana deva hitakārī
नीति प्रीति परमारथ स्वारथु। कोउ न राम सम जान जथारथु
nīti prīti paramāratha svārathu| kou na rāma sama jāna jathārathu
बिधि हरि हरु ससि रबि दिसिपाला। माया जीव करम कुलि काला
bidhi hari haru sasi rabi disipālā| māyā jīva karama kuli kālā
अहिप महिप जहँ लगि प्रभुताई। जोग सिद्धि निगमागम गाई
ahipa mahipa jaha~ lagi prabhutāī| joga siddhi nigamāgama gāī
करि बिचार जिंयँ देखहु नीकें। राम रजाइ सीस सबही कें
kari bicāra jiṃya~ dekhahu nīkeṃ| rāma rajāi sīsa sabahī keṃ
राखें राम रजाइ रुख हम सब कर हित होइ । समुझि सयाने करहु अब सब मिलि संमत सोइ ॥ २५४ ॥
rākheṃ rāma rajāi rukha hama saba kara hita hoi | samujhi sayāne karahu aba saba mili saṃmata soi || 254 ||
सब कहुँ सुखद राम अभिषेकू। मंगल मोद मूल मग एकू
saba kahu~ sukhada rāma abhiṣekū| maṃgala moda mūla maga ekū
केहि बिधि अवध चलहिं रघुराऊ। कहहु समुझि सोइ करिअ उपाऊ
kehi bidhi avadha calahiṃ raghurāū| kahahu samujhi soi karia upāū
सब सादर सुनि मुनिबर बानी। नय परमारथ स्वारथ सानी
saba sādara suni munibara bānī| naya paramāratha svāratha sānī
उतरु न आव लोग भए भोरे। तब सिरु नाइ भरत कर जोरे
utaru na āva loga bhae bhore| taba siru nāi bharata kara jore
भानुबंस भए भूप घनेरे। अधिक एक तें एक बड़ेरे
bhānubaṃsa bhae bhūpa ghanere| adhika eka teṃ eka bar̤ere
जनमु हेतु सब कहँ पितु माता। करम सुभासुभ देइ बिधाता
janamu hetu saba kaha~ pitu mātā| karama subhāsubha dei bidhātā
दलि दुख सजइ सकल कल्याना। अस असीस राउरि जगु जाना
dali dukha sajai sakala kalyānā| asa asīsa rāuri jagu jānā
सो गोसाइँ बिधि गति जेहिं छेंकी। सकइ को टारि टेक जो टेकी
so gosāi~ bidhi gati jehiṃ cheṃkī| sakai ko ṭāri ṭeka jo ṭekī
बूझिअ मोहि उपाउ अब सो सब मोर अभागु । सुनि सनेहमय बचन गुर उर उमगा अनुरागु ॥ २५५ ॥
būjhia mohi upāu aba so saba mora abhāgu | suni sanehamaya bacana gura ura umagā anurāgu || 255 ||
तात बात फुरि राम कृपाहीं। राम बिमुख सिधि सपनेहुँ नाहीं
tāta bāta phuri rāma kṛpāhīṃ| rāma bimukha sidhi sapanehu~ nāhīṃ
सकुचउँ तात कहत एक बाता। अरध तजहिं बुध सरबस जाता
sakucau~ tāta kahata eka bātā| aradha tajahiṃ budha sarabasa jātā
तुम्ह कानन गवनहु दोउ भाई। फेरिअहिं लखन सीय रघुराई
tumha kānana gavanahu dou bhāī| pheriahiṃ lakhana sīya raghurāī
सुनि सुबचन हरषे दोउ भ्राता। भे प्रमोद परिपूरन गाता
suni subacana haraṣe dou bhrātā| bhe pramoda paripūrana gātā
मन प्रसन्न तन तेजु बिराजा। जनु जिय राउ रामु भए राजा
mana prasanna tana teju birājā| janu jiya rāu rāmu bhae rājā
बहुत लाभ लोगन्ह लघु हानी। सम दुख सुख सब रोवहिं रानी
bahuta lābha loganha laghu hānī| sama dukha sukha saba rovahiṃ rānī
कहहिं भरतु मुनि कहा सो कीन्हे। फलु जग जीवन्ह अभिमत दीन्हे
kahahiṃ bharatu muni kahā so kīnhe| phalu jaga jīvanha abhimata dīnhe
कानन करउँ जनम भरि बासू। एहिं तें अधिक न मोर सुपासू
kānana karau~ janama bhari bāsū| ehiṃ teṃ adhika na mora supāsū
अँतरजामी रामु सिय तुम्ह सरबग्य सुजान । जो फुर कहहु त नाथ निज कीजिअ बचनु प्रवान ॥ २५६ ॥
a~tarajāmī rāmu siya tumha sarabagya sujāna | jo phura kahahu ta nātha nija kījia bacanu pravāna || 256 ||
भरत बचन सुनि देखि सनेहू। सभा सहित मुनि भए बिदेहू
bharata bacana suni dekhi sanehū| sabhā sahita muni bhae bidehū
भरत महा महिमा जलरासी। मुनि मति ठाढ़ि तीर अबला सी
bharata mahā mahimā jalarāsī| muni mati ṭhār̤hi tīra abalā sī
गा चह पार जतनु हियँ हेरा। पावति नाव न बोहितु बेरा
gā caha pāra jatanu hiya~ herā| pāvati nāva na bohitu berā
औरु करिहि को भरत बड़ाई। सरसी सीपि कि सिंधु समाई
auru karihi ko bharata bar̤āī| sarasī sīpi ki siṃdhu samāī
भरतु मुनिहि मन भीतर भाए। सहित समाज राम पहिं आए
bharatu munihi mana bhītara bhāe| sahita samāja rāma pahiṃ āe
प्रभु प्रनामु करि दीन्ह सुआसनु। बैठे सब सुनि मुनि अनुसासनु
prabhu pranāmu kari dīnha suāsanu| baiṭhe saba suni muni anusāsanu
बोले मुनिबरु बचन बिचारी। देस काल अवसर अनुहारी
bole munibaru bacana bicārī| desa kāla avasara anuhārī
सुनहु राम सरबग्य सुजाना। धरम नीति गुन ग्यान निधाना
sunahu rāma sarabagya sujānā| dharama nīti guna gyāna nidhānā
सब के उर अंतर बसहु जानहु भाउ कुभाउ । पुरजन जननी भरत हित होइ सो कहिअ उपाउ ॥ २५७ ॥
saba ke ura aṃtara basahu jānahu bhāu kubhāu | purajana jananī bharata hita hoi so kahia upāu || 257 ||
आरत कहहिं बिचारि न काऊ। सूझ जूआरिहि आपन दाऊ
ārata kahahiṃ bicāri na kāū| sūjha jūārihi āpana dāū
सुनि मुनि बचन कहत रघुराऊ। नाथ तुम्हारेहि हाथ उपाऊ
suni muni bacana kahata raghurāū| nātha tumhārehi hātha upāū
सब कर हित रुख राउरि राखें। आयसु किएँ मुदित फुर भाषें
saba kara hita rukha rāuri rākheṃ| āyasu kie~ mudita phura bhāṣeṃ
प्रथम जो आयसु मो कहुँ होई। माथें मानि करौ सिख सोई
prathama jo āyasu mo kahu~ hoī| mātheṃ māni karau sikha soī
पुनि जेहि कहँ जस कहब गोसाईं। सो सब भाँति घटिहि सेवकाईं
puni jehi kaha~ jasa kahaba gosāīṃ| so saba bhā~ti ghaṭihi sevakāīṃ
कह मुनि राम सत्य तुम्ह भाषा। भरत सनेहँ बिचारु न राखा
kaha muni rāma satya tumha bhāṣā| bharata saneha~ bicāru na rākhā
तेहि तें कहउँ बहोरि बहोरी। भरत भगति बस भइ मति मोरी
tehi teṃ kahau~ bahori bahorī| bharata bhagati basa bhai mati morī
मोरें जान भरत रुचि राखि। जो कीजिअ सो सुभ सिव साखी
moreṃ jāna bharata ruci rākhi| jo kījia so subha siva sākhī
भरत बिनय सादर सुनिअ करिअ बिचारु बहोरि । करब साधुमत लोकमत नृपनय निगम निचोरि ॥ २५८ ॥
bharata binaya sādara sunia karia bicāru bahori | karaba sādhumata lokamata nṛpanaya nigama nicori || 258 ||
गुरु अनुराग भरत पर देखी। राम ह्दयँ आनंदु बिसेषी
guru anurāga bharata para dekhī| rāma hdaya~ ānaṃdu biseṣī
भरतहि धरम धुरंधर जानी। निज सेवक तन मानस बानी
bharatahi dharama dhuraṃdhara jānī| nija sevaka tana mānasa bānī
बोले गुर आयस अनुकूला। बचन मंजु मृदु मंगलमूला
bole gura āyasa anukūlā| bacana maṃju mṛdu maṃgalamūlā
नाथ सपथ पितु चरन दोहाई। भयउ न भुअन भरत सम भाई
nātha sapatha pitu carana dohāī| bhayau na bhuana bharata sama bhāī
जे गुर पद अंबुज अनुरागी। ते लोकहुँ बेदहुँ बड़भागी
je gura pada aṃbuja anurāgī| te lokahu~ bedahu~ bar̤abhāgī
राउर जा पर अस अनुरागू। को कहि सकइ भरत कर भागू
rāura jā para asa anurāgū| ko kahi sakai bharata kara bhāgū
लखि लघु बंधु बुद्धि सकुचाई। करत बदन पर भरत बड़ाई
lakhi laghu baṃdhu buddhi sakucāī| karata badana para bharata bar̤āī
भरतु कहहीं सोइ किएँ भलाई। अस कहि राम रहे अरगाई
bharatu kahahīṃ soi kie~ bhalāī| asa kahi rāma rahe aragāī
तब मुनि बोले भरत सन सब सँकोचु तजि तात । कृपासिंधु प्रिय बंधु सन कहहु हृदय कै बात ॥ २५९ ॥
taba muni bole bharata sana saba sa~kocu taji tāta | kṛpāsiṃdhu priya baṃdhu sana kahahu hṛdaya kai bāta || 259 ||
सुनि मुनि बचन राम रुख पाई। गुरु साहिब अनुकूल अघाई
suni muni bacana rāma rukha pāī| guru sāhiba anukūla aghāī
लखि अपने सिर सबु छरु भारू। कहि न सकहिं कछु करहिं बिचारू
lakhi apane sira sabu charu bhārū| kahi na sakahiṃ kachu karahiṃ bicārū
पुलकि सरीर सभाँ भए ठाढें। नीरज नयन नेह जल बाढ़ें
pulaki sarīra sabhā~ bhae ṭhāḍheṃ| nīraja nayana neha jala bār̤heṃ
कहब मोर मुनिनाथ निबाहा। एहि तें अधिक कहौं मैं काहा
kahaba mora muninātha nibāhā| ehi teṃ adhika kahauṃ maiṃ kāhā
मैं जानउँ निज नाथ सुभाऊ। अपराधिहु पर कोह न काऊ
maiṃ jānau~ nija nātha subhāū| aparādhihu para koha na kāū
मो पर कृपा सनेह बिसेषी। खेलत खुनिस न कबहूँ देखी
mo para kṛpā saneha biseṣī| khelata khunisa na kabahū~ dekhī
सिसुपन तेम परिहरेउँ न संगू। कबहुँ न कीन्ह मोर मन भंगू
sisupana tema parihareu~ na saṃgū| kabahu~ na kīnha mora mana bhaṃgū
मैं प्रभु कृपा रीति जियँ जोही। हारेहुँ खेल जितावहिं मोही
maiṃ prabhu kṛpā rīti jiya~ johī| hārehu~ khela jitāvahiṃ mohī
महूँ सनेह सकोच बस सनमुख कही न बैन । दरसन तृपित न आजु लगि पेम पिआसे नैन ॥ २६० ॥
mahū~ saneha sakoca basa sanamukha kahī na baina | darasana tṛpita na āju lagi pema piāse naina || 260 ||
बिधि न सकेउ सहि मोर दुलारा। नीच बीचु जननी मिस पारा
bidhi na sakeu sahi mora dulārā| nīca bīcu jananī misa pārā
यहउ कहत मोहि आजु न सोभा। अपनीं समुझि साधु सुचि को भा
yahau kahata mohi āju na sobhā| apanīṃ samujhi sādhu suci ko bhā
मातु मंदि मैं साधु सुचाली। उर अस आनत कोटि कुचाली
mātu maṃdi maiṃ sādhu sucālī| ura asa ānata koṭi kucālī
फरइ कि कोदव बालि सुसाली। मुकुता प्रसव कि संबुक काली
pharai ki kodava bāli susālī| mukutā prasava ki saṃbuka kālī
सपनेहुँ दोसक लेसु न काहू। मोर अभाग उदधि अवगाहू
sapanehu~ dosaka lesu na kāhū| mora abhāga udadhi avagāhū
बिनु समुझें निज अघ परिपाकू। जारिउँ जायँ जननि कहि काकू
binu samujheṃ nija agha paripākū| jāriu~ jāya~ janani kahi kākū
हृदयँ हेरि हारेउँ सब ओरा। एकहि भाँति भलेहिं भल मोरा
hṛdaya~ heri hāreu~ saba orā| ekahi bhā~ti bhalehiṃ bhala morā
गुर गोसाइँ साहिब सिय रामू। लागत मोहि नीक परिनामू
gura gosāi~ sāhiba siya rāmū| lāgata mohi nīka parināmū
साधु सभा गुर प्रभु निकट कहउँ सुथल सति भाउ । प्रेम प्रपंचु कि झूठ फुर जानहिं मुनि रघुराउ ॥ २६१ ॥
sādhu sabhā gura prabhu nikaṭa kahau~ suthala sati bhāu | prema prapaṃcu ki jhūṭha phura jānahiṃ muni raghurāu || 261 ||
भूपति मरन पेम पनु राखी। जननी कुमति जगतु सबु साखी
bhūpati marana pema panu rākhī| jananī kumati jagatu sabu sākhī
देखि न जाहि बिकल महतारी। जरहिं दुसह जर पुर नर नारी
dekhi na jāhi bikala mahatārī| jarahiṃ dusaha jara pura nara nārī
Keys: ← → turn the page, J K step through the verses.
Illustration: Verse & Place (Project-owned).